| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. ஆனந்த³ஸுத்தவண்ணனா
5. Ānandasuttavaṇṇanā
225. பஞ்சமே ஆனந்தோ³தி த⁴ம்மப⁴ண்டா³கா³ரிகத்தே²ரோ. அதிவேலந்தி அதிக்கந்தங் வேலங். கி³ஹிஸஞ்ஞத்திப³ஹுலோதி ரத்திஞ்ச தி³வா ச ப³ஹுகாலங் கி³ஹீ ஸஞ்ஞாபயந்தோ. ப⁴க³வதி பரினிப்³பு³தே மஹாகஸ்ஸபத்தே²ரோ தே²ரங் ஆஹ – ‘‘ஆவுஸோ, மயங் ராஜக³ஹே வஸ்ஸங் உபக³ந்த்வா த⁴ம்மங் ஸங்கா³யிஸ்ஸாம, க³ச்ச² த்வங் அரஞ்ஞங் பவிஸித்வா உபரிமக்³க³த்தயத்தா²ய வாயாமங் கரோஹீ’’தி. ஸோ ப⁴க³வதோ பத்தசீவரமாதா³ய கோஸலரட்ட²ங் க³ந்த்வா ஏகஸ்மிங் அரஞ்ஞாவாஸே வஸித்வா புனதி³வஸே ஏகங் கா³மங் பாவிஸி. மனுஸ்ஸா தே²ரங் தி³ஸ்வா – ‘‘ப⁴ந்தே ஆனந்த³, தும்ஹே புப்³பே³ ஸத்தா²ரா ஸத்³தி⁴ங் ஆக³ச்ச²த². அஜ்ஜ ஏககாவ ஆக³தா. கஹங் ஸத்தா²ரங் ட²பெத்வா ஆக³தத்த²? இதா³னி கஸ்ஸ பத்தசீவரங் க³ஹெத்வா விசரத²? கஸ்ஸ முகோ²த³கங் த³ந்தகட்ட²ங் தே³த², பரிவேணங் ஸம்மஜ்ஜத², வத்தபடிவத்தங் கரோதா²’’தி ப³ஹுங் வத்வா பரிதே³விங்ஸு. தே²ரோ – ‘‘மா, ஆவுஸோ, ஸோசித்த², மா பரிதே³வித்த², அனிச்சா ஸங்கா²ரா’’திஆதீ³னி வத்வா தே ஸஞ்ஞாபெத்வா ப⁴த்தகிச்சாவஸானே வஸனட்டா²னமேவ க³ச்ச²தி. மனுஸ்ஸா ஸாயம்பி தத்த² க³ந்த்வா ததே²வ பரிதே³வந்தி. தே²ரோபி ததே²வ ஓவத³தி. தங் ஸந்தா⁴யேதங் வுத்தங். அஜ்ஜ²பா⁴ஸீதி ‘‘அயங் தே²ரோ பி⁴க்கு²ஸங்க⁴ஸ்ஸ கத²ங் ஸுத்வா ‘ஸமணத⁴ம்மங் கரிஸ்ஸாமீ’தி அரஞ்ஞங் பவிஸித்வா இதா³னி கி³ஹீ ஸஞ்ஞாபெந்தோ விஹரதி, ஸத்து² ஸாஸனங் அஸங்க³ஹிதபுப்ப²ராஸி விய டி²தங், த⁴ம்மஸங்க³ஹங் ந கரோதி, சோதெ³ஸ்ஸாமி ந’’ந்தி சிந்தெத்வா அபா⁴ஸி.
225. Pañcame ānandoti dhammabhaṇḍāgārikatthero. Ativelanti atikkantaṃ velaṃ. Gihisaññattibahuloti rattiñca divā ca bahukālaṃ gihī saññāpayanto. Bhagavati parinibbute mahākassapatthero theraṃ āha – ‘‘āvuso, mayaṃ rājagahe vassaṃ upagantvā dhammaṃ saṅgāyissāma, gaccha tvaṃ araññaṃ pavisitvā uparimaggattayatthāya vāyāmaṃ karohī’’ti. So bhagavato pattacīvaramādāya kosalaraṭṭhaṃ gantvā ekasmiṃ araññāvāse vasitvā punadivase ekaṃ gāmaṃ pāvisi. Manussā theraṃ disvā – ‘‘bhante ānanda, tumhe pubbe satthārā saddhiṃ āgacchatha. Ajja ekakāva āgatā. Kahaṃ satthāraṃ ṭhapetvā āgatattha? Idāni kassa pattacīvaraṃ gahetvā vicaratha? Kassa mukhodakaṃ dantakaṭṭhaṃ detha, pariveṇaṃ sammajjatha, vattapaṭivattaṃ karothā’’ti bahuṃ vatvā parideviṃsu. Thero – ‘‘mā, āvuso, socittha, mā paridevittha, aniccā saṅkhārā’’tiādīni vatvā te saññāpetvā bhattakiccāvasāne vasanaṭṭhānameva gacchati. Manussā sāyampi tattha gantvā tatheva paridevanti. Theropi tatheva ovadati. Taṃ sandhāyetaṃ vuttaṃ. Ajjhabhāsīti ‘‘ayaṃ thero bhikkhusaṅghassa kathaṃ sutvā ‘samaṇadhammaṃ karissāmī’ti araññaṃ pavisitvā idāni gihī saññāpento viharati, satthu sāsanaṃ asaṅgahitapuppharāsi viya ṭhitaṃ, dhammasaṅgahaṃ na karoti, codessāmi na’’nti cintetvā abhāsi.
பஸக்கியாதி பவிஸித்வா. ஹத³யஸ்மிங் ஓபியாதி கிச்சதோ ச ஆரம்மணதோ ச ஹத³யம்ஹி பக்கி²பித்வா. ‘‘நிப்³பா³னங் பாபுணிஸ்ஸாமீ’’தி வீரியங் கரொந்தோ நிப்³பா³னங் கிச்சதோ ஹத³யம்ஹி ஓபேதி நாம, நிப்³பா³னாரம்மணங் பன ஸமாபத்திங் அப்பெத்வா நிஸீத³ந்தோ ஆரம்மணதோ. தது³ப⁴யம்பி ஸந்தா⁴யேஸா பா⁴ஸதி. ஜா²யாதி த்³வீஹி ஜா²னேஹி ஜா²யிகோ ப⁴வ. பி³ளிபி³ளிகாதி அயங் கி³ஹீஹி ஸத்³தி⁴ங் பி³ளிபி³ளிகதா². பஞ்சமங்.
Pasakkiyāti pavisitvā. Hadayasmiṃ opiyāti kiccato ca ārammaṇato ca hadayamhi pakkhipitvā. ‘‘Nibbānaṃ pāpuṇissāmī’’ti vīriyaṃ karonto nibbānaṃ kiccato hadayamhi opeti nāma, nibbānārammaṇaṃ pana samāpattiṃ appetvā nisīdanto ārammaṇato. Tadubhayampi sandhāyesā bhāsati. Jhāyāti dvīhi jhānehi jhāyiko bhava. Biḷibiḷikāti ayaṃ gihīhi saddhiṃ biḷibiḷikathā. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஆனந்த³ஸுத்தங் • 5. Ānandasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஆனந்த³ஸுத்தவண்ணனா • 5. Ānandasuttavaṇṇanā
