| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. தே²ரவக்³கோ³
9. Theravaggo
1. ஆனந்த³ஸுத்தங்
1. Ānandasuttaṃ
83. ஸாவத்தி²னிதா³னங் . தத்ர கோ² ஆயஸ்மா ஆனந்தோ³ பி⁴க்கூ² ஆமந்தேஸி – ‘‘ஆவுஸோ, பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ ஆனந்த³ஸ்ஸ பச்சஸ்ஸோஸுங். ஆயஸ்மா ஆனந்தோ³ ஏதத³வோச –
83. Sāvatthinidānaṃ . Tatra kho āyasmā ānando bhikkhū āmantesi – ‘‘āvuso, bhikkhave’’ti. ‘‘Āvuso’’ti kho te bhikkhū āyasmato ānandassa paccassosuṃ. Āyasmā ānando etadavoca –
‘‘புண்ணோ நாம, ஆவுஸோ, ஆயஸ்மா மந்தாணிபுத்தோ 1 அம்ஹாகங் நவகானங் ஸதங் ப³ஹூபகாரோ ஹோதி. ஸோ அம்ஹே இமினா ஓவாதே³ன ஓவத³தி – ‘உபாதா³ய, ஆவுஸோ ஆனந்த³, அஸ்மீதி ஹோதி, நோ அனுபாதா³ய. கிஞ்ச உபாதா³ய அஸ்மீதி ஹோதி, நோ அனுபாதா³ய? ரூபங் உபாதா³ய அஸ்மீதி ஹோதி, நோ அனுபாதா³ய. வேத³னங்… ஸஞ்ஞங்… ஸங்கா²ரே… விஞ்ஞாணங் உபாதா³ய அஸ்மீதி ஹோதி, நோ அனுபாதா³ய’’’.
‘‘Puṇṇo nāma, āvuso, āyasmā mantāṇiputto 2 amhākaṃ navakānaṃ sataṃ bahūpakāro hoti. So amhe iminā ovādena ovadati – ‘upādāya, āvuso ānanda, asmīti hoti, no anupādāya. Kiñca upādāya asmīti hoti, no anupādāya? Rūpaṃ upādāya asmīti hoti, no anupādāya. Vedanaṃ… saññaṃ… saṅkhāre… viññāṇaṃ upādāya asmīti hoti, no anupādāya’’’.
‘‘ஸெய்யதா²பி, ஆவுஸோ ஆனந்த³, இத்தீ² வா புரிஸோ வா த³ஹரோ யுவா மண்ட³னகஜாதிகோ ஆதா³ஸே வா பரிஸுத்³தே⁴ பரியோதா³தே அச்சே² வா உத³கபத்தே ஸகங் முக²னிமித்தங் பச்சவெக்க²மானோ உபாதா³ய பஸ்ஸெய்ய, நோ அனுபாதா³ய; ஏவமேவ கோ², ஆவுஸோ ஆனந்த³, ரூபங் உபாதா³ய அஸ்மீதி ஹோதி, நோ அனுபாதா³ய. வேத³னங்… ஸஞ்ஞங்… ஸங்கா²ரே… விஞ்ஞாணங் உபாதா³ய அஸ்மீதி ஹோதி, நோ அனுபாதா³ய.
‘‘Seyyathāpi, āvuso ānanda, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udakapatte sakaṃ mukhanimittaṃ paccavekkhamāno upādāya passeyya, no anupādāya; evameva kho, āvuso ānanda, rūpaṃ upādāya asmīti hoti, no anupādāya. Vedanaṃ… saññaṃ… saṅkhāre… viññāṇaṃ upādāya asmīti hoti, no anupādāya.
‘‘தங் கிங் மஞ்ஞஸி, ஆவுஸோ ஆனந்த³, ‘ரூபங் நிச்சங் வா அனிச்சங் வா’’’தி? ‘அனிச்சங், ஆவுஸோ’. வேத³னா… ஸஞ்ஞா … ஸங்கா²ரா… விஞ்ஞாணங் நிச்சங் வா அனிச்சங் வா’தி? ‘அனிச்சங், ஆவுஸோ’. தஸ்மாதிஹ…பே॰… ஏவங் பஸ்ஸங்…பே॰… நாபரங் இத்த²த்தாயாதி பஜானாதீதி. புண்ணோ நாம ஆவுஸோ ஆயஸ்மா மந்தாணிபுத்தோ அம்ஹாகங் நவகானங் ஸதங் ப³ஹூபகாரோ ஹோதி. ஸோ அம்ஹே இமினா ஓவாதே³ன ஓவத³தி. இத³ஞ்ச பன மே ஆயஸ்மதோ புண்ணஸ்ஸ மந்தாணிபுத்தஸ்ஸ த⁴ம்மதே³ஸனங் ஸுத்வா த⁴ம்மோ அபி⁴ஸமிதோதி. பட²மங்.
‘‘Taṃ kiṃ maññasi, āvuso ānanda, ‘rūpaṃ niccaṃ vā aniccaṃ vā’’’ti? ‘Aniccaṃ, āvuso’. Vedanā… saññā … saṅkhārā… viññāṇaṃ niccaṃ vā aniccaṃ vā’ti? ‘Aniccaṃ, āvuso’. Tasmātiha…pe… evaṃ passaṃ…pe… nāparaṃ itthattāyāti pajānātīti. Puṇṇo nāma āvuso āyasmā mantāṇiputto amhākaṃ navakānaṃ sataṃ bahūpakāro hoti. So amhe iminā ovādena ovadati. Idañca pana me āyasmato puṇṇassa mantāṇiputtassa dhammadesanaṃ sutvā dhammo abhisamitoti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஆனந்த³ஸுத்தவண்ணனா • 1. Ānandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஆனந்த³ஸுத்தவண்ணனா • 1. Ānandasuttavaṇṇanā
