| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၃. အနန္တရပစ္စယကထာဝဏ္ဏနာ
3. Anantarapaccayakathāvaṇṇanā
၆၉၃-၆၉၇. ဣဒာနိ အနန္တရပစ္စယကထာ နာမ ဟောတိ။ တတ္ထ နစ္စဂီတာဒီသု ရူပဒသ္သနသဒ္ဒသဝနာဒီနံ လဟုပရိဝတ္တိတံ ဒိသ္ဝာ ‘‘ဣမာနိ ဝိညာဏာနိ အညမညသ္သ အနန္တရာ ဥပ္ပဇ္ဇန္တီ’’တိ ယေသံ လဒ္ဓိ, သေယ္ယထာပိ ဥတ္တရာပထကာနံ; တေ သန္ဓာယ စက္ခုဝိညာဏသ္သာတိ ပုစ္ဆာ သကဝာဒိသ္သ, ပဋိညာ ဣတရသ္သ။ သောတဝိညာဏံ ရူပာရမ္မဏံယေဝာတိ ယဒိ စက္ခုဝိညာဏသ္သ အနန္တရာ ဥပ္ပဇ္ဇေယ္ယ, ဝိပာကမနောဓာတု ဝိယ ရူပာရမ္မဏံ သိယာတိ စောဒေတုံ ဝုတ္တံ။ စက္ခုဉ္စ ပဋိစ္စ ရူပေ စ ဥပ္ပဇ္ဇတိ သောတဝိညာဏန္တိ ပဉ္ဟေသု သုတ္တာဘာဝေန ပဋိက္ခိပိတ္ဝာ အနန္တရုပ္ပတ္တိံ သလ္လက္ခေန္တော လဒ္ဓိဝသေန ပဋိဇာနာတိ။ တညေဝ စက္ခုဝိညာဏံ တံ သောတဝိညာဏန္တိ ယထာ ပဌမဇဝနာနန္တရံ ဒုတိယဇဝနံ မနောဝိညာဏဘာဝေန တညေဝ ဟောတိ, ကိံ တေ တထာ ဧတမ္ပိ ဒ္ဝယံ ဧကမေဝာတိ ပုစ္ဆတိ။ ဣမိနာ နယေန သဗ္ဗဝာရေသု အတ္ထော ဝေဒိတဗ္ဗော။ နစ္စတိ ဂာယတီတိအာဒိဝစနံ အာရမ္မဏသမောဓာနေ လဟုပရိဝတ္တိတာယ ဝောကိဏ္ဏဘာဝံ ဒီပေတိ, န အနန္တရပစ္စယတံ, တသ္မာ အသာဓကန္တိ။
693-697. Idāni anantarapaccayakathā nāma hoti. Tattha naccagītādīsu rūpadassanasaddasavanādīnaṃ lahuparivattitaṃ disvā ‘‘imāni viññāṇāni aññamaññassa anantarā uppajjantī’’ti yesaṃ laddhi, seyyathāpi uttarāpathakānaṃ; te sandhāya cakkhuviññāṇassāti pucchā sakavādissa, paṭiññā itarassa. Sotaviññāṇaṃ rūpārammaṇaṃyevāti yadi cakkhuviññāṇassa anantarā uppajjeyya, vipākamanodhātu viya rūpārammaṇaṃ siyāti codetuṃ vuttaṃ. Cakkhuñca paṭicca rūpe ca uppajjati sotaviññāṇanti pañhesu suttābhāvena paṭikkhipitvā anantaruppattiṃ sallakkhento laddhivasena paṭijānāti. Taññeva cakkhuviññāṇaṃtaṃ sotaviññāṇanti yathā paṭhamajavanānantaraṃ dutiyajavanaṃ manoviññāṇabhāvena taññeva hoti, kiṃ te tathā etampi dvayaṃ ekamevāti pucchati. Iminā nayena sabbavāresu attho veditabbo. Naccati gāyatītiādivacanaṃ ārammaṇasamodhāne lahuparivattitāya vokiṇṇabhāvaṃ dīpeti, na anantarapaccayataṃ, tasmā asādhakanti.
အနန္တရပစ္စယကထာဝဏ္ဏနာ။
Anantarapaccayakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၃၈) ၃. အနန္တရပစ္စယကထာ • (138) 3. Anantarapaccayakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၃. အနန္တရပစ္စယကထာဝဏ္ဏနာ • 3. Anantarapaccayakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၃. အနန္တရပစ္စယကထာဝဏ္ဏနာ • 3. Anantarapaccayakathāvaṇṇanā
