| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၉. ထေရဝဂ္ဂော
9. Theravaggo
၁. အာနန္ဒသုတ္တဝဏ္ဏနာ
1. Ānandasuttavaṇṇanā
၈၃. ထေရဝဂ္ဂသ္သ ပဌမေ မန္တာဏိပုတ္တောတိ, မန္တာဏိယာ နာမ ဗ္ရာဟ္မဏိယာ ပုတ္တော။ ဥပာဒာယာတိ အာဂမ္မ အာရဗ္ဘ သန္ဓာယ ပဋိစ္စ။ အသ္မီတိ ဟောတီတိ အသ္မီတိ ဧဝံ ပဝတ္တံ တဏ္ဟာမာနဒိဋ္ဌိပပဉ္စတ္တယံ ဟောတိ။ ဒဟရောတိ တရုဏော။ ယုဝာတိ ယောဗ္ဗနေန သမန္နာဂတော။ မဏ္ဍနကဇာတိကောတိ မဏ္ဍနကသဘာဝော မဏ္ဍနကသီလော။ မုခနိမိတ္တန္တိ မုခပဋိဗိမ္ဗံ။ တဉ္ဟိ ပရိသုဒ္ဓံ အာဒာသမဏ္ဍလံ ပဋိစ္စ ပညာယတိ။ ကိံ ပန တံ ဩလောကယတော သကမုခံ ပညာယတိ, ပရမုခန္တိ? ယဒိ သကံ ဘဝေယ္ယ, ပရမ္မုခံ ဟုတ္ဝာ ပညာယေယ္ယ, အထ ပရသ္သ ဘဝေယ္ယ, ဝဏ္ဏာဒီဟိ အသဒိသံ ဟုတ္ဝာ ပညာယေယ္ယ။ တသ္မာ န တံ အတ္တနော, န ပရသ္သ, အာဒာသံ ပန နိသ္သာယ နိဘာသရူပံ နာမ တံ ပညာယတီတိ ဝဒန္တိ။ အထ ယံ ဥဒကေ ပညာယတိ, တံ ကေန ကာရဏေနာတိ ? မဟာဘူတာနံ ဝိသုဒ္ဓတာယ။ ဓမ္မော မေ အဘိသမိတောတိ မယာ ဉာဏေန စတုသစ္စဓမ္မော အဘိသမာဂတော, သောတာပန္နောသ္မိ ဇာတောတိ ကထေသိ။ ပဌမံ။
83. Theravaggassa paṭhame mantāṇiputtoti, mantāṇiyā nāma brāhmaṇiyā putto. Upādāyāti āgamma ārabbha sandhāya paṭicca. Asmīti hotīti asmīti evaṃ pavattaṃ taṇhāmānadiṭṭhipapañcattayaṃ hoti. Daharoti taruṇo. Yuvāti yobbanena samannāgato. Maṇḍanakajātikoti maṇḍanakasabhāvo maṇḍanakasīlo. Mukhanimittanti mukhapaṭibimbaṃ. Tañhi parisuddhaṃ ādāsamaṇḍalaṃ paṭicca paññāyati. Kiṃ pana taṃ olokayato sakamukhaṃ paññāyati, paramukhanti? Yadi sakaṃ bhaveyya, parammukhaṃ hutvā paññāyeyya, atha parassa bhaveyya, vaṇṇādīhi asadisaṃ hutvā paññāyeyya. Tasmā na taṃ attano, na parassa, ādāsaṃ pana nissāya nibhāsarūpaṃ nāma taṃ paññāyatīti vadanti. Atha yaṃ udake paññāyati, taṃ kena kāraṇenāti ? Mahābhūtānaṃ visuddhatāya. Dhammo me abhisamitoti mayā ñāṇena catusaccadhammo abhisamāgato, sotāpannosmi jātoti kathesi. Paṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. အာနန္ဒသုတ္တံ • 1. Ānandasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. အာနန္ဒသုတ္တဝဏ္ဏနာ • 1. Ānandasuttavaṇṇanā
