| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੨. ਆਨਨ੍ਦਸੁਤ੍ਤવਣ੍ਣਨਾ
2. Ānandasuttavaṇṇanā
੩੨. ਦੁਤਿਯੇ ਤਥਾਰੂਪੋਤਿ ਤਥਾਜਾਤਿਕੋ। ਸਮਾਧਿਪਟਿਲਾਭੋਤਿ ਚਿਤ੍ਤੇਕਗ੍ਗਤਾਲਾਭੋ। ਇਮਸ੍ਮਿਂ ਚ ਸવਿਞ੍ਞਾਣਕੇਤਿ ਏਤ੍ਥ ਅਤ੍ਤਨੋ ਚ ਪਰਸ੍ਸ ਚਾਤਿ ਉਭਯੇਸਮ੍ਪਿ ਕਾਯੋ ਸવਿਞ੍ਞਾਣਕਟ੍ਠੇਨ ਏਕਤੋ ਕਤ੍વਾ ਇਮਸ੍ਮਿਨ੍ਤਿ વੁਤ੍ਤੋ। ਅਹਙ੍ਕਾਰਮਮਙ੍ਕਾਰਮਾਨਾਨੁਸਯਾਤਿ ਅਹਙ੍ਕਾਰਦਿਟ੍ਠਿ ਚ ਮਮਙ੍ਕਾਰਤਣ੍ਹਾ ਚ ਮਾਨਾਨੁਸਯੋ ਚਾਤਿ ਅਤ੍ਤਨੋ ਚ ਪਰਸ੍ਸ ਚ ਕਿਲੇਸਾ। ਨਾਸ੍ਸੂਤਿ ਨ ਭવੇਯ੍ਯੁਂ। ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਸੂਤਿ ਰੂਪਨਿਮਿਤ੍ਤਂ, ਸਦ੍ਦਨਿਮਿਤ੍ਤਂ, ਗਨ੍ਧਨਿਮਿਤ੍ਤਂ, ਰਸਨਿਮਿਤ੍ਤਂ, ਫੋਟ੍ਠਬ੍ਬਨਿਮਿਤ੍ਤਂ, ਸਸ੍ਸਤਾਦਿਨਿਮਿਤ੍ਤਂ, ਪੁਗ੍ਗਲਨਿਮਿਤ੍ਤਂ ਧਮ੍ਮਨਿਮਿਤ੍ਤਨ੍ਤਿ ਏવਰੂਪੇਸੁ ਚ ਬਹਿਦ੍ਧਾ ਸਬ੍ਬਨਿਮਿਤ੍ਤੇਸੁ। ਚੇਤੋવਿਮੁਤ੍ਤਿਂ ਪਞ੍ਞਾવਿਮੁਤ੍ਤਿਨ੍ਤਿ ਫਲਸਮਾਧਿਞ੍ਚੇવ ਫਲਞਾਣਞ੍ਚ। ਸਿਯਾਤਿ ਭવੇਯ੍ਯ।
32. Dutiye tathārūpoti tathājātiko. Samādhipaṭilābhoti cittekaggatālābho. Imasmiṃ ca saviññāṇaketi ettha attano ca parassa cāti ubhayesampi kāyo saviññāṇakaṭṭhena ekato katvā imasminti vutto. Ahaṅkāramamaṅkāramānānusayāti ahaṅkāradiṭṭhi ca mamaṅkārataṇhā ca mānānusayo cāti attano ca parassa ca kilesā. Nāssūti na bhaveyyuṃ. Bahiddhā ca sabbanimittesūti rūpanimittaṃ, saddanimittaṃ, gandhanimittaṃ, rasanimittaṃ, phoṭṭhabbanimittaṃ, sassatādinimittaṃ, puggalanimittaṃ dhammanimittanti evarūpesu ca bahiddhā sabbanimittesu. Cetovimuttiṃ paññāvimuttinti phalasamādhiñceva phalañāṇañca. Siyāti bhaveyya.
