| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. அனந்தரபச்சயனித்³தே³ஸவண்ணனா
4. Anantarapaccayaniddesavaṇṇanā
4. அனந்தரபச்சயனித்³தே³ஸே மனோதா⁴துயாதி விபாகமனோதா⁴துயா. மனோவிஞ்ஞாணதா⁴துயாதி ஸந்தீரணகிச்சாய அஹேதுகவிபாகமனோவிஞ்ஞாணதா⁴துயா. ததோ பரங் பன வொட்ட²ப்³ப³னஜவனததா³ரம்மணப⁴வங்க³கிச்சா மனோவிஞ்ஞாணதா⁴துயோ வத்தப்³பா³ ஸியுங், தா அவுத்தாபி இமினாவ நயேன வேதி³தப்³பா³தி நயங் த³ஸ்ஸெத்வா தே³ஸனா ஸங்கி²த்தா. ‘‘புரிமா புரிமா குஸலா த⁴ம்மா’’திஆதி³கே ச ச²ட்ட²னயே தா ஸங்க³ஹிதாதிபி இத⁴ ந வுத்தாதி வேதி³தப்³பா³. தத்த² புரிமா புரிமாதி ச²ஸு த்³வாரேஸுபி அனந்தராதீதா குஸலஜவனத⁴ம்மா த³ட்ட²ப்³பா³. பச்சி²மானங் பச்சி²மானந்தி அனந்தரஉப்பஜ்ஜமானானஞ்ஞேவ. குஸலானந்தி ஸதி³ஸகுஸலானங். அப்³யாகதானந்தி இத³ங் பன குஸலானந்தரங் ததா³ரம்மணப⁴வங்க³ப²லஸமாபத்திவஸேன வுத்தங். அகுஸலமூலகே அப்³யாகதானந்தி ததா³ரம்மணப⁴வங்க³ஸங்கா²தானஞ்ஞேவ. அப்³யாகதமூலகே அப்³யாகதானந்தி ஆவஜ்ஜனஜவனவஸேன வா ப⁴வங்க³வஸேன வா பவத்தானங் கிரியவிபாகாப்³யாகதானங் கிரியமனோதா⁴துதோ பட்டா²ய பன யாவ வொட்ட²ப்³ப³னகிச்சா மனோவிஞ்ஞாணதா⁴து, தாவ பவத்தேஸு வீதி²சித்தேஸுபி அயங் நயோ லப்³ப⁴தேவ. குஸலானந்தி பஞ்சத்³வாரே வொட்ட²ப்³ப³னானந்தரானங் மனொத்³வாரே ஆவஜ்ஜனாந்தரானங் பட²மஜவனகுஸலானங். அகுஸலானந்தி பதே³பி ஏஸேவ நயோ. யேஸங் யேஸந்தி இத³ங் ஸப்³பே³ஸம்பி அனந்தரபச்சயத⁴ம்மானங். ஸங்கே²பலக்க²ணந்தி அயங் தாவெத்த² பாளிவண்ணனா.
4. Anantarapaccayaniddese manodhātuyāti vipākamanodhātuyā. Manoviññāṇadhātuyāti santīraṇakiccāya ahetukavipākamanoviññāṇadhātuyā. Tato paraṃ pana voṭṭhabbanajavanatadārammaṇabhavaṅgakiccā manoviññāṇadhātuyo vattabbā siyuṃ, tā avuttāpi imināva nayena veditabbāti nayaṃ dassetvā desanā saṅkhittā. ‘‘Purimā purimā kusalā dhammā’’tiādike ca chaṭṭhanaye tā saṅgahitātipi idha na vuttāti veditabbā. Tattha purimā purimāti chasu dvāresupi anantarātītā kusalajavanadhammā daṭṭhabbā. Pacchimānaṃ pacchimānanti anantarauppajjamānānaññeva. Kusalānanti sadisakusalānaṃ. Abyākatānanti idaṃ pana kusalānantaraṃ tadārammaṇabhavaṅgaphalasamāpattivasena vuttaṃ. Akusalamūlake abyākatānanti tadārammaṇabhavaṅgasaṅkhātānaññeva. Abyākatamūlake abyākatānanti āvajjanajavanavasena vā bhavaṅgavasena vā pavattānaṃ kiriyavipākābyākatānaṃ kiriyamanodhātuto paṭṭhāya pana yāva voṭṭhabbanakiccā manoviññāṇadhātu, tāva pavattesu vīthicittesupi ayaṃ nayo labbhateva. Kusalānanti pañcadvāre voṭṭhabbanānantarānaṃ manodvāre āvajjanāntarānaṃ paṭhamajavanakusalānaṃ. Akusalānanti padepi eseva nayo. Yesaṃ yesanti idaṃ sabbesampi anantarapaccayadhammānaṃ. Saṅkhepalakkhaṇanti ayaṃ tāvettha pāḷivaṇṇanā.
