| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. ආනන්‌දත්‌ථෙරසුත්‌තං
3. Ānandattherasuttaṃ
1009. එකං සමයං ආයස්‌මා ච ආනන්‌දො ආයස්‌මා ච සාරිපුත්‌තො සාවත්‌ථියං විහරන්‌ති ජෙතවනෙ අනාථපිණ්‌ඩිකස්‌ස ආරාමෙ. අථ ඛො ආයස්‌මා සාරිපුත්‌තො සායන්‌හසමයං පටිසල්‌ලානා වුට්‌ඨිතො යෙනායස්‌මා ආනන්‌දො තෙනුපසඞ්‌කමි; උපසඞ්‌කමිත්‌වා ආයස්‌මතා ආනන්‌දෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා සාරිපුත්‌තො ආයස්‌මන්‌තං ආනන්‌දං එතදවොච – ‘‘කතිනං ඛො, ආවුසො ආනන්‌ද , ධම්‌මානං පහානා, කතිනං ධම්‌මානං සමන්‌නාගමනහෙතු, එවමයං පජා භගවතා බ්‍යාකතා සොතාපන්‌නා අවිනිපාතධම්‌මා නියතා සම්‌බොධිපරායණා’’ති? ‘‘චතුන්‌නං ඛො, ආවුසො, ධම්‌මානං පහානා, චතුන්‌නං ධම්‌මානං සමන්‌නාගමනහෙතු, එවමයං පජා භගවතා බ්‍යාකතා සොතාපන්‌නා අවිනිපාතධම්‌මා නියතා සම්‌බොධිපරායණා’’ති.
1009. Ekaṃ samayaṃ āyasmā ca ānando āyasmā ca sāriputto sāvatthiyaṃ viharanti jetavane anāthapiṇḍikassa ārāme. Atha kho āyasmā sāriputto sāyanhasamayaṃ paṭisallānā vuṭṭhito yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā sāriputto āyasmantaṃ ānandaṃ etadavoca – ‘‘katinaṃ kho, āvuso ānanda , dhammānaṃ pahānā, katinaṃ dhammānaṃ samannāgamanahetu, evamayaṃ pajā bhagavatā byākatā sotāpannā avinipātadhammā niyatā sambodhiparāyaṇā’’ti? ‘‘Catunnaṃ kho, āvuso, dhammānaṃ pahānā, catunnaṃ dhammānaṃ samannāgamanahetu, evamayaṃ pajā bhagavatā byākatā sotāpannā avinipātadhammā niyatā sambodhiparāyaṇā’’ti.
‘‘කතමෙසං චතුන්‌නං? යථාරූපෙන ඛො, ආවුසො, බුද්‌ධෙ අප්‌පසාදෙන සමන්‌නාගතො අස්‌සුතවා පුථුජ්‌ජනො කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති තථාරූපස්‌ස බුද්‌ධෙ අප්‌පසාදො න හොති. යථාරූපෙන ච ඛො, ආවුසො, බුද්‌ධෙ අවෙච්‌චප්‌පසාදෙන සමන්‌නාගතො සුතවා අරියසාවකො කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති තථාරූපස්‌ස බුද්‌ධෙ අවෙච්‌චප්‌පසාදො හොති – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවා’’ති.
‘‘Katamesaṃ catunnaṃ? Yathārūpena kho, āvuso, buddhe appasādena samannāgato assutavā puthujjano kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati tathārūpassa buddhe appasādo na hoti. Yathārūpena ca kho, āvuso, buddhe aveccappasādena samannāgato sutavā ariyasāvako kāyassa bhedā paraṃ maraṇā sugatiṃ saggaṃ lokaṃ upapajjati tathārūpassa buddhe aveccappasādo hoti – itipi so bhagavā…pe… satthā devamanussānaṃ buddho bhagavā’’ti.
‘‘යථාරූපෙන ච ඛො, ආවුසො, ධම්‌මෙ අප්‌පසාදෙන සමන්‌නාගතො අස්‌සුතවා පුථුජ්‌ජනො කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති තථාරූපස්‌ස ධම්‌මෙ අප්‌පසාදො න හොති. යථාරූපෙන ච ඛො, ආවුසො, ධම්‌මෙ අවෙච්‌චප්‌පසාදෙන සමන්‌නාගතො සුතවා අරියසාවකො කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති තථාරූපස්‌ස ධම්‌මෙ අවෙච්‌චප්‌පසාදො හොති – ස්‌වාක්‌ඛාතො භගවතා ධම්‌මො…පෙ.… විඤ්‌ඤූහීති.
