| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
৩২. আনন্তরিকসমাধিঞাণনিদ্দেসৰণ্ণনা
32. Ānantarikasamādhiñāṇaniddesavaṇṇanā
৮০. আনন্তরিকসমাধিঞাণনিদ্দেসে নেক্খম্মৰসেনাতিআদীসু নেক্খম্মঅব্যাপাদআলোকসঞ্ঞাঅৰিক্খেপধম্মৰৰত্থানঞাণপামোজ্জানি সুক্খৰিপস্সকস্স উপচারজ্ঝানসম্পযুত্তা তস্স তস্স কিলেসস্স ৰিপক্খভূতা সত্ত ধম্মা একচিত্তসম্পযুত্তা এৰ। চিত্তস্স একগ্গতা অৰিক্খেপোতি একগ্গস্স ভাৰো একগ্গতা, নানারম্মণে ন ৰিক্খিপতি তেন চিত্তন্তি অৰিক্খেপো, চিত্তস্স একগ্গতাসঙ্খাতো অৰিক্খেপোতি অত্থো। সমাধীতি একারম্মণে সমং আধীযতি তেন চিত্তন্তি সমাধি নামাতি অত্থো। তস্স সমাধিস্স ৰসেনাতি উপচারসমাধিনাপি সমাহিতচিত্তস্স যথাভূতাৰবোধতো ৰুত্তপ্পকারস্স সমাধিস্স ৰসেন। উপ্পজ্জতি ঞাণন্তি মগ্গঞাণং যথাক্কমেন উপ্পজ্জতি। খীযন্তীতি সমুচ্ছেদৰসেন খীযন্তি। ইতীতি ৰুত্তপ্পকারস্স অত্থস্স নিগমনং। পঠমং সমথোতি পুব্বভাগে সমাধি হোতি। পচ্ছা ঞাণন্তি অপরভাগে মগ্গক্খণে ঞাণং হোতি।
80. Ānantarikasamādhiñāṇaniddese nekkhammavasenātiādīsu nekkhammaabyāpādaālokasaññāavikkhepadhammavavatthānañāṇapāmojjāni sukkhavipassakassa upacārajjhānasampayuttā tassa tassa kilesassa vipakkhabhūtā satta dhammā ekacittasampayuttā eva. Cittassa ekaggatā avikkhepoti ekaggassa bhāvo ekaggatā, nānārammaṇe na vikkhipati tena cittanti avikkhepo, cittassa ekaggatāsaṅkhāto avikkhepoti attho. Samādhīti ekārammaṇe samaṃ ādhīyati tena cittanti samādhi nāmāti attho. Tassa samādhissa vasenāti upacārasamādhināpi samāhitacittassa yathābhūtāvabodhato vuttappakārassa samādhissa vasena. Uppajjati ñāṇanti maggañāṇaṃ yathākkamena uppajjati. Khīyantīti samucchedavasena khīyanti. Itīti vuttappakārassa atthassa nigamanaṃ. Paṭhamaṃ samathoti pubbabhāge samādhi hoti. Pacchā ñāṇanti aparabhāge maggakkhaṇe ñāṇaṃ hoti.
কামাসৰোতি পঞ্চকামগুণিকরাগো। ভৰাসৰোতি রূপারূপভৰেসু ছন্দরাগো ঝাননিকন্তি সস্সতদিট্ঠিসহজাতো রাগো ভৰৰসেন পত্থনা। দিট্ঠাসৰোতি দ্ৰাসট্ঠি দিট্ঠিযো। অৰিজ্জাসৰোতি দুক্খাদীসু অট্ঠসু ঠানেসু অঞ্ঞাণং। ভুম্মৰচনেন ওকাসপুচ্ছং কত্ৰা ‘‘সোতাপত্তিমগ্গেনা’’তিআদিনা আসৰক্খযকরেন মগ্গেন আসৰক্খযং দস্সেত্ৰা ‘‘এত্থা’’তি ওকাসৰিস্সজ্জনং কতং, মগ্গক্খণেতি ৰুত্তং হোতি। অনৰসেসোতি নত্থি এতস্স অৰসেসোতি অনৰসেসো। অপাযগমনীযোতি নিরযতিরচ্ছানযোনিপেত্তিৰিসযাসুরকাযা চত্তারো সুখসঙ্খাতা অযা অপেতত্তা অপাযা, যস্স সংৰিজ্জতি , তং পুগ্গলং অপাযে গমেতীতি অপাযগমনীযো। আসৰক্খযকথা দুভতোৰুট্ঠানকথাযং ৰুত্তা।
Kāmāsavoti pañcakāmaguṇikarāgo. Bhavāsavoti rūpārūpabhavesu chandarāgo jhānanikanti sassatadiṭṭhisahajāto rāgo bhavavasena patthanā. Diṭṭhāsavoti dvāsaṭṭhi diṭṭhiyo. Avijjāsavoti dukkhādīsu aṭṭhasu ṭhānesu aññāṇaṃ. Bhummavacanena okāsapucchaṃ katvā ‘‘sotāpattimaggenā’’tiādinā āsavakkhayakarena maggena āsavakkhayaṃ dassetvā ‘‘etthā’’ti okāsavissajjanaṃ kataṃ, maggakkhaṇeti vuttaṃ hoti. Anavasesoti natthi etassa avasesoti anavaseso. Apāyagamanīyoti nirayatiracchānayonipettivisayāsurakāyā cattāro sukhasaṅkhātā ayā apetattā apāyā, yassa saṃvijjati , taṃ puggalaṃ apāye gametīti apāyagamanīyo. Āsavakkhayakathā dubhatovuṭṭhānakathāyaṃ vuttā.
