| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. ஆனண்யஸுத்தவண்ணனா
2. Ānaṇyasuttavaṇṇanā
62. து³தியே அதி⁴க³மனீயானீதி பத்தப்³பா³னி. காமபோ⁴கி³னாதி வத்து²காமே ச கிலேஸகாமே ச பரிபு⁴ஞ்ஜந்தேன. அத்தி²ஸுகா²தீ³ஸு அத்தீ²தி உப்பஜ்ஜனகஸுக²ங் அத்தி²ஸுக²ங் நாம. போ⁴கே³ பரிபு⁴ஞ்ஜந்தஸ்ஸ உப்பஜ்ஜனகஸுக²ங் போ⁴க³ஸுக²ங் நாம. அனணொஸ்மீதி உப்பஜ்ஜனகஸுக²ங் ஆனண்யஸுக²ங் நாம. நித்³தோ³ஸோ அனவஜ்ஜொஸ்மீதி உப்பஜ்ஜனகஸுக²ங் அனவஜ்ஜஸுக²ங் நாம.
62. Dutiye adhigamanīyānīti pattabbāni. Kāmabhogināti vatthukāme ca kilesakāme ca paribhuñjantena. Atthisukhādīsu atthīti uppajjanakasukhaṃ atthisukhaṃ nāma. Bhoge paribhuñjantassa uppajjanakasukhaṃ bhogasukhaṃ nāma. Anaṇosmīti uppajjanakasukhaṃ ānaṇyasukhaṃ nāma. Niddoso anavajjosmīti uppajjanakasukhaṃ anavajjasukhaṃ nāma.
பு⁴ஞ்ஜந்தி பு⁴ஞ்ஜமானோ. பஞ்ஞா விபஸ்ஸதீதி பஞ்ஞாய விபஸ்ஸதி. உபோ⁴ பா⁴கே³தி த்³வே கொட்டா²ஸே, ஹெட்டி²மானி தீணி ஏகங் கொட்டா²ஸங், அனவஜ்ஜஸுக²ங் ஏகங் கொட்டா²ஸந்தி ஏவங் பஞ்ஞாய பஸ்ஸமானோ த்³வே கொட்டா²ஸே ஜானாதீதி அத்தோ². அனவஜ்ஜஸுக²ஸ்ஸேதந்தி ஏதங் திவித⁴ம்பி ஸுக²ங் அனவஜ்ஜஸுக²ஸ்ஸ ஸோளஸிங் கலங் நாக்³க⁴தீதி.
Bhuñjanti bhuñjamāno. Paññā vipassatīti paññāya vipassati. Ubho bhāgeti dve koṭṭhāse, heṭṭhimāni tīṇi ekaṃ koṭṭhāsaṃ, anavajjasukhaṃ ekaṃ koṭṭhāsanti evaṃ paññāya passamāno dve koṭṭhāse jānātīti attho. Anavajjasukhassetanti etaṃ tividhampi sukhaṃ anavajjasukhassa soḷasiṃ kalaṃ nāgghatīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஆனண்யஸுத்தங் • 2. Ānaṇyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. பத்தகம்மஸுத்தாதி³வண்ணனா • 1-4. Pattakammasuttādivaṇṇanā
