| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. ஆனந்த³ஸுத்தங்
10. Ānandasuttaṃ
419. அத² கோ² வச்ச²கொ³த்தோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² வச்ச²கொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘கிங் நு கோ², போ⁴ கோ³தம, அத்த²த்தா’’தி? ஏவங் வுத்தே, ப⁴க³வா துண்ஹீ அஹோஸி. ‘‘கிங் பன, போ⁴ கோ³தம, நத்த²த்தா’’தி? து³தியம்பி கோ² ப⁴க³வா துண்ஹீ அஹோஸி. அத² கோ² வச்ச²கொ³த்தோ பரிப்³பா³ஜகோ உட்டா²யாஸனா பக்காமி.
419. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, atthattā’’ti? Evaṃ vutte, bhagavā tuṇhī ahosi. ‘‘Kiṃ pana, bho gotama, natthattā’’ti? Dutiyampi kho bhagavā tuṇhī ahosi. Atha kho vacchagotto paribbājako uṭṭhāyāsanā pakkāmi.
அத² கோ² ஆயஸ்மா ஆனந்தோ³ அசிரபக்கந்தே வச்ச²கொ³த்தே பரிப்³பா³ஜகே ப⁴க³வந்தங் ஏதத³வோச – ‘‘கிங் நு கோ², ப⁴ந்தே, ப⁴க³வா வச்ச²கொ³த்தஸ்ஸ பரிப்³பா³ஜகஸ்ஸ பஞ்ஹங் புட்டோ² ந ப்³யாகாஸீ’’தி? ‘‘அஹஞ்சானந்த³, வச்ச²கொ³த்தஸ்ஸ பரிப்³பா³ஜகஸ்ஸ ‘அத்த²த்தா’தி புட்டோ² ஸமானோ ‘அத்த²த்தா’தி ப்³யாகரெய்யங், யே தே, ஆனந்த³, ஸமணப்³ராஹ்மணா ஸஸ்ஸதவாதா³ தேஸமேதங் ஸத்³தி⁴ங் 1 அப⁴விஸ்ஸ. அஹஞ்சானந்த³, வச்ச²கொ³த்தஸ்ஸ பரிப்³பா³ஜகஸ்ஸ ‘நத்த²த்தா’தி புட்டோ² ஸமானோ ‘நத்த²த்தா’தி ப்³யாகரெய்யங், யே தே, ஆனந்த³, ஸமணப்³ராஹ்மணா உச்சே²த³வாதா³ தேஸமேதங் ஸத்³தி⁴ங் அப⁴விஸ்ஸ. அஹஞ்சானந்த³, வச்ச²கொ³த்தஸ்ஸ பரிப்³பா³ஜகஸ்ஸ ‘அத்த²த்தா’தி புட்டோ² ஸமானோ ‘அத்த²த்தா’தி ப்³யாகரெய்யங், அபி நு மே தங், ஆனந்த³, அனுலோமங் அப⁴விஸ்ஸ ஞாணஸ்ஸ உப்பாதா³ய – ‘ஸப்³பே³ த⁴ம்மா அனத்தா’’’தி? ‘‘நோ ஹேதங், ப⁴ந்தே’’. ‘‘அஹஞ்சானந்த³, வச்ச²கொ³த்தஸ்ஸ பரிப்³பா³ஜகஸ்ஸ ‘நத்த²த்தா’தி புட்டோ² ஸமானோ ‘நத்த²த்தா’தி ப்³யாகரெய்யங் , ஸம்மூள்ஹஸ்ஸ, ஆனந்த³, வச்ச²கொ³த்தஸ்ஸ பரிப்³பா³ஜகஸ்ஸ பி⁴ய்யோ ஸம்மோஹாய அப⁴விஸ்ஸ – ‘அஹுவா மே நூன புப்³பே³ அத்தா, ஸோ ஏதரஹி நத்தீ²’’’தி. த³ஸமங்.
Atha kho āyasmā ānando acirapakkante vacchagotte paribbājake bhagavantaṃ etadavoca – ‘‘kiṃ nu kho, bhante, bhagavā vacchagottassa paribbājakassa pañhaṃ puṭṭho na byākāsī’’ti? ‘‘Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, ye te, ānanda, samaṇabrāhmaṇā sassatavādā tesametaṃ saddhiṃ 2 abhavissa. Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ, ye te, ānanda, samaṇabrāhmaṇā ucchedavādā tesametaṃ saddhiṃ abhavissa. Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, api nu me taṃ, ānanda, anulomaṃ abhavissa ñāṇassa uppādāya – ‘sabbe dhammā anattā’’’ti? ‘‘No hetaṃ, bhante’’. ‘‘Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ , sammūḷhassa, ānanda, vacchagottassa paribbājakassa bhiyyo sammohāya abhavissa – ‘ahuvā me nūna pubbe attā, so etarahi natthī’’’ti. Dasamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ஆனந்த³ஸுத்தவண்ணனா • 10. Ānandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஆனந்த³ஸுத்தவண்ணனா • 10. Ānandasuttavaṇṇanā
