| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၂. အာနန္ဒသုတ္တဝဏ္ဏနာ
2. Ānandasuttavaṇṇanā
၃၂. ဒုတိယေ တထာဇာတိကောတိ တထာသဘာဝော။ စိတ္တေကဂ္ဂတာလာဘောတိ စိတ္တေကဂ္ဂတာယ အဓိဂမော။ ရူပမေဝ ကိလေသုပ္ပတ္တိယာ ကာရဏဘာဝတော ရူပနိမိတ္တံ။ ဧသ နယော သေသေသုပိ။ သသ္သတာဒိနိမိတ္တန္တိ သသ္သတုစ္ဆေဒဘာဝနိမိတ္တံ။ ပုဂ္ဂလနိမိတ္တန္တိ ပုဂ္ဂလာဘိနိဝေသနနိမိတ္တံ။ ဓမ္မနိမိတ္တန္တိ ဓမ္မာရမ္မဏသင္ခာတံ နိမိတ္တံ။ ‘‘သိယာ နု ခော, ဘန္တေ’’တိ ထေရေန ပုဋ္ဌော ဘဂဝာ ‘‘သိယာ’’တိ အဝောစ လောကုတ္တရသမာဓိပ္ပဋိလာဘံ သန္ဓာယ။ သော ဟိ နိဗ္ဗာနံ သန္တံ ပဏီတန္တိ စ ပသ္သတိ။ တေနာဟ ‘‘ဣဓာနန္ဒာ’’တိအာဒိ။
32. Dutiye tathājātikoti tathāsabhāvo. Cittekaggatālābhoti cittekaggatāya adhigamo. Rūpameva kilesuppattiyā kāraṇabhāvato rūpanimittaṃ. Esa nayo sesesupi. Sassatādinimittanti sassatucchedabhāvanimittaṃ. Puggalanimittanti puggalābhinivesananimittaṃ. Dhammanimittanti dhammārammaṇasaṅkhātaṃ nimittaṃ. ‘‘Siyā nu kho, bhante’’ti therena puṭṭho bhagavā ‘‘siyā’’ti avoca lokuttarasamādhippaṭilābhaṃ sandhāya. So hi nibbānaṃ santaṃ paṇītanti ca passati. Tenāha ‘‘idhānandā’’tiādi.
နိဗ္ဗာနံ သန္တန္တိ သမာပတ္တိံ အပ္ပေတ္ဝာတိ နိဗ္ဗာနံ သန္တန္တိ အာဘုဇိတ္ဝာ ဖလသမာပတ္တိံ အပ္ပေတ္ဝာ ။ ဒိဝသမ္ပီတိအာဒိနာ အသင္ခတာယ ဓာတုယာ အစ္စန္တသန္တပဏီတာဒိဘာဝံ ဒသ္သေတိ။ အဋ္ဌဝိဓေတိ ‘‘သန္တံ ပဏီတံ သဗ္ဗသင္ခာရသမထော သဗ္ဗူပဓိပဋိနိသ္သဂ္ဂော တဏ္ဟာက္ခယော ဝိရာဂော နိရောဓော နိဗ္ဗာန’’န္တိ ဧဝံ အဋ္ဌဝိဓေ အာဘောဂသညိတေ သမန္နာဟာရေ။ နိဒ္ဓာရဏေ စေတံ ဘုမ္မံ။ ဣမသ္မိံ ဌာနေ။ပေ.။ လဗ္ဘန္တေဝာတိ ‘‘ဣဓာနန္ဒ, ဘိက္ခုနော ဧဝံ ဟောတီ’’တိ အာဂတေ ဣမသ္မိံ သုတ္တပ္ပဒေသေ ဧကောပိ အာဘောဂသမန္နာဟာရော စေပိ သဗ္ဗေ အဋ္ဌပိ အာဘောဂသမန္နာဟာရာ လဗ္ဘန္တေဝ သမန္နာဟရတံ အတ္ထာဝဟတ္တာ။
Nibbānaṃsantanti samāpattiṃ appetvāti nibbānaṃ santanti ābhujitvā phalasamāpattiṃ appetvā . Divasampītiādinā asaṅkhatāya dhātuyā accantasantapaṇītādibhāvaṃ dasseti. Aṭṭhavidheti ‘‘santaṃ paṇītaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbāna’’nti evaṃ aṭṭhavidhe ābhogasaññite samannāhāre. Niddhāraṇe cetaṃ bhummaṃ. Imasmiṃ ṭhāne…pe… labbhantevāti ‘‘idhānanda, bhikkhuno evaṃ hotī’’ti āgate imasmiṃ suttappadese ekopi ābhogasamannāhāro cepi sabbe aṭṭhapi ābhogasamannāhārā labbhanteva samannāharataṃ atthāvahattā.
ဉာဏေန ဇာနိတ္ဝာတိ ဝိပသ္သနာဉာဏသဟိတေန မဂ္ဂဉာဏေန ဇာနိတ္ဝာ။ ပရာနိ စ ဩပရာနိ စ စက္ခာဒီနိ အာယတနာနိ။ သန္တတာယာတိ ပဋိပ္ပသ္သဒ္ဓိတာယ။ ကာယဒုစ္စရိတာဒိဓူမဝိရဟိတောတိ ကာယဒုစ္စရိတာဒိ ဧဝ သန္တာပနဋ္ဌေန ဓူမော, တေန ဝိရဟိတော။ အနီဃောတိ အပာပော။ ဇာတိဇရာဂဟဏေနေဝ ဗ္ယာဓိမရဏမ္ပိ ဂဟိတမေဝာတိ တဗ္ဘာဝဘာဝတောတိ ဝုတ္တံ။
Ñāṇena jānitvāti vipassanāñāṇasahitena maggañāṇena jānitvā. Parāni ca oparāni ca cakkhādīni āyatanāni. Santatāyāti paṭippassaddhitāya. Kāyaduccaritādidhūmavirahitoti kāyaduccaritādi eva santāpanaṭṭhena dhūmo, tena virahito. Anīghoti apāpo. Jātijarāgahaṇeneva byādhimaraṇampi gahitamevāti tabbhāvabhāvatoti vuttaṃ.
အာနန္ဒသုတ္တဝဏ္ဏနာ နိဋ္ဌိတာ။
Ānandasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. အာနန္ဒသုတ္တံ • 2. Ānandasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. အာနန္ဒသုတ္တဝဏ္ဏနာ • 2. Ānandasuttavaṇṇanā
