4. ஆனந்த³ஸுத்தவண்ணனா

212. சதுத்தே² ராகோ³தி ஆயஸ்மா ஆனந்தோ³ மஹாபுஞ்ஞோ ஸம்பா⁴விதோ, தங் ராஜராஜமஹாமத்தாத³யோ நிமந்தெத்வா அந்தோனிவேஸனே நிஸீதா³பெந்தி. ஸப்³பா³லங்காரபடிமண்டி³தாபி இத்தி²யோ தே²ரங் உபஸங்கமித்வா வந்தி³த்வா தாலவண்டேன பீ³ஜெந்தி, உபனிஸீதி³த்வா பஞ்ஹங் புச்ச²ந்தி த⁴ம்மங் ஸுணந்தி. தத்த² ஆயஸ்மதோ வங்கீ³ஸஸ்ஸ நவபப்³ப³ஜிதஸ்ஸ ஆரம்மணங் பரிக்³க³ஹேதுங் அஸக்கொந்தஸ்ஸ இத்தி²ரூபாரம்மணே ராகோ³ சித்தங் அனுத்³த⁴ங்ஸேதி. ஸோ ஸத்³தா⁴பப்³ப³ஜிதத்தா உஜுஜாதிகோ குலபுத்தோ ‘‘அயங் மே ராகோ³ வட்³டி⁴த்வா தி³ட்ட²த⁴ம்மிகஸம்பராயிகங் அத்த²ங் நாஸெய்யா’’தி சிந்தெத்வா அனந்தரங் நிஸின்னோவ தே²ரஸ்ஸ அத்தானங் ஆவிகரொந்தோ காமராகே³னாதிஆதி³மாஹ.

தத்த² நிப்³பா³பனந்தி ராக³னிப்³பா³னகாரணங். விபரியேஸாதி விபல்லாஸேன. ஸுப⁴ங் ராகூ³பஸஞ்ஹிதந்தி ராக³ட்டா²னியங் இட்டா²ரம்மணங். பரதோ பஸ்ஸாதி அனிச்சதோ பஸ்ஸ. மா ச அத்ததோதி அத்ததோ மா பஸ்ஸ. காயக³தா த்யத்தூ²தி காயக³தா தே அத்து². அனிமித்தஞ்ச பா⁴வேஹீதி நிச்சாதீ³னங் நிமித்தானங் உக்³கா⁴டிதத்தா விபஸ்ஸனா அனிமித்தா நாம, தங் பா⁴வேஹீதி வத³தி. மானாபி⁴ஸமயாதி மானஸ்ஸ த³ஸ்ஸனாபி⁴ஸமயா சேவ பஹானாபி⁴ஸமயா ச. உபஸந்தோதி ராகா³தி³ஸந்ததாய உபஸந்தோ. சதுத்த²ங்.