| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫-৬. আনন্দসুত্তাদিৰণ্ণনা
5-6. Ānandasuttādivaṇṇanā
৩৭-৩৮. পঞ্চমে ঠিতস্স অঞ্ঞথত্তং পঞ্ঞাযতীতি ধরমানস্স জীৰমানস্স জরা পঞ্ঞাযতি। ঠিতীতি হি জীৰিতিন্দ্রিযসঙ্খাতায অনুপালনায নামং। অঞ্ঞথত্তন্তি জরায। তেনাহু পোরাণা –
37-38. Pañcame ṭhitassa aññathattaṃ paññāyatīti dharamānassa jīvamānassa jarā paññāyati. Ṭhitīti hi jīvitindriyasaṅkhātāya anupālanāya nāmaṃ. Aññathattanti jarāya. Tenāhu porāṇā –
‘‘উপ্পাদো জাতি অক্খাতো, ভঙ্গো ৰুত্তো ৰযোতি চ।
‘‘Uppādo jāti akkhāto, bhaṅgo vutto vayoti ca;
অঞ্ঞথত্তং জরা ৰুত্তা, ঠিতী চ অনুপালনা’’তি॥
Aññathattaṃ jarā vuttā, ṭhitī ca anupālanā’’ti.
এৰং একেকস্স খন্ধস্স উপ্পাদজরাভঙ্গসঙ্খাতানি তীণি লক্খণানি হোন্তি যানি সন্ধায ৰুত্তং ‘‘তীণিমানি, ভিক্খৰে, সঙ্খতস্স সঙ্খতলক্খণানী’’তি (অ॰ নি॰ ৩.৪৭)।
Evaṃ ekekassa khandhassa uppādajarābhaṅgasaṅkhātāni tīṇi lakkhaṇāni honti yāni sandhāya vuttaṃ ‘‘tīṇimāni, bhikkhave, saṅkhatassa saṅkhatalakkhaṇānī’’ti (a. ni. 3.47).
তত্থ সঙ্খতং নাম পচ্চযনিব্বত্তো যো কোচি সঙ্খারো। সঙ্খারো চ ন লক্খণং, লক্খণং ন সঙ্খারো, ন চ সঙ্খারেন ৰিনা লক্খণং পঞ্ঞাপেতুং সক্কা, নাপি লক্খণং ৰিনা সঙ্খারো, লক্খণেন পন সঙ্খারো পাকটো হোতি। যথা হি ন চ গাৰীযেৰ লক্খণং, লক্খণমেৰ ন গাৰী, নাপি গাৰিং মুঞ্চিত্ৰা লক্খণং পঞ্ঞাপেতুং সক্কা, নাপি লক্খণং মুঞ্চিত্ৰা গাৰিং, লক্খণেন পন গাৰী পাকটা হোতি, এৰংসম্পদমিদং ৰেদিতব্বং।
Tattha saṅkhataṃ nāma paccayanibbatto yo koci saṅkhāro. Saṅkhāro ca na lakkhaṇaṃ, lakkhaṇaṃ na saṅkhāro, na ca saṅkhārena vinā lakkhaṇaṃ paññāpetuṃ sakkā, nāpi lakkhaṇaṃ vinā saṅkhāro, lakkhaṇena pana saṅkhāro pākaṭo hoti. Yathā hi na ca gāvīyeva lakkhaṇaṃ, lakkhaṇameva na gāvī, nāpi gāviṃ muñcitvā lakkhaṇaṃ paññāpetuṃ sakkā, nāpi lakkhaṇaṃ muñcitvā gāviṃ, lakkhaṇena pana gāvī pākaṭā hoti, evaṃsampadamidaṃ veditabbaṃ.
তত্থ সঙ্খারানং উপ্পাদক্খণে সঙ্খারোপি উপ্পাদলক্খণম্পি কালসঙ্খাতো তস্স খণোপি পঞ্ঞাযতি। ‘‘উপ্পাদোপী’’তি ৰুত্তে সঙ্খারোপি জরালক্খণম্পি কালসঙ্খাতো তস্স খণোপি পঞ্ঞাযতি। ভঙ্গক্খণে সঙ্খারোপি তংলক্খণম্পি কালসঙ্খাতো তস্স খণোপি পঞ্ঞাযতি। অপরে পন ৰদন্তি ‘‘অরূপধম্মানং জরাখণো নাম ন সক্কা পঞ্ঞাপেতুং, সম্মাসম্বুদ্ধো চ ‘ৰেদনায উপ্পাদো পঞ্ঞাযতি, ৰযো পঞ্ঞাযতি, ঠিতায অঞ্ঞথত্তং পঞ্ঞাযতী’তি ৰদন্তো অরূপধম্মানম্পি তীণি লক্খণানি পঞ্ঞাপেতি, তানি অত্থিক্খণং উপাদায লব্ভন্তী’’তি ৰত্ৰা –
Tattha saṅkhārānaṃ uppādakkhaṇe saṅkhāropi uppādalakkhaṇampi kālasaṅkhāto tassa khaṇopi paññāyati. ‘‘Uppādopī’’ti vutte saṅkhāropi jarālakkhaṇampi kālasaṅkhāto tassa khaṇopi paññāyati. Bhaṅgakkhaṇe saṅkhāropi taṃlakkhaṇampi kālasaṅkhāto tassa khaṇopi paññāyati. Apare pana vadanti ‘‘arūpadhammānaṃ jarākhaṇo nāma na sakkā paññāpetuṃ, sammāsambuddho ca ‘vedanāya uppādo paññāyati, vayo paññāyati, ṭhitāya aññathattaṃ paññāyatī’ti vadanto arūpadhammānampi tīṇi lakkhaṇāni paññāpeti, tāni atthikkhaṇaṃ upādāya labbhantī’’ti vatvā –
‘‘অত্থিতা সব্বধম্মানং, ঠিতি নাম পৰুচ্চতি।
‘‘Atthitā sabbadhammānaṃ, ṭhiti nāma pavuccati;
তস্সেৰ ভেদো মরণং, সব্বদা সব্বপাণিন’’ন্তি॥ –
Tasseva bhedo maraṇaṃ, sabbadā sabbapāṇina’’nti. –
ইমায আচরিযগাথায তমত্থং সাধেন্তি। অথ ৰা সন্ততিৰসেন ঠানং ঠিতীতি ৰেদিতব্বন্তি চ ৰদন্তি। যস্মা পন সুত্তে অযং ৰিসেসো নত্থি, তস্মা আচরিযমতিযা সুত্তং অপটিবাহেত্ৰা সুত্তমেৰ পমাণং কত্তব্বং। ছট্ঠং উত্তানমেৰ। পঞ্চমছট্ঠানি।
Imāya ācariyagāthāya tamatthaṃ sādhenti. Atha vā santativasena ṭhānaṃ ṭhitīti veditabbanti ca vadanti. Yasmā pana sutte ayaṃ viseso natthi, tasmā ācariyamatiyā suttaṃ apaṭibāhetvā suttameva pamāṇaṃ kattabbaṃ. Chaṭṭhaṃ uttānameva. Pañcamachaṭṭhāni.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৫. আনন্দসুত্তং • 5. Ānandasuttaṃ
৬. দুতিযআনন্দসুত্তং • 6. Dutiyaānandasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫-৬. আনন্দসুত্তাদিৰণ্ণনা • 5-6. Ānandasuttādivaṇṇanā
