| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൧൦. ആനന്ദസുത്തം
10. Ānandasuttaṃ
൨൧. സാവത്ഥിയം … ആരാമേ. അഥ ഖോ ആയസ്മാ ആനന്ദോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ ആനന്ദോ ഭഗവന്തം ഏതദവോച – ‘‘‘നിരോധോ നിരോധോ’തി, ഭന്തേ, വുച്ചതി. കതമേസാനം ഖോ, ഭന്തേ, ധമ്മാനം നിരോധോ 1 ‘നിരോധോ’തി വുച്ചതീ’’തി? ‘‘രൂപം ഖോ, ആനന്ദ, അനിച്ചം സങ്ഖതം പടിച്ചസമുപ്പന്നം ഖയധമ്മം വയധമ്മം വിരാഗധമ്മം നിരോധധമ്മം. തസ്സ നിരോധോ 2 ‘നിരോധോ’തി വുച്ചതി. വേദനാ അനിച്ചാ സങ്ഖതാ പടിച്ചസമുപ്പന്നാ ഖയധമ്മാ വയധമ്മാ വിരാഗധമ്മാ നിരോധധമ്മാ. തസ്സാ നിരോധോ ‘നിരോധോ’തി വുച്ചതി. സഞ്ഞാ… സങ്ഖാരാ അനിച്ചാ സങ്ഖതാ പടിച്ചസമുപ്പന്നാ ഖയധമ്മാ വയധമ്മാ വിരാഗധമ്മാ നിരോധധമ്മാ. തേസം നിരോധോ ‘നിരോധോ’തി വുച്ചതി. വിഞ്ഞാണം അനിച്ചം സങ്ഖതം പടിച്ചസമുപ്പന്നം ഖയധമ്മം വയധമ്മം വിരാഗധമ്മം നിരോധധമ്മം. തസ്സ നിരോധോ ‘നിരോധോ’തി വുച്ചതി. ഇമേസം ഖോ, ആനന്ദ, ധമ്മാനം നിരോധോ ‘നിരോധോ’തി വുച്ചതീ’’തി. ദസമം.
21. Sāvatthiyaṃ … ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘‘nirodho nirodho’ti, bhante, vuccati. Katamesānaṃ kho, bhante, dhammānaṃ nirodho 3 ‘nirodho’ti vuccatī’’ti? ‘‘Rūpaṃ kho, ānanda, aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho 4 ‘nirodho’ti vuccati. Vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tassā nirodho ‘nirodho’ti vuccati. Saññā… saṅkhārā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tesaṃ nirodho ‘nirodho’ti vuccati. Viññāṇaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ. Tassa nirodho ‘nirodho’ti vuccati. Imesaṃ kho, ānanda, dhammānaṃ nirodho ‘nirodho’ti vuccatī’’ti. Dasamaṃ.
അനിച്ചവഗ്ഗോ ദുതിയോ.
Aniccavaggo dutiyo.
തസ്സുദ്ദാനം –
Tassuddānaṃ –
അനിച്ചം ദുക്ഖം അനത്താ, യദനിച്ചാപരേ തയോ;
Aniccaṃ dukkhaṃ anattā, yadaniccāpare tayo;
ഹേതുനാപി തയോ വുത്താ, ആനന്ദേന ച തേ ദസാതി.
Hetunāpi tayo vuttā, ānandena ca te dasāti.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൧-൧൦. അനിച്ചസുത്താദിവണ്ണനാ • 1-10. Aniccasuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൧-൧൦. അനിച്ചാദിസുത്തവണ്ണനാ • 1-10. Aniccādisuttavaṇṇanā
