| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. ཨཱནནྡསུཏྟཾ
10. Ānandasuttaṃ
༢༡. སཱཝཏྠིཡཾ … ཨཱརཱམེ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘‘ནིརོདྷོ ནིརོདྷོ’ཏི, བྷནྟེ, ཝུཙྩཏི། ཀཏམེསཱནཾ ཁོ, བྷནྟེ, དྷམྨཱནཾ ནིརོདྷོ 1 ‘ནིརོདྷོ’ཏི ཝུཙྩཏཱི’’ཏི? ‘‘རཱུཔཾ ཁོ, ཨཱནནྡ, ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨཾ། ཏསྶ ནིརོདྷོ 2 ‘ནིརོདྷོ’ཏི ཝུཙྩཏི། ཝེདནཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ། ཏསྶཱ ནིརོདྷོ ‘ནིརོདྷོ’ཏི ཝུཙྩཏི། སཉྙཱ… སངྑཱརཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ། ཏེསཾ ནིརོདྷོ ‘ནིརོདྷོ’ཏི ཝུཙྩཏི། ཝིཉྙཱཎཾ ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨཾ། ཏསྶ ནིརོདྷོ ‘ནིརོདྷོ’ཏི ཝུཙྩཏི། ཨིམེསཾ ཁོ, ཨཱནནྡ, དྷམྨཱནཾ ནིརོདྷོ ‘ནིརོདྷོ’ཏི ཝུཙྩཏཱི’’ཏི། དསམཾ།
21. Sāvatthiyaṃ … ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘‘nirodho nirodho’ti, bhante, vuccati. Katamesānaṃ kho, bhante, dhammānaṃ nirodho 3 ‘nirodho’ti vuccatī’’ti? ‘‘Rūpaṃ kho, ānanda, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho 4 ‘nirodho’ti vuccati. Vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tassā nirodho ‘nirodho’ti vuccati. Saññā… saṅkhārā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tesaṃ nirodho ‘nirodho’ti vuccati. Viññāṇaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho ‘nirodho’ti vuccati. Imesaṃ kho, ānanda, dhammānaṃ nirodho ‘nirodho’ti vuccatī’’ti. Dasamaṃ.
ཨནིཙྩཝགྒོ དུཏིཡོ།
Aniccavaggo dutiyo.
ཏསྶུདྡཱནཾ –
Tassuddānaṃ –
ཨནིཙྩཾ དུཀྑཾ ཨནཏྟཱ, ཡདནིཙྩཱཔརེ ཏཡོ།
Aniccaṃ dukkhaṃ anattā, yadaniccāpare tayo;
ཧེཏུནཱཔི ཏཡོ ཝུཏྟཱ, ཨཱནནྡེན ཙ ཏེ དསཱཏི༎
Hetunāpi tayo vuttā, ānandena ca te dasāti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡-༡༠. ཨནིཙྩསུཏྟཱདིཝཎྞནཱ • 1-10. Aniccasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡-༡༠. ཨནིཙྩཱདིསུཏྟཝཎྞནཱ • 1-10. Aniccādisuttavaṇṇanā
