| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
5-6. аананд̣̇асуд̇д̇аад̣̇иван̣н̣анаа
5-6. Ānandasuttādivaṇṇanā
37-38. тид̇ияаа тид̇игкан̣зна сахид̇ам̣ тид̇ам̣. тид̇асса ан̃н̃ат̇ад̇д̇анд̇и уббаад̣̇агкан̣ад̇о ан̃н̃ат̇аабхааво. бан̃н̃ааяад̇ийд̇и убалаб̣бхад̇и. бажжаяавасзна д̇харамаанад̇д̇аа зва ж̇ийвамаанасса ж̇ийвид̇инд̣̇рияавасзна ж̇араа бан̃н̃ааяад̇и уббаад̣̇агкан̣ад̇о ан̃н̃ат̇ад̇д̇аббад̇д̇ияаа. вуд̇д̇амзва ад̇т̇ам̣ баагадад̇арам̣ гаад̇ум̣ ‘‘тид̇ий’’д̇иаад̣̇и вуд̇д̇ам̣. ж̇ийви…бз… наамам̣. д̇ат̇аа хи абхид̇хаммз (д̇ха. са. 19) ‘‘ааяу тид̇ий’’д̇и нид̣̇д̣̇идтам̣. ан̃н̃ат̇ад̇д̇анд̇и ж̇арааяа нааманд̇и самб̣анд̇хо.
37-38. Ṭhitiyā ṭhitikkhaṇena sahitaṃ ṭhitaṃ. Ṭhitassa aññathattanti uppādakkhaṇato aññathābhāvo. Paññāyatīti upalabbhati. Paccayavasena dharamānattā eva jīvamānassa jīvitindriyavasena jarā paññāyati uppādakkhaṇato aññathattappattiyā. Vuttameva atthaṃ pākaṭataraṃ kātuṃ ‘‘ṭhitī’’tiādi vuttaṃ. Jīvi…pe… nāmaṃ. Tathā hi abhidhamme (dha. sa. 19) ‘‘āyu ṭhitī’’ti niddiṭṭhaṃ. Aññathattanti jarāya nāmanti sambandho.
д̇ийн̣и лагкан̣аани хонд̇и сан̇кад̇асабхаавалагкан̣ад̇о. яо гожи руубад̇хаммо ваа аруубад̇хаммо ваа логияо ваа логуд̇д̇аро ваа сан̇кааро. сан̇кааро, на лагкан̣ам̣ уббаад̣̇аад̣̇исабхаавад̇д̇аа. лагкан̣ам̣, на сан̇кааро уббаад̣̇аад̣̇ирахид̇ад̇д̇аа. на жа…бз… саггаа сан̇каарад̇хаммад̇д̇аа лагкан̣асса. нааби лагкан̣ам̣ винаа сан̇кааро бан̃н̃аабзд̇ум̣ саггаа сан̇каарабхаавзна. д̇знааха ‘‘лагкан̣знаа’’д̇иаад̣̇и. ид̣̇аани яат̇аавуд̇д̇амад̇т̇ам̣ убамааяа вибхаавзд̇ум̣ ‘‘яат̇аа’’д̇иаад̣̇имааха. д̇ад̇т̇а лагкан̣анд̇и гаал̣арад̇д̇асаб̣алаад̣̇ибхаавалагкан̣ам̣ баагадам̣ ход̇и ‘‘аяам̣ асугасса г̇аавий’’д̇и.
Tīṇi lakkhaṇāni honti saṅkhatasabhāvalakkhaṇato. Yo koci rūpadhammo vā arūpadhammo vā lokiyo vā lokuttaro vā saṅkhāro. Saṅkhāro, na lakkhaṇaṃ uppādādisabhāvattā. Lakkhaṇaṃ, na saṅkhāro uppādādirahitattā. Na ca…pe… sakkā saṅkhāradhammattā lakkhaṇassa. Nāpi lakkhaṇaṃ vinā saṅkhāro paññāpetuṃ sakkā saṅkhārabhāvena. Tenāha ‘‘lakkhaṇenā’’tiādi. Idāni yathāvuttamatthaṃ upamāya vibhāvetuṃ ‘‘yathā’’tiādimāha. Tattha lakkhaṇanti kāḷarattasabalādibhāvalakkhaṇaṃ pākaṭaṃ hoti ‘‘ayaṃ asukassa gāvī’’ti.
