| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3-10. ஆனந்த³த்தே²ரஅபதா³னவண்ணனா
3-10. Ānandattheraapadānavaṇṇanā
ஆராமத்³வாரா நிக்க²ம்மாதிஆதி³கங் ஆயஸ்மதோ ஆனந்த³த்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹங்ஸவதீனக³ரே ஸத்து² வேமாதிகபா⁴தா ஹுத்வா நிப்³ப³த்தி. ஸுமனோதிஸ்ஸ நாமங் அஹோஸி. பிதா பனஸ்ஸ நந்த³ராஜா நாம. ஸோ அத்தனோ புத்தஸ்ஸ ஸுமனகுமாரஸ்ஸ வயப்பத்தஸ்ஸ ஹங்ஸவதீனக³ரதோ வீஸயோஜனஸதே டா²னே போ⁴க³னக³ரங் அதா³ஸி. ஸோ கதா³சி கதா³சி ஆக³ந்த்வா ஸத்தா²ரஞ்ச பிதரஞ்ச பஸ்ஸதி. ததா³ ராஜா ஸத்தா²ரஞ்ச ஸதஸஹஸ்ஸபரிமாணங் பி⁴க்கு²ஸங்க⁴ஞ்ச ஸயமேவ ஸக்கச்சங் உபட்ட²ஹி, அஞ்ஞேஸங் உபட்டா²துங் ந தே³தி.
Ārāmadvārā nikkhammātiādikaṃ āyasmato ānandattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare satthu vemātikabhātā hutvā nibbatti. Sumanotissa nāmaṃ ahosi. Pitā panassa nandarājā nāma. So attano puttassa sumanakumārassa vayappattassa haṃsavatīnagarato vīsayojanasate ṭhāne bhoganagaraṃ adāsi. So kadāci kadāci āgantvā satthārañca pitarañca passati. Tadā rājā satthārañca satasahassaparimāṇaṃ bhikkhusaṅghañca sayameva sakkaccaṃ upaṭṭhahi, aññesaṃ upaṭṭhātuṃ na deti.
தேன ஸமயேன பச்சந்தோ குபிதோ அஹோஸி. குமாரோ தஸ்ஸ குபிதபா⁴வங் ரஞ்ஞோ அனாரோசெத்வா ஸயமேவ தங் வூபஸமேஸி. தங் ஸுத்வா ராஜா துட்ட²மானஸோ ‘‘வரங் தே தாவ த³ம்மி, க³ண்ஹாஹீ’’தி ஆஹ. குமாரோ ‘‘ஸத்தா²ரங் பி⁴க்கு²ஸங்க⁴ஞ்ச தேமாஸங் உபட்ட²ஹந்தோ ஜீவிதங் அவஞ்ஜ²ங் காதுங் இச்சா²மீ’’தி ஆஹ. ‘‘ஏதங் ந ஸக்கா, அஞ்ஞங் வதே³ஹீ’’தி. ‘‘தே³வ, க²த்தியானங் த்³வே கதா² நாம நத்தி², ஏதங் மே தே³ஹி, ந மய்ஹங் அஞ்ஞேனத்தோ², ஸசே ஸத்தா² அனுஜானாதி, தி³ன்னமேவா’’தி. ஸோ ‘‘ஸத்து² சித்தங் ஜானிஸ்ஸாமீ’’தி விஹாரங் க³தோ. தேன ச ஸமயேன ப⁴க³வா க³ந்த⁴குடிங் பவிட்டோ² ஹோதி. ஸோ பி⁴க்கூ² உபஸங்கமித்வா ‘‘அஹங், ப⁴ந்தே, ப⁴க³வந்தங் த³ஸ்ஸனாய ஆக³தோ, த³ஸ்ஸேத² ம’’ந்தி. பி⁴க்கூ² ‘‘ஸுமனோ நாம தே²ரோ ஸத்து² உபட்டா²கோ, தஸ்ஸ ஸந்திகங் க³ச்சா²ஹீ’’தி ஆஹங்ஸு. ஸோ தே²ரஸ்ஸ ஸந்திகங் க³ந்த்வா ‘‘ஸத்தா²ரங், ப⁴ந்தே, த³ஸ்ஸேதா²’’தி ஆஹ. அத² தே²ரோ தஸ்ஸ பஸ்ஸந்தஸ்ஸேவ பத²வியங் நிமுஜ்ஜித்வா ப⁴க³வந்தங் உபஸங்கமித்வா ‘‘ராஜபுத்தோ, ப⁴ந்தே, தும்ஹாகங் த³ஸ்ஸனாய ஆக³தோ’’தி ஆஹ. ‘‘தேன ஹி பி⁴க்கு² ப³ஹி ஆஸனங் பஞ்ஞபேஹீ’’தி. தே²ரோ புனபி பு³த்³தா⁴ஸனங் க³ஹெத்வா அந்தோக³ந்த⁴குடியங் நிமுஜ்ஜித்வா தஸ்ஸ பஸ்ஸந்தஸ்ஸ ப³ஹிபரிவேணே பாதுப⁴வித்வா க³ந்த⁴குடிபரிவேணே ஆஸனங் பஞ்ஞாபேஸி. குமாரோ தங் தி³ஸ்வா ‘‘மஹந்தோ வதாயங் பி⁴க்கூ²’’தி சித்தங் உப்பாதே³ஸி.
Tena samayena paccanto kupito ahosi. Kumāro tassa kupitabhāvaṃ rañño anārocetvā sayameva taṃ vūpasamesi. Taṃ sutvā rājā tuṭṭhamānaso ‘‘varaṃ te tāva dammi, gaṇhāhī’’ti āha. Kumāro ‘‘satthāraṃ bhikkhusaṅghañca temāsaṃ upaṭṭhahanto jīvitaṃ avañjhaṃ kātuṃ icchāmī’’ti āha. ‘‘Etaṃ na sakkā, aññaṃ vadehī’’ti. ‘‘Deva, khattiyānaṃ dve kathā nāma natthi, etaṃ me dehi, na mayhaṃ aññenattho, sace satthā anujānāti, dinnamevā’’ti. So ‘‘satthu cittaṃ jānissāmī’’ti vihāraṃ gato. Tena ca samayena bhagavā gandhakuṭiṃ paviṭṭho hoti. So bhikkhū upasaṅkamitvā ‘‘ahaṃ, bhante, bhagavantaṃ dassanāya āgato, dassetha ma’’nti. Bhikkhū ‘‘sumano nāma thero satthu upaṭṭhāko, tassa santikaṃ gacchāhī’’ti āhaṃsu. So therassa santikaṃ gantvā ‘‘satthāraṃ, bhante, dassethā’’ti āha. Atha thero tassa passantasseva pathaviyaṃ nimujjitvā bhagavantaṃ upasaṅkamitvā ‘‘rājaputto, bhante, tumhākaṃ dassanāya āgato’’ti āha. ‘‘Tena hi bhikkhu bahi āsanaṃ paññapehī’’ti. Thero punapi buddhāsanaṃ gahetvā antogandhakuṭiyaṃ nimujjitvā tassa passantassa bahipariveṇe pātubhavitvā gandhakuṭipariveṇe āsanaṃ paññāpesi. Kumāro taṃ disvā ‘‘mahanto vatāyaṃ bhikkhū’’ti cittaṃ uppādesi.
