| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. থেরৰগ্গো
9. Theravaggo
১. আনন্দসুত্তং
1. Ānandasuttaṃ
৮৩. সাৰত্থিনিদানং । তত্র খো আযস্মা আনন্দো ভিক্খূ আমন্তেসি – ‘‘আৰুসো, ভিক্খৰে’’তি। ‘‘আৰুসো’’তি খো তে ভিক্খূ আযস্মতো আনন্দস্স পচ্চস্সোসুং। আযস্মা আনন্দো এতদৰোচ –
83. Sāvatthinidānaṃ . Tatra kho āyasmā ānando bhikkhū āmantesi – ‘‘āvuso, bhikkhave’’ti. ‘‘Āvuso’’ti kho te bhikkhū āyasmato ānandassa paccassosuṃ. Āyasmā ānando etadavoca –
‘‘পুণ্ণো নাম, আৰুসো, আযস্মা মন্তাণিপুত্তো 1 অম্হাকং নৰকানং সতং বহূপকারো হোতি। সো অম্হে ইমিনা ওৰাদেন ওৰদতি – ‘উপাদায, আৰুসো আনন্দ, অস্মীতি হোতি, নো অনুপাদায। কিঞ্চ উপাদায অস্মীতি হোতি, নো অনুপাদায? রূপং উপাদায অস্মীতি হোতি, নো অনুপাদায। ৰেদনং… সঞ্ঞং… সঙ্খারে… ৰিঞ্ঞাণং উপাদায অস্মীতি হোতি, নো অনুপাদায’’’।
‘‘Puṇṇo nāma, āvuso, āyasmā mantāṇiputto 2 amhākaṃ navakānaṃ sataṃ bahūpakāro hoti. So amhe iminā ovādena ovadati – ‘upādāya, āvuso ānanda, asmīti hoti, no anupādāya. Kiñca upādāya asmīti hoti, no anupādāya? Rūpaṃ upādāya asmīti hoti, no anupādāya. Vedanaṃ… saññaṃ… saṅkhāre… viññāṇaṃ upādāya asmīti hoti, no anupādāya’’’.
‘‘সেয্যথাপি, আৰুসো আনন্দ, ইত্থী ৰা পুরিসো ৰা দহরো যুৰা মণ্ডনকজাতিকো আদাসে ৰা পরিসুদ্ধে পরিযোদাতে অচ্ছে ৰা উদকপত্তে সকং মুখনিমিত্তং পচ্চৰেক্খমানো উপাদায পস্সেয্য, নো অনুপাদায; এৰমেৰ খো, আৰুসো আনন্দ, রূপং উপাদায অস্মীতি হোতি, নো অনুপাদায। ৰেদনং… সঞ্ঞং… সঙ্খারে… ৰিঞ্ঞাণং উপাদায অস্মীতি হোতি, নো অনুপাদায।
‘‘Seyyathāpi, āvuso ānanda, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udakapatte sakaṃ mukhanimittaṃ paccavekkhamāno upādāya passeyya, no anupādāya; evameva kho, āvuso ānanda, rūpaṃ upādāya asmīti hoti, no anupādāya. Vedanaṃ… saññaṃ… saṅkhāre… viññāṇaṃ upādāya asmīti hoti, no anupādāya.
‘‘তং কিং মঞ্ঞসি, আৰুসো আনন্দ, ‘রূপং নিচ্চং ৰা অনিচ্চং ৰা’’’তি? ‘অনিচ্চং, আৰুসো’। ৰেদনা… সঞ্ঞা … সঙ্খারা… ৰিঞ্ঞাণং নিচ্চং ৰা অনিচ্চং ৰা’তি? ‘অনিচ্চং, আৰুসো’। তস্মাতিহ…পে॰… এৰং পস্সং…পে॰… নাপরং ইত্থত্তাযাতি পজানাতীতি। পুণ্ণো নাম আৰুসো আযস্মা মন্তাণিপুত্তো অম্হাকং নৰকানং সতং বহূপকারো হোতি। সো অম্হে ইমিনা ওৰাদেন ওৰদতি। ইদঞ্চ পন মে আযস্মতো পুণ্ণস্স মন্তাণিপুত্তস্স ধম্মদেসনং সুত্ৰা ধম্মো অভিসমিতোতি। পঠমং।
‘‘Taṃ kiṃ maññasi, āvuso ānanda, ‘rūpaṃ niccaṃ vā aniccaṃ vā’’’ti? ‘Aniccaṃ, āvuso’. Vedanā… saññā … saṅkhārā… viññāṇaṃ niccaṃ vā aniccaṃ vā’ti? ‘Aniccaṃ, āvuso’. Tasmātiha…pe… evaṃ passaṃ…pe… nāparaṃ itthattāyāti pajānātīti. Puṇṇo nāma āvuso āyasmā mantāṇiputto amhākaṃ navakānaṃ sataṃ bahūpakāro hoti. So amhe iminā ovādena ovadati. Idañca pana me āyasmato puṇṇassa mantāṇiputtassa dhammadesanaṃ sutvā dhammo abhisamitoti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. আনন্দসুত্তৰণ্ণনা • 1. Ānandasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. আনন্দসুত্তৰণ্ণনা • 1. Ānandasuttavaṇṇanā
