| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. থেরৰগ্গো
9. Theravaggo
১. আনন্দসুত্তৰণ্ণনা
1. Ānandasuttavaṇṇanā
৮৩. পটিচ্চাতি নিস্সযং কত্ৰা। ‘‘এসোহমস্মী’’তি দিট্ঠিগ্গাহো, ‘‘সেয্যোহমস্মী’’তি মানগ্গাহো চ তণ্হাৰসেনেৰ হোন্তীতি তণ্হাপি তথাপৰত্তিযা পচ্চযভূতা তথাপৰত্তি এৰাতি ৰুত্তং ‘‘অস্মীতি এৰং পৰত্তং তণ্হামানদিট্ঠিপপঞ্চত্তযং হোতী’’তি। দহরসদ্দো বালদারকেপি পৰত্ততীতি ততো ৰিসেসনত্থং ‘‘যুৰা’’তি ৰুত্তং। যুৰাপি একো অমণ্ডনসীলোতি ততো ৰিসেসনত্থং ‘‘মণ্ডনকজাতিকো’’তি ৰুত্তং। তেন মুখনিমিত্তপচ্চৰেক্খণস্স সব্ভাৰং দস্সেতি। তন্তি আদাসমণ্ডলং ওলোকযতো। পরম্মুখং হুত্ৰা পঞ্ঞাযেয্যাতি যদি পুরত্থিমদিসাভিমুখং হুত্ৰা ঠিতং, মুখনিমিত্তম্পি পুরত্থিমদিসাভিমুখমেৰ হুত্ৰা পঞ্ঞাযেয্যাতি অত্থো। যদিপি পরস্স সদিসস্স মুখং ভৰেয্য, তথাপি কাচি অসদিসতা ভৰেয্যাতি ৰুত্তং ‘‘ৰণ্ণাদীহি অসদিসং হুত্ৰা পঞ্ঞাযেয্যা’’তি। নিভাসরূপন্তি পটিভাসরূপং। নিভাসরূপং তাৰ কংসাদিমযে পভস্সরে মণ্ডলে পঞ্ঞাযতু, উদকে পন কথন্তি ‘‘কেন কারণেনা’’তি পুচ্ছতি। ইতরো ‘‘মহাভূতানং ৰিসুদ্ধতাযা’’তি ৰদন্তো তত্থাপি যথালদ্ধপভস্সরভাৰেনেৰাতি দস্সেতি। এত্থ চ মণ্ডনজাতিকো পুরিসো ৰিয পুথুজ্জনো, আদাসতলাদযো ৰিয পঞ্চক্খন্ধা, মুখনিমিত্তং ৰিয ‘‘অস্মী’’তি গহণং, মুখনিমিত্তং উপাদায দিস্সমানরূপাদি ৰিয ‘‘অস্মী’’তি সতি ‘‘অহমস্মী’’তি ‘‘পরোস্মী’’তিআদযো গাহৰিসেসা। অভিসমেতোতি অভিসমিতো, অযমেৰ ৰা পাঠো।
83.Paṭiccāti nissayaṃ katvā. ‘‘Esohamasmī’’ti diṭṭhiggāho, ‘‘seyyohamasmī’’ti mānaggāho ca taṇhāvaseneva hontīti taṇhāpi tathāpavattiyā paccayabhūtā tathāpavatti evāti vuttaṃ ‘‘asmīti evaṃ pavattaṃ taṇhāmānadiṭṭhipapañcattayaṃ hotī’’ti. Daharasaddo bāladārakepi pavattatīti tato visesanatthaṃ ‘‘yuvā’’ti vuttaṃ. Yuvāpi eko amaṇḍanasīloti tato visesanatthaṃ ‘‘maṇḍanakajātiko’’ti vuttaṃ. Tena mukhanimittapaccavekkhaṇassa sabbhāvaṃ dasseti. Tanti ādāsamaṇḍalaṃ olokayato. Parammukhaṃ hutvā paññāyeyyāti yadi puratthimadisābhimukhaṃ hutvā ṭhitaṃ, mukhanimittampi puratthimadisābhimukhameva hutvā paññāyeyyāti attho. Yadipi parassa sadisassa mukhaṃ bhaveyya, tathāpi kāci asadisatā bhaveyyāti vuttaṃ ‘‘vaṇṇādīhi asadisaṃ hutvā paññāyeyyā’’ti. Nibhāsarūpanti paṭibhāsarūpaṃ. Nibhāsarūpaṃ tāva kaṃsādimaye pabhassare maṇḍale paññāyatu, udake pana kathanti ‘‘kena kāraṇenā’’ti pucchati. Itaro ‘‘mahābhūtānaṃ visuddhatāyā’’ti vadanto tatthāpi yathāladdhapabhassarabhāvenevāti dasseti. Ettha ca maṇḍanajātiko puriso viya puthujjano, ādāsatalādayo viya pañcakkhandhā, mukhanimittaṃ viya ‘‘asmī’’ti gahaṇaṃ, mukhanimittaṃ upādāya dissamānarūpādi viya ‘‘asmī’’ti sati ‘‘ahamasmī’’ti ‘‘parosmī’’tiādayo gāhavisesā. Abhisametoti abhisamito, ayameva vā pāṭho.
আনন্দসুত্তৰণ্ণনা নিট্ঠিতা।
Ānandasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. আনন্দসুত্তং • 1. Ānandasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. আনন্দসুত্তৰণ্ণনা • 1. Ānandasuttavaṇṇanā