ப⁴க³வாபி க³ந்த⁴குடிதோ நிக்க²மித்வா பஞ்ஞத்தாஸனே நிஸீதி³. ராஜபுத்தோ ஸத்தா²ரங் வந்தி³த்வா படிஸந்தா²ரங் கத்வா ‘‘அயங், ப⁴ந்தே, தே²ரோ தும்ஹாகங் ஸாஸனே வல்லபோ⁴ மஞ்ஞே’’தி? ‘‘ஆம, குமார, வல்லபோ⁴’’தி. ‘‘கிங் கத்வா, ப⁴ந்தே, ஏஸ வல்லபோ⁴’’தி? ‘‘தா³னாதீ³னி புஞ்ஞானி கத்வா’’தி. ‘‘ப⁴க³வா, அஹம்பி அயங் தே²ரோ விய அனாக³தே பு³த்³த⁴ஸாஸனே வல்லபோ⁴ ஹோதுகாமோ’’தி ஸோ பு³த்³த⁴ப்பமுக²ஸ்ஸ ஸங்க⁴ஸ்ஸ ஸத்தாஹங் க²ந்தா⁴வாரே ப⁴த்தங் த³த்வா ஸத்தமே தி³வஸே, ‘‘ப⁴ந்தே, மயா பிது ஸந்திகா தும்ஹாகங் தேமாஸங் படிஜக்³க³னவரோ லத்³தோ⁴, தேமாஸங் மே வஸ்ஸாவாஸங் அதி⁴வாஸேதா²’’தி வத்வா ஸத்து² அதி⁴வாஸனங் விதி³த்வா ஸபரிவாரங் ப⁴க³வந்தங் க³ஹெத்வா யோஜனே யோஜனே ஸத்து² பி⁴க்கு²ஸங்க⁴ஸ்ஸ ச வஸனானுச்ச²விகே விஹாரே காரெத்வா தத்த² தத்த² வஸாபெந்தோ அத்தனோ வஸனட்டா²னஸமீபே ஸதஸஹஸ்ஸேன கீதே ஸோப⁴னநாமகே உய்யானே ஸதஸஹஸ்ஸேன காரிதங் விஹாரங் பவேஸாபெத்வா –
Bhagavāpi gandhakuṭito nikkhamitvā paññattāsane nisīdi. Rājaputto satthāraṃ vanditvā paṭisanthāraṃ katvā ‘‘ayaṃ, bhante, thero tumhākaṃ sāsane vallabho maññe’’ti? ‘‘Āma, kumāra, vallabho’’ti. ‘‘Kiṃ katvā, bhante, esa vallabho’’ti? ‘‘Dānādīni puññāni katvā’’ti. ‘‘Bhagavā, ahampi ayaṃ thero viya anāgate buddhasāsane vallabho hotukāmo’’ti so buddhappamukhassa saṅghassa sattāhaṃ khandhāvāre bhattaṃ datvā sattame divase, ‘‘bhante, mayā pitu santikā tumhākaṃ temāsaṃ paṭijagganavaro laddho, temāsaṃ me vassāvāsaṃ adhivāsethā’’ti vatvā satthu adhivāsanaṃ viditvā saparivāraṃ bhagavantaṃ gahetvā yojane yojane satthu bhikkhusaṅghassa ca vasanānucchavike vihāre kāretvā tattha tattha vasāpento attano vasanaṭṭhānasamīpe satasahassena kīte sobhananāmake uyyāne satasahassena kāritaṃ vihāraṃ pavesāpetvā –
‘‘ஸதஸஹஸ்ஸேன மே கீதங், ஸதஸஹஸ்ஸேன காரிதங்;
‘‘Satasahassena me kītaṃ, satasahassena kāritaṃ;
ஸோப⁴னங் நாம உய்யானங், படிக்³க³ண்ஹ மஹாமுனீ’’தி. –
Sobhanaṃ nāma uyyānaṃ, paṭiggaṇha mahāmunī’’ti. –
உத³கங் பாதேஸி. ஸோ வஸ்ஸூபனாயிகதி³வஸே ஸத்து² மஹாதா³னங் பவத்தெத்வா ‘‘இமினா நீஹாரேன தா³னங் த³தெ³ய்யாதா²’’தி புத்ததா³ரே அமச்சே ச தா³னே கிச்சகரணே ச நியோஜெத்வா ஸயங் ஸுமனத்தே²ரஸ்ஸ வஸனட்டா²னஸமீபேயேவ வஸந்தோ ஏவங் அத்தனோ வஸனட்டா²னே ஸத்தா²ரங் தேமாஸங் உபட்ட²ஹி. உபகட்டா²ய பன பவாரணாய கா³மங் பவிஸித்வா ஸத்தாஹங் மஹாதா³னங் பவத்தெத்வா ஸத்தமே தி³வஸே ஸத்து² பி⁴க்கு²ஸங்க⁴ஸ்ஸ ச பாத³மூலே திசீவரே ட²பெத்வா வந்தி³த்வா ‘‘ப⁴ந்தே, யதே³தங் மயா க²ந்தா⁴வாரதோ பட்டா²ய புஞ்ஞங் கதங், ந தங் ஸக்கஸம்பத்திஆதீ³னங் அத்தா²ய கதங், அத² கோ² அஹம்பி ஸுமனத்தே²ரோ விய அனாக³தே ஏகஸ்ஸ பு³த்³த⁴ஸ்ஸ உபட்டா²கோ வல்லபோ⁴ ப⁴வெய்ய’’ந்தி பத்த²னங் அகாஸி. ஸத்தா² தஸ்ஸ அனந்தராயதங் தி³ஸ்வா ப்³யாகரித்வா பக்காமி.
