| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. আনন্দসুত্তৰণ্ণনা
5. Ānandasuttavaṇṇanā
২২৫. পঞ্চমে আনন্দোতি ধম্মভণ্ডাগারিকত্থেরো। অতিৰেলন্তি অতিক্কন্তং ৰেলং। গিহিসঞ্ঞত্তিবহুলোতি রত্তিঞ্চ দিৰা চ বহুকালং গিহী সঞ্ঞাপযন্তো। ভগৰতি পরিনিব্বুতে মহাকস্সপত্থেরো থেরং আহ – ‘‘আৰুসো, মযং রাজগহে ৰস্সং উপগন্ত্ৰা ধম্মং সঙ্গাযিস্সাম, গচ্ছ ত্ৰং অরঞ্ঞং পৰিসিত্ৰা উপরিমগ্গত্তযত্থায ৰাযামং করোহী’’তি। সো ভগৰতো পত্তচীৰরমাদায কোসলরট্ঠং গন্ত্ৰা একস্মিং অরঞ্ঞাৰাসে ৰসিত্ৰা পুনদিৰসে একং গামং পাৰিসি। মনুস্সা থেরং দিস্ৰা – ‘‘ভন্তে আনন্দ, তুম্হে পুব্বে সত্থারা সদ্ধিং আগচ্ছথ। অজ্জ এককাৰ আগতা। কহং সত্থারং ঠপেত্ৰা আগতত্থ? ইদানি কস্স পত্তচীৰরং গহেত্ৰা ৰিচরথ? কস্স মুখোদকং দন্তকট্ঠং দেথ, পরিৰেণং সম্মজ্জথ, ৰত্তপটিৰত্তং করোথা’’তি বহুং ৰত্ৰা পরিদেৰিংসু। থেরো – ‘‘মা, আৰুসো, সোচিত্থ, মা পরিদেৰিত্থ, অনিচ্চা সঙ্খারা’’তিআদীনি ৰত্ৰা তে সঞ্ঞাপেত্ৰা ভত্তকিচ্চাৰসানে ৰসনট্ঠানমেৰ গচ্ছতি। মনুস্সা সাযম্পি তত্থ গন্ত্ৰা তথেৰ পরিদেৰন্তি। থেরোপি তথেৰ ওৰদতি। তং সন্ধাযেতং ৰুত্তং। অজ্ঝভাসীতি ‘‘অযং থেরো ভিক্খুসঙ্ঘস্স কথং সুত্ৰা ‘সমণধম্মং করিস্সামী’তি অরঞ্ঞং পৰিসিত্ৰা ইদানি গিহী সঞ্ঞাপেন্তো ৰিহরতি, সত্থু সাসনং অসঙ্গহিতপুপ্ফরাসি ৰিয ঠিতং, ধম্মসঙ্গহং ন করোতি, চোদেস্সামি ন’’ন্তি চিন্তেত্ৰা অভাসি।
225. Pañcame ānandoti dhammabhaṇḍāgārikatthero. Ativelanti atikkantaṃ velaṃ. Gihisaññattibahuloti rattiñca divā ca bahukālaṃ gihī saññāpayanto. Bhagavati parinibbute mahākassapatthero theraṃ āha – ‘‘āvuso, mayaṃ rājagahe vassaṃ upagantvā dhammaṃ saṅgāyissāma, gaccha tvaṃ araññaṃ pavisitvā uparimaggattayatthāya vāyāmaṃ karohī’’ti. So bhagavato pattacīvaramādāya kosalaraṭṭhaṃ gantvā ekasmiṃ araññāvāse vasitvā punadivase ekaṃ gāmaṃ pāvisi. Manussā theraṃ disvā – ‘‘bhante ānanda, tumhe pubbe satthārā saddhiṃ āgacchatha. Ajja ekakāva āgatā. Kahaṃ satthāraṃ ṭhapetvā āgatattha? Idāni kassa pattacīvaraṃ gahetvā vicaratha? Kassa mukhodakaṃ dantakaṭṭhaṃ detha, pariveṇaṃ sammajjatha, vattapaṭivattaṃ karothā’’ti bahuṃ vatvā parideviṃsu. Thero – ‘‘mā, āvuso, socittha, mā paridevittha, aniccā saṅkhārā’’tiādīni vatvā te saññāpetvā bhattakiccāvasāne vasanaṭṭhānameva gacchati. Manussā sāyampi tattha gantvā tatheva paridevanti. Theropi tatheva ovadati. Taṃ sandhāyetaṃ vuttaṃ. Ajjhabhāsīti ‘‘ayaṃ thero bhikkhusaṅghassa kathaṃ sutvā ‘samaṇadhammaṃ karissāmī’ti araññaṃ pavisitvā idāni gihī saññāpento viharati, satthu sāsanaṃ asaṅgahitapuppharāsi viya ṭhitaṃ, dhammasaṅgahaṃ na karoti, codessāmi na’’nti cintetvā abhāsi.
পসক্কিযাতি পৰিসিত্ৰা। হদযস্মিং ওপিযাতি কিচ্চতো চ আরম্মণতো চ হদযম্হি পক্খিপিত্ৰা। ‘‘নিব্বানং পাপুণিস্সামী’’তি ৰীরিযং করোন্তো নিব্বানং কিচ্চতো হদযম্হি ওপেতি নাম, নিব্বানারম্মণং পন সমাপত্তিং অপ্পেত্ৰা নিসীদন্তো আরম্মণতো। তদুভযম্পি সন্ধাযেসা ভাসতি। ঝাযাতি দ্ৰীহি ঝানেহি ঝাযিকো ভৰ। বিল়িবিল়িকাতি অযং গিহীহি সদ্ধিং বিল়িবিল়িকথা। পঞ্চমং।
Pasakkiyāti pavisitvā. Hadayasmiṃ opiyāti kiccato ca ārammaṇato ca hadayamhi pakkhipitvā. ‘‘Nibbānaṃ pāpuṇissāmī’’ti vīriyaṃ karonto nibbānaṃ kiccato hadayamhi opeti nāma, nibbānārammaṇaṃ pana samāpattiṃ appetvā nisīdanto ārammaṇato. Tadubhayampi sandhāyesā bhāsati. Jhāyāti dvīhi jhānehi jhāyiko bhava. Biḷibiḷikāti ayaṃ gihīhi saddhiṃ biḷibiḷikathā. Pañcamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. আনন্দসুত্তং • 5. Ānandasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. আনন্দসুত্তৰণ্ণনা • 5. Ānandasuttavaṇṇanā
