| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. ཨཱནནྡསུཏྟཾ
10. Ānandasuttaṃ
༤༡༩. ཨཐ ཁོ ཝཙྪགོཏྟོ པརིབྦཱཛཀོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝཏཱ སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཝཙྪགོཏྟོ པརིབྦཱཛཀོ བྷགཝནྟཾ ཨེཏདཝོཙ – ‘‘ཀིཾ ནུ ཁོ, བྷོ གོཏམ, ཨཏྠཏྟཱ’’ཏི? ཨེཝཾ ཝུཏྟེ, བྷགཝཱ ཏུཎྷཱི ཨཧོསི། ‘‘ཀིཾ པན, བྷོ གོཏམ, ནཏྠཏྟཱ’’ཏི? དུཏིཡམྤི ཁོ བྷགཝཱ ཏུཎྷཱི ཨཧོསི། ཨཐ ཁོ ཝཙྪགོཏྟོ པརིབྦཱཛཀོ ཨུཊྛཱཡཱསནཱ པཀྐཱམི།
419. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, atthattā’’ti? Evaṃ vutte, bhagavā tuṇhī ahosi. ‘‘Kiṃ pana, bho gotama, natthattā’’ti? Dutiyampi kho bhagavā tuṇhī ahosi. Atha kho vacchagotto paribbājako uṭṭhāyāsanā pakkāmi.
ཨཐ ཁོ ཨཱཡསྨཱ ཨཱནནྡོ ཨཙིརཔཀྐནྟེ ཝཙྪགོཏྟེ པརིབྦཱཛཀེ བྷགཝནྟཾ ཨེཏདཝོཙ – ‘‘ཀིཾ ནུ ཁོ, བྷནྟེ, བྷགཝཱ ཝཙྪགོཏྟསྶ པརིབྦཱཛཀསྶ པཉྷཾ པུཊྛོ ན བྱཱཀཱསཱི’’ཏི? ‘‘ཨཧཉྩཱནནྡ, ཝཙྪགོཏྟསྶ པརིབྦཱཛཀསྶ ‘ཨཏྠཏྟཱ’ཏི པུཊྛོ སམཱནོ ‘ཨཏྠཏྟཱ’ཏི བྱཱཀརེཡྻཾ, ཡེ ཏེ, ཨཱནནྡ, སམཎབྲཱཧྨཎཱ སསྶཏཝཱདཱ ཏེསམེཏཾ སདྡྷིཾ 1 ཨབྷཝིསྶ། ཨཧཉྩཱནནྡ, ཝཙྪགོཏྟསྶ པརིབྦཱཛཀསྶ ‘ནཏྠཏྟཱ’ཏི པུཊྛོ སམཱནོ ‘ནཏྠཏྟཱ’ཏི བྱཱཀརེཡྻཾ, ཡེ ཏེ, ཨཱནནྡ, སམཎབྲཱཧྨཎཱ ཨུཙྪེདཝཱདཱ ཏེསམེཏཾ སདྡྷིཾ ཨབྷཝིསྶ། ཨཧཉྩཱནནྡ, ཝཙྪགོཏྟསྶ པརིབྦཱཛཀསྶ ‘ཨཏྠཏྟཱ’ཏི པུཊྛོ སམཱནོ ‘ཨཏྠཏྟཱ’ཏི བྱཱཀརེཡྻཾ, ཨཔི ནུ མེ ཏཾ, ཨཱནནྡ, ཨནུལོམཾ ཨབྷཝིསྶ ཉཱཎསྶ ཨུཔྤཱདཱཡ – ‘སབྦེ དྷམྨཱ ཨནཏྟཱ’’’ཏི? ‘‘ནོ ཧེཏཾ, བྷནྟེ’’། ‘‘ཨཧཉྩཱནནྡ, ཝཙྪགོཏྟསྶ པརིབྦཱཛཀསྶ ‘ནཏྠཏྟཱ’ཏི པུཊྛོ སམཱནོ ‘ནཏྠཏྟཱ’ཏི བྱཱཀརེཡྻཾ , སམྨཱུལ༹ྷསྶ, ཨཱནནྡ, ཝཙྪགོཏྟསྶ པརིབྦཱཛཀསྶ བྷིཡྻོ སམྨོཧཱཡ ཨབྷཝིསྶ – ‘ཨཧུཝཱ མེ ནཱུན པུབྦེ ཨཏྟཱ, སོ ཨེཏརཧི ནཏྠཱི’’’ཏི། དསམཾ།
Atha kho āyasmā ānando acirapakkante vacchagotte paribbājake bhagavantaṃ etadavoca – ‘‘kiṃ nu kho, bhante, bhagavā vacchagottassa paribbājakassa pañhaṃ puṭṭho na byākāsī’’ti? ‘‘Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, ye te, ānanda, samaṇabrāhmaṇā sassatavādā tesametaṃ saddhiṃ 2 abhavissa. Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ, ye te, ānanda, samaṇabrāhmaṇā ucchedavādā tesametaṃ saddhiṃ abhavissa. Ahañcānanda, vacchagottassa paribbājakassa ‘atthattā’ti puṭṭho samāno ‘atthattā’ti byākareyyaṃ, api nu me taṃ, ānanda, anulomaṃ abhavissa ñāṇassa uppādāya – ‘sabbe dhammā anattā’’’ti? ‘‘No hetaṃ, bhante’’. ‘‘Ahañcānanda, vacchagottassa paribbājakassa ‘natthattā’ti puṭṭho samāno ‘natthattā’ti byākareyyaṃ , sammūḷhassa, ānanda, vacchagottassa paribbājakassa bhiyyo sammohāya abhavissa – ‘ahuvā me nūna pubbe attā, so etarahi natthī’’’ti. Dasamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. ཨཱནནྡསུཏྟཝཎྞནཱ • 10. Ānandasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡༠. ཨཱནནྡསུཏྟཝཎྞནཱ • 10. Ānandasuttavaṇṇanā