Udakaṃ pātesi. So vassūpanāyikadivase satthu mahādānaṃ pavattetvā ‘‘iminā nīhārena dānaṃ dadeyyāthā’’ti puttadāre amacce ca dāne kiccakaraṇe ca niyojetvā sayaṃ sumanattherassa vasanaṭṭhānasamīpeyeva vasanto evaṃ attano vasanaṭṭhāne satthāraṃ temāsaṃ upaṭṭhahi. Upakaṭṭhāya pana pavāraṇāya gāmaṃ pavisitvā sattāhaṃ mahādānaṃ pavattetvā sattame divase satthu bhikkhusaṅghassa ca pādamūle ticīvare ṭhapetvā vanditvā ‘‘bhante, yadetaṃ mayā khandhāvārato paṭṭhāya puññaṃ kataṃ, na taṃ sakkasampattiādīnaṃ atthāya kataṃ, atha kho ahampi sumanatthero viya anāgate ekassa buddhassa upaṭṭhāko vallabho bhaveyya’’nti patthanaṃ akāsi. Satthā tassa anantarāyataṃ disvā byākaritvā pakkāmi.
ஸோ தஸ்மிங் பு³த்³து⁴ப்பாதே³ வஸ்ஸஸதஸஹஸ்ஸங் புஞ்ஞானி கத்வா ததோ பரம்பி தத்த² தத்த² ப⁴வே உளாரானி புஞ்ஞகம்மானி உபசினித்வா தே³வமனுஸ்ஸேஸு ஸங்ஸரந்தோ கஸ்ஸபப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்வா ஏகஸ்ஸ தே²ரஸ்ஸ பிண்டா³ய சரதோ பத்தக்³க³ஹணத்த²ங் உத்தரஸாடகங் கத்வா பூஜங் அகாஸி. புன ஸக்³கே³ நிப்³ப³த்தித்வா ததோ சுதோ பா³ராணஸிராஜா ஹுத்வா அட்ட² பச்சேகபு³த்³தே⁴ தி³ஸ்வா தே போ⁴ஜெத்வா அத்தனோ மங்க³லுய்யானே அட்ட² பண்ணஸாலாயோ காரெத்வா தேஸங் நிஸீத³னத்தா²ய அட்ட² ஸப்³ப³ரதனமயபீடே² சேவ மணிஆதா⁴ரகே ச படியாதெ³த்வா த³ஸவஸ்ஸஸஹஸ்ஸானி உபட்டா²னங் அகாஸி, ஏதானி பாகடானி.
So tasmiṃ buddhuppāde vassasatasahassaṃ puññāni katvā tato parampi tattha tattha bhave uḷārāni puññakammāni upacinitvā devamanussesu saṃsaranto kassapabhagavato kāle kulagehe nibbatto viññutaṃ patvā ekassa therassa piṇḍāya carato pattaggahaṇatthaṃ uttarasāṭakaṃ katvā pūjaṃ akāsi. Puna sagge nibbattitvā tato cuto bārāṇasirājā hutvā aṭṭha paccekabuddhe disvā te bhojetvā attano maṅgaluyyāne aṭṭha paṇṇasālāyo kāretvā tesaṃ nisīdanatthāya aṭṭha sabbaratanamayapīṭhe ceva maṇiādhārake ca paṭiyādetvā dasavassasahassāni upaṭṭhānaṃ akāsi, etāni pākaṭāni.
கப்பஸதஸஹஸ்ஸங் பன தத்த² தத்த² ப⁴வே புஞ்ஞானி உபசினந்தோ அம்ஹாகங் போ³தி⁴ஸத்தேன ஸத்³தி⁴ங் துஸிதபுரே நிப்³ப³த்தித்வா ததோ சுதோ அமிதோத³னஸக்கஸ்ஸ கே³ஹே நிப்³ப³த்தித்வா ஸப்³பே³ ஞாதகே ஆனந்தி³தே கரொந்தோ ஜாதோதி ஆனந்தோ³த்வேவ நாமங் லபி⁴. ஸோ அனுக்கமேன வயப்பத்தோ கதாபி⁴னிக்க²மனே ஸம்மாஸம்போ³தி⁴ங் பத்வா பவத்திதவரத⁴ம்மசக்கே பட²மங் கபிலவத்து²ங் க³ந்த்வா ததோ நிக்க²மந்தே ப⁴க³வதி தஸ்ஸ பரிவாரத்த²ங் பப்³ப³ஜிதுங் நிக்க²மந்தேஹி ப⁴த்³தி³யாதீ³ஹி ஸத்³தி⁴ங் நிக்க²மித்வா ப⁴க³வதோ ஸந்திகே பப்³ப³ஜித்வா ஆயஸ்மதோ புண்ணஸ்ஸ மந்தாணிபுத்தஸ்ஸ ஸந்திகே த⁴ம்மகத²ங் ஸுத்வா ஸோதாபத்திப²லே பதிட்ட²ஹி.
Kappasatasahassaṃ pana tattha tattha bhave puññāni upacinanto amhākaṃ bodhisattena saddhiṃ tusitapure nibbattitvā tato cuto amitodanasakkassa gehe nibbattitvā sabbe ñātake ānandite karonto jātoti ānandotveva nāmaṃ labhi. So anukkamena vayappatto katābhinikkhamane sammāsambodhiṃ patvā pavattitavaradhammacakke paṭhamaṃ kapilavatthuṃ gantvā tato nikkhamante bhagavati tassa parivāratthaṃ pabbajituṃ nikkhamantehi bhaddiyādīhi saddhiṃ nikkhamitvā bhagavato santike pabbajitvā āyasmato puṇṇassa mantāṇiputtassa santike dhammakathaṃ sutvā sotāpattiphale patiṭṭhahi.