звам̣ сан̇каароби бан̃н̃ааяад̇и сабхаавад̇о убад̇хаарзнд̇асса уббаад̣̇алагкан̣амби уббаад̣̇аавад̇т̇аад̇и гад̇ваа. гааласан̇каад̇од̇и уббаж̇ж̇амаанагааласан̇каад̇о. д̇асса сан̇каарасса. кан̣обийд̇и уббаад̣̇агкан̣оби бан̃н̃ааяад̇и. уббаад̣̇обийд̇и уббаад̣̇алагкан̣оби. ж̇араалагкан̣анд̇и уббаннаж̇ийран̣алагкан̣ам̣, д̇ам̣ ‘‘тид̇асса ан̃н̃ат̇ад̇д̇а’’нд̇и вуд̇д̇ам̣. ‘‘бхан̇г̇агкан̣з сан̇каароби д̇ам̣лагкан̣амби гааласан̇каад̇о д̇асса кан̣оби бан̃н̃ааяад̇ий’’д̇и баато. гзжи бана ‘‘ж̇араабий’’д̇и бад̣̇амбзд̇т̇а багкибанд̇и. зван̃жа вад̣̇анд̇и ‘‘на хи д̇асмим̣ кан̣з д̇арун̣о худ̇ваа сан̇кааро бхиж̇ж̇ад̇и, ат̇а ко ж̇ияяамаано махаллаго вияа ж̇ин̣н̣о зва худ̇ваа бхиж̇ж̇ад̇ий’’д̇и, бхан̇г̇знзва бана ж̇араа абхибхуяяад̇и кан̣асса ад̇иид̇д̇арабхаавад̇о на саггаа бан̃н̃аабзд̇ум̣ тид̇ияаад̇и д̇зсам̣ ад̇хиббааяо. д̇аанийд̇и аруубад̇хаммаанам̣ д̇ийн̣и лагкан̣аани. ад̇т̇игкан̣анд̇и аруубад̇хаммавиж̇ж̇амаанагкан̣ам̣, уббаад̣̇агкан̣анд̇и ад̇хиббааяо. саб̣б̣ад̇хаммаананд̇и саб̣б̣зсам̣ руубааруубад̇хаммаанам̣ тид̇ияаа на бхавид̇аб̣б̣ам̣. д̇ассзваад̇и д̇ассаа зва тид̇ияаа. д̇амад̇т̇анд̇и ж̇араалагкан̣асса бан̃н̃аабзд̇ум̣ асаггун̣зяяабхаавам̣. ан̃н̃з бана ‘‘санд̇ад̇ивасзна таанам̣ тид̇ий’’д̇и вад̣̇анд̇и, д̇аяид̣̇ам̣ агааран̣ам̣ адтаанам̣. яасмаа суд̇д̇з ‘‘тид̇асса ан̃н̃ат̇ад̇д̇ам̣ бан̃н̃ааяад̇ий’’д̇и уббаад̣̇аваязхи ниб̣б̣исзсзна тид̇ияаа ж̇од̇ид̇ад̇д̇аа. яам̣ банзд̇т̇а вад̇д̇аб̣б̣ам̣, д̇ам̣ хздтаа вуд̇д̇амзва. абижа яат̇аа д̇хаммасса уббаад̣̇аавад̇т̇ааяа бхиннаа бхан̇г̇аавад̇т̇аа ижчид̇аа, ан̃н̃ат̇аа уббаж̇ж̇амаанамзва бхиж̇ж̇ад̇ийд̇и аабаж̇ж̇ад̇и, звам̣ бхан̇г̇аавад̇т̇ааяаби бхиннаа бхан̇г̇аабхимукаавад̇т̇аа ижчид̇аб̣б̣аа. на хи абхан̇г̇аабхимуко бхиж̇ж̇ад̇и. на жзд̇т̇а саггаа уббаад̣̇аабхимукаавад̇т̇ам̣ баригаббзд̇ум̣ д̇ад̣̇аа д̇асса алад̣̇д̇хад̇д̇алаабхад̇д̇аа. аяам̣ висзсод̇и тид̇игкан̣о наама руубад̇хаммаанам̣язва, на аруубад̇хаммаананд̇и аяам̣ ийд̣̇исо висзсо. аажарияамад̇и наама д̇ассзва аажарияасса мад̇и, саа саб̣б̣ад̣̇уб̣б̣алаад̇и ааха ‘‘д̇асмаа’’д̇иаад̣̇и.
