| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
9. ආනන්‌දඅච්‌ඡරියසුත්‌තවණ්‌ණනා
9. Ānandaacchariyasuttavaṇṇanā
129. නවමෙ භික්‌ඛුපරිසා ආනන්‌දං දස්‌සනායාති යෙ භගවන්‌තං පස්‌සිතුකාමා ථෙරං උපසඞ්‌කමන්‌ති, යෙ වා ‘‘ආයස්‌මා කිරානන්‌දො සමන්‌තපාසාදිකො අභිරූපො දස්‌සනීයො බහුස්‌සුතො සඞ්‌ඝසොභනො’’ති ථෙරස්‌ස ගුණෙ සුත්‌වා ආගච්‌ඡන්‌ති, තෙ සන්‌ධාය ‘‘භික්‌ඛුපරිසා ආනන්‌දං දස්‌සනාය උපසඞ්‌කමතී’’ති වුත්‌තං. එස නයො සබ්‌බත්‌ථ. අත්‌තමනාති ‘‘සවනෙන නො දස්‌සනං සමෙතී’’ති සකමනා තුට්‌ඨචිත්‌තා. ධම්‌මන්‌ති ‘‘කච්‌චි, ආවුසො, ඛමනීයං, කච්‌චි යාපනීයං, කච්‌චි යොනිසොමනසිකාරකම්‌මං කරොථ, ආචරියුපජ්‌ඣායවත්‌තං පූරෙථා’’ති එවරූපං පටිසන්‌ථාරධම්‌මං. තත්‌ථ භික්‌ඛුනීසු ‘‘කච්‌චි, භගිනියො, අට්‌ඨ ගරුධම්‌මෙ සමාදාය වත්‌තථා’’ති ඉදම්‌පි නානාකරණං හොති. උපාසකෙසු ‘‘ස්‌වාගතං, උපාසක, න තෙ කිඤ්‌චි සීසං වා අඞ්‌ගං වා රුජ්‌ජති, අරොගා තෙ පුත්‌තභාතරො’’ති න එවං පටිසන්‌ථාරං කරොති, එවං පන කරොති – ‘‘කථං, උපාසකා, තීණි සරණානි පඤ්‌ච සීලානි රක්‌ඛථ, මාසස්‌ස අට්‌ඨ උපොසථෙ කරොථ, මාතාපිතූනං උපට්‌ඨානවත්‌තං පූරෙථ, ධම්‌මිකසමණබ්‍රාහ්‌මණෙ පටිජග්‌ගථා’’ති. උපාසිකාසුපි එසෙව නයො.
129. Navame bhikkhuparisā ānandaṃ dassanāyāti ye bhagavantaṃ passitukāmā theraṃ upasaṅkamanti, ye vā ‘‘āyasmā kirānando samantapāsādiko abhirūpo dassanīyo bahussuto saṅghasobhano’’ti therassa guṇe sutvā āgacchanti, te sandhāya ‘‘bhikkhuparisā ānandaṃ dassanāya upasaṅkamatī’’ti vuttaṃ. Esa nayo sabbattha. Attamanāti ‘‘savanena no dassanaṃ sametī’’ti sakamanā tuṭṭhacittā. Dhammanti ‘‘kacci, āvuso, khamanīyaṃ, kacci yāpanīyaṃ, kacci yonisomanasikārakammaṃ karotha, ācariyupajjhāyavattaṃ pūrethā’’ti evarūpaṃ paṭisanthāradhammaṃ. Tattha bhikkhunīsu ‘‘kacci, bhaginiyo, aṭṭha garudhamme samādāya vattathā’’ti idampi nānākaraṇaṃ hoti. Upāsakesu ‘‘svāgataṃ, upāsaka, na te kiñci sīsaṃ vā aṅgaṃ vā rujjati, arogā te puttabhātaro’’ti na evaṃ paṭisanthāraṃ karoti, evaṃ pana karoti – ‘‘kathaṃ, upāsakā, tīṇi saraṇāni pañca sīlāni rakkhatha, māsassa aṭṭha uposathe karotha, mātāpitūnaṃ upaṭṭhānavattaṃ pūretha, dhammikasamaṇabrāhmaṇe paṭijaggathā’’ti. Upāsikāsupi eseva nayo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 9. ආනන්‌දඅච්‌ඡරියසුත්‌තං • 9. Ānandaacchariyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9-10. ආනන්‌දඅච්‌ඡරියසුත්‌තාදිවණ්‌ණනා • 9-10. Ānandaacchariyasuttādivaṇṇanā