தேன ச ஸமயேன ப⁴க³வதோ பட²மபோ³தி⁴யங் வீஸதிவஸ்ஸானி அனிப³த்³தா⁴ உபட்டா²கா அஹேஸுங். ஏகதா³ நாக³ஸமாலோ பத்தசீவரங் க³ஹெத்வா விசரதி, ஏகதா³ நாகி³தோ, ஏகதா³ உபவானோ, ஏகதா³ ஸுனக்க²த்தோ, ஏகதா³ சுந்தோ³ ஸமணுத்³தே³ஸோ, ஏகதா³ ஸாக³தோ, ஏகதா³ மேகி⁴யோ, தே யேபு⁴ய்யேன ஸத்து² சித்தங் நாராத⁴யிங்ஸு. அதே²கதி³வஸங் ப⁴க³வா க³ந்த⁴குடிபரிவேணே பஞ்ஞத்தவரபு³த்³தா⁴ஸனே பி⁴க்கு²ஸங்க⁴பரிவுதோ நிஸின்னோ பி⁴க்கூ² ஆமந்தேஸி – ‘‘அஹங், பி⁴க்க²வே, இதா³னி மஹல்லகோ ஏகச்சே பி⁴க்கூ² ‘இமினா மக்³கே³ன க³ச்சா²மீ’தி வுத்தே அஞ்ஞேன மக்³கே³ன க³ச்ச²ந்தி, ஏகச்சே மய்ஹங் பத்தசீவரங் பூ⁴மியங் நிக்கி²பந்தி, மய்ஹங் நிப³த்³து⁴பட்டா²கங் ஏகங் பி⁴க்கு²ங் விஜானதா²’’தி. தங் ஸுத்வா பி⁴க்கூ²னங் த⁴ம்மஸங்வேகோ³ உத³பாதி³. அதா²யஸ்மா ஸாரிபுத்தோ உட்டா²ய ப⁴க³வந்தங் வந்தி³த்வா ‘‘அஹங், ப⁴ந்தே, தும்ஹே உபட்ட²ஹிஸ்ஸாமீ’’தி ஆஹ. தங் ப⁴க³வா படிக்கி²பி. ஏதேனுபாயேன மஹாமொக்³க³ல்லானங் ஆதி³ங் கத்வா ஸப்³பே³ மஹாஸாவகா ‘‘அஹங் உபட்ட²ஹிஸ்ஸாமி , அஹங் உபட்ட²ஹிஸ்ஸாமீ’’தி உட்ட²ஹிங்ஸு ட²பெத்வா ஆயஸ்மந்தங் ஆனந்த³ங். தேபி ப⁴க³வா படிக்கி²பி.
Tena ca samayena bhagavato paṭhamabodhiyaṃ vīsativassāni anibaddhā upaṭṭhākā ahesuṃ. Ekadā nāgasamālo pattacīvaraṃ gahetvā vicarati, ekadā nāgito, ekadā upavāno, ekadā sunakkhatto, ekadā cundo samaṇuddeso, ekadā sāgato, ekadā meghiyo, te yebhuyyena satthu cittaṃ nārādhayiṃsu. Athekadivasaṃ bhagavā gandhakuṭipariveṇe paññattavarabuddhāsane bhikkhusaṅghaparivuto nisinno bhikkhū āmantesi – ‘‘ahaṃ, bhikkhave, idāni mahallako ekacce bhikkhū ‘iminā maggena gacchāmī’ti vutte aññena maggena gacchanti, ekacce mayhaṃ pattacīvaraṃ bhūmiyaṃ nikkhipanti, mayhaṃ nibaddhupaṭṭhākaṃ ekaṃ bhikkhuṃ vijānathā’’ti. Taṃ sutvā bhikkhūnaṃ dhammasaṃvego udapādi. Athāyasmā sāriputto uṭṭhāya bhagavantaṃ vanditvā ‘‘ahaṃ, bhante, tumhe upaṭṭhahissāmī’’ti āha. Taṃ bhagavā paṭikkhipi. Etenupāyena mahāmoggallānaṃ ādiṃ katvā sabbe mahāsāvakā ‘‘ahaṃ upaṭṭhahissāmi , ahaṃ upaṭṭhahissāmī’’ti uṭṭhahiṃsu ṭhapetvā āyasmantaṃ ānandaṃ. Tepi bhagavā paṭikkhipi.
ஆனந்தோ³ பன துண்ஹீயேவ நிஸீதி³. அத² நங் பி⁴க்கூ² ஆஹங்ஸு – ‘‘ஆவுஸோ, த்வம்பி ஸத்து² உபட்டா²கட்டா²னங் யாசாஹீ’’தி. ‘‘யாசித்வா லத்³து⁴பட்டா²னங் நாம கீதி³ஸங் ஹோதி? ஸசே ருச்சதி, ஸத்தா² ஸயமேவ வக்க²தீ’’தி. அத² ப⁴க³வா – ‘‘ந, பி⁴க்க²வே, ஆனந்தோ³ அஞ்ஞேஹி உஸ்ஸாஹேதப்³போ³, ஸயமேவ ஜானித்வா மங் உபட்ட²ஹிஸ்ஸதீ’’தி ஆஹ. ததோ பி⁴க்கூ² ‘‘உட்டே²ஹி, ஆவுஸோ ஆனந்த³, ஸத்தா²ரங் உபட்டா²கட்டா²னங் யாசாஹீ’’தி ஆஹங்ஸு. தே²ரோ உட்ட²ஹித்வா ‘‘ஸசே மே, ப⁴ந்தே, ப⁴க³வா அத்தனா லத்³த⁴ங் பணீதங் சீவரங் ந த³ஸ்ஸதி, பணீதங் பிண்ட³பாதங் ந த³ஸ்ஸதி, ஏகக³ந்த⁴குடியங் வஸிதுங் ந த³ஸ்ஸதி, நிமந்தனங் க³ஹெத்வா ந க³மிஸ்ஸதி, ஏவாஹங் ப⁴க³வந்தங் உபட்ட²ஹிஸ்ஸாமீ’’தி ஆஹ. ‘‘எத்தகே கு³ணே லப⁴தோ ஸத்து² உபட்டா²னங் கோ பா⁴ரோ’’தி உபவாத³மோசனத்த²ங் இமே சத்தாரோ படிக்கே²பா, ‘‘ஸசே, ப⁴ந்தே, ப⁴க³வா மயா க³ஹிதங் நிமந்தனங் க³மிஸ்ஸதி, ஸசாஹங் தே³ஸந்தரதோ ஆக³தாக³தே தாவதே³வ த³ஸ்ஸேதுங் லபா⁴மி, யதா³ மே கங்கா² உப்பஜ்ஜதி, தாவதே³வ ப⁴க³வந்தங் உபஸங்கமித்வா புச்சி²துங் லபா⁴மி, ஸசே ப⁴க³வா பரம்முகா² தே³ஸிதங் த⁴ம்மங் புன மய்ஹங் ப்³யாகரிஸ்ஸஸி, ஏவாஹங் ப⁴க³வந்தங் உபட்ட²ஹிஸ்ஸாமி’’. ‘‘எத்தகம்பி ஸத்து² ஸந்திகே அனுக்³க³ஹங் ந லப⁴தீ’’தி உபவாத³மோசனத்த²ஞ்சேவ த⁴ம்மப⁴ண்டா³கா³ரிகபா⁴வபரிபூரணத்த²ஞ்ச இமா சதஸ்ஸோ யாசனாதி இமே அட்ட² வரே க³ஹெத்வா நிப³த்³து⁴பட்டா²கோ அஹோஸி. தஸ்ஸேவ டா²னந்தரஸ்ஸ அத்தா²ய கப்பஸதஸஹஸ்ஸங் பூரிதானங் பாரமீனங் ப²லங் பாபுணி.