অৰিক্খেপৰসেনাতি পৰত্তমানস্স সমাধিস্স উপনিস্সযভূতসমাধিৰসেন। পথৰীকসিণৰসেনাতিআদীসু দস কসিণানি তদারম্মণিকঅপ্পনাসমাধিৰসেন ৰুত্তানি, বুদ্ধানুস্সতিআদযো মরণস্সতি উপসমানুস্সতি চ উপচারজ্ঝানৰসেন ৰুত্তা, আনাপানস্সতি কাযগতাসতি চ অপ্পনাসমাধিৰসেন ৰুত্তা, দস অসুভা পঠমজ্ঝানৰসেন ৰুত্তা।
Avikkhepavasenāti pavattamānassa samādhissa upanissayabhūtasamādhivasena. Pathavīkasiṇavasenātiādīsu dasa kasiṇāni tadārammaṇikaappanāsamādhivasena vuttāni, buddhānussatiādayo maraṇassati upasamānussati ca upacārajjhānavasena vuttā, ānāpānassati kāyagatāsati ca appanāsamādhivasena vuttā, dasa asubhā paṭhamajjhānavasena vuttā.
বুদ্ধং আরব্ভ উপ্পন্না অনুস্সতি বুদ্ধানুস্সতি। ‘‘ইতিপি সো ভগৰা অরহ’’ন্তিআদিবুদ্ধগুণারম্মণায (ম॰ নি॰ ১.৭৪; অ॰ নি॰ ৩.৭১; ৯.২৭) সতিযা এতং অধিৰচনং, তস্সা বুদ্ধানুস্সতিযা ৰসেন। তথা ধম্মং আরব্ভ উপ্পন্না অনুস্সতি ধম্মানুস্সতি। ‘‘স্ৰাক্খাতো ভগৰতা ধম্মো’’তিআদিধম্মগুণারম্মণায সতিযা এতং অধিৰচনং। সঙ্ঘং আরব্ভ উপ্পন্না অনুস্সতি সঙ্ঘানুস্সতি। ‘‘সুপ্পটিপন্নো ভগৰতো সাৰকসঙ্ঘো’’তিআদিসঙ্ঘগুণারম্মণায সতিযা এতং অধিৰচনং। সীলং আরব্ভ উপ্পন্না অনুস্সতি সীলানুস্সতি। অত্তনো অখণ্ডতাদিসীলগুণারম্মণায সতিযা এতং অধিৰচনং। চাগং আরব্ভ উপ্পন্না অনুস্সতি চাগানুস্সতি। অত্তনো মুত্তচাগতাদিচাগগুণারম্মণায সতিযা এতং অধিৰচনং। দেৰতা আরব্ভ উপ্পন্না অনুস্সতি দেৰতানুস্সতি। দেৰতা সক্খিট্ঠানে ঠপেত্ৰা অত্তনো সদ্ধাদিগুণারম্মণায সতিযা এতং অধিৰচনং। আনাপানে আরব্ভ উপ্পন্না সতি আনাপানস্সতি। আনাপাননিমিত্তারম্মণায সতিযা এতং অধিৰচনং। মরণং আরব্ভ উপ্পন্না সতি মরণস্সতি। একভৰপরিযাপন্নজীৰিতিন্দ্রিযুপচ্ছেদসঙ্খাতমরণারম্মণায সতিযা এতং অধিৰচনং। কুচ্ছিতানং কেসাদীনং পটিকূলানং আযত্তা আকরত্তা কাযোতিসঙ্খাতে সরীরে গতা পৰত্তা, তাদিসং ৰা কাযং গতা সতি কাযগতাসতি। ‘‘কাযগতসতী’’তি ৰত্তব্বে রস্সং অকত্ৰা ‘‘কাযগতাসতী’’তি ৰুত্তা। তথেৰ ইধাপি কাযগতাসতিৰসেনাতি ৰুত্তং। কেসাদিকেসু কাযকোট্ঠাসেসু পটিকূলনিমিত্তারম্মণায সতিযা এতং অধিৰচনং। উপসমং আরব্ভ উপ্পন্না অনুস্সতি উপসমানুস্সতি। সব্বদুক্খূপসমারম্মণায সতিযা এতং অধিৰচনং। দস অসুভা হেট্ঠা ৰুত্তত্থা।
