Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༥. ཨཱནནྡསུཏྟཾ

    5. Ānandasuttaṃ

    ༣༧. སཱཝཏྠིནིདཱནཾ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝཏཱ སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ ཨཱནནྡཾ བྷགཝཱ ཨེཏདཝོཙ –

    37. Sāvatthinidānaṃ. Atha kho āyasmā ānando yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –

    ‘‘སཙེ ཏཾ, ཨཱནནྡ, ཨེཝཾ པུཙྪེཡྻུཾ – ‘ཀཏམེསཾ, ཨཱཝུསོ ཨཱནནྡ, དྷམྨཱནཾ ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ 1 ཨཉྙཐཏྟཾ པཉྙཱཡཏཱི’ཏི? ཨེཝཾ པུཊྛོ ཏྭཾ, ཨཱནནྡ, ཀིནྟི བྱཱཀརེཡྻཱསཱི’’ཏི? ‘‘སཙེ མཾ, བྷནྟེ, ཨེཝཾ པུཙྪེཡྻུཾ – ‘ཀཏམེསཾ, ཨཱཝུསོ ཨཱནནྡ, དྷམྨཱནཾ ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏཱི’ཏི? ཨེཝཾ པུཊྛོཧཾ, བྷནྟེ, ཨེཝཾ བྱཱཀརེཡྻཾ – ‘རཱུཔསྶ ཁོ, ཨཱཝུསོ, ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏི། ཝེདནཱཡ… སཉྙཱཡ… སངྑཱརཱནཾ… ཝིཉྙཱཎསྶ ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏི། ཨིམེསཾ ཁོ, ཨཱཝུསོ, དྷམྨཱནཾ ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏཱི’ཏི། ཨེཝཾ པུཊྛོཧཾ, བྷནྟེ, ཨེཝཾ བྱཱཀརེཡྻ’’ནྟི།

    ‘‘Sace taṃ, ānanda, evaṃ puccheyyuṃ – ‘katamesaṃ, āvuso ānanda, dhammānaṃ uppādo paññāyati, vayo paññāyati, ṭhitassa 2 aññathattaṃ paññāyatī’ti? Evaṃ puṭṭho tvaṃ, ānanda, kinti byākareyyāsī’’ti? ‘‘Sace maṃ, bhante, evaṃ puccheyyuṃ – ‘katamesaṃ, āvuso ānanda, dhammānaṃ uppādo paññāyati, vayo paññāyati, ṭhitassa aññathattaṃ paññāyatī’ti? Evaṃ puṭṭhohaṃ, bhante, evaṃ byākareyyaṃ – ‘rūpassa kho, āvuso, uppādo paññāyati, vayo paññāyati, ṭhitassa aññathattaṃ paññāyati. Vedanāya… saññāya… saṅkhārānaṃ… viññāṇassa uppādo paññāyati, vayo paññāyati, ṭhitassa aññathattaṃ paññāyati. Imesaṃ kho, āvuso, dhammānaṃ uppādo paññāyati, vayo paññāyati, ṭhitassa aññathattaṃ paññāyatī’ti. Evaṃ puṭṭhohaṃ, bhante, evaṃ byākareyya’’nti.

    ‘‘སཱདྷུ སཱདྷུ, ཨཱནནྡ! རཱུཔསྶ ཁོ, ཨཱནནྡ, ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏི། ཝེདནཱཡ… སཉྙཱཡ… སངྑཱརཱནཾ… ཝིཉྙཱཎསྶ ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏི། ཨིམེསཾ ཁོ, ཨཱནནྡ, དྷམྨཱནཾ ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏཱིཏི། ཨེཝཾ པུཊྛོ ཏྭཾ, ཨཱནནྡ, ཨེཝཾ བྱཱཀརེཡྻཱསཱི’’ཏི། པཉྩམཾ།

    ‘‘Sādhu sādhu, ānanda! Rūpassa kho, ānanda, uppādo paññāyati, vayo paññāyati, ṭhitassa aññathattaṃ paññāyati. Vedanāya… saññāya… saṅkhārānaṃ… viññāṇassa uppādo paññāyati, vayo paññāyati, ṭhitassa aññathattaṃ paññāyati. Imesaṃ kho, ānanda, dhammānaṃ uppādo paññāyati, vayo paññāyati, ṭhitassa aññathattaṃ paññāyatīti. Evaṃ puṭṭho tvaṃ, ānanda, evaṃ byākareyyāsī’’ti. Pañcamaṃ.




    Next: ༦. དུཏིཡཨཱནནྡསུཏྟཾ • 6. Dutiyaānandasuttaṃ




    Footnotes:
    1. ཋིཏཱནཾ (སྱཱ॰ ཀཾ॰ པཱི॰ ཀ॰)
    2. ṭhitānaṃ (syā. kaṃ. pī. ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥-༦. ཨཱནནྡསུཏྟཱདིཝཎྞནཱ • 5-6. Ānandasuttādivaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥-༦. ཨཱནནྡསུཏྟཱདིཝཎྞནཱ • 5-6. Ānandasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact