| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. អានន្ទសុត្តំ
10. Ānandasuttaṃ
៤១៩. អថ ខោ វច្ឆគោត្តោ បរិព្ពាជកោ យេន ភគវា តេនុបសង្កមិ; ឧបសង្កមិត្វា ភគវតា សទ្ធិំ សម្មោទិ។ សម្មោទនីយំ កថំ សារណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ វច្ឆគោត្តោ បរិព្ពាជកោ ភគវន្តំ ឯតទវោច – ‘‘កិំ នុ ខោ, ភោ គោតម, អត្ថត្តា’’តិ? ឯវំ វុត្តេ, ភគវា តុណ្ហី អហោសិ។ ‘‘កិំ បន, ភោ គោតម, នត្ថត្តា’’តិ? ទុតិយម្បិ ខោ ភគវា តុណ្ហី អហោសិ។ អថ ខោ វច្ឆគោត្តោ បរិព្ពាជកោ ឧដ្ឋាយាសនា បក្កាមិ។
419. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, atthattā’’ti? Evaṃ vutte, bhagavā tuṇhī ahosi. ‘‘Kiṃ pana, bho gotama, natthattā’’ti? Dutiyampi kho bhagavā tuṇhī ahosi. Atha kho vacchagotto paribbājako uṭṭhāyāsanā pakkāmi.
អថ ខោ អាយស្មា អានន្ទោ អចិរបក្កន្តេ វច្ឆគោត្តេ បរិព្ពាជកេ ភគវន្តំ ឯតទវោច – ‘‘កិំ នុ ខោ, ភន្តេ, ភគវា វច្ឆគោត្តស្ស បរិព្ពាជកស្ស បញ្ហំ បុដ្ឋោ ន ព្យាកាសី’’តិ? ‘‘អហញ្ចានន្ទ, វច្ឆគោត្តស្ស បរិព្ពាជកស្ស ‘អត្ថត្តា’តិ បុដ្ឋោ សមានោ ‘អត្ថត្តា’តិ ព្យាករេយ្យំ, យេ តេ, អានន្ទ, សមណព្រាហ្មណា សស្សតវាទា តេសមេតំ សទ្ធិំ 1 អភវិស្ស។ អហញ្ចានន្ទ, វច្ឆគោត្តស្ស បរិព្ពាជកស្ស ‘នត្ថត្តា’តិ បុដ្ឋោ សមានោ ‘នត្ថត្តា’តិ ព្យាករេយ្យំ, យេ តេ, អានន្ទ, សមណព្រាហ្មណា ឧច្ឆេទវាទា តេសមេតំ សទ្ធិំ អភវិស្ស។ អហញ្ចានន្ទ, វច្ឆគោត្តស្ស បរិព្ពាជកស្ស ‘អត្ថត្តា’តិ បុដ្ឋោ សមានោ ‘អត្ថត្តា’តិ ព្យាករេយ្យំ, អបិ នុ មេ តំ, អានន្ទ, អនុលោមំ អភវិស្ស ញាណស្ស ឧប្បាទាយ – ‘សព្ពេ ធម្មា អនត្តា’’’តិ? ‘‘នោ ហេតំ, ភន្តេ’’។ ‘‘អហញ្ចានន្ទ, វច្ឆគោត្តស្ស បរិព្ពាជកស្ស ‘នត្ថត្តា’តិ បុដ្ឋោ សមានោ ‘នត្ថត្តា’តិ ព្យាករេយ្យំ , សម្មូឡ្ហស្ស, អានន្ទ, វច្ឆគោត្តស្ស បរិព្ពាជកស្ស ភិយ្យោ សម្មោហាយ អភវិស្ស – ‘អហុវា មេ នូន បុព្ពេ អត្តា, សោ ឯតរហិ នត្ថី’’’តិ។ ទសមំ។
Atha kho āyasmā ānando acirapakkante vacchagotte paribbājake bhagavantaṃ etadavoca – ‘‘kiṃ nu kho, bhante, bhagavā vacchagottassa paribbājakassa pañhaṃ puṭṭho na byākāsī’’ti? ‘‘Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, ye te, ānanda, samaṇabrāhmaṇā sassatavādā tesametaṃ saddhiṃ 2 abhavissa. Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ, ye te, ānanda, samaṇabrāhmaṇā ucchedavādā tesametaṃ saddhiṃ abhavissa. Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, api nu me taṃ, ānanda, anulomaṃ abhavissa ñāṇassa uppādāya – ‘sabbe dhammā anattā’’’ti? ‘‘No hetaṃ, bhante’’. ‘‘Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ , sammūḷhassa, ānanda, vacchagottassa paribbājakassa bhiyyo sammohāya abhavissa – ‘ahuvā me nūna pubbe attā, so etarahi natthī’’’ti. Dasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. អានន្ទសុត្តវណ្ណនា • 10. Ānandasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. អានន្ទសុត្តវណ្ណនា • 10. Ānandasuttavaṇṇanā
