| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
3-10. аананд̣̇ад̇т̇зраабад̣̇аанаван̣н̣анаа
3-10. Ānandattheraapadānavaṇṇanā
аараамад̣̇ваараа нигкаммаад̇иаад̣̇игам̣ ааяасмад̇о аананд̣̇ад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о бад̣̇умуд̇д̇арасса бхаг̇авад̇о гаалз хам̣савад̇ийнаг̇арз сад̇т̇у взмаад̇игабхаад̇аа худ̇ваа ниб̣б̣ад̇д̇и. суманод̇исса наамам̣ ахоси. бид̇аа банасса нанд̣̇арааж̇аа наама. со ад̇д̇ано буд̇д̇асса суманагумаарасса ваяаббад̇д̇асса хам̣савад̇ийнаг̇арад̇о вийсаяож̇анасад̇з таанз бхог̇анаг̇арам̣ ад̣̇ааси. со гад̣̇аажи гад̣̇аажи ааг̇анд̇ваа сад̇т̇ааран̃жа бид̇аран̃жа бассад̇и. д̇ад̣̇аа рааж̇аа сад̇т̇ааран̃жа сад̇асахассабаримаан̣ам̣ бхигкусан̇гхан̃жа саяамзва саггажжам̣ убадтахи, ан̃н̃зсам̣ убадтаад̇ум̣ на д̣̇зд̇и.
Ārāmadvārā nikkhammātiādikaṃ āyasmato ānandattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare satthu vemātikabhātā hutvā nibbatti. Sumanotissa nāmaṃ ahosi. Pitā panassa nandarājā nāma. So attano puttassa sumanakumārassa vayappattassa haṃsavatīnagarato vīsayojanasate ṭhāne bhoganagaraṃ adāsi. So kadāci kadāci āgantvā satthārañca pitarañca passati. Tadā rājā satthārañca satasahassaparimāṇaṃ bhikkhusaṅghañca sayameva sakkaccaṃ upaṭṭhahi, aññesaṃ upaṭṭhātuṃ na deti.
д̇зна самаязна бажжанд̇о губид̇о ахоси. гумааро д̇асса губид̇абхаавам̣ ран̃н̃о анаарожзд̇ваа саяамзва д̇ам̣ вуубасамзси. д̇ам̣ суд̇ваа рааж̇аа д̇удтамаанасо ‘‘варам̣ д̇з д̇аава д̣̇амми, г̇ан̣хаахий’’д̇и ааха. гумааро ‘‘сад̇т̇аарам̣ бхигкусан̇гхан̃жа д̇змаасам̣ убадтаханд̇о ж̇ийвид̇ам̣ аван̃жхам̣ гаад̇ум̣ ижчаамий’’д̇и ааха. ‘‘зд̇ам̣ на саггаа, ан̃н̃ам̣ вад̣̇зхий’’д̇и. ‘‘д̣̇зва, кад̇д̇ияаанам̣ д̣̇вз гат̇аа наама над̇т̇и, зд̇ам̣ мз д̣̇зхи, на маяхам̣ ан̃н̃знад̇т̇о, сажз сад̇т̇аа ануж̇аанаад̇и, д̣̇иннамзваа’’д̇и. со ‘‘сад̇т̇у жид̇д̇ам̣ ж̇ааниссаамий’’д̇и вихаарам̣ г̇ад̇о. д̇зна жа самаязна бхаг̇аваа г̇анд̇хагудим̣ бавидто ход̇и. со бхигкуу убасан̇гамид̇ваа ‘‘ахам̣, бханд̇з, бхаг̇аванд̇ам̣ д̣̇ассанааяа ааг̇ад̇о, д̣̇ассзт̇а ма’’нд̇и. бхигкуу ‘‘сумано наама т̇зро сад̇т̇у убадтааго, д̇асса санд̇игам̣ г̇ажчаахий’’д̇и аахам̣су. со т̇зрасса санд̇игам̣ г̇анд̇ваа ‘‘сад̇т̇аарам̣, бханд̇з, д̣̇ассзт̇аа’’д̇и ааха. ат̇а т̇зро д̇асса бассанд̇ассзва бат̇авияам̣ нимуж̇ж̇ид̇ваа бхаг̇аванд̇ам̣ убасан̇гамид̇ваа ‘‘рааж̇абуд̇д̇о, бханд̇з, д̇умхаагам̣ д̣̇ассанааяа ааг̇ад̇о’’д̇и ааха. ‘‘д̇зна хи бхигку б̣ахи аасанам̣ бан̃н̃абзхий’’д̇и. т̇зро бунаби б̣уд̣̇д̇хаасанам̣ г̇ахзд̇ваа анд̇ог̇анд̇хагудияам̣ нимуж̇ж̇ид̇ваа д̇асса бассанд̇асса б̣ахибаривзн̣з баад̇убхавид̇ваа г̇анд̇хагудибаривзн̣з аасанам̣ бан̃н̃аабзси. гумааро д̇ам̣ д̣̇исваа ‘‘маханд̇о вад̇ааяам̣ бхигкуу’’д̇и жид̇д̇ам̣ уббаад̣̇зси.
Tena samayena paccanto kupito ahosi. Kumāro tassa kupitabhāvaṃ rañño anārocetvā sayameva taṃ vūpasamesi. Taṃ sutvā rājā tuṭṭhamānaso ‘‘varaṃ te tāva dammi, gaṇhāhī’’ti āha. Kumāro ‘‘satthāraṃ bhikkhusaṅghañca temāsaṃ upaṭṭhahanto jīvitaṃ avañjhaṃ kātuṃ icchāmī’’ti āha. ‘‘Etaṃ na sakkā, aññaṃ vadehī’’ti. ‘‘Deva, khattiyānaṃ dve kathā nāma natthi, etaṃ me dehi, na mayhaṃ aññenattho, sace satthā anujānāti, dinnamevā’’ti. So ‘‘satthu cittaṃ jānissāmī’’ti vihāraṃ gato. Tena ca samayena bhagavā gandhakuṭiṃ paviṭṭho hoti. So bhikkhū upasaṅkamitvā ‘‘ahaṃ, bhante, bhagavantaṃ dassanāya āgato, dassetha ma’’nti. Bhikkhū ‘‘sumano nāma thero satthu upaṭṭhāko, tassa santikaṃ gacchāhī’’ti āhaṃsu. So therassa santikaṃ gantvā ‘‘satthāraṃ, bhante, dassethā’’ti āha. Atha thero tassa passantasseva pathaviyaṃ nimujjitvā bhagavantaṃ upasaṅkamitvā ‘‘rājaputto, bhante, tumhākaṃ dassanāya āgato’’ti āha. ‘‘Tena hi bhikkhu bahi āsanaṃ paññapehī’’ti. Thero punapi buddhāsanaṃ gahetvā antogandhakuṭiyaṃ nimujjitvā tassa passantassa bahipariveṇe pātubhavitvā gandhakuṭipariveṇe āsanaṃ paññāpesi. Kumāro taṃ disvā ‘‘mahanto vatāyaṃ bhikkhū’’ti cittaṃ uppādesi.