Ānando pana tuṇhīyeva nisīdi. Atha naṃ bhikkhū āhaṃsu – ‘‘āvuso, tvampi satthu upaṭṭhākaṭṭhānaṃ yācāhī’’ti. ‘‘Yācitvā laddhupaṭṭhānaṃ nāma kīdisaṃ hoti? Sace ruccati, satthā sayameva vakkhatī’’ti. Atha bhagavā – ‘‘na, bhikkhave, ānando aññehi ussāhetabbo, sayameva jānitvā maṃ upaṭṭhahissatī’’ti āha. Tato bhikkhū ‘‘uṭṭhehi, āvuso ānanda, satthāraṃ upaṭṭhākaṭṭhānaṃ yācāhī’’ti āhaṃsu. Thero uṭṭhahitvā ‘‘sace me, bhante, bhagavā attanā laddhaṃ paṇītaṃ cīvaraṃ na dassati, paṇītaṃ piṇḍapātaṃ na dassati, ekagandhakuṭiyaṃ vasituṃ na dassati, nimantanaṃ gahetvā na gamissati, evāhaṃ bhagavantaṃ upaṭṭhahissāmī’’ti āha. ‘‘Ettake guṇe labhato satthu upaṭṭhānaṃ ko bhāro’’ti upavādamocanatthaṃ ime cattāro paṭikkhepā, ‘‘sace, bhante, bhagavā mayā gahitaṃ nimantanaṃ gamissati, sacāhaṃ desantarato āgatāgate tāvadeva dassetuṃ labhāmi, yadā me kaṅkhā uppajjati, tāvadeva bhagavantaṃ upasaṅkamitvā pucchituṃ labhāmi, sace bhagavā parammukhā desitaṃ dhammaṃ puna mayhaṃ byākarissasi, evāhaṃ bhagavantaṃ upaṭṭhahissāmi’’. ‘‘Ettakampi satthu santike anuggahaṃ na labhatī’’ti upavādamocanatthañceva dhammabhaṇḍāgārikabhāvaparipūraṇatthañca imā catasso yācanāti ime aṭṭha vare gahetvā nibaddhupaṭṭhāko ahosi. Tasseva ṭhānantarassa atthāya kappasatasahassaṃ pūritānaṃ pāramīnaṃ phalaṃ pāpuṇi.
ஸோ உபட்டா²கட்டா²னங் லத்³த⁴தி³வஸதோ பட்டா²ய த³ஸப³லங் து³விதே⁴ன உத³கேன திவிதே⁴ன த³ந்தகட்டே²ன ஹத்த²பாத³பரிகம்மேன பிட்டி²பரிகம்மேன க³ந்த⁴குடிபரிவேணஸம்மஜ்ஜனேனாதி ஏவமாதீ³ஹி கிச்சேஹி உபட்ட²ஹந்தோ – ‘‘இமாய நாம வேலாய ஸத்து² இத³ங் நாம லத்³து⁴ங் வட்டதி, இத³ங் நாம காதுங் வட்டதீ’’தி தி³வஸபா⁴க³ங் ஸந்திகாவசரோ ஹுத்வா ரத்திபா⁴கே³ மஹந்தங் த³ண்ட³தீ³பிகங் க³ஹெத்வா க³ந்த⁴குடிபரிவேணங் நவவாரே அனுபரியாயதி ஸத்த²ரி பக்கோஸந்தே படிவசனதா³னாய, தி²னமித்³த⁴வினோத³னத்த²ங். அத² நங் ஸத்தா² ஜேதவனே அரியக³ணமஜ்ஜே² நிஸின்னோ அனேகபரியாயேன பஸங்ஸித்வா ப³ஹுஸ்ஸுதானங் ஸதிமந்தானங் க³திமந்தானங் தி⁴திமந்தானங் உபட்டா²கானஞ்ச பி⁴க்கூ²னங் அக்³க³ட்டா²னே ட²பேஸி.
So upaṭṭhākaṭṭhānaṃ laddhadivasato paṭṭhāya dasabalaṃ duvidhena udakena tividhena dantakaṭṭhena hatthapādaparikammena piṭṭhiparikammena gandhakuṭipariveṇasammajjanenāti evamādīhi kiccehi upaṭṭhahanto – ‘‘imāya nāma velāya satthu idaṃ nāma laddhuṃ vaṭṭati, idaṃ nāma kātuṃ vaṭṭatī’’ti divasabhāgaṃ santikāvacaro hutvā rattibhāge mahantaṃ daṇḍadīpikaṃ gahetvā gandhakuṭipariveṇaṃ navavāre anupariyāyati satthari pakkosante paṭivacanadānāya, thinamiddhavinodanatthaṃ. Atha naṃ satthā jetavane ariyagaṇamajjhe nisinno anekapariyāyena pasaṃsitvā bahussutānaṃ satimantānaṃ gatimantānaṃ dhitimantānaṃ upaṭṭhākānañca bhikkhūnaṃ aggaṭṭhāne ṭhapesi.
ஏவங் ஸத்தா²ரா பஞ்சஸு டா²னேஸு ஏதத³க்³கே³ ட²பிதோ சதூஹி அச்ச²ரியப்³பூ⁴தத⁴ம்மேஹி ஸமன்னாக³தோ ஸத்து² த⁴ம்மகோஸாரக்கோ² அயங் மஹாதே²ரோ ஸேகோ²வ ஸமானோ ஸத்த²ரி பரினிப்³பு³தே ஹெட்டா² வுத்தனயேன பி⁴க்கூ²ஹி ஸமுத்தேஜிதோ தே³வதாய ச ஸங்வேஜிதோ ‘‘ஸ்வேயேவ ச தா³னி த⁴ம்மஸங்கீ³தி காதப்³பா³, ந கோ² பன மேதங் பதிரூபங், ய்வாயங் ஸேகோ² ஸகரணீயோ அஸேகே²ஹி தே²ரேஹி ஸத்³தி⁴ங் த⁴ம்மங் கா³யிதுங் ஸன்னிபாதங் க³ந்து’’ந்தி ஸஞ்ஜாதுஸ்ஸாஹோ விபஸ்ஸனங் பட்ட²பெத்வா ப³ஹுதே³வ ரத்திங் விபஸ்ஸனாய கம்மங் கரொந்தோ சங்கமே வீரியஸமதங் அலபி⁴த்வா ததோ விஹாரங் பவிஸித்வா ஸயனே நிஸீதி³த்வா ஸயிதுகாமோ காயங் ஆவட்டேஸி. அபத்தஞ்ச ஸீஸங் பி³ம்போ³ஹனங், பாதா³ ச பூ⁴மிதோ முத்தமத்தா, ஏகஸ்மிங் அந்தரே அனுபாதா³ய ஆஸவேஹி சித்தங் விமுச்சி, ச²ளபி⁴ஞ்ஞோ அஹோஸி.
