| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. ཨཱནནྡསུཏྟཾ
6. Ānandasuttaṃ
༡༠༦. ཨེཀཾ སམཡཾ བྷགཝཱ ཀོསམྦིཡཾ ཝིཧརཏི གྷོསིཏཱརཱམེ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ –
106. Ekaṃ samayaṃ bhagavā kosambiyaṃ viharati ghositārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘སིཡཱ པན, བྷནྟེ, ཨཉྙོཔི པརིཡཱཡོ ཡཐཱ བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻཱ’’ཏི? ‘‘སིཡཱ, ཨཱནནྡ 9! ཡཏོ ཁོ, ཨཱནནྡ, བྷིཀྑུ ཨཏྟནཱ སཱིལསམྤནྣོ ཧོཏི, ནོ པརཾ ཨདྷིསཱིལེ སམྤཝཏྟཱ; ཨཏྟཱནུཔེཀྑཱི ཙ ཧོཏི, ནོ པརཱནུཔེཀྑཱི; ཨེཏྟཱཝཏཱཔི ཁོ, ཨཱནནྡ, བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻཱ’’ཏི།
‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda 10! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.
‘‘སིཡཱ པན, བྷནྟེ, ཨཉྙོཔི པརིཡཱཡོ ཡཐཱ བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻཱ’’ཏི? ‘‘སིཡཱ, ཨཱནནྡ! ཡཏོ ཁོ, ཨཱནནྡ, བྷིཀྑུ ཨཏྟནཱ སཱིལསམྤནྣོ ཧོཏི, ནོ པརཾ ཨདྷིསཱིལེ སམྤཝཏྟཱ; ཨཏྟཱནུཔེཀྑཱི ཙ ཧོཏི, ནོ པརཱནུཔེཀྑཱི; ཨཔཉྙཱཏོ ཙ ཧོཏི, ཏེན ཙ ཨཔཉྙཱཏཀེན ནོ པརིཏསྶཏི; ཨེཏྟཱཝཏཱཔི ཁོ, ཨཱནནྡ, བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻཱ’’ཏི།
‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.
‘‘སིཡཱ པན, བྷནྟེ, ཨཉྙོཔི པརིཡཱཡོ ཡཐཱ བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻཱ’’ཏི? ‘‘སིཡཱ, ཨཱནནྡ! ཡཏོ ཁོ, ཨཱནནྡ, བྷིཀྑུ ཨཏྟནཱ སཱིལསམྤནྣོ ཧོཏི, ནོ པརཾ ཨདྷིསཱིལེ སམྤཝཏྟཱ; ཨཏྟཱནུཔེཀྑཱི ཙ ཧོཏི, ནོ པརཱནུཔེཀྑཱི; ཨཔཉྙཱཏོ ཙ ཧོཏི, ཏེན ཙ ཨཔཉྙཱཏཀེན ནོ པརིཏསྶཏི; ཙཏུནྣཉྩ 11 ཛྷཱནཱནཾ ཨཱབྷིཙེཏསིཀཱནཾ དིཊྛདྷམྨསུཁཝིཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི; ཨེཏྟཱཝཏཱཔི ཁོ, ཨཱནནྡ, བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻཱ’’ཏི།
‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca 12 jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; ettāvatāpi kho, ānanda, bhikkhu saṅghe viharanto phāsuṃ vihareyyā’’ti.
‘‘སིཡཱ པན, བྷནྟེ, ཨཉྙོཔི པརིཡཱཡོ ཡཐཱ བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻཱ’’ཏི? ‘‘སིཡཱ, ཨཱནནྡ! ཡཏོ ཁོ, ཨཱནནྡ, བྷིཀྑུ ཨཏྟནཱ སཱིལསམྤནྣོ ཧོཏི, ནོ པརཾ ཨདྷིསཱིལེ སམྤཝཏྟཱ; ཨཏྟཱནུཔེཀྑཱི ཙ ཧོཏི, ནོ པརཱནུཔེཀྑཱི; ཨཔཉྙཱཏོ ཙ ཧོཏི, ཏེན ཙ ཨཔཉྙཱཏཀེན ནོ པརིཏསྶཏི; ཙཏུནྣཉྩ ཛྷཱནཱནཾ ཨཱབྷིཙེཏསིཀཱནཾ དིཊྛདྷམྨསུཁཝིཧཱརཱནཾ ནིཀཱམལཱབྷཱི ཧོཏི ཨཀིཙྪལཱབྷཱི ཨཀསིརལཱབྷཱི; ཨཱསཝཱནཉྩ 13 ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི; ཨེཏྟཱཝཏཱཔི ཁོ, ཨཱནནྡ, བྷིཀྑུ སངྒྷེ ཝིཧརནྟོ ཕཱསུཾ ཝིཧརེཡྻ།
‘‘Siyā pana, bhante, aññopi pariyāyo yathā bhikkhu saṅghe viharanto phāsuṃ vihareyyā’’ti? ‘‘Siyā, ānanda! Yato kho, ānanda, bhikkhu attanā sīlasampanno hoti, no paraṃ adhisīle sampavattā; attānupekkhī ca hoti, no parānupekkhī; apaññāto ca hoti, tena ca apaññātakena no paritassati; catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī; āsavānañca 14 khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ettāvatāpi kho, ānanda, bhikkhu saṅghe viharanto phāsuṃ vihareyya.
‘‘ཨིམམྷཱ ཙཱཧཾ, ཨཱནནྡ, ཕཱསུཝིཧཱརཱ ཨཉྙོ ཕཱསུཝིཧཱརོ ཨུཏྟརིཏརོ ཝཱ པཎཱིཏཏརོ ཝཱ ནཏྠཱིཏི ཝདཱམཱི’’ཏི། ཚཊྛཾ།
‘‘Imamhā cāhaṃ, ānanda, phāsuvihārā añño phāsuvihāro uttaritaro vā paṇītataro vā natthīti vadāmī’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཨཱནནྡསུཏྟཝཎྞནཱ • 6. Ānandasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦-༡༠. ཨཱནནྡསུཏྟཱདིཝཎྞནཱ • 6-10. Ānandasuttādivaṇṇanā