бхаг̇авааби г̇анд̇хагудид̇о нигкамид̇ваа бан̃н̃ад̇д̇аасанз нисийд̣̇и. рааж̇абуд̇д̇о сад̇т̇аарам̣ ванд̣̇ид̇ваа бадисант̇аарам̣ гад̇ваа ‘‘аяам̣, бханд̇з, т̇зро д̇умхаагам̣ саасанз валлабхо ман̃н̃з’’д̇и? ‘‘аама, гумаара, валлабхо’’д̇и. ‘‘гим̣ гад̇ваа, бханд̇з, зса валлабхо’’д̇и? ‘‘д̣̇аанаад̣̇ийни бун̃н̃аани гад̇ваа’’д̇и. ‘‘бхаг̇аваа, ахамби аяам̣ т̇зро вияа анааг̇ад̇з б̣уд̣̇д̇хасаасанз валлабхо ход̇угаамо’’д̇и со б̣уд̣̇д̇хаббамукасса сан̇гхасса сад̇д̇аахам̣ канд̇хааваарз бхад̇д̇ам̣ д̣̇ад̇ваа сад̇д̇амз д̣̇ивасз, ‘‘бханд̇з, маяаа бид̇у санд̇игаа д̇умхаагам̣ д̇змаасам̣ бадиж̇аг̇г̇анаваро лад̣̇д̇хо, д̇змаасам̣ мз вассааваасам̣ ад̇хиваасзт̇аа’’д̇и вад̇ваа сад̇т̇у ад̇хиваасанам̣ вид̣̇ид̇ваа сабариваарам̣ бхаг̇аванд̇ам̣ г̇ахзд̇ваа яож̇анз яож̇анз сад̇т̇у бхигкусан̇гхасса жа васанаанужчавигз вихаарз гаарзд̇ваа д̇ад̇т̇а д̇ад̇т̇а васаабзнд̇о ад̇д̇ано васанадтаанасамийбз сад̇асахассзна гийд̇з собхананаамагз уяяаанз сад̇асахассзна гаарид̇ам̣ вихаарам̣ бавзсаабзд̇ваа –
Bhagavāpi gandhakuṭito nikkhamitvā paññattāsane nisīdi. Rājaputto satthāraṃ vanditvā paṭisanthāraṃ katvā ‘‘ayaṃ, bhante, thero tumhākaṃ sāsane vallabho maññe’’ti? ‘‘Āma, kumāra, vallabho’’ti. ‘‘Kiṃ katvā, bhante, esa vallabho’’ti? ‘‘Dānādīni puññāni katvā’’ti. ‘‘Bhagavā, ahampi ayaṃ thero viya anāgate buddhasāsane vallabho hotukāmo’’ti so buddhappamukhassa saṅghassa sattāhaṃ khandhāvāre bhattaṃ datvā sattame divase, ‘‘bhante, mayā pitu santikā tumhākaṃ temāsaṃ paṭijagganavaro laddho, temāsaṃ me vassāvāsaṃ adhivāsethā’’ti vatvā satthu adhivāsanaṃ viditvā saparivāraṃ bhagavantaṃ gahetvā yojane yojane satthu bhikkhusaṅghassa ca vasanānucchavike vihāre kāretvā tattha tattha vasāpento attano vasanaṭṭhānasamīpe satasahassena kīte sobhananāmake uyyāne satasahassena kāritaṃ vihāraṃ pavesāpetvā –
‘‘сад̇асахассзна мз гийд̇ам̣, сад̇асахассзна гаарид̇ам̣;
‘‘Satasahassena me kītaṃ, satasahassena kāritaṃ;
собханам̣ наама уяяаанам̣, бадиг̇г̇ан̣ха махаамуний’’д̇и. –
Sobhanaṃ nāma uyyānaṃ, paṭiggaṇha mahāmunī’’ti. –
уд̣̇агам̣ баад̇зси. со вассуубанааяигад̣̇ивасз сад̇т̇у махаад̣̇аанам̣ бавад̇д̇зд̇ваа ‘‘иминаа нийхаарзна д̣̇аанам̣ д̣̇ад̣̇зяяаат̇аа’’д̇и буд̇д̇ад̣̇аарз амажжз жа д̣̇аанз гижжагаран̣з жа нияож̇зд̇ваа саяам̣ суманад̇т̇зрасса васанадтаанасамийбзязва васанд̇о звам̣ ад̇д̇ано васанадтаанз сад̇т̇аарам̣ д̇змаасам̣ убадтахи. убагадтааяа бана бавааран̣ааяа г̇аамам̣ бависид̇ваа сад̇д̇аахам̣ махаад̣̇аанам̣ бавад̇д̇зд̇ваа сад̇д̇амз д̣̇ивасз сад̇т̇у бхигкусан̇гхасса жа баад̣̇амуулз д̇ижийварз табзд̇ваа ванд̣̇ид̇ваа ‘‘бханд̇з, яад̣̇зд̇ам̣ маяаа канд̇хааваарад̇о бадтааяа бун̃н̃ам̣ гад̇ам̣, на д̇ам̣ саггасамбад̇д̇иаад̣̇ийнам̣ ад̇т̇ааяа гад̇ам̣, ат̇а ко ахамби суманад̇т̇зро вияа анааг̇ад̇з згасса б̣уд̣̇д̇хасса убадтааго валлабхо бхавзяяа’’нд̇и бад̇т̇анам̣ агааси. сад̇т̇аа д̇асса ананд̇арааяад̇ам̣ д̣̇исваа б̣яаагарид̇ваа баггаами.