அயங் பன அனந்தரபச்சயோ நாம ட²பெத்வா நிப்³பா³னங் சதுபூ⁴மகோ அரூபத⁴ம்மராஸியேவாதி வேதி³தப்³போ³. ஸோ ஜாதிவஸேன குஸலாகுஸலவிபாககிரியதோ சதுதா⁴ பி⁴ஜ்ஜதி. தத்த² குஸலோ காமாவசராதி³பே⁴த³தோ சதுப்³பி³தோ⁴ ஹோதி, அகுஸலோ காமாவசரோவ விபாகோ சதுபூ⁴மகோ, கிரியானந்தரபச்சயோ பன தே பூ⁴மகோதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
Ayaṃ pana anantarapaccayo nāma ṭhapetvā nibbānaṃ catubhūmako arūpadhammarāsiyevāti veditabbo. So jātivasena kusalākusalavipākakiriyato catudhā bhijjati. Tattha kusalo kāmāvacarādibhedato catubbidho hoti, akusalo kāmāvacarova vipāko catubhūmako, kiriyānantarapaccayo pana te bhūmakoti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² காமாவசரகுஸலோ அத்தனா ஸதி³ஸஸ்ஸேவ காமாவசரகுஸலஸ்ஸ அனந்தரபச்சயோ ஹோதி. ஞாணஸம்பயுத்தகாமாவசரகுஸலோ பன ரூபாவசரகுஸலஸ்ஸ அரூபாவசரகுஸலஸ்ஸ லோகுத்தரகுஸலஸ்ஸாதி இமேஸங் திண்ணங் ராஸீனங் அனந்தரபச்சயோ ஹோதி. காமாவசரகுஸலோ ச காமாவசரவிபாகஸ்ஸ, ரூபாவசராரூபாவசரவிபாகஸ்ஸ, ஞாணஸம்பயுத்தோ லோகுத்தரவிபாகஸ்ஸாபீதி இமேஸங் சதுன்னங் ராஸீனங் அனந்தரபச்சயோ ஹோதி. ரூபாவசரகுஸலோ ரூபாவசரகுஸலஸ்ஸ, ஞாணஸம்பயுத்தகாமாவசரவிபாகஸ்ஸ, ரூபாவசரவிபாகஸ்ஸாதி இமேஸங் திண்ணங் ராஸீனங் அனந்தரபச்சயோ ஹோதி. அரூபாவசரகுஸலோ தேஸங் த்³வின்னங் விபாகானங் அத்தனோ குஸலஸ்ஸ விபாகஸ்ஸ சாதி அவிஸேஸேன சதுன்னங் ராஸீனங் அனந்தரபச்சயோ ஹோதி. விஸேஸேன பனெத்த² நேவஸஞ்ஞானாஸஞ்ஞாயதனகுஸலோ அனாகா³மிப²லஸங்கா²தஸ்ஸ லோகுத்தரவிபாகஸ்ஸபி அனந்தரபச்சயோ ஹோதி. லோகுத்தரகுஸலோ லோகுத்தரவிபாகஸ்ஸேவ அனந்தரபச்சயோ ஹோதி. அகுஸலோ அவிஸேஸேன அகுஸலஸ்ஸ சேவ குஸலாகுஸலவிபாகஸ்ஸ ச. விஸேஸேன பனெத்த² ஸுக²மஜ்ஜ²த்தவேத³னாஸம்பயுத்தோ அகுஸலோ ரூபாவசராரூபாவசரவிபாகஸ்ஸாபீதி இமேஸங் சதுன்னங் ராஸீனங் அனந்தரபச்சயோ ஹோதி.
Evaṃ bhinne panettha kāmāvacarakusalo attanā sadisasseva kāmāvacarakusalassa anantarapaccayo hoti. Ñāṇasampayuttakāmāvacarakusalo pana rūpāvacarakusalassa arūpāvacarakusalassa lokuttarakusalassāti imesaṃ tiṇṇaṃ rāsīnaṃ anantarapaccayo hoti. Kāmāvacarakusalo ca kāmāvacaravipākassa, rūpāvacarārūpāvacaravipākassa, ñāṇasampayutto lokuttaravipākassāpīti imesaṃ catunnaṃ rāsīnaṃ anantarapaccayo hoti. Rūpāvacarakusalo rūpāvacarakusalassa, ñāṇasampayuttakāmāvacaravipākassa, rūpāvacaravipākassāti imesaṃ tiṇṇaṃ rāsīnaṃ anantarapaccayo hoti. Arūpāvacarakusalo tesaṃ dvinnaṃ vipākānaṃ attano kusalassa vipākassa cāti avisesena catunnaṃ rāsīnaṃ anantarapaccayo hoti. Visesena panettha nevasaññānāsaññāyatanakusalo anāgāmiphalasaṅkhātassa lokuttaravipākassapi anantarapaccayo hoti. Lokuttarakusalo lokuttaravipākasseva anantarapaccayo hoti. Akusalo avisesena akusalassa ceva kusalākusalavipākassa ca. Visesena panettha sukhamajjhattavedanāsampayutto akusalo rūpāvacarārūpāvacaravipākassāpīti imesaṃ catunnaṃ rāsīnaṃ anantarapaccayo hoti.
