| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੩. ਅਨਨ੍ਤਰਪਚ੍ਚਯਕਥਾવਣ੍ਣਨਾ
3. Anantarapaccayakathāvaṇṇanā
੬੯੩-੬੯੭. ਇਦਾਨਿ ਅਨਨ੍ਤਰਪਚ੍ਚਯਕਥਾ ਨਾਮ ਹੋਤਿ। ਤਤ੍ਥ ਨਚ੍ਚਗੀਤਾਦੀਸੁ ਰੂਪਦਸ੍ਸਨਸਦ੍ਦਸવਨਾਦੀਨਂ ਲਹੁਪਰਿવਤ੍ਤਿਤਂ ਦਿਸ੍વਾ ‘‘ਇਮਾਨਿ વਿਞ੍ਞਾਣਾਨਿ ਅਞ੍ਞਮਞ੍ਞਸ੍ਸ ਅਨਨ੍ਤਰਾ ਉਪ੍ਪਜ੍ਜਨ੍ਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਚਕ੍ਖੁવਿਞ੍ਞਾਣਸ੍ਸਾਤਿ ਪੁਚ੍ਛਾ ਸਕવਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ। ਸੋਤવਿਞ੍ਞਾਣਂ ਰੂਪਾਰਮ੍ਮਣਂਯੇવਾਤਿ ਯਦਿ ਚਕ੍ਖੁવਿਞ੍ਞਾਣਸ੍ਸ ਅਨਨ੍ਤਰਾ ਉਪ੍ਪਜ੍ਜੇਯ੍ਯ, વਿਪਾਕਮਨੋਧਾਤੁ વਿਯ ਰੂਪਾਰਮ੍ਮਣਂ ਸਿਯਾਤਿ ਚੋਦੇਤੁਂ વੁਤ੍ਤਂ। ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਸੋਤવਿਞ੍ਞਾਣਨ੍ਤਿ ਪਞ੍ਹੇਸੁ ਸੁਤ੍ਤਾਭਾવੇਨ ਪਟਿਕ੍ਖਿਪਿਤ੍વਾ ਅਨਨ੍ਤਰੁਪ੍ਪਤ੍ਤਿਂ ਸਲ੍ਲਕ੍ਖੇਨ੍ਤੋ ਲਦ੍ਧਿવਸੇਨ ਪਟਿਜਾਨਾਤਿ। ਤਞ੍ਞੇવ ਚਕ੍ਖੁવਿਞ੍ਞਾਣਂ ਤਂ ਸੋਤવਿਞ੍ਞਾਣਨ੍ਤਿ ਯਥਾ ਪਠਮਜવਨਾਨਨ੍ਤਰਂ ਦੁਤਿਯਜવਨਂ ਮਨੋવਿਞ੍ਞਾਣਭਾવੇਨ ਤਞ੍ਞੇવ ਹੋਤਿ, ਕਿਂ ਤੇ ਤਥਾ ਏਤਮ੍ਪਿ ਦ੍વਯਂ ਏਕਮੇવਾਤਿ ਪੁਚ੍ਛਤਿ। ਇਮਿਨਾ ਨਯੇਨ ਸਬ੍ਬવਾਰੇਸੁ ਅਤ੍ਥੋ વੇਦਿਤਬ੍ਬੋ। ਨਚ੍ਚਤਿ ਗਾਯਤੀਤਿਆਦਿવਚਨਂ ਆਰਮ੍ਮਣਸਮੋਧਾਨੇ ਲਹੁਪਰਿવਤ੍ਤਿਤਾਯ વੋਕਿਣ੍ਣਭਾવਂ ਦੀਪੇਤਿ, ਨ ਅਨਨ੍ਤਰਪਚ੍ਚਯਤਂ, ਤਸ੍ਮਾ ਅਸਾਧਕਨ੍ਤਿ।
693-697. Idāni anantarapaccayakathā nāma hoti. Tattha naccagītādīsu rūpadassanasaddasavanādīnaṃ lahuparivattitaṃ disvā ‘‘imāni viññāṇāni aññamaññassa anantarā uppajjantī’’ti yesaṃ laddhi, seyyathāpi uttarāpathakānaṃ; te sandhāya cakkhuviññāṇassāti pucchā sakavādissa, paṭiññā itarassa. Sotaviññāṇaṃ rūpārammaṇaṃyevāti yadi cakkhuviññāṇassa anantarā uppajjeyya, vipākamanodhātu viya rūpārammaṇaṃ siyāti codetuṃ vuttaṃ. Cakkhuñca paṭicca rūpe ca uppajjati sotaviññāṇanti pañhesu suttābhāvena paṭikkhipitvā anantaruppattiṃ sallakkhento laddhivasena paṭijānāti. Taññeva cakkhuviññāṇaṃtaṃ sotaviññāṇanti yathā paṭhamajavanānantaraṃ dutiyajavanaṃ manoviññāṇabhāvena taññeva hoti, kiṃ te tathā etampi dvayaṃ ekamevāti pucchati. Iminā nayena sabbavāresu attho veditabbo. Naccati gāyatītiādivacanaṃ ārammaṇasamodhāne lahuparivattitāya vokiṇṇabhāvaṃ dīpeti, na anantarapaccayataṃ, tasmā asādhakanti.
ਅਨਨ੍ਤਰਪਚ੍ਚਯਕਥਾવਣ੍ਣਨਾ।
Anantarapaccayakathāvaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਕਥਾવਤ੍ਥੁਪਾਲ਼ਿ • Kathāvatthupāḷi / (੧੩੮) ੩. ਅਨਨ੍ਤਰਪਚ੍ਚਯਕਥਾ • (138) 3. Anantarapaccayakathā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੩. ਅਨਨ੍ਤਰਪਚ੍ਚਯਕਥਾવਣ੍ਣਨਾ • 3. Anantarapaccayakathāvaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੩. ਅਨਨ੍ਤਰਪਚ੍ਚਯਕਥਾવਣ੍ਣਨਾ • 3. Anantarapaccayakathāvaṇṇanā