‘‘Yathārūpena ca kho, āvuso, dhamme appasādena samannāgato assutavā puthujjano kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati tathārūpassa dhamme appasādo na hoti. Yathārūpena ca kho, āvuso, dhamme aveccappasādena samannāgato sutavā ariyasāvako kāyassa bhedā paraṃ maraṇā sugatiṃ saggaṃ lokaṃ upapajjati tathārūpassa dhamme aveccappasādo hoti – svākkhāto bhagavatā dhammo…pe… viññūhīti.
‘‘යථාරූපෙන ච ඛො, ආවුසො, සඞ්‌ඝෙ අප්‌පසාදෙන සමන්‌නාගතො අස්‌සුතවා පුථුජ්‌ජනො කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති තථාරූපස්‌ස සඞ්‌ඝෙ අප්‌පසාදො න හොති. යථාරූපෙන ච ඛො, ආවුසො, සඞ්‌ඝෙ අවෙච්‌චප්‌පසාදෙන සමන්‌නාගතො සුතවා අරියසාවකො කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති තථාරූපස්‌ස සඞ්‌ඝෙ අවෙච්‌චප්‌පසාදො හොති – සුප්‌පටිපන්‌නො භගවතො සාවකසඞ්‌ඝො…පෙ.… අනුත්‌තරං පුඤ්‌ඤක්‌ඛෙත්‌තං ලොකස්‌සාති.
‘‘Yathārūpena ca kho, āvuso, saṅghe appasādena samannāgato assutavā puthujjano kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati tathārūpassa saṅghe appasādo na hoti. Yathārūpena ca kho, āvuso, saṅghe aveccappasādena samannāgato sutavā ariyasāvako kāyassa bhedā paraṃ maraṇā sugatiṃ saggaṃ lokaṃ upapajjati tathārūpassa saṅghe aveccappasādo hoti – suppaṭipanno bhagavato sāvakasaṅgho…pe… anuttaraṃ puññakkhettaṃ lokassāti.
‘‘යථාරූපෙන ච ඛො, ආවුසො, දුස්‌සීල්‍යෙන සමන්‌නාගතො අස්‌සුතවා පුථුජ්‌ජනො කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති තථාරූපස්‌ස දුස්‌සීල්‍යං න හොති. යථාරූපෙහි ච ඛො, ආවුසො, අරියකන්‌තෙහි සීලෙහි සමන්‌නාගතො සුතවා අරියසාවකො කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති තථාරූපානි අරියකන්‌තානි සීලානි හොන්‌ති අඛණ්‌ඩානි…පෙ.… සමාධිසංවත්‌තනිකානි. ඉමෙසං ඛො, ආවුසො, චතුන්‌නං ධම්‌මානං පහානා ඉමෙසං චතුන්‌නං ධම්‌මානං සමන්‌නාගමනහෙතු එවමයං පජා භගවතා බ්‍යාකතා සොතාපන්‌නා අවිනිපාතධම්‌මා නියතා සම්‌බොධිපරායණා’’ති. තතියං.
‘‘Yathārūpena ca kho, āvuso, dussīlyena samannāgato assutavā puthujjano kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati tathārūpassa dussīlyaṃ na hoti. Yathārūpehi ca kho, āvuso, ariyakantehi sīlehi samannāgato sutavā ariyasāvako kāyassa bhedā paraṃ maraṇā sugatiṃ saggaṃ lokaṃ upapajjati tathārūpāni ariyakantāni sīlāni honti akhaṇḍāni…pe… samādhisaṃvattanikāni. Imesaṃ kho, āvuso, catunnaṃ dhammānaṃ pahānā imesaṃ catunnaṃ dhammānaṃ samannāgamanahetu evamayaṃ pajā bhagavatā byākatā sotāpannā avinipātadhammā niyatā sambodhiparāyaṇā’’ti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-3. බ්‍රාහ්‌මණසුත්‌තාදිවණ්‌ණනා • 2-3. Brāhmaṇasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-3. බ්‍රාහ්‌මණසුත්‌තාදිවණ්‌ණනා • 2-3. Brāhmaṇasuttādivaṇṇanā