ਇਧਾਨਨ੍ਦ, ਭਿਕ੍ਖੁਨੋਤਿ, ਆਨਨ੍ਦ, ਇਮਸ੍ਮਿਂ ਸਾਸਨੇ ਭਿਕ੍ਖੁਨੋ। ਏਤਂ ਸਨ੍ਤਂ ਏਤਂ ਪਣੀਤਨ੍ਤਿ ਨਿਬ੍ਬਾਨਂ ਦਸ੍ਸੇਨ੍ਤੋ ਆਹ। ਨਿਬ੍ਬਾਨਂ ਹਿ ਕਿਲੇਸਾਨਂ ਸਨ੍ਤਤਾਯ ਸਨ੍ਤਂ ਨਾਮ, ਨਿਬ੍ਬਾਨਂ ਸਨ੍ਤਨ੍ਤਿ ਸਮਾਪਤ੍ਤਿਂ ਅਪ੍ਪੇਤ੍વਾવ ਦਿવਸਮ੍ਪਿ ਨਿਸਿਨ੍ਨਸ੍ਸ ਚਿਤ੍ਤੁਪ੍ਪਾਦੋ ਸਨ੍ਤਨ੍ਤੇવ ਪવਤ੍ਤਤੀਤਿਪਿ ਸਨ੍ਤਂ। ਪਣੀਤਨ੍ਤਿ ਸਮਾਪਤ੍ਤਿਂ ਅਪ੍ਪੇਤ੍વਾ ਨਿਸਿਨ੍ਨਸ੍ਸਾਪਿ ਚਿਤ੍ਤੁਪ੍ਪਾਦੋ ਪਣੀਤਨ੍ਤੇવ ਪવਤ੍ਤਤੀਤਿ ਨਿਬ੍ਬਾਨਂ ਪਣੀਤਂ ਨਾਮ। ਸਬ੍ਬਸਙ੍ਖਾਰਸਮਥੋਤਿਆਦੀਨਿਪਿ ਤਸ੍ਸੇવ વੇવਚਨਾਨਿ। ‘‘ਸਬ੍ਬਸਙ੍ਖਾਰਸਮਥੋ’’ਤਿ ਸਮਾਪਤ੍ਤਿਂ ਅਪ੍ਪੇਤ੍વਾ ਨਿਸਿਨ੍ਨਸ੍ਸ ਹਿ ਦਿવਸਭਾਗਮ੍ਪਿ ਚਿਤ੍ਤੁਪ੍ਪਾਦੋ ਸਬ੍ਬਸਙ੍ਖਾਰਸਮਥੋਤੇવ ਪવਤ੍ਤਤਿ…ਪੇ॰… ਤਥਾ ਤੀਸੁ ਭવੇਸੁ વਾਨਸਙ੍ਖਾਤਾਯ ਤਣ੍ਹਾਯ ਅਭਾવੇਨ ਨਿਬ੍ਬਾਨਨ੍ਤਿ ਲਦ੍ਧਨਾਮੇ ਤਸ੍ਮਿਂ ਸਮਾਪਤ੍ਤਿਂ ਅਪ੍ਪੇਤ੍વਾ ਨਿਸਿਨ੍ਨਸ੍ਸ ਚਿਤ੍ਤੁਪ੍ਪਾਦੋ ਨਿਬ੍ਬਾਨਂ ਨਿਬ੍ਬਾਨਨ੍ਤੇવ ਪવਤ੍ਤਤੀਤਿ ਸਬ੍ਬਸਙ੍ਖਾਰਸਮਥੋਤਿਆਦੀਨਿ ਨਾਮਾਨਿ ਲਭਤਿ। ਇਮਸ੍ਮਿਂ ਪਨ ਅਟ੍ਠવਿਧੇ ਆਭੋਗਸਮਨ੍ਨਾਹਾਰੇ ਇਮਸ੍ਮਿਂ ਠਾਨੇ ਏਕੋਪਿ ਲਬ੍ਭਤਿ, ਦ੍વੇਪਿ ਸਬ੍ਬੇਪਿ ਲਬ੍ਭਨ੍ਤੇવ।
Idhānanda, bhikkhunoti, ānanda, imasmiṃ sāsane bhikkhuno. Etaṃ santaṃ etaṃ paṇītanti nibbānaṃ dassento āha. Nibbānaṃ hi kilesānaṃ santatāya santaṃ nāma, nibbānaṃ santanti samāpattiṃ appetvāva divasampi nisinnassa cittuppādo santanteva pavattatītipi santaṃ. Paṇītanti samāpattiṃ appetvā nisinnassāpi cittuppādo paṇītanteva pavattatīti nibbānaṃ paṇītaṃ nāma. Sabbasaṅkhārasamathotiādīnipi tasseva vevacanāni. ‘‘Sabbasaṅkhārasamatho’’ti samāpattiṃ appetvā nisinnassa hi divasabhāgampi cittuppādo sabbasaṅkhārasamathoteva pavattati…pe… tathā tīsu bhavesu vānasaṅkhātāya taṇhāya abhāvena nibbānanti laddhanāme tasmiṃ samāpattiṃ appetvā nisinnassa cittuppādo nibbānaṃ nibbānanteva pavattatīti sabbasaṅkhārasamathotiādīni nāmāni labhati. Imasmiṃ pana aṭṭhavidhe ābhogasamannāhāre imasmiṃ ṭhāne ekopi labbhati, dvepi sabbepi labbhanteva.