Udakaṃ pātesi. So vassūpanāyikadivase satthu mahādānaṃ pavattetvā ‘‘iminā nīhārena dānaṃ dadeyyāthā’’ti puttadāre amacce ca dāne kiccakaraṇe ca niyojetvā sayaṃ sumanattherassa vasanaṭṭhānasamīpeyeva vasanto evaṃ attano vasanaṭṭhāne satthāraṃ temāsaṃ upaṭṭhahi. Upakaṭṭhāya pana pavāraṇāya gāmaṃ pavisitvā sattāhaṃ mahādānaṃ pavattetvā sattame divase satthu bhikkhusaṅghassa ca pādamūle ticīvare ṭhapetvā vanditvā ‘‘bhante, yadetaṃ mayā khandhāvārato paṭṭhāya puññaṃ kataṃ, na taṃ sakkasampattiādīnaṃ atthāya kataṃ, atha kho ahampi sumanatthero viya anāgate ekassa buddhassa upaṭṭhāko vallabho bhaveyya’’nti patthanaṃ akāsi. Satthā tassa anantarāyataṃ disvā byākaritvā pakkāmi.
со д̇асмим̣ б̣уд̣̇д̇хуббаад̣̇з вассасад̇асахассам̣ бун̃н̃аани гад̇ваа д̇ад̇о барамби д̇ад̇т̇а д̇ад̇т̇а бхавз ул̣аараани бун̃н̃агаммаани убажинид̇ваа д̣̇звамануссзсу сам̣саранд̇о гассабабхаг̇авад̇о гаалз гулаг̇зхз ниб̣б̣ад̇д̇о вин̃н̃уд̇ам̣ бад̇ваа згасса т̇зрасса бин̣д̣ааяа жарад̇о бад̇д̇аг̇г̇ахан̣ад̇т̇ам̣ уд̇д̇арасаадагам̣ гад̇ваа бууж̇ам̣ агааси. буна саг̇г̇з ниб̣б̣ад̇д̇ид̇ваа д̇ад̇о жуд̇о б̣аараан̣асирааж̇аа худ̇ваа адта бажжзгаб̣уд̣̇д̇хз д̣̇исваа д̇з бхож̇зд̇ваа ад̇д̇ано ман̇г̇алуяяаанз адта бан̣н̣асаалааяо гаарзд̇ваа д̇зсам̣ нисийд̣̇анад̇т̇ааяа адта саб̣б̣арад̇анамаяабийтз жзва ман̣иаад̇хаарагз жа бадияаад̣̇зд̇ваа д̣̇асавассасахассаани убадтаанам̣ агааси, зд̇аани баагадаани.
So tasmiṃ buddhuppāde vassasatasahassaṃ puññāni katvā tato parampi tattha tattha bhave uḷārāni puññakammāni upacinitvā devamanussesu saṃsaranto kassapabhagavato kāle kulagehe nibbatto viññutaṃ patvā ekassa therassa piṇḍāya carato pattaggahaṇatthaṃ uttarasāṭakaṃ katvā pūjaṃ akāsi. Puna sagge nibbattitvā tato cuto bārāṇasirājā hutvā aṭṭha paccekabuddhe disvā te bhojetvā attano maṅgaluyyāne aṭṭha paṇṇasālāyo kāretvā tesaṃ nisīdanatthāya aṭṭha sabbaratanamayapīṭhe ceva maṇiādhārake ca paṭiyādetvā dasavassasahassāni upaṭṭhānaṃ akāsi, etāni pākaṭāni.
габбасад̇асахассам̣ бана д̇ад̇т̇а д̇ад̇т̇а бхавз бун̃н̃аани убажинанд̇о амхаагам̣ б̣од̇хисад̇д̇зна сад̣̇д̇хим̣ д̇усид̇абурз ниб̣б̣ад̇д̇ид̇ваа д̇ад̇о жуд̇о амид̇од̣̇анасаггасса г̇зхз ниб̣б̣ад̇д̇ид̇ваа саб̣б̣з н̃аад̇агз аананд̣̇ид̇з гаронд̇о ж̇аад̇од̇и аананд̣̇од̇взва наамам̣ лабхи. со ануггамзна ваяаббад̇д̇о гад̇аабхинигкаманз саммаасамб̣од̇хим̣ бад̇ваа бавад̇д̇ид̇аварад̇хаммажаггз батамам̣ габилавад̇т̇ум̣ г̇анд̇ваа д̇ад̇о нигкаманд̇з бхаг̇авад̇и д̇асса бариваарад̇т̇ам̣ баб̣б̣аж̇ид̇ум̣ нигкаманд̇зхи бхад̣̇д̣̇ияаад̣̇ийхи сад̣̇д̇хим̣ нигкамид̇ваа бхаг̇авад̇о санд̇игз баб̣б̣аж̇ид̇ваа ааяасмад̇о бун̣н̣асса манд̇аан̣ибуд̇д̇асса санд̇игз д̇хаммагат̇ам̣ суд̇ваа сод̇аабад̇д̇ипалз бад̇идтахи.
Kappasatasahassaṃ pana tattha tattha bhave puññāni upacinanto amhākaṃ bodhisattena saddhiṃ tusitapure nibbattitvā tato cuto amitodanasakkassa gehe nibbattitvā sabbe ñātake ānandite karonto jātoti ānandotveva nāmaṃ labhi. So anukkamena vayappatto katābhinikkhamane sammāsambodhiṃ patvā pavattitavaradhammacakke paṭhamaṃ kapilavatthuṃ gantvā tato nikkhamante bhagavati tassa parivāratthaṃ pabbajituṃ nikkhamantehi bhaddiyādīhi saddhiṃ nikkhamitvā bhagavato santike pabbajitvā āyasmato puṇṇassa mantāṇiputtassa santike dhammakathaṃ sutvā sotāpattiphale patiṭṭhahi.
