| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੪. ਆਨਨ੍ਦਸੁਤ੍ਤવਣ੍ਣਨਾ
4. Ānandasuttavaṇṇanā
੨੧੨. ਚਤੁਤ੍ਥੇ ਰਾਗੋਤਿ ਆਯਸ੍ਮਾ ਆਨਨ੍ਦੋ ਮਹਾਪੁਞ੍ਞੋ ਸਮ੍ਭਾવਿਤੋ, ਤਂ ਰਾਜਰਾਜਮਹਾਮਤ੍ਤਾਦਯੋ ਨਿਮਨ੍ਤੇਤ੍વਾ ਅਨ੍ਤੋਨਿવੇਸਨੇ ਨਿਸੀਦਾਪੇਨ੍ਤਿ। ਸਬ੍ਬਾਲਙ੍ਕਾਰਪਟਿਮਣ੍ਡਿਤਾਪਿ ਇਤ੍ਥਿਯੋ ਥੇਰਂ ਉਪਸਙ੍ਕਮਿਤ੍વਾ વਨ੍ਦਿਤ੍વਾ ਤਾਲવਣ੍ਟੇਨ ਬੀਜੇਨ੍ਤਿ, ਉਪਨਿਸੀਦਿਤ੍વਾ ਪਞ੍ਹਂ ਪੁਚ੍ਛਨ੍ਤਿ ਧਮ੍ਮਂ ਸੁਣਨ੍ਤਿ। ਤਤ੍ਥ ਆਯਸ੍ਮਤੋ વਙ੍ਗੀਸਸ੍ਸ ਨવਪਬ੍ਬਜਿਤਸ੍ਸ ਆਰਮ੍ਮਣਂ ਪਰਿਗ੍ਗਹੇਤੁਂ ਅਸਕ੍ਕੋਨ੍ਤਸ੍ਸ ਇਤ੍ਥਿਰੂਪਾਰਮ੍ਮਣੇ ਰਾਗੋ ਚਿਤ੍ਤਂ ਅਨੁਦ੍ਧਂਸੇਤਿ। ਸੋ ਸਦ੍ਧਾਪਬ੍ਬਜਿਤਤ੍ਤਾ ਉਜੁਜਾਤਿਕੋ ਕੁਲਪੁਤ੍ਤੋ ‘‘ਅਯਂ ਮੇ ਰਾਗੋ વਡ੍ਢਿਤ੍વਾ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਅਤ੍ਥਂ ਨਾਸੇਯ੍ਯਾ’’ਤਿ ਚਿਨ੍ਤੇਤ੍વਾ ਅਨਨ੍ਤਰਂ ਨਿਸਿਨ੍ਨੋવ ਥੇਰਸ੍ਸ ਅਤ੍ਤਾਨਂ ਆવਿਕਰੋਨ੍ਤੋ ਕਾਮਰਾਗੇਨਾਤਿਆਦਿਮਾਹ।
212. Catutthe rāgoti āyasmā ānando mahāpuñño sambhāvito, taṃ rājarājamahāmattādayo nimantetvā antonivesane nisīdāpenti. Sabbālaṅkārapaṭimaṇḍitāpi itthiyo theraṃ upasaṅkamitvā vanditvā tālavaṇṭena bījenti, upanisīditvā pañhaṃ pucchanti dhammaṃ suṇanti. Tattha āyasmato vaṅgīsassa navapabbajitassa ārammaṇaṃ pariggahetuṃ asakkontassa itthirūpārammaṇe rāgo cittaṃ anuddhaṃseti. So saddhāpabbajitattā ujujātiko kulaputto ‘‘ayaṃ me rāgo vaḍḍhitvā diṭṭhadhammikasamparāyikaṃ atthaṃ nāseyyā’’ti cintetvā anantaraṃ nisinnova therassa attānaṃ āvikaronto kāmarāgenātiādimāha.
ਤਤ੍ਥ ਨਿਬ੍ਬਾਪਨਨ੍ਤਿ ਰਾਗਨਿਬ੍ਬਾਨਕਾਰਣਂ। વਿਪਰਿਯੇਸਾਤਿ વਿਪਲ੍ਲਾਸੇਨ। ਸੁਭਂ ਰਾਗੂਪਸਞ੍ਹਿਤਨ੍ਤਿ ਰਾਗਟ੍ਠਾਨਿਯਂ ਇਟ੍ਠਾਰਮ੍ਮਣਂ। ਪਰਤੋ ਪਸ੍ਸਾਤਿ ਅਨਿਚ੍ਚਤੋ ਪਸ੍ਸ। ਮਾ ਚ ਅਤ੍ਤਤੋਤਿ ਅਤ੍ਤਤੋ ਮਾ ਪਸ੍ਸ। ਕਾਯਗਤਾ ਤ੍ਯਤ੍ਥੂਤਿ ਕਾਯਗਤਾ ਤੇ ਅਤ੍ਥੁ। ਅਨਿਮਿਤ੍ਤਞ੍ਚ ਭਾવੇਹੀਤਿ ਨਿਚ੍ਚਾਦੀਨਂ ਨਿਮਿਤ੍ਤਾਨਂ ਉਗ੍ਘਾਟਿਤਤ੍ਤਾ વਿਪਸ੍ਸਨਾ ਅਨਿਮਿਤ੍ਤਾ ਨਾਮ, ਤਂ ਭਾવੇਹੀਤਿ વਦਤਿ। ਮਾਨਾਭਿਸਮਯਾਤਿ ਮਾਨਸ੍ਸ ਦਸ੍ਸਨਾਭਿਸਮਯਾ ਚੇવ ਪਹਾਨਾਭਿਸਮਯਾ ਚ। ਉਪਸਨ੍ਤੋਤਿ ਰਾਗਾਦਿਸਨ੍ਤਤਾਯ ਉਪਸਨ੍ਤੋ। ਚਤੁਤ੍ਥਂ।
Tattha nibbāpananti rāganibbānakāraṇaṃ. Vipariyesāti vipallāsena. Subhaṃ rāgūpasañhitanti rāgaṭṭhāniyaṃ iṭṭhārammaṇaṃ. Parato passāti aniccato passa. Mā ca attatoti attato mā passa. Kāyagatā tyatthūti kāyagatā te atthu. Animittañca bhāvehīti niccādīnaṃ nimittānaṃ ugghāṭitattā vipassanā animittā nāma, taṃ bhāvehīti vadati. Mānābhisamayāti mānassa dassanābhisamayā ceva pahānābhisamayā ca. Upasantoti rāgādisantatāya upasanto. Catutthaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੪. ਆਨਨ੍ਦਸੁਤ੍ਤਂ • 4. Ānandasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੪. ਆਨਨ੍ਦਸੁਤ੍ਤવਣ੍ਣਨਾ • 4. Ānandasuttavaṇṇanā
