| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৩. তেরসমৰগ্গো
13. Terasamavaggo
(১২৮) ৩. অনন্তরাপযুত্তকথা
(128) 3. Anantarāpayuttakathā
৬৬০. অনন্তরাপযুত্তো পুগ্গলো সম্মত্তনিযামং ওক্কমেয্যাতি? আমন্তা। মিচ্ছত্তনিযামঞ্চ সম্মত্তনিযামঞ্চ উভো ওক্কমেয্যাতি? ন হেৰং ৰত্তব্বে…পে॰… অনন্তরাপযুত্তো পুগ্গলো সম্মত্তনিযামং ওক্কমেয্যাতি? আমন্তা। ননু তং কম্মং পযুত্তং কুক্কুচ্চং উপ্পাদিতং ৰিপ্পটিসারিযং জনিতন্তি? আমন্তা। হঞ্চি তং কম্মং পযুত্তং কুক্কুচ্চং উপ্পাদিতং ৰিপ্পটিসারিযং জনিতং, নো চ ৰত রে ৰত্তব্বে – ‘‘অনন্তরাপযুত্তো পুগ্গলো সম্মত্তনিযামং ওক্কমেয্যা’’তি।
660. Anantarāpayutto puggalo sammattaniyāmaṃ okkameyyāti? Āmantā. Micchattaniyāmañca sammattaniyāmañca ubho okkameyyāti? Na hevaṃ vattabbe…pe… anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payuttaṃ kukkuccaṃ uppāditaṃ vippaṭisāriyaṃ janitanti? Āmantā. Hañci taṃ kammaṃ payuttaṃ kukkuccaṃ uppāditaṃ vippaṭisāriyaṃ janitaṃ, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
৬৬১. অনন্তরাপযুত্তো পুগ্গলো অভব্বো সম্মত্তনিযামং ওক্কমিতুন্তি? আমন্তা। মাতা জীৰিতা ৰোরোপিতা… পিতা জীৰিতা ৰোরোপিতো… অরহা জীৰিতা ৰোরোপিতো… দুট্ঠেন চিত্তেন তথাগতস্স লোহিতং উপ্পাদিতং… সঙ্ঘো ভিন্নোতি? ন হেৰং ৰত্তব্বে…পে॰…।
661. Anantarāpayutto puggalo abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito… arahā jīvitā voropito… duṭṭhena cittena tathāgatassa lohitaṃ uppāditaṃ… saṅgho bhinnoti? Na hevaṃ vattabbe…pe….
অনন্তরাপযুত্তো পুগ্গলো তং কম্মং পটিসংহরিত্ৰা কুক্কুচ্চং পটিৰিনোদেত্ৰা ৰিপ্পটিসারিযং পটিৰিনেত্ৰা 1 অভব্বো সম্মত্তনিযামং ওক্কমিতুন্তি? আমন্তা। মাতা জীৰিতা ৰোরোপিতা… পিতা জীৰিতা ৰোরোপিতো…পে॰… সঙ্ঘো ভিন্নোতি? ন হেৰং ৰত্তব্বে…পে॰…।
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā 2 abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito…pe… saṅgho bhinnoti? Na hevaṃ vattabbe…pe….
অনন্তরাপযুত্তো পুগ্গলো তং কম্মং পটিসংহরিত্ৰা কুক্কুচ্চং পটিৰিনোদেত্ৰা ৰিপ্পটিসারিযং পটিৰিনেত্ৰা অভব্বো সম্মত্তনিযামং ওক্কমিতুন্তি? আমন্তা। ননু তং কম্মং পটিসংহটং কুক্কুচ্চং পটিৰিনোদিতং ৰিপ্পটিসারিযং পটিৰিনীতন্তি? আমন্তা। হঞ্চি তং কম্মং পটিসংহটং কুক্কুচ্চং পটিৰিনোদিতং ৰিপ্পটিসারিযং পটিৰিনীতং, নো চ ৰত রে ৰত্তব্বে – ‘‘অনন্তরাপযুত্তো পুগ্গলো তং কম্মং পটিসংহরিত্ৰা কুক্কুচ্চং পটিৰিনোদেত্ৰা ৰিপ্পটিসারিযং পটিৰিনেত্ৰা অভব্বো সম্মত্তনিযামং ওক্কমিতু’’ন্তি।
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitunti? Āmantā. Nanu taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītanti? Āmantā. Hañci taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītaṃ, no ca vata re vattabbe – ‘‘anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitu’’nti.
৬৬২. অনন্তরাপযুত্তো পুগ্গলো সম্মত্তনিযামং ওক্কমেয্যাতি? আমন্তা। ননু তং কম্মং পযুত্তো আসীতি? আমন্তা। হঞ্চি তং কম্মং পযুত্তো আসি, নো চ ৰত রে ৰত্তব্বে – ‘‘অনন্তরাপযুত্তো পুগ্গলো সম্মত্তনিযামং ওক্কমেয্যা’’তি।
662. Anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payutto āsīti? Āmantā. Hañci taṃ kammaṃ payutto āsi, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
অনন্তরাপযুত্তকথা নিট্ঠিতা।
Anantarāpayuttakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. অনন্তরাপযুত্তকথাৰণ্ণনা • 3. Anantarāpayuttakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. অনন্তরাপযুত্তকথাৰণ্ণনা • 3. Anantarāpayuttakathāvaṇṇanā