Evaṃ satthārā pañcasu ṭhānesu etadagge ṭhapito catūhi acchariyabbhūtadhammehi samannāgato satthu dhammakosārakkho ayaṃ mahāthero sekhova samāno satthari parinibbute heṭṭhā vuttanayena bhikkhūhi samuttejito devatāya ca saṃvejito ‘‘sveyeva ca dāni dhammasaṅgīti kātabbā, na kho pana metaṃ patirūpaṃ, yvāyaṃ sekho sakaraṇīyo asekhehi therehi saddhiṃ dhammaṃ gāyituṃ sannipātaṃ gantu’’nti sañjātussāho vipassanaṃ paṭṭhapetvā bahudeva rattiṃ vipassanāya kammaṃ karonto caṅkame vīriyasamataṃ alabhitvā tato vihāraṃ pavisitvā sayane nisīditvā sayitukāmo kāyaṃ āvaṭṭesi. Apattañca sīsaṃ bimbohanaṃ, pādā ca bhūmito muttamattā, ekasmiṃ antare anupādāya āsavehi cittaṃ vimucci, chaḷabhiñño ahosi.
644. ஏவங் ச²ளபி⁴ஞ்ஞாதி³கு³ணபடிமண்டி³தோ உபட்டா²காதி³கு³ணேஹி ஏதத³க்³க³ட்டா²னங் பத்தோ அத்தனோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் த³ஸ்ஸெந்தோ ஆராமத்³வாரா நிக்க²ம்மாதிஆதி³மாஹ. தத்த² ஆராமத்³வாராதி ஸப்³ப³ஸத்தானங் த⁴ம்மதே³ஸனத்தா²ய விஹாரத்³வாரதோ நிக்க²மித்வா ப³ஹித்³வாரஸமீபே கதமண்ட³பமஜ்ஜே² ஸுபஞ்ஞத்தவரபு³த்³தா⁴ஸனே நிஸின்னோ பது³முத்தரோ நாம மஹாமுனி ஸம்மாஸம்பு³த்³தோ⁴. வஸ்ஸந்தோ அமதங் வுட்டி²ந்தி த⁴ம்மதே³ஸனாமஹாஅமததா⁴ராஹி த⁴ம்மவஸ்ஸங் வஸ்ஸந்தோ. நிப்³பா³பேஸி மஹாஜனந்தி மஹாஜனஸ்ஸ சித்தஸந்தானக³தகிலேஸக்³கி³ங் நிப்³பா³பேஸி வூபஸமேஸி, மஹாஜனங் நிப்³பா³னாமதபானேன ஸந்திங் ஸீதிபா⁴வங் பாபேஸீதி அத்தோ².
644. Evaṃ chaḷabhiññādiguṇapaṭimaṇḍito upaṭṭhākādiguṇehi etadaggaṭṭhānaṃ patto attano pubbakammaṃ saritvā somanassavasena pubbacaritāpadānaṃ dassento ārāmadvārā nikkhammātiādimāha. Tattha ārāmadvārāti sabbasattānaṃ dhammadesanatthāya vihāradvārato nikkhamitvā bahidvārasamīpe katamaṇḍapamajjhe supaññattavarabuddhāsane nisinno padumuttaro nāma mahāmuni sammāsambuddho. Vassanto amataṃ vuṭṭhinti dhammadesanāmahāamatadhārāhi dhammavassaṃ vassanto. Nibbāpesi mahājananti mahājanassa cittasantānagatakilesaggiṃ nibbāpesi vūpasamesi, mahājanaṃ nibbānāmatapānena santiṃ sītibhāvaṃ pāpesīti attho.
645. ஸதஸஹஸ்ஸங் தே தீ⁴ராதி பரிவாரஸம்பத்திங் த³ஸ்ஸெந்தோ ஆஹ. ச²ஹி அபி⁴ஞ்ஞாஹி இத்³தி⁴விதா⁴தி³ஞாணகொட்டா²ஸேஹி ஸமன்னாக³தா அனேகஸதஸஹஸ்ஸசக்கவாளேஸு க²ணேன க³ந்துங் ஸமத்தா²ஹி இத்³தீ⁴ஹி ஸமன்னாக³தத்தா மஹித்³தி⁴காதே தீ⁴ரா ஸதஸஹஸ்ஸகீ²ணாஸவா சா²யாவ அனபாயினீதி கத்த²சி அனபக³தா சா²யா இவ தங் ஸம்பு³த்³த⁴ங் பது³முத்தரங் ப⁴க³வந்தங் பரிவாரெந்தி பரிவாரெத்வா த⁴ம்மங் ஸுணந்தீதி அத்தோ².
645.Satasahassaṃ te dhīrāti parivārasampattiṃ dassento āha. Chahi abhiññāhi iddhividhādiñāṇakoṭṭhāsehi samannāgatā anekasatasahassacakkavāḷesu khaṇena gantuṃ samatthāhi iddhīhi samannāgatattā mahiddhikāte dhīrā satasahassakhīṇāsavā chāyāva anapāyinīti katthaci anapagatā chāyā iva taṃ sambuddhaṃ padumuttaraṃ bhagavantaṃ parivārenti parivāretvā dhammaṃ suṇantīti attho.
646. ஹத்தி²க்க²ந்த⁴க³தோ ஆஸிந்தி ததா³ ப⁴க³வதோ த⁴ம்மதே³ஸனாஸமயே அஹங் ஹத்தி²பிட்டே² நிஸின்னோ ஆஸிங் அஹோஸிந்தி அத்தோ². ஸேதச்ச²த்தங் வருத்தமந்தி பத்தே²தப்³ப³ங் உத்தமங் ஸேதச்ச²த்தங் மம மத்த²கே தா⁴ரயந்தோ ஹத்தி²பிட்டே² நிஸின்னோதி ஸம்ப³ந்தோ⁴. ஸுசாருரூபங் தி³ஸ்வானாதி ஸுந்த³ரங் சாருங் மனோஹரரூபவந்தங் த⁴ம்மங் தே³ஸியமானங் ஸம்பு³த்³த⁴ங் தி³ஸ்வா மே மய்ஹங் வித்தி ஸந்துட்டி² ஸோமனஸ்ஸங் உத³பஜ்ஜத² உப்பஜ்ஜதீதி அத்தோ².