காமாவசரவிபாகஸ்ஸ ஞாணஸம்பயுத்தோ வா ஞாணவிப்பயுத்தோ வா விபாகோ காமாவசரகிரியாவஜ்ஜனஸ்ஸ, ஞாணஸம்பயுத்தவிபாகோ பனெத்த² படிஸந்தி⁴வஸேன உப்பஜ்ஜமானஸ்ஸ ரூபாவசராரூபாவசரவிபாகஸ்ஸாபீதி இமேஸங் சதுன்னங் ராஸீனங் அனந்தரபச்சயோ ஹோதி. ரூபாவசரவிபாகோ ஸஹேதுககாமாவசரவிபாகஸ்ஸ ரூபாவசராரூபாவசரவிபாகஸ்ஸ காமாவசரகிரியாவஜ்ஜனஸ்ஸாதி இமேஸங் சதுன்னங் ராஸீனங் அனந்தரபச்சயோ ஹோதி. அரூபாவசரவிபாகோ திஹேதுககாமாவசரவிபாகஸ்ஸ அரூபாவசரவிபாகஸ்ஸ காமாவசரகிரியாவஜ்ஜனஸ்ஸாதி திண்ணங் ராஸீனங் அனந்தரபச்சயோ ஹோதி. லோகுத்தரவிபாகோ திஹேதுககாமாவசரவிபாகஸ்ஸ ரூபாவசராரூபாவசரலோகுத்தரவிபாகஸ்ஸாதி சதுன்னங் ராஸீனங் அனந்தரபச்சயோ ஹோதி.
Kāmāvacaravipākassa ñāṇasampayutto vā ñāṇavippayutto vā vipāko kāmāvacarakiriyāvajjanassa, ñāṇasampayuttavipāko panettha paṭisandhivasena uppajjamānassa rūpāvacarārūpāvacaravipākassāpīti imesaṃ catunnaṃ rāsīnaṃ anantarapaccayo hoti. Rūpāvacaravipāko sahetukakāmāvacaravipākassa rūpāvacarārūpāvacaravipākassa kāmāvacarakiriyāvajjanassāti imesaṃ catunnaṃ rāsīnaṃ anantarapaccayo hoti. Arūpāvacaravipāko tihetukakāmāvacaravipākassa arūpāvacaravipākassa kāmāvacarakiriyāvajjanassāti tiṇṇaṃ rāsīnaṃ anantarapaccayo hoti. Lokuttaravipāko tihetukakāmāvacaravipākassa rūpāvacarārūpāvacaralokuttaravipākassāti catunnaṃ rāsīnaṃ anantarapaccayo hoti.
காமாவசரகிரியங் காமாவசரகுஸலாகுஸலஸ்ஸ சதுபூ⁴மகவிபாகஸ்ஸ தேபூ⁴மககிரியஸ்ஸாதி நவன்னங் ராஸீனங் அனந்தரபச்சயோ ஹோதி. ரூபாவசரகிரியங் திஹேதுககாமாவசரவிபாகஸ்ஸ ரூபாவசரவிபாகஸ்ஸ ரூபாவசரகிரியஸ்ஸாதி திண்ணங் ராஸீனங் அனந்தரபச்சயோ ஹோதி. அரூபாவசரகிரியங் திஹேதுககாமாவசரவிபாகஸ்ஸ ரூபாவசராரூபாவசரலோகுத்தரவிபாகஸ்ஸ அரூபாவசரகிரியஸ்ஸாதி பஞ்சன்னங் ராஸீனங் அனந்தரபச்சயோ ஹோதீதி. ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Kāmāvacarakiriyaṃ kāmāvacarakusalākusalassa catubhūmakavipākassa tebhūmakakiriyassāti navannaṃ rāsīnaṃ anantarapaccayo hoti. Rūpāvacarakiriyaṃ tihetukakāmāvacaravipākassa rūpāvacaravipākassa rūpāvacarakiriyassāti tiṇṇaṃ rāsīnaṃ anantarapaccayo hoti. Arūpāvacarakiriyaṃ tihetukakāmāvacaravipākassa rūpāvacarārūpāvacaralokuttaravipākassa arūpāvacarakiriyassāti pañcannaṃ rāsīnaṃ anantarapaccayo hotīti. Evamettha paccayuppannatopi viññātabbo vinicchayoti.
அனந்தரபச்சயனித்³தே³ஸவண்ணனா.
Anantarapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