д̇зна жа самаязна бхаг̇авад̇о батамаб̣од̇хияам̣ вийсад̇ивассаани аниб̣ад̣̇д̇хаа убадтаагаа ахзсум̣. згад̣̇аа нааг̇асамаало бад̇д̇ажийварам̣ г̇ахзд̇ваа вижарад̇и, згад̣̇аа нааг̇ид̇о, згад̣̇аа убаваано, згад̣̇аа сунагкад̇д̇о, згад̣̇аа жунд̣̇о саман̣уд̣̇д̣̇зсо, згад̣̇аа сааг̇ад̇о, згад̣̇аа мзгхияо, д̇з язбхуяязна сад̇т̇у жид̇д̇ам̣ наараад̇хаяим̣су. ат̇згад̣̇ивасам̣ бхаг̇аваа г̇анд̇хагудибаривзн̣з бан̃н̃ад̇д̇авараб̣уд̣̇д̇хаасанз бхигкусан̇гхабаривуд̇о нисинно бхигкуу ааманд̇зси – ‘‘ахам̣, бхигкавз, ид̣̇аани махаллаго згажжз бхигкуу ‘иминаа маг̇г̇зна г̇ажчаамий’д̇и вуд̇д̇з ан̃н̃зна маг̇г̇зна г̇ажчанд̇и, згажжз маяхам̣ бад̇д̇ажийварам̣ бхуумияам̣ нигкибанд̇и, маяхам̣ ниб̣ад̣̇д̇хубадтаагам̣ згам̣ бхигкум̣ виж̇аанат̇аа’’д̇и. д̇ам̣ суд̇ваа бхигкуунам̣ д̇хаммасам̣взг̇о уд̣̇абаад̣̇и. ат̇ааяасмаа саарибуд̇д̇о удтааяа бхаг̇аванд̇ам̣ ванд̣̇ид̇ваа ‘‘ахам̣, бханд̇з, д̇умхз убадтахиссаамий’’д̇и ааха. д̇ам̣ бхаг̇аваа бадигкиби. зд̇знубааязна махаамог̇г̇аллаанам̣ аад̣̇им̣ гад̇ваа саб̣б̣з махаасаавагаа ‘‘ахам̣ убадтахиссаами , ахам̣ убадтахиссаамий’’д̇и удтахим̣су табзд̇ваа ааяасманд̇ам̣ аананд̣̇ам̣. д̇зби бхаг̇аваа бадигкиби.
Tena ca samayena bhagavato paṭhamabodhiyaṃ vīsativassāni anibaddhā upaṭṭhākā ahesuṃ. Ekadā nāgasamālo pattacīvaraṃ gahetvā vicarati, ekadā nāgito, ekadā upavāno, ekadā sunakkhatto, ekadā cundo samaṇuddeso, ekadā sāgato, ekadā meghiyo, te yebhuyyena satthu cittaṃ nārādhayiṃsu. Athekadivasaṃ bhagavā gandhakuṭipariveṇe paññattavarabuddhāsane bhikkhusaṅghaparivuto nisinno bhikkhū āmantesi – ‘‘ahaṃ, bhikkhave, idāni mahallako ekacce bhikkhū ‘iminā maggena gacchāmī’ti vutte aññena maggena gacchanti, ekacce mayhaṃ pattacīvaraṃ bhūmiyaṃ nikkhipanti, mayhaṃ nibaddhupaṭṭhākaṃ ekaṃ bhikkhuṃ vijānathā’’ti. Taṃ sutvā bhikkhūnaṃ dhammasaṃvego udapādi. Athāyasmā sāriputto uṭṭhāya bhagavantaṃ vanditvā ‘‘ahaṃ, bhante, tumhe upaṭṭhahissāmī’’ti āha. Taṃ bhagavā paṭikkhipi. Etenupāyena mahāmoggallānaṃ ādiṃ katvā sabbe mahāsāvakā ‘‘ahaṃ upaṭṭhahissāmi , ahaṃ upaṭṭhahissāmī’’ti uṭṭhahiṃsu ṭhapetvā āyasmantaṃ ānandaṃ. Tepi bhagavā paṭikkhipi.
аананд̣̇о бана д̇ун̣хийязва нисийд̣̇и. ат̇а нам̣ бхигкуу аахам̣су – ‘‘аавусо, д̇вамби сад̇т̇у убадтаагадтаанам̣ яаажаахий’’д̇и. ‘‘яаажид̇ваа лад̣̇д̇хубадтаанам̣ наама гийд̣̇исам̣ ход̇и? сажз ружжад̇и, сад̇т̇аа саяамзва вагкад̇ий’’д̇и. ат̇а бхаг̇аваа – ‘‘на, бхигкавз, аананд̣̇о ан̃н̃зхи уссаахзд̇аб̣б̣о, саяамзва ж̇аанид̇ваа мам̣ убадтахиссад̇ий’’д̇и ааха. д̇ад̇о бхигкуу ‘‘удтзхи, аавусо аананд̣̇а, сад̇т̇аарам̣ убадтаагадтаанам̣ яаажаахий’’д̇и аахам̣су. т̇зро удтахид̇ваа ‘‘сажз мз, бханд̇з, бхаг̇аваа ад̇д̇анаа лад̣̇д̇хам̣ бан̣ийд̇ам̣ жийварам̣ на д̣̇ассад̇и, бан̣ийд̇ам̣ бин̣д̣абаад̇ам̣ на д̣̇ассад̇и, згаг̇анд̇хагудияам̣ васид̇ум̣ на д̣̇ассад̇и, ниманд̇анам̣ г̇ахзд̇ваа на г̇амиссад̇и, зваахам̣ бхаг̇аванд̇ам̣ убадтахиссаамий’’д̇и ааха. ‘‘зд̇д̇агз г̇ун̣з лабхад̇о сад̇т̇у убадтаанам̣ го бхааро’’д̇и убаваад̣̇аможанад̇т̇ам̣ имз жад̇д̇ааро бадигкзбаа, ‘‘сажз, бханд̇з, бхаг̇аваа маяаа г̇ахид̇ам̣ ниманд̇анам̣ г̇амиссад̇и, сажаахам̣ д̣̇зсанд̇арад̇о ааг̇ад̇ааг̇ад̇з д̇аавад̣̇зва д̣̇ассзд̇ум̣ лабхаами, яад̣̇аа мз ган̇каа уббаж̇ж̇ад̇и, д̇аавад̣̇зва бхаг̇аванд̇ам̣ убасан̇гамид̇ваа бужчид̇ум̣ лабхаами, сажз бхаг̇аваа бараммукаа д̣̇зсид̇ам̣ д̇хаммам̣ буна маяхам̣ б̣яаагариссаси, зваахам̣ бхаг̇аванд̇ам̣ убадтахиссаами’’. ‘‘зд̇д̇агамби сад̇т̇у санд̇игз ануг̇г̇ахам̣ на лабхад̇ий’’д̇и убаваад̣̇аможанад̇т̇ан̃жзва д̇хаммабхан̣д̣ааг̇ааригабхаавабарибууран̣ад̇т̇ан̃жа имаа жад̇ассо яаажанаад̇и имз адта варз г̇ахзд̇ваа ниб̣ад̣̇д̇хубадтааго ахоси. д̇ассзва таананд̇арасса ад̇т̇ааяа габбасад̇асахассам̣ буурид̇аанам̣ баарамийнам̣ палам̣ баабун̣и.