646.Hatthikkhandhagato āsinti tadā bhagavato dhammadesanāsamaye ahaṃ hatthipiṭṭhe nisinno āsiṃ ahosinti attho. Setacchattaṃvaruttamanti patthetabbaṃ uttamaṃ setacchattaṃ mama matthake dhārayanto hatthipiṭṭhe nisinnoti sambandho. Sucārurūpaṃ disvānāti sundaraṃ cāruṃ manohararūpavantaṃ dhammaṃ desiyamānaṃ sambuddhaṃ disvā me mayhaṃ vitti santuṭṭhi somanassaṃ udapajjatha uppajjatīti attho.
647. ஓருய்ஹ ஹத்தி²க்க²ந்த⁴ம்ஹாதி தங் ப⁴க³வந்தங் நிஸின்னங் தி³ஸ்வா ஹத்தி²பிட்டி²தோ ஓருய்ஹ ஓரோஹித்வா நராஸப⁴ங் நரவஸப⁴ங் உபக³ச்சி²ங் ஸமீபங் க³தோதி அத்தோ². ரதனமயச²த்தங் மேதி ரதனபூ⁴ஸிதங் மே மய்ஹங் ச²த்தங் பு³த்³த⁴ஸெட்ட²ஸ்ஸ மத்த²கே தா⁴ரயிந்தி ஸம்ப³ந்தோ⁴.
647.Oruyha hatthikkhandhamhāti taṃ bhagavantaṃ nisinnaṃ disvā hatthipiṭṭhito oruyha orohitvā narāsabhaṃ naravasabhaṃ upagacchiṃ samīpaṃ gatoti attho. Ratanamayachattaṃ meti ratanabhūsitaṃ me mayhaṃ chattaṃ buddhaseṭṭhassa matthake dhārayinti sambandho.
648. மம ஸங்கப்பமஞ்ஞாயாதி மய்ஹங் பஸாதே³ன உப்பன்னங் ஸங்கப்பங் ஞத்வா இஸீனங் அந்தரே மஹந்தபூ⁴தோ ஸோ பது³முத்தரோ ப⁴க³வா. தங் கத²ங் ட²பயித்வானாதி தங் அத்தனா தே³ஸியமானங் த⁴ம்மகத²ங் ட²பெத்வா மம ப்³யாகரணத்தா²ய இமா கா³தா² அபா⁴ஸத² கதே²ஸீதி அத்தோ².
648.Mama saṅkappamaññāyāti mayhaṃ pasādena uppannaṃ saṅkappaṃ ñatvā isīnaṃ antare mahantabhūto so padumuttaro bhagavā. Taṃ kathaṃ ṭhapayitvānāti taṃ attanā desiyamānaṃ dhammakathaṃ ṭhapetvā mama byākaraṇatthāya imā gāthā abhāsatha kathesīti attho.
649. கத²ந்தி சே? யோ ஸோதிஆதி³மாஹ. ஸொண்ணாலங்காரபூ⁴ஸிதங் ச²த்தங் யோ ஸோ ராஜகுமாரோ மே மத்த²கே தா⁴ரேஸீதி ஸம்ப³ந்தோ⁴. தமஹங் கித்தயிஸ்ஸாமீதி தங் ராஜகுமாரங் அஹங் கித்தயிஸ்ஸாமி பாகடங் கரிஸ்ஸாமி. ஸுணோத² மம பா⁴ஸதோதி பா⁴ஸந்தஸ்ஸ மம வசனங் ஸுணோத² ஓஹிதஸோதா மனஸி கரோதா²தி அத்தோ².
649. Kathanti ce? Yo sotiādimāha. Soṇṇālaṅkārabhūsitaṃ chattaṃ yo so rājakumāro me matthake dhāresīti sambandho. Tamahaṃ kittayissāmīti taṃ rājakumāraṃ ahaṃ kittayissāmi pākaṭaṃ karissāmi. Suṇotha mama bhāsatoti bhāsantassa mama vacanaṃ suṇotha ohitasotā manasi karothāti attho.
650. இதோ க³ந்த்வா அயங் போஸோதி அயங் ராஜகுமாரோ இதோ மனுஸ்ஸலோகதோ சுதோ துஸிதங் க³ந்த்வா ஆவஸிஸ்ஸதி தத்த² விஹரிஸ்ஸதி. தத்த² அச்ச²ராஹி புரக்க²தோ பரிவாரிதோ துஸிதப⁴வனஸம்பத்திங் அனுபொ⁴ஸ்ஸதீதி ஸம்ப³ந்தோ⁴.
650.Ito gantvā ayaṃ posoti ayaṃ rājakumāro ito manussalokato cuto tusitaṃ gantvā āvasissati tattha viharissati. Tattha accharāhi purakkhato parivārito tusitabhavanasampattiṃ anubhossatīti sambandho.
651. சதுத்திங்ஸக்க²த்துந்தி துஸிதப⁴வனதோ சவித்வா தாவதிங்ஸப⁴வனே உப்பன்னோ சதுத்திங்ஸவாரே தே³விந்தோ³ தே³வரஜ்ஜங் கரிஸ்ஸதீதி ஸம்ப³ந்தோ⁴. ப³லாதி⁴போ அட்ட²ஸதந்தி தாவதிங்ஸப⁴வனதோ சுதோ மனுஸ்ஸலோகே உப்பன்னோ ப³லாதி⁴போ சதுரங்கி³னியா ஸேனாய அதி⁴போ பதா⁴னோ அட்ட²ஸதஜாதீஸு பதே³ஸராஜா ஹுத்வா வஸுத⁴ங் அனேகரதனவரங் பத²விங் ஆவஸிஸ்ஸதி புத²ப்³யங் விஹரிஸ்ஸதீதி அத்தோ².
651.Catuttiṃsakkhattunti tusitabhavanato cavitvā tāvatiṃsabhavane uppanno catuttiṃsavāre devindo devarajjaṃ karissatīti sambandho. Balādhipo aṭṭhasatanti tāvatiṃsabhavanato cuto manussaloke uppanno balādhipo caturaṅginiyā senāya adhipo padhāno aṭṭhasatajātīsu padesarājā hutvā vasudhaṃ anekaratanavaraṃ pathaviṃ āvasissati puthabyaṃ viharissatīti attho.
