| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៣. តេរសមវគ្គោ
13. Terasamavaggo
(១២៨) ៣. អនន្តរាបយុត្តកថា
(128) 3. Anantarāpayuttakathā
៦៦០. អនន្តរាបយុត្តោ បុគ្គលោ សម្មត្តនិយាមំ ឱក្កមេយ្យាតិ? អាមន្តា។ មិច្ឆត្តនិយាមញ្ច សម្មត្តនិយាមញ្ច ឧភោ ឱក្កមេយ្យាតិ? ន ហេវំ វត្តព្ពេ…បេ.… អនន្តរាបយុត្តោ បុគ្គលោ សម្មត្តនិយាមំ ឱក្កមេយ្យាតិ? អាមន្តា។ ននុ តំ កម្មំ បយុត្តំ កុក្កុច្ចំ ឧប្បាទិតំ វិប្បដិសារិយំ ជនិតន្តិ? អាមន្តា។ ហញ្ចិ តំ កម្មំ បយុត្តំ កុក្កុច្ចំ ឧប្បាទិតំ វិប្បដិសារិយំ ជនិតំ, នោ ច វត រេ វត្តព្ពេ – ‘‘អនន្តរាបយុត្តោ បុគ្គលោ សម្មត្តនិយាមំ ឱក្កមេយ្យា’’តិ។
660. Anantarāpayutto puggalo sammattaniyāmaṃ okkameyyāti? Āmantā. Micchattaniyāmañca sammattaniyāmañca ubho okkameyyāti? Na hevaṃ vattabbe…pe… anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payuttaṃ kukkuccaṃ uppāditaṃ vippaṭisāriyaṃ janitanti? Āmantā. Hañci taṃ kammaṃ payuttaṃ kukkuccaṃ uppāditaṃ vippaṭisāriyaṃ janitaṃ, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
៦៦១. អនន្តរាបយុត្តោ បុគ្គលោ អភព្ពោ សម្មត្តនិយាមំ ឱក្កមិតុន្តិ? អាមន្តា។ មាតា ជីវិតា វោរោបិតា… បិតា ជីវិតា វោរោបិតោ… អរហា ជីវិតា វោរោបិតោ… ទុដ្ឋេន ចិត្តេន តថាគតស្ស លោហិតំ ឧប្បាទិតំ… សង្ឃោ ភិន្នោតិ? ន ហេវំ វត្តព្ពេ…បេ.…។
661. Anantarāpayutto puggalo abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito… arahā jīvitā voropito… duṭṭhena cittena tathāgatassa lohitaṃ uppāditaṃ… saṅgho bhinnoti? Na hevaṃ vattabbe…pe….
អនន្តរាបយុត្តោ បុគ្គលោ តំ កម្មំ បដិសំហរិត្វា កុក្កុច្ចំ បដិវិនោទេត្វា វិប្បដិសារិយំ បដិវិនេត្វា 1 អភព្ពោ សម្មត្តនិយាមំ ឱក្កមិតុន្តិ? អាមន្តា។ មាតា ជីវិតា វោរោបិតា… បិតា ជីវិតា វោរោបិតោ…បេ.… សង្ឃោ ភិន្នោតិ? ន ហេវំ វត្តព្ពេ…បេ.…។
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā 2 abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito…pe… saṅgho bhinnoti? Na hevaṃ vattabbe…pe….
អនន្តរាបយុត្តោ បុគ្គលោ តំ កម្មំ បដិសំហរិត្វា កុក្កុច្ចំ បដិវិនោទេត្វា វិប្បដិសារិយំ បដិវិនេត្វា អភព្ពោ សម្មត្តនិយាមំ ឱក្កមិតុន្តិ? អាមន្តា។ ននុ តំ កម្មំ បដិសំហដំ កុក្កុច្ចំ បដិវិនោទិតំ វិប្បដិសារិយំ បដិវិនីតន្តិ? អាមន្តា។ ហញ្ចិ តំ កម្មំ បដិសំហដំ កុក្កុច្ចំ បដិវិនោទិតំ វិប្បដិសារិយំ បដិវិនីតំ, នោ ច វត រេ វត្តព្ពេ – ‘‘អនន្តរាបយុត្តោ បុគ្គលោ តំ កម្មំ បដិសំហរិត្វា កុក្កុច្ចំ បដិវិនោទេត្វា វិប្បដិសារិយំ បដិវិនេត្វា អភព្ពោ សម្មត្តនិយាមំ ឱក្កមិតុ’’ន្តិ។
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitunti? Āmantā. Nanu taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītanti? Āmantā. Hañci taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītaṃ, no ca vata re vattabbe – ‘‘anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitu’’nti.
៦៦២. អនន្តរាបយុត្តោ បុគ្គលោ សម្មត្តនិយាមំ ឱក្កមេយ្យាតិ? អាមន្តា។ ននុ តំ កម្មំ បយុត្តោ អាសីតិ? អាមន្តា។ ហញ្ចិ តំ កម្មំ បយុត្តោ អាសិ, នោ ច វត រេ វត្តព្ពេ – ‘‘អនន្តរាបយុត្តោ បុគ្គលោ សម្មត្តនិយាមំ ឱក្កមេយ្យា’’តិ។
662. Anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payutto āsīti? Āmantā. Hañci taṃ kammaṃ payutto āsi, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
អនន្តរាបយុត្តកថា និដ្ឋិតា។
Anantarāpayuttakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៣. អនន្តរាបយុត្តកថាវណ្ណនា • 3. Anantarāpayuttakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៣. អនន្តរាបយុត្តកថាវណ្ណនា • 3. Anantarāpayuttakathāvaṇṇanā
