| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. আনন্দসুত্তং
10. Ānandasuttaṃ
২১. সাৰত্থিযং … আরামে। অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘‘নিরোধো নিরোধো’তি, ভন্তে, ৰুচ্চতি। কতমেসানং খো, ভন্তে, ধম্মানং নিরোধো 1 ‘নিরোধো’তি ৰুচ্চতী’’তি? ‘‘রূপং খো, আনন্দ, অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং। তস্স নিরোধো 2 ‘নিরোধো’তি ৰুচ্চতি। ৰেদনা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা। তস্সা নিরোধো ‘নিরোধো’তি ৰুচ্চতি। সঞ্ঞা… সঙ্খারা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মা। তেসং নিরোধো ‘নিরোধো’তি ৰুচ্চতি। ৰিঞ্ঞাণং অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মং। তস্স নিরোধো ‘নিরোধো’তি ৰুচ্চতি। ইমেসং খো, আনন্দ, ধম্মানং নিরোধো ‘নিরোধো’তি ৰুচ্চতী’’তি। দসমং।
21. Sāvatthiyaṃ … ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘‘nirodho nirodho’ti, bhante, vuccati. Katamesānaṃ kho, bhante, dhammānaṃ nirodho 3 ‘nirodho’ti vuccatī’’ti? ‘‘Rūpaṃ kho, ānanda, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho 4 ‘nirodho’ti vuccati. Vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tassā nirodho ‘nirodho’ti vuccati. Saññā… saṅkhārā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tesaṃ nirodho ‘nirodho’ti vuccati. Viññāṇaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho ‘nirodho’ti vuccati. Imesaṃ kho, ānanda, dhammānaṃ nirodho ‘nirodho’ti vuccatī’’ti. Dasamaṃ.
অনিচ্চৰগ্গো দুতিযো।
Aniccavaggo dutiyo.
তস্সুদ্দানং –
Tassuddānaṃ –
অনিচ্চং দুক্খং অনত্তা, যদনিচ্চাপরে তযো।
Aniccaṃ dukkhaṃ anattā, yadaniccāpare tayo;
হেতুনাপি তযো ৰুত্তা, আনন্দেন চ তে দসাতি॥
Hetunāpi tayo vuttā, ānandena ca te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-১০. অনিচ্চসুত্তাদিৰণ্ণনা • 1-10. Aniccasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১-১০. অনিচ্চাদিসুত্তৰণ্ণনা • 1-10. Aniccādisuttavaṇṇanā