Ānando pana tuṇhīyeva nisīdi. Atha naṃ bhikkhū āhaṃsu – ‘‘āvuso, tvampi satthu upaṭṭhākaṭṭhānaṃ yācāhī’’ti. ‘‘Yācitvā laddhupaṭṭhānaṃ nāma kīdisaṃ hoti? Sace ruccati, satthā sayameva vakkhatī’’ti. Atha bhagavā – ‘‘na, bhikkhave, ānando aññehi ussāhetabbo, sayameva jānitvā maṃ upaṭṭhahissatī’’ti āha. Tato bhikkhū ‘‘uṭṭhehi, āvuso ānanda, satthāraṃ upaṭṭhākaṭṭhānaṃ yācāhī’’ti āhaṃsu. Thero uṭṭhahitvā ‘‘sace me, bhante, bhagavā attanā laddhaṃ paṇītaṃ cīvaraṃ na dassati, paṇītaṃ piṇḍapātaṃ na dassati, ekagandhakuṭiyaṃ vasituṃ na dassati, nimantanaṃ gahetvā na gamissati, evāhaṃ bhagavantaṃ upaṭṭhahissāmī’’ti āha. ‘‘Ettake guṇe labhato satthu upaṭṭhānaṃ ko bhāro’’ti upavādamocanatthaṃ ime cattāro paṭikkhepā, ‘‘sace, bhante, bhagavā mayā gahitaṃ nimantanaṃ gamissati, sacāhaṃ desantarato āgatāgate tāvadeva dassetuṃ labhāmi, yadā me kaṅkhā uppajjati, tāvadeva bhagavantaṃ upasaṅkamitvā pucchituṃ labhāmi, sace bhagavā parammukhā desitaṃ dhammaṃ puna mayhaṃ byākarissasi, evāhaṃ bhagavantaṃ upaṭṭhahissāmi’’. ‘‘Ettakampi satthu santike anuggahaṃ na labhatī’’ti upavādamocanatthañceva dhammabhaṇḍāgārikabhāvaparipūraṇatthañca imā catasso yācanāti ime aṭṭha vare gahetvā nibaddhupaṭṭhāko ahosi. Tasseva ṭhānantarassa atthāya kappasatasahassaṃ pūritānaṃ pāramīnaṃ phalaṃ pāpuṇi.
со убадтаагадтаанам̣ лад̣̇д̇хад̣̇ивасад̇о бадтааяа д̣̇асаб̣алам̣ д̣̇увид̇хзна уд̣̇агзна д̇ивид̇хзна д̣̇анд̇агадтзна хад̇т̇абаад̣̇абаригаммзна бидтибаригаммзна г̇анд̇хагудибаривзн̣асаммаж̇ж̇анзнаад̇и звамаад̣̇ийхи гижжзхи убадтаханд̇о – ‘‘имааяа наама взлааяа сад̇т̇у ид̣̇ам̣ наама лад̣̇д̇хум̣ ваддад̇и, ид̣̇ам̣ наама гаад̇ум̣ ваддад̇ий’’д̇и д̣̇ивасабхааг̇ам̣ санд̇игааважаро худ̇ваа рад̇д̇ибхааг̇з маханд̇ам̣ д̣̇ан̣д̣ад̣̇ийбигам̣ г̇ахзд̇ваа г̇анд̇хагудибаривзн̣ам̣ нававаарз анубарияааяад̇и сад̇т̇ари баггосанд̇з бадиважанад̣̇аанааяа, т̇инамид̣̇д̇хавинод̣̇анад̇т̇ам̣. ат̇а нам̣ сад̇т̇аа ж̇зд̇аванз арияаг̇ан̣амаж̇жхз нисинно анзгабарияааязна басам̣сид̇ваа б̣ахуссуд̇аанам̣ сад̇иманд̇аанам̣ г̇ад̇иманд̇аанам̣ д̇хид̇иманд̇аанам̣ убадтаагаанан̃жа бхигкуунам̣ аг̇г̇адтаанз табзси.
So upaṭṭhākaṭṭhānaṃ laddhadivasato paṭṭhāya dasabalaṃ duvidhena udakena tividhena dantakaṭṭhena hatthapādaparikammena piṭṭhiparikammena gandhakuṭipariveṇasammajjanenāti evamādīhi kiccehi upaṭṭhahanto – ‘‘imāya nāma velāya satthu idaṃ nāma laddhuṃ vaṭṭati, idaṃ nāma kātuṃ vaṭṭatī’’ti divasabhāgaṃ santikāvacaro hutvā rattibhāge mahantaṃ daṇḍadīpikaṃ gahetvā gandhakuṭipariveṇaṃ navavāre anupariyāyati satthari pakkosante paṭivacanadānāya, thinamiddhavinodanatthaṃ. Atha naṃ satthā jetavane ariyagaṇamajjhe nisinno anekapariyāyena pasaṃsitvā bahussutānaṃ satimantānaṃ gatimantānaṃ dhitimantānaṃ upaṭṭhākānañca bhikkhūnaṃ aggaṭṭhāne ṭhapesi.
звам̣ сад̇т̇аараа бан̃жасу таанзсу зд̇ад̣̇аг̇г̇з табид̇о жад̇уухи ажчарияаб̣бхууд̇ад̇хаммзхи саманнааг̇ад̇о сад̇т̇у д̇хаммагосаарагко аяам̣ махаат̇зро сзкова самаано сад̇т̇ари бариниб̣б̣уд̇з хздтаа вуд̇д̇анаязна бхигкуухи самуд̇д̇зж̇ид̇о д̣̇звад̇ааяа жа сам̣взж̇ид̇о ‘‘свзязва жа д̣̇аани д̇хаммасан̇г̇ийд̇и гаад̇аб̣б̣аа, на ко бана мзд̇ам̣ бад̇ируубам̣, явааяам̣ сзко сагаран̣ийяо асзкзхи т̇зрзхи сад̣̇д̇хим̣ д̇хаммам̣ г̇ааяид̇ум̣ саннибаад̇ам̣ г̇анд̇у’’нд̇и сан̃ж̇аад̇уссаахо вибассанам̣ бадтабзд̇ваа б̣ахуд̣̇зва рад̇д̇им̣ вибассанааяа гаммам̣ гаронд̇о жан̇гамз вийрияасамад̇ам̣ алабхид̇ваа д̇ад̇о вихаарам̣ бависид̇ваа саяанз нисийд̣̇ид̇ваа саяид̇угаамо гааяам̣ ааваддзси. абад̇д̇ан̃жа сийсам̣ б̣имб̣оханам̣, баад̣̇аа жа бхуумид̇о муд̇д̇амад̇д̇аа, згасмим̣ анд̇арз анубаад̣̇ааяа аасавзхи жид̇д̇ам̣ вимужжи, чал̣абхин̃н̃о ахоси.