ਸਙ੍ਖਾਯਾਤਿ ਞਾਣੇਨ ਜਾਨਿਤ੍વਾ। ਪਰੋਪਰਾਨੀਤਿ ਪਰਾਨਿ ਚ ਓਪਰਾਨਿ ਚ। ਪਰਅਤ੍ਤਭਾવਸਕਅਤ੍ਤਭਾવਾਨਿ ਹਿ ਪਰਾਨਿ ਚ ਓਪਰਾਨਿ ਚਾਤਿ વੁਤ੍ਤਂ ਹੋਤਿ। ਯਸ੍ਸਾਤਿ ਯਸ੍ਸ ਅਰਹਤੋ। ਇਞ੍ਜਿਤਨ੍ਤਿ ਰਾਗਿਞ੍ਜਿਤਂ ਦੋਸਮੋਹਮਾਨਦਿਟ੍ਠਿਕਿਲੇਸਦੁਚ੍ਚਰਿਤਿਞ੍ਜਿਤਨ੍ਤਿ ਇਮਾਨਿ ਸਤ੍ਤ ਇਞ੍ਜਿਤਾਨਿ ਚਲਿਤਾਨਿ ਫਨ੍ਦਿਤਾਨਿ। ਨਤ੍ਥਿ ਕੁਹਿਞ੍ਚੀਤਿ ਕਤ੍ਥਚਿ ਏਕਾਰਮ੍ਮਣੇਪਿ ਨਤ੍ਥਿ। ਸਨ੍ਤੋਤਿ ਪਚ੍ਚਨੀਕਕਿਲੇਸਾਨਂ ਸਨ੍ਤਤਾਯ ਸਨ੍ਤੋ। વਿਧੂਮੋਤਿ ਕਾਯਦੁਚ੍ਚਰਿਤਾਦਿਧੂਮવਿਰਹਿਤੋ। ਅਨੀਘੋਤਿ ਰਾਗਾਦਿਈਘવਿਰਹਿਤੋ। ਨਿਰਾਸੋਤਿ ਨਿਤ੍ਤਣ੍ਹੋ। ਅਤਾਰੀਤਿ ਤਿਣ੍ਣੋ ਉਤ੍ਤਿਣ੍ਣੋ ਸਮਤਿਕ੍ਕਨ੍ਤੋ। ਸੋਤਿ ਸੋ ਅਰਹਂ ਖੀਣਾਸવੋ। ਜਾਤਿਜਰਨ੍ਤਿ ਏਤ੍ਥ ਜਾਤਿਜਰਾਗਹਣੇਨੇવ ਬ੍ਯਾਧਿਮਰਣਮ੍ਪਿ ਗਹਿਤਮੇવਾਤਿ વੇਦਿਤਬ੍ਬਂ। ਇਤਿ ਸੁਤ੍ਤਨ੍ਤੇਪਿ ਗਾਥਾਯਪਿ ਅਰਹਤ੍ਤਫਲਸਮਾਪਤ੍ਤਿਯੇવ ਕਥਿਤਾਤਿ।
Saṅkhāyāti ñāṇena jānitvā. Paroparānīti parāni ca oparāni ca. Paraattabhāvasakaattabhāvāni hi parāni ca oparāni cāti vuttaṃ hoti. Yassāti yassa arahato. Iñjitanti rāgiñjitaṃ dosamohamānadiṭṭhikilesaduccaritiñjitanti imāni satta iñjitāni calitāni phanditāni. Natthi kuhiñcīti katthaci ekārammaṇepi natthi. Santoti paccanīkakilesānaṃ santatāya santo. Vidhūmoti kāyaduccaritādidhūmavirahito. Anīghoti rāgādiīghavirahito. Nirāsoti nittaṇho. Atārīti tiṇṇo uttiṇṇo samatikkanto. Soti so arahaṃ khīṇāsavo. Jātijaranti ettha jātijarāgahaṇeneva byādhimaraṇampi gahitamevāti veditabbaṃ. Iti suttantepi gāthāyapi arahattaphalasamāpattiyeva kathitāti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੨. ਆਨਨ੍ਦਸੁਤ੍ਤਂ • 2. Ānandasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੨. ਆਨਨ੍ਦਸੁਤ੍ਤવਣ੍ਣਨਾ • 2. Ānandasuttavaṇṇanā
