| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༢. ཨཱནནྡསུཏྟཝཎྞནཱ
2. Ānandasuttavaṇṇanā
༣༢. དུཏིཡེ ཏཐཱརཱུཔོཏི ཏཐཱཛཱཏིཀོ། སམཱདྷིཔཊིལཱབྷོཏི ཙིཏྟེཀགྒཏཱལཱབྷོ། ཨིམསྨིཾ ཙ སཝིཉྙཱཎཀེཏི ཨེཏྠ ཨཏྟནོ ཙ པརསྶ ཙཱཏི ཨུབྷཡེསམྤི ཀཱཡོ སཝིཉྙཱཎཀཊྛེན ཨེཀཏོ ཀཏྭཱ ཨིམསྨིནྟི ཝུཏྟོ། ཨཧངྐཱརམམངྐཱརམཱནཱནུསཡཱཏི ཨཧངྐཱརདིཊྛི ཙ མམངྐཱརཏཎྷཱ ཙ མཱནཱནུསཡོ ཙཱཏི ཨཏྟནོ ཙ པརསྶ ཙ ཀིལེསཱ། ནཱསྶཱུཏི ན བྷཝེཡྻུཾ། བཧིདྡྷཱ ཙ སབྦནིམིཏྟེསཱུཏི རཱུཔནིམིཏྟཾ, སདྡནིམིཏྟཾ, གནྡྷནིམིཏྟཾ, རསནིམིཏྟཾ, ཕོཊྛབྦནིམིཏྟཾ, སསྶཏཱདིནིམིཏྟཾ, པུགྒལནིམིཏྟཾ དྷམྨནིམིཏྟནྟི ཨེཝརཱུཔེསུ ཙ བཧིདྡྷཱ སབྦནིམིཏྟེསུ། ཙེཏོཝིམུཏྟིཾ པཉྙཱཝིམུཏྟིནྟི ཕལསམཱདྷིཉྩེཝ ཕལཉཱཎཉྩ། སིཡཱཏི བྷཝེཡྻ།
32. Dutiye tathārūpoti tathājātiko. Samādhipaṭilābhoti cittekaggatālābho. Imasmiṃ ca saviññāṇaketi ettha attano ca parassa cāti ubhayesampi kāyo saviññāṇakaṭṭhena ekato katvā imasminti vutto. Ahaṅkāramamaṅkāramānānusayāti ahaṅkāradiṭṭhi ca mamaṅkārataṇhā ca mānānusayo cāti attano ca parassa ca kilesā. Nāssūti na bhaveyyuṃ. Bahiddhā ca sabbanimittesūti rūpanimittaṃ, saddanimittaṃ, gandhanimittaṃ, rasanimittaṃ, phoṭṭhabbanimittaṃ, sassatādinimittaṃ, puggalanimittaṃ dhammanimittanti evarūpesu ca bahiddhā sabbanimittesu. Cetovimuttiṃ paññāvimuttinti phalasamādhiñceva phalañāṇañca. Siyāti bhaveyya.
ཨིདྷཱནནྡ, བྷིཀྑུནོཏི, ཨཱནནྡ, ཨིམསྨིཾ སཱསནེ བྷིཀྑུནོ། ཨེཏཾ སནྟཾ ཨེཏཾ པཎཱིཏནྟི ནིབྦཱནཾ དསྶེནྟོ ཨཱཧ། ནིབྦཱནཾ ཧི ཀིལེསཱནཾ སནྟཏཱཡ སནྟཾ ནཱམ, ནིབྦཱནཾ སནྟནྟི སམཱཔཏྟིཾ ཨཔྤེཏྭཱཝ དིཝསམྤི ནིསིནྣསྶ ཙིཏྟུཔྤཱདོ སནྟནྟེཝ པཝཏྟཏཱིཏིཔི སནྟཾ། པཎཱིཏནྟི སམཱཔཏྟིཾ ཨཔྤེཏྭཱ ནིསིནྣསྶཱཔི ཙིཏྟུཔྤཱདོ པཎཱིཏནྟེཝ པཝཏྟཏཱིཏི ནིབྦཱནཾ པཎཱིཏཾ ནཱམ། སབྦསངྑཱརསམཐོཏིཨཱདཱིནིཔི ཏསྶེཝ ཝེཝཙནཱནི། ‘‘སབྦསངྑཱརསམཐོ’’ཏི སམཱཔཏྟིཾ ཨཔྤེཏྭཱ ནིསིནྣསྶ ཧི དིཝསབྷཱགམྤི ཙིཏྟུཔྤཱདོ སབྦསངྑཱརསམཐོཏེཝ པཝཏྟཏི…པེ॰… ཏཐཱ ཏཱིསུ བྷཝེསུ ཝཱནསངྑཱཏཱཡ ཏཎྷཱཡ ཨབྷཱཝེན ནིབྦཱནནྟི ལདྡྷནཱམེ ཏསྨིཾ སམཱཔཏྟིཾ ཨཔྤེཏྭཱ ནིསིནྣསྶ ཙིཏྟུཔྤཱདོ ནིབྦཱནཾ ནིབྦཱནནྟེཝ པཝཏྟཏཱིཏི སབྦསངྑཱརསམཐོཏིཨཱདཱིནི ནཱམཱནི ལབྷཏི། ཨིམསྨིཾ པན ཨཊྛཝིདྷེ ཨཱབྷོགསམནྣཱཧཱརེ ཨིམསྨིཾ ཋཱནེ ཨེཀོཔི ལབྦྷཏི, དྭེཔི སབྦེཔི ལབྦྷནྟེཝ།