652. அட்ட²பஞ்ஞாஸக்க²த்துந்தி அட்ட²பஞ்ஞாஸஜாதீஸு சக்கவத்தீ ராஜா ப⁴விஸ்ஸதீதி அத்தோ². மஹியா ஸகலஜம்பு³தீ³பபத²வியா விபுலங் அஸங்க்²யெய்யங் பதே³ஸரஜ்ஜங் காரயிஸ்ஸதி.
652.Aṭṭhapaññāsakkhattunti aṭṭhapaññāsajātīsu cakkavattī rājā bhavissatīti attho. Mahiyā sakalajambudīpapathaviyā vipulaṃ asaṅkhyeyyaṃ padesarajjaṃ kārayissati.
654. ஸக்யானங் குலகேதுஸ்ஸாதி ஸக்யராஜூனங் குலஸ்ஸ த⁴ஜபூ⁴தஸ்ஸ பு³த்³த⁴ஸ்ஸ ஞாதகோ ப⁴விஸ்ஸதீதி அத்தோ².
654.Sakyānaṃkulaketussāti sakyarājūnaṃ kulassa dhajabhūtassa buddhassa ñātako bhavissatīti attho.
655. ஆதாபீதி வீரியவா. நிபகோதி நேபக்கஸங்கா²தாய பஞ்ஞாய ஸமன்னாக³தோ. பா³ஹுஸச்சேஸு ப³ஹுஸ்ஸுதபா⁴வேஸு பிடகத்தயதா⁴ரணேஸு கோவிதோ³ சே²கோ. நிவாதவுத்தி அனவஞ்ஞத்திகோ அத²த்³தோ⁴ காயபாக³ப்³பி³யாதி³த²த்³த⁴பா⁴வவிரஹிதோ ஸப்³ப³பாடீ² ஸகலபிடகத்தயதா⁴ரீ ப⁴விஸ்ஸதீதி ஸம்ப³ந்தோ⁴.
655.Ātāpīti vīriyavā. Nipakoti nepakkasaṅkhātāya paññāya samannāgato. Bāhusaccesu bahussutabhāvesu piṭakattayadhāraṇesu kovido cheko. Nivātavutti anavaññattiko athaddho kāyapāgabbiyādithaddhabhāvavirahito sabbapāṭhī sakalapiṭakattayadhārī bhavissatīti sambandho.
656. பதா⁴னபஹிதத்தோ ஸோதி ஸோ ஆனந்த³த்தே²ரோ வீரியகரணாய பேஸிதசித்தோ. உபஸந்தோ நிரூபதீ⁴தி ராகூ³பதி⁴தோ³ஸூபதி⁴மோஹூபதீ⁴ஹி விரஹிதோ, ஸோதாபத்திமக்³கே³ன பஹாதப்³ப³கிலேஸானங் பஹீனத்தா உபஸந்தோ ஸந்தகாயசித்தோ.
656.Padhānapahitatto soti so ānandatthero vīriyakaraṇāya pesitacitto. Upasanto nirūpadhīti rāgūpadhidosūpadhimohūpadhīhi virahito, sotāpattimaggena pahātabbakilesānaṃ pahīnattā upasanto santakāyacitto.
657. ஸந்தி ஆரஞ்ஞகாதி அரஞ்ஞே ப⁴வா மஹாவனே ஜாதா. ஸட்டி²ஹாயனாதி ஸட்டி²வஸ்ஸகாலே ஹாயனப³லா . திதா⁴ பபி⁴ன்னாதி அக்கி²கண்ணகோஸஸங்கா²தேஹி தீஹி டா²னேஹி பி⁴ன்னமதா³. மாதங்கா³தி மாதங்க³ஹத்தி²குலே ஜாதா. ஈஸாத³ந்தாதி ரதீ²ஸாஸதி³ஸத³ந்தா. உரூள்ஹவா ராஜவாஹனா. குஞ்ஜரஸங்கா²தா நாகா³ ஹத்தி²ராஜானோ ஸந்தி ஸங்விஜ்ஜந்தி யதா², ததா² ஸதஸஹஸ்ஸஸங்க்²யா கீ²ணாஸவஸங்கா²தா பண்டி³தா மஹித்³தி⁴கா அரஹந்தனாகா³ ஸந்தி, ஸப்³பே³ தே அரஹந்தனாகா³ பு³த்³த⁴னாக³ராஜஸ்ஸ. ந ஹொந்தி பணிதி⁴ம்ஹி தேதி தே பணிதி⁴ம்ஹி தாதி³ஸா ந ஹொந்தி, கிங் ஸப்³பே³ தே ப⁴யபீ⁴தா ஸகபா⁴வேன ஸண்டா²துங் அஸமத்தா²தி அத்தோ². ஸேஸங் வுத்தனயத்தா உத்தானத்த²மேவாதி.
657.Santi āraññakāti araññe bhavā mahāvane jātā. Saṭṭhihāyanāti saṭṭhivassakāle hāyanabalā . Tidhā pabhinnāti akkhikaṇṇakosasaṅkhātehi tīhi ṭhānehi bhinnamadā. Mātaṅgāti mātaṅgahatthikule jātā. Īsādantāti rathīsāsadisadantā. Urūḷhavā rājavāhanā. Kuñjarasaṅkhātā nāgā hatthirājāno santi saṃvijjanti yathā, tathā satasahassasaṅkhyā khīṇāsavasaṅkhātā paṇḍitā mahiddhikā arahantanāgā santi, sabbe te arahantanāgā buddhanāgarājassa. Na honti paṇidhimhi teti te paṇidhimhi tādisā na honti, kiṃ sabbe te bhayabhītā sakabhāvena saṇṭhātuṃ asamatthāti attho. Sesaṃ vuttanayattā uttānatthamevāti.
ஆனந்த³த்தே²ரஅபதா³னவண்ணனா ஸமத்தா.
Ānandattheraapadānavaṇṇanā samattā.
எத்தாவதா பட²மா பு³த்³த⁴வக்³க³வண்ணனா ஸமத்தா.
Ettāvatā paṭhamā buddhavaggavaṇṇanā samattā.
பட²மோ பா⁴கோ³ நிட்டி²தோ.
Paṭhamo bhāgo niṭṭhito.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3-10. ஆனந்த³த்தே²ரஅபதா³னங் • 3-10. Ānandattheraapadānaṃ
