| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. আনন্দসুত্তৰণ্ণনা
5. Ānandasuttavaṇṇanā
২২৫. অতিৰেলন্তি অতিবহুকালং। ভিক্খুনা নাম উপগতানং উপনিসিন্নকথামত্তং ৰত্ৰা গন্থধুরেহি ৰাসধুরেহি ৰা যুত্তপযুত্তচিত্তেন ভৰিতব্বং, নাতিৰেলং তেসং সঞ্ঞত্তিবহুলেন। থেরো পন তদা কেনচি কারণেন বহুৰেলং গিহিসঞ্ঞত্তিবহুলো অহোসি, তং সন্ধায ৰুত্তং ‘‘অতিৰেল’’ন্তিআদি। ইদানি তমত্থং ৰিভাৰেতুং ‘‘ভগৰতী’’তিআদি ৰুত্তং। তন্তি তং তাদিসং সঞ্ঞাপনং সন্ধায এতং ‘‘অতিৰেলং গিহিসঞ্ঞত্তিবহুলো’’তি ৰচনং ৰুত্তং। ভিক্খুসঙ্ঘস্স কথং সুত্ৰাতি সঙ্ঘস্স মজ্ঝে নিসীদিত্ৰা থেরেন কথিতত্তা ৰুত্তং। সত্থুসাসনন্তি পিটকত্তযং ৰদতি।
225.Ativelanti atibahukālaṃ. Bhikkhunā nāma upagatānaṃ upanisinnakathāmattaṃ vatvā ganthadhurehi vāsadhurehi vā yuttapayuttacittena bhavitabbaṃ, nātivelaṃ tesaṃ saññattibahulena. Thero pana tadā kenaci kāraṇena bahuvelaṃ gihisaññattibahulo ahosi, taṃ sandhāya vuttaṃ ‘‘ativela’’ntiādi. Idāni tamatthaṃ vibhāvetuṃ ‘‘bhagavatī’’tiādi vuttaṃ. Tanti taṃ tādisaṃ saññāpanaṃ sandhāya etaṃ ‘‘ativelaṃ gihisaññattibahulo’’ti vacanaṃ vuttaṃ. Bhikkhusaṅghassa kathaṃ sutvāti saṅghassa majjhe nisīditvā therena kathitattā vuttaṃ. Satthusāsananti piṭakattayaṃ vadati.
পসক্কিযাতি উপসক্কিত্ৰা গন্ত্ৰা। তং পন তত্থ অজ্ঝোগাহনং হোতীতি আহ ‘‘পৰিসিত্ৰা’’তি। সঙ্খারদুক্খতো নিব্বিন্নহদযস্স সব্বসঙ্খারৰিনিস্সটং নিব্বানং যাথাৰতো পচ্চৰেক্খন্তস্স সম্মদেৰ সমস্সাসকরং হুত্ৰা উপট্ঠহন্তং তং উপরি অধিগমায উস্সুক্কং করোন্তো নিব্বানং হদযে নিক্খিপতি নামাতি আহ – ‘‘নিব্বানং…পে॰… ওপেতি নামা’’তি। নিব্বানং…পে॰… আরম্মণতো ওপেতি নামাতি আনেত্ৰা সম্বন্ধো। অত্থৰিরহিতা ‘‘বিল়িবিল়ী’’তি পৰত্তকিরিযা বিল়িকা, অযং পন গিহিসঞ্ঞত্তিকথা থেরস্স অত্তনো সামঞ্ঞত্থঅসাধনতো দেৰতায বিল়িকা ৰিযাতি বিল়িবিল়িকাতি ৰুত্তা।
Pasakkiyāti upasakkitvā gantvā. Taṃ pana tattha ajjhogāhanaṃ hotīti āha ‘‘pavisitvā’’ti. Saṅkhāradukkhato nibbinnahadayassa sabbasaṅkhāravinissaṭaṃ nibbānaṃ yāthāvato paccavekkhantassa sammadeva samassāsakaraṃ hutvā upaṭṭhahantaṃ taṃ upari adhigamāya ussukkaṃ karonto nibbānaṃ hadaye nikkhipati nāmāti āha – ‘‘nibbānaṃ…pe… opeti nāmā’’ti. Nibbānaṃ…pe… ārammaṇato opeti nāmāti ānetvā sambandho. Atthavirahitā ‘‘biḷibiḷī’’ti pavattakiriyā biḷikā, ayaṃ pana gihisaññattikathā therassa attano sāmaññatthaasādhanato devatāya biḷikā viyāti biḷibiḷikāti vuttā.
আনন্দসুত্তৰণ্ণনা নিট্ঠিতা।
Ānandasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. আনন্দসুত্তং • 5. Ānandasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. আনন্দসুত্তৰণ্ণনা • 5. Ānandasuttavaṇṇanā
