| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. ආනන්‌දසුත්‌තං
10. Ānandasuttaṃ
419. අථ ඛො වච්‌ඡගොත්‌තො පරිබ්‌බාජකො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො වච්‌ඡගොත්‌තො පරිබ්‌බාජකො භගවන්‌තං එතදවොච – ‘‘කිං නු ඛො, භො ගොතම, අත්‌ථත්‌තා’’ති? එවං වුත්‌තෙ, භගවා තුණ්‌හී අහොසි. ‘‘කිං පන, භො ගොතම, නත්‌ථත්‌තා’’ති? දුතියම්‌පි ඛො භගවා තුණ්‌හී අහොසි. අථ ඛො වච්‌ඡගොත්‌තො පරිබ්‌බාජකො උට්‌ඨායාසනා පක්‌කාමි.
419. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, atthattā’’ti? Evaṃ vutte, bhagavā tuṇhī ahosi. ‘‘Kiṃ pana, bho gotama, natthattā’’ti? Dutiyampi kho bhagavā tuṇhī ahosi. Atha kho vacchagotto paribbājako uṭṭhāyāsanā pakkāmi.
අථ ඛො ආයස්‌මා ආනන්‌දො අචිරපක්‌කන්‌තෙ වච්‌ඡගොත්‌තෙ පරිබ්‌බාජකෙ භගවන්‌තං එතදවොච – ‘‘කිං නු ඛො, භන්‌තෙ, භගවා වච්‌ඡගොත්‌තස්‌ස පරිබ්‌බාජකස්‌ස පඤ්‌හං පුට්‌ඨො න බ්‍යාකාසී’’ති? ‘‘අහඤ්‌චානන්‌ද, වච්‌ඡගොත්‌තස්‌ස පරිබ්‌බාජකස්‌ස ‘අත්‌ථත්‌තා’ති පුට්‌ඨො සමානො ‘අත්‌ථත්‌තා’ති බ්‍යාකරෙය්‍යං, යෙ තෙ, ආනන්‌ද, සමණබ්‍රාහ්‌මණා සස්‌සතවාදා තෙසමෙතං සද්‌ධිං 1 අභවිස්‌ස. අහඤ්‌චානන්‌ද, වච්‌ඡගොත්‌තස්‌ස පරිබ්‌බාජකස්‌ස ‘නත්‌ථත්‌තා’ති පුට්‌ඨො සමානො ‘නත්‌ථත්‌තා’ති බ්‍යාකරෙය්‍යං, යෙ තෙ, ආනන්‌ද, සමණබ්‍රාහ්‌මණා උච්‌ඡෙදවාදා තෙසමෙතං සද්‌ධිං අභවිස්‌ස. අහඤ්‌චානන්‌ද, වච්‌ඡගොත්‌තස්‌ස පරිබ්‌බාජකස්‌ස ‘අත්‌ථත්‌තා’ති පුට්‌ඨො සමානො ‘අත්‌ථත්‌තා’ති බ්‍යාකරෙය්‍යං, අපි නු මෙ තං, ආනන්‌ද, අනුලොමං අභවිස්‌ස ඤාණස්‌ස උප්‌පාදාය – ‘සබ්‌බෙ ධම්‌මා අනත්‌තා’’’ති? ‘‘නො හෙතං, භන්‌තෙ’’. ‘‘අහඤ්‌චානන්‌ද, වච්‌ඡගොත්‌තස්‌ස පරිබ්‌බාජකස්‌ස ‘නත්‌ථත්‌තා’ති පුට්‌ඨො සමානො ‘නත්‌ථත්‌තා’ති බ්‍යාකරෙය්‍යං , සම්‌මූළ්‌හස්‌ස, ආනන්‌ද, වච්‌ඡගොත්‌තස්‌ස පරිබ්‌බාජකස්‌ස භිය්‍යො සම්‌මොහාය අභවිස්‌ස – ‘අහුවා මෙ නූන පුබ්‌බෙ අත්‌තා, සො එතරහි නත්‌ථී’’’ති. දසමං.
Atha kho āyasmā ānando acirapakkante vacchagotte paribbājake bhagavantaṃ etadavoca – ‘‘kiṃ nu kho, bhante, bhagavā vacchagottassa paribbājakassa pañhaṃ puṭṭho na byākāsī’’ti? ‘‘Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, ye te, ānanda, samaṇabrāhmaṇā sassatavādā tesametaṃ saddhiṃ 2 abhavissa. Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ, ye te, ānanda, samaṇabrāhmaṇā ucchedavādā tesametaṃ saddhiṃ abhavissa. Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, api nu me taṃ, ānanda, anulomaṃ abhavissa ñāṇassa uppādāya – ‘sabbe dhammā anattā’’’ti? ‘‘No hetaṃ, bhante’’. ‘‘Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ , sammūḷhassa, ānanda, vacchagottassa paribbājakassa bhiyyo sammohāya abhavissa – ‘ahuvā me nūna pubbe attā, so etarahi natthī’’’ti. Dasamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. ආනන්‌දසුත්‌තවණ්‌ණනා • 10. Ānandasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. ආනන්‌දසුත්‌තවණ්‌ණනා • 10. Ānandasuttavaṇṇanā
