| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. ථෙරවග්‌ගො
9. Theravaggo
1. ආනන්‌දසුත්‌තං
1. Ānandasuttaṃ
83. සාවත්‌ථිනිදානං . තත්‍ර ඛො ආයස්‌මා ආනන්‌දො භික්‌ඛූ ආමන්‌තෙසි – ‘‘ආවුසො, භික්‌ඛවෙ’’ති. ‘‘ආවුසො’’ති ඛො තෙ භික්‌ඛූ ආයස්‌මතො ආනන්‌දස්‌ස පච්‌චස්‌සොසුං. ආයස්‌මා ආනන්‌දො එතදවොච –
83. Sāvatthinidānaṃ . Tatra kho āyasmā ānando bhikkhū āmantesi – ‘‘āvuso, bhikkhave’’ti. ‘‘Āvuso’’ti kho te bhikkhū āyasmato ānandassa paccassosuṃ. Āyasmā ānando etadavoca –
‘‘පුණ්‌ණො නාම, ආවුසො, ආයස්‌මා මන්‌තාණිපුත්‌තො 1 අම්‌හාකං නවකානං සතං බහූපකාරො හොති. සො අම්‌හෙ ඉමිනා ඔවාදෙන ඔවදති – ‘උපාදාය, ආවුසො ආනන්‌ද, අස්‌මීති හොති, නො අනුපාදාය. කිඤ්‌ච උපාදාය අස්‌මීති හොති, නො අනුපාදාය? රූපං උපාදාය අස්‌මීති හොති, නො අනුපාදාය. වෙදනං… සඤ්‌ඤං… සඞ්‌ඛාරෙ… විඤ්‌ඤාණං උපාදාය අස්‌මීති හොති, නො අනුපාදාය’’’.
‘‘Puṇṇo nāma, āvuso, āyasmā mantāṇiputto 2 amhākaṃ navakānaṃ sataṃ bahūpakāro hoti. So amhe iminā ovādena ovadati – ‘upādāya, āvuso ānanda, asmīti hoti, no anupādāya. Kiñca upādāya asmīti hoti, no anupādāya? Rūpaṃ upādāya asmīti hoti, no anupādāya. Vedanaṃ… saññaṃ… saṅkhāre… viññāṇaṃ upādāya asmīti hoti, no anupādāya’’’.
‘‘සෙය්‍යථාපි, ආවුසො ආනන්‌ද, ඉත්‌ථී වා පුරිසො වා දහරො යුවා මණ්‌ඩනකජාතිකො ආදාසෙ වා පරිසුද්‌ධෙ පරියොදාතෙ අච්‌ඡෙ වා උදකපත්‌තෙ සකං මුඛනිමිත්‌තං පච්‌චවෙක්‌ඛමානො උපාදාය පස්‌සෙය්‍ය, නො අනුපාදාය; එවමෙව ඛො, ආවුසො ආනන්‌ද, රූපං උපාදාය අස්‌මීති හොති, නො අනුපාදාය. වෙදනං… සඤ්‌ඤං… සඞ්‌ඛාරෙ… විඤ්‌ඤාණං උපාදාය අස්‌මීති හොති, නො අනුපාදාය.
‘‘Seyyathāpi, āvuso ānanda, itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udakapatte sakaṃ mukhanimittaṃ paccavekkhamāno upādāya passeyya, no anupādāya; evameva kho, āvuso ānanda, rūpaṃ upādāya asmīti hoti, no anupādāya. Vedanaṃ… saññaṃ… saṅkhāre… viññāṇaṃ upādāya asmīti hoti, no anupādāya.
‘‘තං කිං මඤ්‌ඤසි, ආවුසො ආනන්‌ද, ‘රූපං නිච්‌චං වා අනිච්‌චං වා’’’ති? ‘අනිච්‌චං, ආවුසො’. වෙදනා… සඤ්‌ඤා … සඞ්‌ඛාරා… විඤ්‌ඤාණං නිච්‌චං වා අනිච්‌චං වා’ති? ‘අනිච්‌චං, ආවුසො’. තස්‌මාතිහ…පෙ.… එවං පස්‌සං…පෙ.… නාපරං ඉත්‌ථත්‌තායාති පජානාතීති. පුණ්‌ණො නාම ආවුසො ආයස්‌මා මන්‌තාණිපුත්‌තො අම්‌හාකං නවකානං සතං බහූපකාරො හොති. සො අම්‌හෙ ඉමිනා ඔවාදෙන ඔවදති. ඉදඤ්‌ච පන මෙ ආයස්‌මතො පුණ්‌ණස්‌ස මන්‌තාණිපුත්‌තස්‌ස ධම්‌මදෙසනං සුත්‌වා ධම්‌මො අභිසමිතොති. පඨමං.
‘‘Taṃ kiṃ maññasi, āvuso ānanda, ‘rūpaṃ niccaṃ vā aniccaṃ vā’’’ti? ‘Aniccaṃ, āvuso’. Vedanā… saññā … saṅkhārā… viññāṇaṃ niccaṃ vā aniccaṃ vā’ti? ‘Aniccaṃ, āvuso’. Tasmātiha…pe… evaṃ passaṃ…pe… nāparaṃ itthattāyāti pajānātīti. Puṇṇo nāma āvuso āyasmā mantāṇiputto amhākaṃ navakānaṃ sataṃ bahūpakāro hoti. So amhe iminā ovādena ovadati. Idañca pana me āyasmato puṇṇassa mantāṇiputtassa dhammadesanaṃ sutvā dhammo abhisamitoti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. ආනන්‌දසුත්‌තවණ්‌ණනා • 1. Ānandasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. ආනන්‌දසුත්‌තවණ්‌ණනා • 1. Ānandasuttavaṇṇanā
