| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၃. တေရသမဝဂ္ဂော
13. Terasamavaggo
(၁၂၈) ၃. အနန္တရာပယုတ္တကထာ
(128) 3. Anantarāpayuttakathā
၆၆၀. အနန္တရာပယုတ္တော ပုဂ္ဂလော သမ္မတ္တနိယာမံ ဩက္ကမေယ္ယာတိ? အာမန္တာ။ မိစ္ဆတ္တနိယာမဉ္စ သမ္မတ္တနိယာမဉ္စ ဥဘော ဩက္ကမေယ္ယာတိ? န ဟေဝံ ဝတ္တဗ္ဗေ။ပေ.။ အနန္တရာပယုတ္တော ပုဂ္ဂလော သမ္မတ္တနိယာမံ ဩက္ကမေယ္ယာတိ? အာမန္တာ။ နနု တံ ကမ္မံ ပယုတ္တံ ကုက္ကုစ္စံ ဥပ္ပာဒိတံ ဝိပ္ပဋိသာရိယံ ဇနိတန္တိ? အာမန္တာ။ ဟဉ္စိ တံ ကမ္မံ ပယုတ္တံ ကုက္ကုစ္စံ ဥပ္ပာဒိတံ ဝိပ္ပဋိသာရိယံ ဇနိတံ, နော စ ဝတ ရေ ဝတ္တဗ္ဗေ – ‘‘အနန္တရာပယုတ္တော ပုဂ္ဂလော သမ္မတ္တနိယာမံ ဩက္ကမေယ္ယာ’’တိ။
660. Anantarāpayutto puggalo sammattaniyāmaṃ okkameyyāti? Āmantā. Micchattaniyāmañca sammattaniyāmañca ubho okkameyyāti? Na hevaṃ vattabbe…pe… anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payuttaṃ kukkuccaṃ uppāditaṃ vippaṭisāriyaṃ janitanti? Āmantā. Hañci taṃ kammaṃ payuttaṃ kukkuccaṃ uppāditaṃ vippaṭisāriyaṃ janitaṃ, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
၆၆၁. အနန္တရာပယုတ္တော ပုဂ္ဂလော အဘဗ္ဗော သမ္မတ္တနိယာမံ ဩက္ကမိတုန္တိ? အာမန္တာ။ မာတာ ဇီဝိတာ ဝောရောပိတာ။ ပိတာ ဇီဝိတာ ဝောရောပိတော။ အရဟာ ဇီဝိတာ ဝောရောပိတော။ ဒုဋ္ဌေန စိတ္တေန တထာဂတသ္သ လောဟိတံ ဥပ္ပာဒိတံ။ သင္ဃော ဘိန္နောတိ? န ဟေဝံ ဝတ္တဗ္ဗေ။ပေ.။။
661. Anantarāpayutto puggalo abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito… arahā jīvitā voropito… duṭṭhena cittena tathāgatassa lohitaṃ uppāditaṃ… saṅgho bhinnoti? Na hevaṃ vattabbe…pe….
အနန္တရာပယုတ္တော ပုဂ္ဂလော တံ ကမ္မံ ပဋိသံဟရိတ္ဝာ ကုက္ကုစ္စံ ပဋိဝိနောဒေတ္ဝာ ဝိပ္ပဋိသာရိယံ ပဋိဝိနေတ္ဝာ 1 အဘဗ္ဗော သမ္မတ္တနိယာမံ ဩက္ကမိတုန္တိ? အာမန္တာ။ မာတာ ဇီဝိတာ ဝောရောပိတာ။ ပိတာ ဇီဝိတာ ဝောရောပိတော။ပေ.။ သင္ဃော ဘိန္နောတိ? န ဟေဝံ ဝတ္တဗ္ဗေ။ပေ.။။
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā 2 abhabbo sammattaniyāmaṃ okkamitunti? Āmantā. Mātā jīvitā voropitā… pitā jīvitā voropito…pe… saṅgho bhinnoti? Na hevaṃ vattabbe…pe….
အနန္တရာပယုတ္တော ပုဂ္ဂလော တံ ကမ္မံ ပဋိသံဟရိတ္ဝာ ကုက္ကုစ္စံ ပဋိဝိနောဒေတ္ဝာ ဝိပ္ပဋိသာရိယံ ပဋိဝိနေတ္ဝာ အဘဗ္ဗော သမ္မတ္တနိယာမံ ဩက္ကမိတုန္တိ? အာမန္တာ။ နနု တံ ကမ္မံ ပဋိသံဟဋံ ကုက္ကုစ္စံ ပဋိဝိနောဒိတံ ဝိပ္ပဋိသာရိယံ ပဋိဝိနီတန္တိ? အာမန္တာ။ ဟဉ္စိ တံ ကမ္မံ ပဋိသံဟဋံ ကုက္ကုစ္စံ ပဋိဝိနောဒိတံ ဝိပ္ပဋိသာရိယံ ပဋိဝိနီတံ, နော စ ဝတ ရေ ဝတ္တဗ္ဗေ – ‘‘အနန္တရာပယုတ္တော ပုဂ္ဂလော တံ ကမ္မံ ပဋိသံဟရိတ္ဝာ ကုက္ကုစ္စံ ပဋိဝိနောဒေတ္ဝာ ဝိပ္ပဋိသာရိယံ ပဋိဝိနေတ္ဝာ အဘဗ္ဗော သမ္မတ္တနိယာမံ ဩက္ကမိတု’’န္တိ။
Anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitunti? Āmantā. Nanu taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītanti? Āmantā. Hañci taṃ kammaṃ paṭisaṃhaṭaṃ kukkuccaṃ paṭivinoditaṃ vippaṭisāriyaṃ paṭivinītaṃ, no ca vata re vattabbe – ‘‘anantarāpayutto puggalo taṃ kammaṃ paṭisaṃharitvā kukkuccaṃ paṭivinodetvā vippaṭisāriyaṃ paṭivinetvā abhabbo sammattaniyāmaṃ okkamitu’’nti.
၆၆၂. အနန္တရာပယုတ္တော ပုဂ္ဂလော သမ္မတ္တနိယာမံ ဩက္ကမေယ္ယာတိ? အာမန္တာ။ နနု တံ ကမ္မံ ပယုတ္တော အာသီတိ? အာမန္တာ။ ဟဉ္စိ တံ ကမ္မံ ပယုတ္တော အာသိ, နော စ ဝတ ရေ ဝတ္တဗ္ဗေ – ‘‘အနန္တရာပယုတ္တော ပုဂ္ဂလော သမ္မတ္တနိယာမံ ဩက္ကမေယ္ယာ’’တိ။
662. Anantarāpayutto puggalo sammattaniyāmaṃ okkameyyāti? Āmantā. Nanu taṃ kammaṃ payutto āsīti? Āmantā. Hañci taṃ kammaṃ payutto āsi, no ca vata re vattabbe – ‘‘anantarāpayutto puggalo sammattaniyāmaṃ okkameyyā’’ti.
အနန္တရာပယုတ္တကထာ နိဋ္ဌိတာ။
Anantarāpayuttakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၃. အနန္တရာပယုတ္တကထာဝဏ္ဏနာ • 3. Anantarāpayuttakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၃. အနန္တရာပယုတ္တကထာဝဏ္ဏနာ • 3. Anantarāpayuttakathāvaṇṇanā
