| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๙. อานนฺทสุตฺตวณฺณนา
9. Ānandasuttavaṇṇanā
๕๑. นวเม กิตฺตาวตาติ กิตฺตเกนฯ อสฺสุตเญฺจวาติ อญฺญสฺมิํ กาเล อสฺสุตปุพฺพํฯ น สโมฺมสํ คจฺฉนฺตีติ วินาสํ น คจฺฉนฺติฯ เจตโส สมฺผุฎฺฐปุพฺพาติ จิเตฺตน ผุสิตปุพฺพาฯ สมุทาจรนฺตีติ มโนทฺวาเร จรนฺติฯ อวิญฺญาตญฺจ วิชานาตีติ อญฺญสฺมิํ กาเล อวิญฺญาตการณํ ชานาติฯ ปริยาปุณาตีติ วฬเญฺชติ กเถติฯ เทเสตีติ ปกาเสติฯ ปรํ วาเจตีติ ปรํ อุคฺคณฺหาเปติฯ
51. Navame kittāvatāti kittakena. Assutañcevāti aññasmiṃ kāle assutapubbaṃ. Na sammosaṃ gacchantīti vināsaṃ na gacchanti. Cetaso samphuṭṭhapubbāti cittena phusitapubbā. Samudācarantīti manodvāre caranti. Aviññātañca vijānātīti aññasmiṃ kāle aviññātakāraṇaṃ jānāti. Pariyāpuṇātīti vaḷañjeti katheti. Desetīti pakāseti. Paraṃ vācetīti paraṃ uggaṇhāpeti.
อาคตาคมาติ ทีฆาทีสุ โย โกจิ อาคโม อาคโต เอเตสนฺติ อาคตาคมาฯ ธมฺมธราติ สุตฺตนฺตปิฎกธราฯ วินยธราติ วินยปิฎกธราฯ มาติกาธราติ เทฺวปาติโมกฺขธราฯ ปริปุจฺฉตีติ อนุสนฺธิปุพฺพาปรํ ปุจฺฉติฯ ปริปญฺหตีติ อิทญฺจิทญฺจ ปุจฺฉิสฺสามีติ ปริตุลติ ปริจฺฉินฺทติฯ อิทํ, ภเนฺต, กถนฺติ, ภเนฺต, อิทํ อนุสนฺธิปุพฺพาปรํ กถํ โหตีติ ปุจฺฉติฯ อิมสฺส กฺวโตฺถติ อิมสฺส ภาสิตสฺส โก อโตฺถติ ปุจฺฉติฯ อวิวฎนฺติ อวิวริตํฯ วิวรนฺตีติ ปากฎํ กโรนฺติฯ กงฺขาฐานิเยสูติ กงฺขาย การณภูเตสุฯ ตตฺถ ยสฺมิํ ธเมฺม กงฺขา อุปฺปชฺชติ, เสฺวว กงฺขาฐานิโย นามาติ เวทิตโพฺพฯ
Āgatāgamāti dīghādīsu yo koci āgamo āgato etesanti āgatāgamā. Dhammadharāti suttantapiṭakadharā. Vinayadharāti vinayapiṭakadharā. Mātikādharāti dvepātimokkhadharā. Paripucchatīti anusandhipubbāparaṃ pucchati. Paripañhatīti idañcidañca pucchissāmīti paritulati paricchindati. Idaṃ, bhante, kathanti, bhante, idaṃ anusandhipubbāparaṃ kathaṃ hotīti pucchati. Imassa kvatthoti imassa bhāsitassa ko atthoti pucchati. Avivaṭanti avivaritaṃ. Vivarantīti pākaṭaṃ karonti. Kaṅkhāṭhāniyesūti kaṅkhāya kāraṇabhūtesu. Tattha yasmiṃ dhamme kaṅkhā uppajjati, sveva kaṅkhāṭhāniyo nāmāti veditabbo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๙. อานนฺทสุตฺตํ • 9. Ānandasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๙. อานนฺทสุตฺตวณฺณนา • 9. Ānandasuttavaṇṇanā