Buddhaṃ ārabbha uppannā anussati buddhānussati. ‘‘Itipi so bhagavā araha’’ntiādibuddhaguṇārammaṇāya (ma. ni. 1.74; a. ni. 3.71; 9.27) satiyā etaṃ adhivacanaṃ, tassā buddhānussatiyā vasena. Tathā dhammaṃ ārabbha uppannā anussati dhammānussati. ‘‘Svākkhāto bhagavatā dhammo’’tiādidhammaguṇārammaṇāya satiyā etaṃ adhivacanaṃ. Saṅghaṃ ārabbha uppannā anussati saṅghānussati. ‘‘Suppaṭipanno bhagavato sāvakasaṅgho’’tiādisaṅghaguṇārammaṇāya satiyā etaṃ adhivacanaṃ. Sīlaṃ ārabbha uppannā anussati sīlānussati. Attano akhaṇḍatādisīlaguṇārammaṇāya satiyā etaṃ adhivacanaṃ. Cāgaṃ ārabbha uppannā anussati cāgānussati. Attano muttacāgatādicāgaguṇārammaṇāya satiyā etaṃ adhivacanaṃ. Devatā ārabbha uppannā anussati devatānussati. Devatā sakkhiṭṭhāne ṭhapetvā attano saddhādiguṇārammaṇāya satiyā etaṃ adhivacanaṃ. Ānāpāne ārabbha uppannā sati ānāpānassati. Ānāpānanimittārammaṇāya satiyā etaṃ adhivacanaṃ. Maraṇaṃ ārabbha uppannā sati maraṇassati. Ekabhavapariyāpannajīvitindriyupacchedasaṅkhātamaraṇārammaṇāya satiyā etaṃ adhivacanaṃ. Kucchitānaṃ kesādīnaṃ paṭikūlānaṃ āyattā ākarattā kāyotisaṅkhāte sarīre gatā pavattā, tādisaṃ vā kāyaṃ gatā sati kāyagatāsati. ‘‘Kāyagatasatī’’ti vattabbe rassaṃ akatvā ‘‘kāyagatāsatī’’ti vuttā. Tatheva idhāpi kāyagatāsativasenāti vuttaṃ. Kesādikesu kāyakoṭṭhāsesu paṭikūlanimittārammaṇāya satiyā etaṃ adhivacanaṃ. Upasamaṃ ārabbha uppannā anussati upasamānussati. Sabbadukkhūpasamārammaṇāya satiyā etaṃ adhivacanaṃ. Dasa asubhā heṭṭhā vuttatthā.
৮১. দীঘং অস্সাসৰসেনাতিআদীনি অপ্পনূপচারসমাধিভেদংযেৰ দস্সেতুং ৰুত্তানি। দীঘং অস্সাসৰসেনাতি দীঘন্তি ৰুত্তঅস্সাসৰসেন। ‘‘দীঘং ৰা অস্সসন্তো দীঘং অস্সসামীতি পজানাতী’’তি (দী॰ নি॰ ২.৩৭৪; ম॰ নি॰ ১.১০৭; ৩.১৪৮) হি ৰুত্তং। এস নযো সেসেসুপি। সব্বকাযপটিসংৰেদীতি সব্বস্স অস্সাসপস্সাসকাযস্স পটিসংৰেদী। পস্সম্ভযং কাযসঙ্খারন্তি ওল়ারিকং অস্সাসপস্সাসঙ্খাতং কাযসঙ্খারং পস্সম্ভেন্তো ৰূপসমেন্তো। ‘‘দীঘং রস্সং সব্বকাযপটিসংৰেদী পস্সম্ভযং কাযসঙ্খার’’ন্তি ইমিনাৰ চতুক্কেন অপ্পনাসমাধি ৰুত্তো। পীতিপটিসংৰেদীতি পীতিং পাকটং করোন্তো। চিত্তসঙ্খারপটিসংৰেদীতি সঞ্ঞাৰেদনাসঙ্খাতং চিত্তসঙ্খারং পাকটং করোন্তো। অভিপ্পমোদযং চিত্তন্তি চিত্তং মোদেন্তো। সমাদহং চিত্তন্তি আরম্মণে চিত্তং সমং ঠপেন্তো। ৰিমোচযং চিত্তন্তি চিত্তং নীৰরণাদীহি ৰিমোচেন্তো। পীতিপটিসংৰেদী সুখপটিসংৰেদী চিত্তসঙ্খারপটিসংৰেদী পস্সম্ভযং চিত্তসঙ্খারন্তি চতুক্কঞ্চ চিত্তপটিসংৰেদী অভিপ্পমোদযং চিত্তং সমাদহং চিত্তং ৰিমোচযং চিত্তন্তি চতুক্কঞ্চ অপ্পনাসমাধিৰসেন ৰিপস্সনাসম্পযুত্তসমাধিৰসেন চ ৰুত্তানি। অনিচ্চানুপস্সীতি অনিচ্চানুপস্সনাৰসেন। ৰিরাগানুপস্সীতি