| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၉. အာနန္ဒသုတ္တဝဏ္ဏနာ
9. Ānandasuttavaṇṇanā
၅၁. နဝမေ ထေရာ ဘိက္ခူ ဝိဟရန္တိ ဗဟုသ္သုတာ အာဂတာဂမာတိအာဒိပာဠိပဒေသု ဣမိနာဝ နယေန အတ္ထော ဒဋ္ဌဗ္ဗော – သီလာဒိဂုဏာနံ ထိရဘာဝပ္ပတ္တိယာ ထေရာ။ သုတ္တဂေယ္ယာဒိ ဗဟု သုတံ ဧတေသန္တိ ဗဟုသ္သုတာ။ ဝာစုဂ္ဂတဓာရဏေန သမ္မဒေဝ ဂရူနံ သန္တိကေ အာဂမိတဘာဝေန အာဂတော ပရိယတ္တိဓမ္မသင္ခာတော အာဂမော ဧတေသန္တိ အာဂတာဂမာ။ သုတ္တာတိဓမ္မသင္ခာတသ္သ ဓမ္မသ္သ ဓာရဏေန ဓမ္မဓရာ။ ဝိနယဓာရဏေန ဝိနယဓရာ။ တေသံယေဝ ဓမ္မဝိနယာနံ မာတိကာယ ဓာရဏေန မာတိကာဓရာ။ တတ္ထ တတ္ထ ဓမ္မပရိပုစ္ဆာယ ပရိပုစ္ဆတိ။ တံ အတ္ထပရိပုစ္ဆာယ ပရိပဉ္ဟတိ ဝီမံသတိ ဝိစာရေတိ။ ဣဒံ, ဘန္တေ, ကထံ, ဣမသ္သ က္ဝတ္ထောတိ ပရိပုစ္ဆနပဉ္ဟနာကာရဒသ္သနံ။ အာဝိဝဋဉ္စေဝ ပာဠိယာ အတ္ထံ ပဒေသန္တရပာဠိဒသ္သနေန အာဂမတော ဝိဝရန္တိ။ အနုတ္တာနီကတဉ္စ ယုတ္တိဝိဘာဝနေန ဥတ္တာနီကရောန္တိ။ ကင္ခာဋ္ဌာနိယေသု ဓမ္မေသု သံသယုပ္ပတ္တိယာ ဟေတုယာ ဂဏ္ဌိဋ္ဌာနဘူတေသု ပာဠိပဒေသု ယာထာဝတော ဝိနိစ္ဆယဒာနေန ကင္ခံ ပဋိဝိနောဒေန္တိ။
51. Navame therā bhikkhū viharanti bahussutā āgatāgamātiādipāḷipadesu imināva nayena attho daṭṭhabbo – sīlādiguṇānaṃ thirabhāvappattiyā therā. Suttageyyādi bahu sutaṃ etesanti bahussutā. Vācuggatadhāraṇena sammadeva garūnaṃ santike āgamitabhāvena āgato pariyattidhammasaṅkhāto āgamo etesanti āgatāgamā. Suttātidhammasaṅkhātassa dhammassa dhāraṇena dhammadharā. Vinayadhāraṇena vinayadharā. Tesaṃyeva dhammavinayānaṃ mātikāya dhāraṇena mātikādharā. Tattha tattha dhammaparipucchāya paripucchati. Taṃ atthaparipucchāya paripañhati vīmaṃsati vicāreti. Idaṃ, bhante, kathaṃ, imassa kvatthoti paripucchanapañhanākāradassanaṃ. Āvivaṭañceva pāḷiyā atthaṃ padesantarapāḷidassanena āgamato vivaranti. Anuttānīkatañca yuttivibhāvanena uttānīkaronti. Kaṅkhāṭṭhāniyesu dhammesu saṃsayuppattiyā hetuyā gaṇṭhiṭṭhānabhūtesu pāḷipadesu yāthāvato vinicchayadānena kaṅkhaṃ paṭivinodenti.
အာနန္ဒသုတ္တဝဏ္ဏနာ နိဋ္ဌိတာ။
Ānandasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. အာနန္ဒသုတ္တံ • 9. Ānandasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. အာနန္ဒသုတ္တဝဏ္ဏနာ • 9. Ānandasuttavaṇṇanā
