| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
១០. អានន្ទសុត្តវណ្ណនា
10. Ānandasuttavaṇṇanā
១៥៩. ទសមេ ឧបសង្កមីតិ អញ្ញេ ភិក្ខូ បញ្ចក្ខន្ធកម្មដ្ឋានំ កថាបេត្វា យុញ្ជិត្វា ឃដេត្វា អរហត្តំ បត្វា សត្ថុ សន្តិកេ អញ្ញំ ព្យាករោន្តេ ទិស្វា ‘‘អហម្បិ បញ្ចក្ខន្ធកម្មដ្ឋានំ កថាបេត្វា យុញ្ជន្តោ ឃដេន្តោ, អរហត្តំ បត្វា អញ្ញំ ព្យាករិស្សាមី’’តិ ចិន្តេត្វា ឧបសង្កមិ។ សត្ថា បន អត្តនោ ធរមានកាលេ ថេរស្ស ឧបរិមគ្គត្តយវជ្ឈានំ កិលេសានំ បហានំ អបស្សន្តោបិ ‘‘ឥមស្ស ចិត្តំ គណ្ហិស្សាមី’’តិ កថេសិ។ តស្សាបិ ឯកំ ទ្វេ វារេ មនសិ កត្វាវ ពុទ្ធុបដ្ឋានវេលា ជាតាតិ គន្តព្ពំ ហោតិ។ ឥតិស្ស ចិត្តំ សម្បហំសមានោ វិមុត្តិបរិបាចនីយធម្មោវ សោ កម្មដ្ឋានានុយោគោ ជាតោតិ។ ទសមំ។
159. Dasame upasaṅkamīti aññe bhikkhū pañcakkhandhakammaṭṭhānaṃ kathāpetvā yuñjitvā ghaṭetvā arahattaṃ patvā satthu santike aññaṃ byākaronte disvā ‘‘ahampi pañcakkhandhakammaṭṭhānaṃ kathāpetvā yuñjanto ghaṭento, arahattaṃ patvā aññaṃ byākarissāmī’’ti cintetvā upasaṅkami. Satthā pana attano dharamānakāle therassa uparimaggattayavajjhānaṃ kilesānaṃ pahānaṃ apassantopi ‘‘imassa cittaṃ gaṇhissāmī’’ti kathesi. Tassāpi ekaṃ dve vāre manasi katvāva buddhupaṭṭhānavelā jātāti gantabbaṃ hoti. Itissa cittaṃ sampahaṃsamāno vimuttiparipācanīyadhammova so kammaṭṭhānānuyogo jātoti. Dasamaṃ.
ទិដ្ឋិវគ្គោ បន្នរសមោ។
Diṭṭhivaggo pannarasamo.
ឧបរិបណ្ណាសកោ សមត្តោ។
Uparipaṇṇāsako samatto.
ខន្ធសំយុត្តវណ្ណនា និដ្ឋិតា។
Khandhasaṃyuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. អានន្ទសុត្តំ • 10. Ānandasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០.អានន្ទសុត្តវណ្ណនា • 10.Ānandasuttavaṇṇanā