Evaṃ satthārā pañcasu ṭhānesu etadagge ṭhapito catūhi acchariyabbhūtadhammehi samannāgato satthu dhammakosārakkho ayaṃ mahāthero sekhova samāno satthari parinibbute heṭṭhā vuttanayena bhikkhūhi samuttejito devatāya ca saṃvejito ‘‘sveyeva ca dāni dhammasaṅgīti kātabbā, na kho pana metaṃ patirūpaṃ, yvāyaṃ sekho sakaraṇīyo asekhehi therehi saddhiṃ dhammaṃ gāyituṃ sannipātaṃ gantu’’nti sañjātussāho vipassanaṃ paṭṭhapetvā bahudeva rattiṃ vipassanāya kammaṃ karonto caṅkame vīriyasamataṃ alabhitvā tato vihāraṃ pavisitvā sayane nisīditvā sayitukāmo kāyaṃ āvaṭṭesi. Apattañca sīsaṃ bimbohanaṃ, pādā ca bhūmito muttamattā, ekasmiṃ antare anupādāya āsavehi cittaṃ vimucci, chaḷabhiñño ahosi.
644. звам̣ чал̣абхин̃н̃аад̣̇иг̇ун̣абадиман̣д̣ид̇о убадтаагаад̣̇иг̇ун̣зхи зд̇ад̣̇аг̇г̇адтаанам̣ бад̇д̇о ад̇д̇ано буб̣б̣агаммам̣ сарид̇ваа соманассавасзна буб̣б̣ажарид̇аабад̣̇аанам̣ д̣̇ассзнд̇о аараамад̣̇ваараа нигкаммаад̇иаад̣̇имааха. д̇ад̇т̇а аараамад̣̇ваараад̇и саб̣б̣асад̇д̇аанам̣ д̇хаммад̣̇зсанад̇т̇ааяа вихаарад̣̇ваарад̇о нигкамид̇ваа б̣ахид̣̇ваарасамийбз гад̇аман̣д̣абамаж̇жхз субан̃н̃ад̇д̇авараб̣уд̣̇д̇хаасанз нисинно бад̣̇умуд̇д̇аро наама махаамуни саммаасамб̣уд̣̇д̇хо. вассанд̇о амад̇ам̣ вудтинд̇и д̇хаммад̣̇зсанаамахааамад̇ад̇хаараахи д̇хаммавассам̣ вассанд̇о. ниб̣б̣аабзси махааж̇ананд̇и махааж̇анасса жид̇д̇асанд̇аанаг̇ад̇агилзсаг̇г̇им̣ ниб̣б̣аабзси вуубасамзси, махааж̇анам̣ ниб̣б̣аанаамад̇абаанзна санд̇им̣ сийд̇ибхаавам̣ баабзсийд̇и ад̇т̇о.
644. Evaṃ chaḷabhiññādiguṇapaṭimaṇḍito upaṭṭhākādiguṇehi etadaggaṭṭhānaṃ patto attano pubbakammaṃ saritvā somanassavasena pubbacaritāpadānaṃ dassento ārāmadvārā nikkhammātiādimāha. Tattha ārāmadvārāti sabbasattānaṃ dhammadesanatthāya vihāradvārato nikkhamitvā bahidvārasamīpe katamaṇḍapamajjhe supaññattavarabuddhāsane nisinno padumuttaro nāma mahāmuni sammāsambuddho. Vassanto amataṃ vuṭṭhinti dhammadesanāmahāamatadhārāhi dhammavassaṃ vassanto. Nibbāpesi mahājananti mahājanassa cittasantānagatakilesaggiṃ nibbāpesi vūpasamesi, mahājanaṃ nibbānāmatapānena santiṃ sītibhāvaṃ pāpesīti attho.
645. сад̇асахассам̣ д̇з д̇хийраад̇и бариваарасамбад̇д̇им̣ д̣̇ассзнд̇о ааха. чахи абхин̃н̃аахи ид̣̇д̇хивид̇хаад̣̇ин̃аан̣агодтаасзхи саманнааг̇ад̇аа анзгасад̇асахассажаггаваал̣зсу кан̣зна г̇анд̇ум̣ самад̇т̇аахи ид̣̇д̇хийхи саманнааг̇ад̇ад̇д̇аа махид̣̇д̇хигаад̇з д̇хийраа сад̇асахассакийн̣аасаваа чааяаава анабааяинийд̇и гад̇т̇ажи анабаг̇ад̇аа чааяаа ива д̇ам̣ самб̣уд̣̇д̇хам̣ бад̣̇умуд̇д̇арам̣ бхаг̇аванд̇ам̣ бариваарзнд̇и бариваарзд̇ваа д̇хаммам̣ сун̣анд̇ийд̇и ад̇т̇о.
645.Satasahassaṃ te dhīrāti parivārasampattiṃ dassento āha. Chahi abhiññāhi iddhividhādiñāṇakoṭṭhāsehi samannāgatā anekasatasahassacakkavāḷesu khaṇena gantuṃ samatthāhi iddhīhi samannāgatattā mahiddhikāte dhīrā satasahassakhīṇāsavā chāyāva anapāyinīti katthaci anapagatā chāyā iva taṃ sambuddhaṃ padumuttaraṃ bhagavantaṃ parivārenti parivāretvā dhammaṃ suṇantīti attho.
646. хад̇т̇игканд̇хаг̇ад̇о аасинд̇и д̇ад̣̇аа бхаг̇авад̇о д̇хаммад̣̇зсанаасамаяз ахам̣ хад̇т̇ибидтз нисинно аасим̣ ахосинд̇и ад̇т̇о. сзд̇ажчад̇д̇ам̣ варуд̇д̇аманд̇и бад̇т̇зд̇аб̣б̣ам̣ уд̇д̇амам̣ сзд̇ажчад̇д̇ам̣ мама мад̇т̇агз д̇хаараяанд̇о хад̇т̇ибидтз нисиннод̇и самб̣анд̇хо. сужааруруубам̣ д̣̇исваанаад̇и сунд̣̇арам̣ жаарум̣ манохараруубаванд̇ам̣ д̇хаммам̣ д̣̇зсияамаанам̣ самб̣уд̣̇д̇хам̣ д̣̇исваа мз маяхам̣ вид̇д̇и санд̇удти соманассам̣ уд̣̇абаж̇ж̇ат̇а уббаж̇ж̇ад̇ийд̇и ад̇т̇о.
