| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၂. အာနဏ္ယသုတ္တဝဏ္ဏနာ
2. Ānaṇyasuttavaṇṇanā
၆၂. ဒုတိယေ အဓိဂမနီယာနီတိ ပတ္တဗ္ဗာနိ။ ကာမဘောဂိနာတိ ဝတ္ထုကာမေ စ ကိလေသကာမေ စ ပရိဘုဉ္ဇန္တေန။ အတ္ထိသုခာဒီသု အတ္ထီတိ ဥပ္ပဇ္ဇနကသုခံ အတ္ထိသုခံ နာမ။ ဘောဂေ ပရိဘုဉ္ဇန္တသ္သ ဥပ္ပဇ္ဇနကသုခံ ဘောဂသုခံ နာမ။ အနဏောသ္မီတိ ဥပ္ပဇ္ဇနကသုခံ အာနဏ္ယသုခံ နာမ။ နိဒ္ဒောသော အနဝဇ္ဇောသ္မီတိ ဥပ္ပဇ္ဇနကသုခံ အနဝဇ္ဇသုခံ နာမ။
62. Dutiye adhigamanīyānīti pattabbāni. Kāmabhogināti vatthukāme ca kilesakāme ca paribhuñjantena. Atthisukhādīsu atthīti uppajjanakasukhaṃ atthisukhaṃ nāma. Bhoge paribhuñjantassa uppajjanakasukhaṃ bhogasukhaṃ nāma. Anaṇosmīti uppajjanakasukhaṃ ānaṇyasukhaṃ nāma. Niddoso anavajjosmīti uppajjanakasukhaṃ anavajjasukhaṃ nāma.
ဘုဉ္ဇန္တိ ဘုဉ္ဇမာနော။ ပညာ ဝိပသ္သတီတိ ပညာယ ဝိပသ္သတိ။ ဥဘော ဘာဂေတိ ဒ္ဝေ ကောဋ္ဌာသေ, ဟေဋ္ဌိမာနိ တီဏိ ဧကံ ကောဋ္ဌာသံ, အနဝဇ္ဇသုခံ ဧကံ ကောဋ္ဌာသန္တိ ဧဝံ ပညာယ ပသ္သမာနော ဒ္ဝေ ကောဋ္ဌာသေ ဇာနာတီတိ အတ္ထော။ အနဝဇ္ဇသုခသ္သေတန္တိ ဧတံ တိဝိဓမ္ပိ သုခံ အနဝဇ္ဇသုခသ္သ သောဠသိံ ကလံ နာဂ္ဃတီတိ။
Bhuñjanti bhuñjamāno. Paññā vipassatīti paññāya vipassati. Ubho bhāgeti dve koṭṭhāse, heṭṭhimāni tīṇi ekaṃ koṭṭhāsaṃ, anavajjasukhaṃ ekaṃ koṭṭhāsanti evaṃ paññāya passamāno dve koṭṭhāse jānātīti attho. Anavajjasukhassetanti etaṃ tividhampi sukhaṃ anavajjasukhassa soḷasiṃ kalaṃ nāgghatīti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. အာနဏ္ယသုတ္တံ • 2. Ānaṇyasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၄. ပတ္တကမ္မသုတ္တာဒိဝဏ္ဏနာ • 1-4. Pattakammasuttādivaṇṇanā