Evaṃ saṅkhāropi paññāyati sabhāvato upadhārentassa uppādalakkhaṇampi uppādāvatthāti katvā. Kālasaṅkhātoti uppajjamānakālasaṅkhāto. Tassa saṅkhārassa. Khaṇopīti uppādakkhaṇopi paññāyati. Uppādopīti uppādalakkhaṇopi. Jarālakkhaṇanti uppannajīraṇalakkhaṇaṃ, taṃ ‘‘ṭhitassa aññathatta’’nti vuttaṃ. ‘‘Bhaṅgakkhaṇe saṅkhāropi taṃlakkhaṇampi kālasaṅkhāto tassa khaṇopi paññāyatī’’ti pāṭho. Keci pana ‘‘jarāpī’’ti padampettha pakkhipanti. Evañca vadanti ‘‘na hi tasmiṃ khaṇe taruṇo hutvā saṅkhāro bhijjati, atha kho jiyyamāno mahallako viya jiṇṇo eva hutvā bhijjatī’’ti, bhaṅgeneva pana jarā abhibhuyyati khaṇassa atiittarabhāvato na sakkā paññāpetuṃ ṭhitiyāti tesaṃ adhippāyo. Tānīti arūpadhammānaṃ tīṇi lakkhaṇāni. Atthikkhaṇanti arūpadhammavijjamānakkhaṇaṃ, uppādakkhaṇanti adhippāyo. Sabbadhammānanti sabbesaṃ rūpārūpadhammānaṃ ṭhitiyā na bhavitabbaṃ. Tassevāti tassā eva ṭhitiyā. Tamatthanti jarālakkhaṇassa paññāpetuṃ asakkuṇeyyabhāvaṃ. Aññe pana ‘‘santativasena ṭhānaṃ ṭhitī’’ti vadanti, tayidaṃ akāraṇaṃ aṭṭhānaṃ. Yasmā sutte ‘‘ṭhitassa aññathattaṃ paññāyatī’’ti uppādavayehi nibbisesena ṭhitiyā jotitattā. Yaṃ panettha vattabbaṃ, taṃ heṭṭhā vuttameva. Apica yathā dhammassa uppādāvatthāya bhinnā bhaṅgāvatthā icchitā, aññathā uppajjamānameva bhijjatīti āpajjati, evaṃ bhaṅgāvatthāyapi bhinnā bhaṅgābhimukhāvatthā icchitabbā. Na hi abhaṅgābhimukho bhijjati. Na cettha sakkā uppādābhimukhāvatthaṃ parikappetuṃ tadā tassa aladdhattalābhattā. Ayaṃ visesoti ṭhitikkhaṇo nāma rūpadhammānaṃyeva, na arūpadhammānanti ayaṃ īdiso viseso. Ācariyamati nāma tasseva ācariyassa mati, sā sabbadubbalāti āha ‘‘tasmā’’tiādi.
аананд̣̇асуд̇д̇аад̣̇иван̣н̣анаа нидтид̇аа.
Ānandasuttādivaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya
5. аананд̣̇асуд̇д̇ам̣ • 5. Ānandasuttaṃ
6. д̣̇уд̇ияааананд̣̇асуд̇д̇ам̣ • 6. Dutiyaānandasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 5-6. аананд̣̇асуд̇д̇аад̣̇иван̣н̣анаа • 5-6. Ānandasuttādivaṇṇanā
