| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. ஆனந்த³ஸுத்தவண்ணனா
2. Ānandasuttavaṇṇanā
32. து³தியே ததா²ஜாதிகோதி ததா²ஸபா⁴வோ. சித்தேகக்³க³தாலாபோ⁴தி சித்தேகக்³க³தாய அதி⁴க³மோ. ரூபமேவ கிலேஸுப்பத்தியா காரணபா⁴வதோ ரூபனிமித்தங். ஏஸ நயோ ஸேஸேஸுபி. ஸஸ்ஸதாதி³னிமித்தந்தி ஸஸ்ஸதுச்சே²த³பா⁴வனிமித்தங். புக்³க³லனிமித்தந்தி புக்³க³லாபி⁴னிவேஸனநிமித்தங். த⁴ம்மனிமித்தந்தி த⁴ம்மாரம்மணஸங்கா²தங் நிமித்தங். ‘‘ஸியா நு கோ², ப⁴ந்தே’’தி தே²ரேன புட்டோ² ப⁴க³வா ‘‘ஸியா’’தி அவோச லோகுத்தரஸமாதி⁴ப்படிலாப⁴ங் ஸந்தா⁴ய. ஸோ ஹி நிப்³பா³னங் ஸந்தங் பணீதந்தி ச பஸ்ஸதி. தேனாஹ ‘‘இதா⁴னந்தா³’’திஆதி³.
32. Dutiye tathājātikoti tathāsabhāvo. Cittekaggatālābhoti cittekaggatāya adhigamo. Rūpameva kilesuppattiyā kāraṇabhāvato rūpanimittaṃ. Esa nayo sesesupi. Sassatādinimittanti sassatucchedabhāvanimittaṃ. Puggalanimittanti puggalābhinivesananimittaṃ. Dhammanimittanti dhammārammaṇasaṅkhātaṃ nimittaṃ. ‘‘Siyā nu kho, bhante’’ti therena puṭṭho bhagavā ‘‘siyā’’ti avoca lokuttarasamādhippaṭilābhaṃ sandhāya. So hi nibbānaṃ santaṃ paṇītanti ca passati. Tenāha ‘‘idhānandā’’tiādi.
நிப்³பா³னங் ஸந்தந்தி ஸமாபத்திங் அப்பெத்வாதி நிப்³பா³னங் ஸந்தந்தி ஆபு⁴ஜித்வா ப²லஸமாபத்திங் அப்பெத்வா . தி³வஸம்பீதிஆதி³னா அஸங்க²தாய தா⁴துயா அச்சந்தஸந்தபணீதாதி³பா⁴வங் த³ஸ்ஸேதி. அட்ட²விதே⁴தி ‘‘ஸந்தங் பணீதங் ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴ நிப்³பா³ன’’ந்தி ஏவங் அட்ட²விதே⁴ ஆபோ⁴க³ஸஞ்ஞிதே ஸமன்னாஹாரே. நித்³தா⁴ரணே சேதங் பு⁴ம்மங். இமஸ்மிங் டா²னே…பே॰… லப்³ப⁴ந்தேவாதி ‘‘இதா⁴னந்த³, பி⁴க்கு²னோ ஏவங் ஹோதீ’’தி ஆக³தே இமஸ்மிங் ஸுத்தப்பதே³ஸே ஏகோபி ஆபோ⁴க³ஸமன்னாஹாரோ சேபி ஸப்³பே³ அட்ட²பி ஆபோ⁴க³ஸமன்னாஹாரா லப்³ப⁴ந்தேவ ஸமன்னாஹரதங் அத்தா²வஹத்தா.
Nibbānaṃsantanti samāpattiṃ appetvāti nibbānaṃ santanti ābhujitvā phalasamāpattiṃ appetvā . Divasampītiādinā asaṅkhatāya dhātuyā accantasantapaṇītādibhāvaṃ dasseti. Aṭṭhavidheti ‘‘santaṃ paṇītaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbāna’’nti evaṃ aṭṭhavidhe ābhogasaññite samannāhāre. Niddhāraṇe cetaṃ bhummaṃ. Imasmiṃ ṭhāne…pe… labbhantevāti ‘‘idhānanda, bhikkhuno evaṃ hotī’’ti āgate imasmiṃ suttappadese ekopi ābhogasamannāhāro cepi sabbe aṭṭhapi ābhogasamannāhārā labbhanteva samannāharataṃ atthāvahattā.
ஞாணேன ஜானித்வாதி விபஸ்ஸனாஞாணஸஹிதேன மக்³க³ஞாணேன ஜானித்வா. பரானி ச ஓபரானி ச சக்கா²தீ³னி ஆயதனானி. ஸந்ததாயாதி படிப்பஸ்ஸத்³தி⁴தாய. காயது³ச்சரிதாதி³தூ⁴மவிரஹிதோதி காயது³ச்சரிதாதி³ ஏவ ஸந்தாபனட்டே²ன தூ⁴மோ, தேன விரஹிதோ. அனீகோ⁴தி அபாபோ. ஜாதிஜராக³ஹணேனேவ ப்³யாதி⁴மரணம்பி க³ஹிதமேவாதி தப்³பா⁴வபா⁴வதோதி வுத்தங்.
Ñāṇena jānitvāti vipassanāñāṇasahitena maggañāṇena jānitvā. Parāni ca oparāni ca cakkhādīni āyatanāni. Santatāyāti paṭippassaddhitāya. Kāyaduccaritādidhūmavirahitoti kāyaduccaritādi eva santāpanaṭṭhena dhūmo, tena virahito. Anīghoti apāpo. Jātijarāgahaṇeneva byādhimaraṇampi gahitamevāti tabbhāvabhāvatoti vuttaṃ.
ஆனந்த³ஸுத்தவண்ணனா நிட்டி²தா.
Ānandasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஆனந்த³ஸுத்தங் • 2. Ānandasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. ஆனந்த³ஸுத்தவண்ணனா • 2. Ānandasuttavaṇṇanā
