| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༩. ཐེརཝགྒོ
9. Theravaggo
༡. ཨཱནནྡསུཏྟཝཎྞནཱ
1. Ānandasuttavaṇṇanā
༨༣. ཐེརཝགྒསྶ པཋམེ མནྟཱཎིཔུཏྟོཏི, མནྟཱཎིཡཱ ནཱམ བྲཱཧྨཎིཡཱ པུཏྟོ། ཨུཔཱདཱཡཱཏི ཨཱགམྨ ཨཱརབྦྷ སནྡྷཱཡ པཊིཙྩ། ཨསྨཱིཏི ཧོཏཱིཏི ཨསྨཱིཏི ཨེཝཾ པཝཏྟཾ ཏཎྷཱམཱནདིཊྛིཔཔཉྩཏྟཡཾ ཧོཏི། དཧརོཏི ཏརུཎོ། ཡུཝཱཏི ཡོབྦནེན སམནྣཱགཏོ། མཎྜནཀཛཱཏིཀོཏི མཎྜནཀསབྷཱཝོ མཎྜནཀསཱིལོ། མུཁནིམིཏྟནྟི མུཁཔཊིབིམྦཾ། ཏཉྷི པརིསུདྡྷཾ ཨཱདཱསམཎྜལཾ པཊིཙྩ པཉྙཱཡཏི། ཀིཾ པན ཏཾ ཨོལོཀཡཏོ སཀམུཁཾ པཉྙཱཡཏི, པརམུཁནྟི? ཡདི སཀཾ བྷཝེཡྻ, པརམྨུཁཾ ཧུཏྭཱ པཉྙཱཡེཡྻ, ཨཐ པརསྶ བྷཝེཡྻ, ཝཎྞཱདཱིཧི ཨསདིསཾ ཧུཏྭཱ པཉྙཱཡེཡྻ། ཏསྨཱ ན ཏཾ ཨཏྟནོ, ན པརསྶ, ཨཱདཱསཾ པན ནིསྶཱཡ ནིབྷཱསརཱུཔཾ ནཱམ ཏཾ པཉྙཱཡཏཱིཏི ཝདནྟི། ཨཐ ཡཾ ཨུདཀེ པཉྙཱཡཏི, ཏཾ ཀེན ཀཱརཎེནཱཏི ? མཧཱབྷཱུཏཱནཾ ཝིསུདྡྷཏཱཡ། དྷམྨོ མེ ཨབྷིསམིཏོཏི མཡཱ ཉཱཎེན ཙཏུསཙྩདྷམྨོ ཨབྷིསམཱགཏོ, སོཏཱཔནྣོསྨི ཛཱཏོཏི ཀཐེསི། པཋམཾ།
83. Theravaggassa paṭhame mantāṇiputtoti, mantāṇiyā nāma brāhmaṇiyā putto. Upādāyāti āgamma ārabbha sandhāya paṭicca. Asmīti hotīti asmīti evaṃ pavattaṃ taṇhāmānadiṭṭhipapañcattayaṃ hoti. Daharoti taruṇo. Yuvāti yobbanena samannāgato. Maṇḍanakajātikoti maṇḍanakasabhāvo maṇḍanakasīlo. Mukhanimittanti mukhapaṭibimbaṃ. Tañhi parisuddhaṃ ādāsamaṇḍalaṃ paṭicca paññāyati. Kiṃ pana taṃ olokayato sakamukhaṃ paññāyati, paramukhanti? Yadi sakaṃ bhaveyya, parammukhaṃ hutvā paññāyeyya, atha parassa bhaveyya, vaṇṇādīhi asadisaṃ hutvā paññāyeyya. Tasmā na taṃ attano, na parassa, ādāsaṃ pana nissāya nibhāsarūpaṃ nāma taṃ paññāyatīti vadanti. Atha yaṃ udake paññāyati, taṃ kena kāraṇenāti ? Mahābhūtānaṃ visuddhatāya. Dhammo me abhisamitoti mayā ñāṇena catusaccadhammo abhisamāgato, sotāpannosmi jātoti kathesi. Paṭhamaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ཨཱནནྡསུཏྟཾ • 1. Ānandasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. ཨཱནནྡསུཏྟཝཎྞནཱ • 1. Ānandasuttavaṇṇanā
