| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
४. आनन्दसुत्तं
4. Ānandasuttaṃ
२१२. एकं समयं आयस्मा आनन्दो सावत्थियं विहरति जेतवने अनाथपिण्डिकस्स आरामे। अथ खो आयस्मा आनन्दो पुब्बण्हसमयं निवासेत्वा पत्तचीवरमादाय सावत्थिं पिण्डाय पाविसि आयस्मता वङ्गीसेन पच्छासमणेन। तेन खो पन समयेन आयस्मतो वङ्गीसस्स अनभिरति उप्पन्ना होति, रागो चित्तं अनुद्धंसेति। अथ खो आयस्मा वङ्गीसो आयस्मन्तं आनन्दं गाथाय अज्झभासि –
212. Ekaṃ samayaṃ āyasmā ānando sāvatthiyaṃ viharati jetavane anāthapiṇḍikassa ārāme. Atha kho āyasmā ānando pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi āyasmatā vaṅgīsena pacchāsamaṇena. Tena kho pana samayena āyasmato vaṅgīsassa anabhirati uppannā hoti, rāgo cittaṃ anuddhaṃseti. Atha kho āyasmā vaṅgīso āyasmantaṃ ānandaṃ gāthāya ajjhabhāsi –
‘‘कामरागेन डय्हामि, चित्तं मे परिडय्हति।
‘‘Kāmarāgena ḍayhāmi, cittaṃ me pariḍayhati;
साधु निब्बापनं ब्रूहि, अनुकम्पाय गोतमा’’ति॥
Sādhu nibbāpanaṃ brūhi, anukampāya gotamā’’ti.
‘‘सञ्ञाय विपरियेसा, चित्तं ते परिडय्हति।
‘‘Saññāya vipariyesā, cittaṃ te pariḍayhati;
निमित्तं परिवज्जेहि, सुभं रागूपसंहितं॥
Nimittaṃ parivajjehi, subhaṃ rāgūpasaṃhitaṃ.
‘‘सङ्खारे परतो पस्स, दुक्खतो मा च अत्ततो।
‘‘Saṅkhāre parato passa, dukkhato mā ca attato;
निब्बापेहि महारागं, मा डय्हित्थो पुनप्पुनं॥
Nibbāpehi mahārāgaṃ, mā ḍayhittho punappunaṃ.
‘‘असुभाय चित्तं भावेहि, एकग्गं सुसमाहितं।
‘‘Asubhāya cittaṃ bhāvehi, ekaggaṃ susamāhitaṃ;
सति कायगता त्यत्थु, निब्बिदाबहुलो भ॥
Sati kāyagatā tyatthu, nibbidābahulo bha.
‘‘अनिमित्तञ्च भावेहि, मानानुसयमुज्जह।
‘‘Animittañca bhāvehi, mānānusayamujjaha;
ततो मानाभिसमया, उपसन्तो चरिस्ससी’’ति॥
Tato mānābhisamayā, upasanto carissasī’’ti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ४. आनन्दसुत्तवण्णना • 4. Ānandasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ४. आनन्दसुत्तवण्णना • 4. Ānandasuttavaṇṇanā