Idhānanda, bhikkhunoti, ānanda, imasmiṃ sāsane bhikkhuno. Etaṃ santaṃ etaṃ paṇītanti nibbānaṃ dassento āha. Nibbānaṃ hi kilesānaṃ santatāya santaṃ nāma, nibbānaṃ santanti samāpattiṃ appetvāva divasampi nisinnassa cittuppādo santanteva pavattatītipi santaṃ. Paṇītanti samāpattiṃ appetvā nisinnassāpi cittuppādo paṇītanteva pavattatīti nibbānaṃ paṇītaṃ nāma. Sabbasaṅkhārasamathotiādīnipi tasseva vevacanāni. ‘‘Sabbasaṅkhārasamatho’’ti samāpattiṃ appetvā nisinnassa hi divasabhāgampi cittuppādo sabbasaṅkhārasamathoteva pavattati…pe… tathā tīsu bhavesu vānasaṅkhātāya taṇhāya abhāvena nibbānanti laddhanāme tasmiṃ samāpattiṃ appetvā nisinnassa cittuppādo nibbānaṃ nibbānanteva pavattatīti sabbasaṅkhārasamathotiādīni nāmāni labhati. Imasmiṃ pana aṭṭhavidhe ābhogasamannāhāre imasmiṃ ṭhāne ekopi labbhati, dvepi sabbepi labbhanteva.
སངྑཱཡཱཏི ཉཱཎེན ཛཱནིཏྭཱ། པརོཔརཱནཱིཏི པརཱནི ཙ ཨོཔརཱནི ཙ། པརཨཏྟབྷཱཝསཀཨཏྟབྷཱཝཱནི ཧི པརཱནི ཙ ཨོཔརཱནི ཙཱཏི ཝུཏྟཾ ཧོཏི། ཡསྶཱཏི ཡསྶ ཨརཧཏོ། ཨིཉྫིཏནྟི རཱགིཉྫིཏཾ དོསམོཧམཱནདིཊྛིཀིལེསདུཙྩརིཏིཉྫིཏནྟི ཨིམཱནི སཏྟ ཨིཉྫིཏཱནི ཙལིཏཱནི ཕནྡིཏཱནི། ནཏྠི ཀུཧིཉྩཱིཏི ཀཏྠཙི ཨེཀཱརམྨཎེཔི ནཏྠི། སནྟོཏི པཙྩནཱིཀཀིལེསཱནཾ སནྟཏཱཡ སནྟོ། ཝིདྷཱུམོཏི ཀཱཡདུཙྩརིཏཱདིདྷཱུམཝིརཧིཏོ། ཨནཱིགྷོཏི རཱགཱདིཨཱིགྷཝིརཧིཏོ། ནིརཱསོཏི ནིཏྟཎྷོ། ཨཏཱརཱིཏི ཏིཎྞོ ཨུཏྟིཎྞོ སམཏིཀྐནྟོ། སོཏི སོ ཨརཧཾ ཁཱིཎཱསཝོ། ཛཱཏིཛརནྟི ཨེཏྠ ཛཱཏིཛརཱགཧཎེནེཝ བྱཱདྷིམརཎམྤི གཧིཏམེཝཱཏི ཝེདིཏབྦཾ། ཨིཏི སུཏྟནྟེཔི གཱཐཱཡཔི ཨརཧཏྟཕལསམཱཔཏྟིཡེཝ ཀཐིཏཱཏི།
Saṅkhāyāti ñāṇena jānitvā. Paroparānīti parāni ca oparāni ca. Paraattabhāvasakaattabhāvāni hi parāni ca oparāni cāti vuttaṃ hoti. Yassāti yassa arahato. Iñjitanti rāgiñjitaṃ dosamohamānadiṭṭhikilesaduccaritiñjitanti imāni satta iñjitāni calitāni phanditāni. Natthi kuhiñcīti katthaci ekārammaṇepi natthi. Santoti paccanīkakilesānaṃ santatāya santo. Vidhūmoti kāyaduccaritādidhūmavirahito. Anīghoti rāgādiīghavirahito. Nirāsoti nittaṇho. Atārīti tiṇṇo uttiṇṇo samatikkanto. Soti so arahaṃ khīṇāsavo. Jātijaranti ettha jātijarāgahaṇeneva byādhimaraṇampi gahitamevāti veditabbaṃ. Iti suttantepi gāthāyapi arahattaphalasamāpattiyeva kathitāti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༢. ཨཱནནྡསུཏྟཾ • 2. Ānandasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢. ཨཱནནྡསུཏྟཝཎྞནཱ • 2. Ānandasuttavaṇṇanā
