| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៥. អានន្ទសុត្តវណ្ណនា
5. Ānandasuttavaṇṇanā
២២៥. អតិវេលន្តិ អតិពហុកាលំ។ ភិក្ខុនា នាម ឧបគតានំ ឧបនិសិន្នកថាមត្តំ វត្វា គន្ថធុរេហិ វាសធុរេហិ វា យុត្តបយុត្តចិត្តេន ភវិតព្ពំ, នាតិវេលំ តេសំ សញ្ញត្តិពហុលេន។ ថេរោ បន តទា កេនចិ ការណេន ពហុវេលំ គិហិសញ្ញត្តិពហុលោ អហោសិ, តំ សន្ធាយ វុត្តំ ‘‘អតិវេល’’ន្តិអាទិ។ ឥទានិ តមត្ថំ វិភាវេតុំ ‘‘ភគវតី’’តិអាទិ វុត្តំ។ តន្តិ តំ តាទិសំ សញ្ញាបនំ សន្ធាយ ឯតំ ‘‘អតិវេលំ គិហិសញ្ញត្តិពហុលោ’’តិ វចនំ វុត្តំ។ ភិក្ខុសង្ឃស្ស កថំ សុត្វាតិ សង្ឃស្ស មជ្ឈេ និសីទិត្វា ថេរេន កថិតត្តា វុត្តំ។ សត្ថុសាសនន្តិ បិដកត្តយំ វទតិ។
225.Ativelanti atibahukālaṃ. Bhikkhunā nāma upagatānaṃ upanisinnakathāmattaṃ vatvā ganthadhurehi vāsadhurehi vā yuttapayuttacittena bhavitabbaṃ, nātivelaṃ tesaṃ saññattibahulena. Thero pana tadā kenaci kāraṇena bahuvelaṃ gihisaññattibahulo ahosi, taṃ sandhāya vuttaṃ ‘‘ativela’’ntiādi. Idāni tamatthaṃ vibhāvetuṃ ‘‘bhagavatī’’tiādi vuttaṃ. Tanti taṃ tādisaṃ saññāpanaṃ sandhāya etaṃ ‘‘ativelaṃ gihisaññattibahulo’’ti vacanaṃ vuttaṃ. Bhikkhusaṅghassa kathaṃ sutvāti saṅghassa majjhe nisīditvā therena kathitattā vuttaṃ. Satthusāsananti piṭakattayaṃ vadati.
បសក្កិយាតិ ឧបសក្កិត្វា គន្ត្វា។ តំ បន តត្ថ អជ្ឈោគាហនំ ហោតីតិ អាហ ‘‘បវិសិត្វា’’តិ។ សង្ខារទុក្ខតោ និព្ពិន្នហទយស្ស សព្ពសង្ខារវិនិស្សដំ និព្ពានំ យាថាវតោ បច្ចវេក្ខន្តស្ស សម្មទេវ សមស្សាសករំ ហុត្វា ឧបដ្ឋហន្តំ តំ ឧបរិ អធិគមាយ ឧស្សុក្កំ ករោន្តោ និព្ពានំ ហទយេ និក្ខិបតិ នាមាតិ អាហ – ‘‘និព្ពានំ…បេ.… ឱបេតិ នាមា’’តិ។ និព្ពានំ…បេ.… អារម្មណតោ ឱបេតិ នាមាតិ អានេត្វា សម្ពន្ធោ។ អត្ថវិរហិតា ‘‘ពិឡិពិឡី’’តិ បវត្តកិរិយា ពិឡិកា, អយំ បន គិហិសញ្ញត្តិកថា ថេរស្ស អត្តនោ សាមញ្ញត្ថអសាធនតោ ទេវតាយ ពិឡិកា វិយាតិ ពិឡិពិឡិកាតិ វុត្តា។
Pasakkiyāti upasakkitvā gantvā. Taṃ pana tattha ajjhogāhanaṃ hotīti āha ‘‘pavisitvā’’ti. Saṅkhāradukkhato nibbinnahadayassa sabbasaṅkhāravinissaṭaṃ nibbānaṃ yāthāvato paccavekkhantassa sammadeva samassāsakaraṃ hutvā upaṭṭhahantaṃ taṃ upari adhigamāya ussukkaṃ karonto nibbānaṃ hadaye nikkhipati nāmāti āha – ‘‘nibbānaṃ…pe… opeti nāmā’’ti. Nibbānaṃ…pe… ārammaṇato opeti nāmāti ānetvā sambandho. Atthavirahitā ‘‘biḷibiḷī’’ti pavattakiriyā biḷikā, ayaṃ pana gihisaññattikathā therassa attano sāmaññatthaasādhanato devatāya biḷikā viyāti biḷibiḷikāti vuttā.
អានន្ទសុត្តវណ្ណនា និដ្ឋិតា។
Ānandasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៥. អានន្ទសុត្តំ • 5. Ānandasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥. អានន្ទសុត្តវណ្ណនា • 5. Ānandasuttavaṇṇanā