646.Hatthikkhandhagato āsinti tadā bhagavato dhammadesanāsamaye ahaṃ hatthipiṭṭhe nisinno āsiṃ ahosinti attho. Setacchattaṃvaruttamanti patthetabbaṃ uttamaṃ setacchattaṃ mama matthake dhārayanto hatthipiṭṭhe nisinnoti sambandho. Sucārurūpaṃ disvānāti sundaraṃ cāruṃ manohararūpavantaṃ dhammaṃ desiyamānaṃ sambuddhaṃ disvā me mayhaṃ vitti santuṭṭhi somanassaṃ udapajjatha uppajjatīti attho.
647. оруяха хад̇т̇игканд̇хамхаад̇и д̇ам̣ бхаг̇аванд̇ам̣ нисиннам̣ д̣̇исваа хад̇т̇ибидтид̇о оруяха орохид̇ваа нараасабхам̣ наравасабхам̣ убаг̇ажчим̣ самийбам̣ г̇ад̇од̇и ад̇т̇о. рад̇анамаяачад̇д̇ам̣ мзд̇и рад̇анабхуусид̇ам̣ мз маяхам̣ чад̇д̇ам̣ б̣уд̣̇д̇хасздтасса мад̇т̇агз д̇хаараяинд̇и самб̣анд̇хо.
647.Oruyha hatthikkhandhamhāti taṃ bhagavantaṃ nisinnaṃ disvā hatthipiṭṭhito oruyha orohitvā narāsabhaṃ naravasabhaṃ upagacchiṃ samīpaṃ gatoti attho. Ratanamayachattaṃ meti ratanabhūsitaṃ me mayhaṃ chattaṃ buddhaseṭṭhassa matthake dhārayinti sambandho.
648. мама сан̇габбаман̃н̃ааяаад̇и маяхам̣ басаад̣̇зна уббаннам̣ сан̇габбам̣ н̃ад̇ваа исийнам̣ анд̇арз маханд̇абхууд̇о со бад̣̇умуд̇д̇аро бхаг̇аваа. д̇ам̣ гат̇ам̣ табаяид̇ваанаад̇и д̇ам̣ ад̇д̇анаа д̣̇зсияамаанам̣ д̇хаммагат̇ам̣ табзд̇ваа мама б̣яаагаран̣ад̇т̇ааяа имаа г̇аат̇аа абхаасат̇а гат̇зсийд̇и ад̇т̇о.
648.Mama saṅkappamaññāyāti mayhaṃ pasādena uppannaṃ saṅkappaṃ ñatvā isīnaṃ antare mahantabhūto so padumuttaro bhagavā. Taṃ kathaṃ ṭhapayitvānāti taṃ attanā desiyamānaṃ dhammakathaṃ ṭhapetvā mama byākaraṇatthāya imā gāthā abhāsatha kathesīti attho.
649. гат̇анд̇и жз? яо сод̇иаад̣̇имааха. сон̣н̣аалан̇гаарабхуусид̇ам̣ чад̇д̇ам̣ яо со рааж̇агумааро мз мад̇т̇агз д̇хаарзсийд̇и самб̣анд̇хо. д̇амахам̣ гид̇д̇аяиссаамийд̇и д̇ам̣ рааж̇агумаарам̣ ахам̣ гид̇д̇аяиссаами баагадам̣ гариссаами. сун̣от̇а мама бхаасад̇од̇и бхаасанд̇асса мама важанам̣ сун̣от̇а охид̇асод̇аа манаси гарот̇аад̇и ад̇т̇о.
649. Kathanti ce? Yo sotiādimāha. Soṇṇālaṅkārabhūsitaṃ chattaṃ yo so rājakumāro me matthake dhāresīti sambandho. Tamahaṃ kittayissāmīti taṃ rājakumāraṃ ahaṃ kittayissāmi pākaṭaṃ karissāmi. Suṇotha mama bhāsatoti bhāsantassa mama vacanaṃ suṇotha ohitasotā manasi karothāti attho.
650. ид̇о г̇анд̇ваа аяам̣ босод̇и аяам̣ рааж̇агумааро ид̇о мануссалогад̇о жуд̇о д̇усид̇ам̣ г̇анд̇ваа аавасиссад̇и д̇ад̇т̇а вихариссад̇и. д̇ад̇т̇а ажчараахи бурагкад̇о бариваарид̇о д̇усид̇абхаванасамбад̇д̇им̣ анубхоссад̇ийд̇и самб̣анд̇хо.
650.Ito gantvā ayaṃ posoti ayaṃ rājakumāro ito manussalokato cuto tusitaṃ gantvā āvasissati tattha viharissati. Tattha accharāhi purakkhato parivārito tusitabhavanasampattiṃ anubhossatīti sambandho.
651. жад̇уд̇д̇им̣сагкад̇д̇унд̇и д̇усид̇абхаванад̇о жавид̇ваа д̇аавад̇им̣сабхаванз уббанно жад̇уд̇д̇им̣саваарз д̣̇звинд̣̇о д̣̇звараж̇ж̇ам̣ гариссад̇ийд̇и самб̣анд̇хо. б̣алаад̇хибо адтасад̇анд̇и д̇аавад̇им̣сабхаванад̇о жуд̇о мануссалогз уббанно б̣алаад̇хибо жад̇уран̇г̇инияаа сзнааяа ад̇хибо бад̇хаано адтасад̇аж̇аад̇ийсу бад̣̇зсарааж̇аа худ̇ваа васуд̇хам̣ анзгарад̇анаварам̣ бат̇авим̣ аавасиссад̇и бут̇аб̣яам̣ вихариссад̇ийд̇и ад̇т̇о.
651.Catuttiṃsakkhattunti tusitabhavanato cavitvā tāvatiṃsabhavane uppanno catuttiṃsavāre devindo devarajjaṃ karissatīti sambandho. Balādhipo aṭṭhasatanti tāvatiṃsabhavanato cuto manussaloke uppanno balādhipo caturaṅginiyā senāya adhipo padhāno aṭṭhasatajātīsu padesarājā hutvā vasudhaṃ anekaratanavaraṃ pathaviṃ āvasissati puthabyaṃ viharissatīti attho.