নিব্বিদানুপসনাৰসেন। নিরোধানুপস্সীতি ভঙ্গানুপস্সনাৰসেন। পটিনিস্সগ্গানুপস্সীতি ৰুট্ঠানগামিনীৰিপস্সনাৰসেন। সা হি তদঙ্গৰসেন সদ্ধিং খন্ধাভিসঙ্খারেহি কিলেসে পরিচ্চজতি। সঙ্খতদোসদস্সনেন চ তব্বিপরীতে নিব্বানে তন্নিন্নতায পক্খন্দতি। ইদং চতুক্কং ৰিপস্সনাসম্পযুত্তসমাধিৰসেনেৰ ৰুত্তং। অস্সাসৰসেন পস্সাসৰসেনাতি চেত্থ অস্সাসপস্সাসপৰত্তিমত্তং গহেত্ৰা ৰুত্তং, ন তদারম্মণকরণৰসেন। ৰিত্থারো পনেত্থ আনাপানকথাযং আৰিভৰিস্সতি।
81.Dīghaṃassāsavasenātiādīni appanūpacārasamādhibhedaṃyeva dassetuṃ vuttāni. Dīghaṃ assāsavasenāti dīghanti vuttaassāsavasena. ‘‘Dīghaṃ vā assasanto dīghaṃ assasāmīti pajānātī’’ti (dī. ni. 2.374; ma. ni. 1.107; 3.148) hi vuttaṃ. Esa nayo sesesupi. Sabbakāyapaṭisaṃvedīti sabbassa assāsapassāsakāyassa paṭisaṃvedī. Passambhayaṃ kāyasaṅkhāranti oḷārikaṃ assāsapassāsaṅkhātaṃ kāyasaṅkhāraṃ passambhento vūpasamento. ‘‘Dīghaṃ rassaṃ sabbakāyapaṭisaṃvedī passambhayaṃ kāyasaṅkhāra’’nti imināva catukkena appanāsamādhi vutto. Pītipaṭisaṃvedīti pītiṃ pākaṭaṃ karonto. Cittasaṅkhārapaṭisaṃvedīti saññāvedanāsaṅkhātaṃ cittasaṅkhāraṃ pākaṭaṃ karonto. Abhippamodayaṃ cittanti cittaṃ modento. Samādahaṃ cittanti ārammaṇe cittaṃ samaṃ ṭhapento. Vimocayaṃ cittanti cittaṃ nīvaraṇādīhi vimocento. Pītipaṭisaṃvedī sukhapaṭisaṃvedī cittasaṅkhārapaṭisaṃvedī passambhayaṃ cittasaṅkhāranti catukkañca cittapaṭisaṃvedī abhippamodayaṃ cittaṃ samādahaṃ cittaṃ vimocayaṃ cittanti catukkañca appanāsamādhivasena vipassanāsampayuttasamādhivasena ca vuttāni. Aniccānupassīti aniccānupassanāvasena. Virāgānupassīti nibbidānupasanāvasena. Nirodhānupassīti bhaṅgānupassanāvasena. Paṭinissaggānupassīti vuṭṭhānagāminīvipassanāvasena. Sā hi tadaṅgavasena saddhiṃ khandhābhisaṅkhārehi kilese pariccajati. Saṅkhatadosadassanena ca tabbiparīte nibbāne tanninnatāya pakkhandati. Idaṃ catukkaṃ vipassanāsampayuttasamādhivaseneva vuttaṃ. Assāsavasena passāsavasenāti cettha assāsapassāsapavattimattaṃ gahetvā vuttaṃ, na tadārammaṇakaraṇavasena. Vitthāro panettha ānāpānakathāyaṃ āvibhavissati.
আনন্তরিকসমাধিঞাণনিদ্দেসৰণ্ণনা নিট্ঠিতা।
Ānantarikasamādhiñāṇaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ৩২. আনন্তরিকসমাধিঞাণনিদ্দেসো • 32. Ānantarikasamādhiñāṇaniddeso
