| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๑๓. เตรสมวโคฺค
13. Terasamavaggo
(๑๒๘) ๓. อนนฺตราปยุตฺตกถา
(128) 3. Anantarāpayuttakathā
๖๖๐. อนนฺตราปยุโตฺต ปุคฺคโล สมฺมตฺตนิยามํ โอกฺกเมยฺยาติ? อามนฺตาฯ มิจฺฉตฺตนิยามญฺจ สมฺมตฺตนิยามญฺจ อุโภ โอกฺกเมยฺยาติ? น เหวํ วตฺตเพฺพ…เป.… อนนฺตราปยุโตฺต ปุคฺคโล สมฺมตฺตนิยามํ โอกฺกเมยฺยาติ? อามนฺตาฯ นนุ ตํ กมฺมํ ปยุตฺตํ กุกฺกุจฺจํ อุปฺปาทิตํ วิปฺปฎิสาริยํ ชนิตนฺติ? อามนฺตาฯ หญฺจิ ตํ กมฺมํ ปยุตฺตํ กุกฺกุจฺจํ อุปฺปาทิตํ วิปฺปฎิสาริยํ ชนิตํ, โน จ วต เร วตฺตเพฺพ – ‘‘อนนฺตราปยุโตฺต ปุคฺคโล สมฺมตฺตนิยามํ โอกฺกเมยฺยา’’ติฯ
660. Anantarāpayutto puggalo sammattaniyāmaṃ okkameyyāti? Āmantā. Micchattaniyāmañca sammattaniyāmañca ubho okkameyyāti? Na hevaṃ vattabbe…pe… anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payuttaṃ kukkuccaṃ uppāditaṃ vippaṭisāriyaṃ janitanti? Āmantā. Hañci taṃ kammaṃ payuttaṃ kukkuccaṃ uppāditaṃ vippaṭisāriyaṃ janitaṃ, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
๖๖๑. อนนฺตราปยุโตฺต ปุคฺคโล อภโพฺพ สมฺมตฺตนิยามํ โอกฺกมิตุนฺติ? อามนฺตาฯ มาตา ชีวิตา โวโรปิตา… ปิตา ชีวิตา โวโรปิโต… อรหา ชีวิตา โวโรปิโต… ทุเฎฺฐน จิเตฺตน ตถาคตสฺส โลหิตํ อุปฺปาทิตํ… สโงฺฆ ภิโนฺนติ? น เหวํ วตฺตเพฺพ…เป.…ฯ
661. Anantarāpayutto puggalo abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito… arahā jīvitā voropito… duṭṭhena cittena tathāgatassa lohitaṃ uppāditaṃ… saṅgho bhinnoti? Na hevaṃ vattabbe…pe….
อนนฺตราปยุโตฺต ปุคฺคโล ตํ กมฺมํ ปฎิสํหริตฺวา กุกฺกุจฺจํ ปฎิวิโนเทตฺวา วิปฺปฎิสาริยํ ปฎิวิเนตฺวา 1 อภโพฺพ สมฺมตฺตนิยามํ โอกฺกมิตุนฺติ? อามนฺตาฯ มาตา ชีวิตา โวโรปิตา… ปิตา ชีวิตา โวโรปิโต…เป.… สโงฺฆ ภิโนฺนติ? น เหวํ วตฺตเพฺพ…เป.…ฯ
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā 2 abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito…pe… saṅgho bhinnoti? Na hevaṃ vattabbe…pe….
อนนฺตราปยุโตฺต ปุคฺคโล ตํ กมฺมํ ปฎิสํหริตฺวา กุกฺกุจฺจํ ปฎิวิโนเทตฺวา วิปฺปฎิสาริยํ ปฎิวิเนตฺวา อภโพฺพ สมฺมตฺตนิยามํ โอกฺกมิตุนฺติ? อามนฺตาฯ นนุ ตํ กมฺมํ ปฎิสํหฎํ กุกฺกุจฺจํ ปฎิวิโนทิตํ วิปฺปฎิสาริยํ ปฎิวินีตนฺติ? อามนฺตาฯ หญฺจิ ตํ กมฺมํ ปฎิสํหฎํ กุกฺกุจฺจํ ปฎิวิโนทิตํ วิปฺปฎิสาริยํ ปฎิวินีตํ, โน จ วต เร วตฺตเพฺพ – ‘‘อนนฺตราปยุโตฺต ปุคฺคโล ตํ กมฺมํ ปฎิสํหริตฺวา กุกฺกุจฺจํ ปฎิวิโนเทตฺวา วิปฺปฎิสาริยํ ปฎิวิเนตฺวา อภโพฺพ สมฺมตฺตนิยามํ โอกฺกมิตุ’’นฺติฯ
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitunti? Āmantā. Nanu taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītanti? Āmantā. Hañci taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītaṃ, no ca vata re vattabbe – ‘‘anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitu’’nti.
๖๖๒. อนนฺตราปยุโตฺต ปุคฺคโล สมฺมตฺตนิยามํ โอกฺกเมยฺยาติ? อามนฺตาฯ นนุ ตํ กมฺมํ ปยุโตฺต อาสีติ? อามนฺตาฯ หญฺจิ ตํ กมฺมํ ปยุโตฺต อาสิ, โน จ วต เร วตฺตเพฺพ – ‘‘อนนฺตราปยุโตฺต ปุคฺคโล สมฺมตฺตนิยามํ โอกฺกเมยฺยา’’ติฯ
662. Anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payutto āsīti? Āmantā. Hañci taṃ kammaṃ payutto āsi, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
อนนฺตราปยุตฺตกถา นิฎฺฐิตาฯ
Anantarāpayuttakathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๓. อนนฺตราปยุตฺตกถาวณฺณนา • 3. Anantarāpayuttakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๓. อนนฺตราปยุตฺตกถาวณฺณนา • 3. Anantarāpayuttakathāvaṇṇanā