652. адтабан̃н̃аасагкад̇д̇унд̇и адтабан̃н̃аасаж̇аад̇ийсу жаггавад̇д̇ий рааж̇аа бхависсад̇ийд̇и ад̇т̇о. махияаа сагалаж̇амб̣уд̣̇ийбабат̇авияаа вибулам̣ асан̇кязяяам̣ бад̣̇зсараж̇ж̇ам̣ гаараяиссад̇и.
652.Aṭṭhapaññāsakkhattunti aṭṭhapaññāsajātīsu cakkavattī rājā bhavissatīti attho. Mahiyā sakalajambudīpapathaviyā vipulaṃ asaṅkhyeyyaṃ padesarajjaṃ kārayissati.
654. сагяаанам̣ гулагзд̇уссаад̇и сагяарааж̇уунам̣ гуласса д̇хаж̇абхууд̇асса б̣уд̣̇д̇хасса н̃аад̇аго бхависсад̇ийд̇и ад̇т̇о.
654.Sakyānaṃkulaketussāti sakyarājūnaṃ kulassa dhajabhūtassa buddhassa ñātako bhavissatīti attho.
655. аад̇аабийд̇и вийрияаваа. нибагод̇и нзбаггасан̇каад̇ааяа бан̃н̃ааяа саманнааг̇ад̇о. б̣аахусажжзсу б̣ахуссуд̇абхаавзсу бидагад̇д̇аяад̇хааран̣зсу говид̣̇о чзго. ниваад̇авуд̇д̇и анаван̃н̃ад̇д̇иго ат̇ад̣̇д̇хо гааяабааг̇аб̣б̣ияаад̣̇ит̇ад̣̇д̇хабхаававирахид̇о саб̣б̣абаатий сагалабидагад̇д̇аяад̇хаарий бхависсад̇ийд̇и самб̣анд̇хо.
655.Ātāpīti vīriyavā. Nipakoti nepakkasaṅkhātāya paññāya samannāgato. Bāhusaccesu bahussutabhāvesu piṭakattayadhāraṇesu kovido cheko. Nivātavutti anavaññattiko athaddho kāyapāgabbiyādithaddhabhāvavirahito sabbapāṭhī sakalapiṭakattayadhārī bhavissatīti sambandho.
656. бад̇хаанабахид̇ад̇д̇о сод̇и со аананд̣̇ад̇т̇зро вийрияагаран̣ааяа бзсид̇ажид̇д̇о. убасанд̇о нируубад̇хийд̇и рааг̇уубад̇хид̣̇осуубад̇химохуубад̇хийхи вирахид̇о, сод̇аабад̇д̇имаг̇г̇зна бахаад̇аб̣б̣агилзсаанам̣ бахийнад̇д̇аа убасанд̇о санд̇агааяажид̇д̇о.
656.Padhānapahitatto soti so ānandatthero vīriyakaraṇāya pesitacitto. Upasanto nirūpadhīti rāgūpadhidosūpadhimohūpadhīhi virahito, sotāpattimaggena pahātabbakilesānaṃ pahīnattā upasanto santakāyacitto.
657. санд̇и ааран̃н̃агаад̇и аран̃н̃з бхаваа махааванз ж̇аад̇аа. садтихааяанаад̇и садтивассагаалз хааяанаб̣алаа . д̇ид̇хаа бабхиннаад̇и агкиган̣н̣агосасан̇каад̇зхи д̇ийхи таанзхи бхиннамад̣̇аа. маад̇ан̇г̇аад̇и маад̇ан̇г̇ахад̇т̇игулз ж̇аад̇аа. ийсаад̣̇анд̇аад̇и рат̇ийсаасад̣̇исад̣̇анд̇аа. уруул̣хаваа рааж̇авааханаа. гун̃ж̇арасан̇каад̇аа нааг̇аа хад̇т̇ирааж̇аано санд̇и сам̣виж̇ж̇анд̇и яат̇аа, д̇ат̇аа сад̇асахассасан̇кяаа кийн̣аасавасан̇каад̇аа бан̣д̣ид̇аа махид̣̇д̇хигаа араханд̇анааг̇аа санд̇и, саб̣б̣з д̇з араханд̇анааг̇аа б̣уд̣̇д̇ханааг̇арааж̇асса. на хонд̇и бан̣ид̇химхи д̇зд̇и д̇з бан̣ид̇химхи д̇аад̣̇исаа на хонд̇и, гим̣ саб̣б̣з д̇з бхаяабхийд̇аа сагабхаавзна сан̣таад̇ум̣ асамад̇т̇аад̇и ад̇т̇о. сзсам̣ вуд̇д̇анаяад̇д̇аа уд̇д̇аанад̇т̇амзваад̇и.
657.Santi āraññakāti araññe bhavā mahāvane jātā. Saṭṭhihāyanāti saṭṭhivassakāle hāyanabalā . Tidhā pabhinnāti akkhikaṇṇakosasaṅkhātehi tīhi ṭhānehi bhinnamadā. Mātaṅgāti mātaṅgahatthikule jātā. Īsādantāti rathīsāsadisadantā. Urūḷhavā rājavāhanā. Kuñjarasaṅkhātā nāgā hatthirājāno santi saṃvijjanti yathā, tathā satasahassasaṅkhyā khīṇāsavasaṅkhātā paṇḍitā mahiddhikā arahantanāgā santi, sabbe te arahantanāgā buddhanāgarājassa. Na honti paṇidhimhi teti te paṇidhimhi tādisā na honti, kiṃ sabbe te bhayabhītā sakabhāvena saṇṭhātuṃ asamatthāti attho. Sesaṃ vuttanayattā uttānatthamevāti.
аананд̣̇ад̇т̇зраабад̣̇аанаван̣н̣анаа самад̇д̇аа.
Ānandattheraapadānavaṇṇanā samattā.
зд̇д̇аавад̇аа батамаа б̣уд̣̇д̇хаваг̇г̇аван̣н̣анаа самад̇д̇аа.
Ettāvatā paṭhamā buddhavaggavaṇṇanā samattā.
батамо бхааг̇о нидтид̇о.
Paṭhamo bhāgo niṭṭhito.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 3-10. аананд̣̇ад̇т̇зраабад̣̇аанам̣ • 3-10. Ānandattheraapadānaṃ
