Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya

    ৬. আনন্দসুত্তং

    6. Ānandasuttaṃ

    ১০৬. একং সমযং ভগৰা কোসম্বিযং ৰিহরতি ঘোসিতারামে। অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা আনন্দো ভগৰন্তং এতদৰোচ –

    106. Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –

    ‘‘কিত্তাৰতা নু খো, ভন্তে, ভিক্খু সঙ্ঘে 1 ৰিহরন্তো ফাসুং ৰিহরেয্যা’’তি? ‘‘যতো খো, আনন্দ, ভিক্খু অত্তনা 2 সীলসম্পন্নো হোতি, নো 3 পরং অধিসীলে সম্পৰত্তা 4; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি।

    ‘‘Kittāvatā nu kho, bhante, bhikkhu saṅghe 5 viharanto phāsuṃ vihareyyā’’ti? ‘‘Yato kho, ānanda, bhikkhu attanā 6 sīlasampanno hoti, no 7 paraṃ adhisīle sampavattā 8; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ 9! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda 10! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; অপঞ্ঞাতো চ হোতি, তেন চ অপঞ্ঞাতকেন নো পরিতস্সতি; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; অপঞ্ঞাতো চ হোতি, তেন চ অপঞ্ঞাতকেন নো পরিতস্সতি; চতুন্নঞ্চ 11 ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্যা’’তি।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca 12 jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.

    ‘‘সিযা পন, ভন্তে, অঞ্ঞোপি পরিযাযো যথা ভিক্খু সঙ্ঘে ৰিহরন্তো ফাসুং ৰিহরেয্যা’’তি? ‘‘সিযা, আনন্দ! যতো খো, আনন্দ, ভিক্খু অত্তনা সীলসম্পন্নো হোতি, নো পরং অধিসীলে সম্পৰত্তা; অত্তানুপেক্খী চ হোতি, নো পরানুপেক্খী; অপঞ্ঞাতো চ হোতি, তেন চ অপঞ্ঞাতকেন নো পরিতস্সতি; চতুন্নঞ্চ ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী; আসৰানঞ্চ 13 খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি; এত্তাৰতাপি খো, আনন্দ, ভিক্খু সঙ্ঘে ৰিহরন্তো ফাসুং ৰিহরেয্য।

    ‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; āsavānañca 14 khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ettāvatāpi kho, ānanda, bhikkhu saṅghe viharanto phāsuṃ vihareyya.

    ‘‘ইমম্হা চাহং, আনন্দ, ফাসুৰিহারা অঞ্ঞো ফাসুৰিহারো উত্তরিতরো ৰা পণীততরো ৰা নত্থীতি ৰদামী’’তি। ছট্ঠং।

    ‘‘Imamhā cāhaṃ, ānanda, phāsuvihārā añño phāsuvihāro uttaritaro vā paṇītataro vā natthīti vadāmī’’ti. Chaṭṭhaṃ.




    Next: ৭. সীলসুত্তং • 7. Sīlasuttaṃ




    Footnotes:
    1. ভিক্খুংসংঘো (স্যা॰ পী॰)
    2. অত্তনা চ (পী॰ ক॰)
    3. নো চ (ক॰)
    4. সম্পৰত্তা হোতি (ক॰)
    5. bhikkhuṃsaṃgho (syā. pī.)
    6. attanā ca (pī. ka.)
    7. no ca (ka.)
    8. sampavattā hoti (ka.)
    9. আনন্দাতি ভগৰা আৰোচ (স্যা॰ পী॰)
    10. ānandāti bhagavā āvoca (syā. pī.)
    11. চতুন্নং (পী॰ ক॰)
    12. catunnaṃ (pī. ka.)
    13. আসৰানং (সী॰ পী॰ ক॰)
    14. āsavānaṃ (sī. pī. ka.)



    Related texts:



    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৬. আনন্দসুত্তৰণ্ণনা • 6. Ānandasuttavaṇṇanā

    টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬-১০. আনন্দসুত্তাদিৰণ্ণনা • 6-10. Ānandasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact