| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༨. ཨཱནཱཔཱནསྶཏིསུཏྟཾ
8. Ānāpānassatisuttaṃ
༡༤༤. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི པུབྦཱརཱམེ མིགཱརམཱཏུཔཱསཱདེ སམྦཧུལེཧི ཨབྷིཉྙཱཏེཧི ཨབྷིཉྙཱཏེཧི ཐེརེཧི སཱཝཀེཧི སདྡྷིཾ – ཨཱཡསྨཏཱ ཙ སཱརིཔུཏྟེན ཨཱཡསྨཏཱ ཙ མཧཱམོགྒལླཱནེན 1 ཨཱཡསྨཏཱ ཙ མཧཱཀསྶཔེན ཨཱཡསྨཏཱ ཙ མཧཱཀཙྩཱཡནེན ཨཱཡསྨཏཱ ཙ མཧཱཀོཊྛིཀེན ཨཱཡསྨཏཱ ཙ མཧཱཀཔྤིནེན ཨཱཡསྨཏཱ ཙ མཧཱཙུནྡེན ཨཱཡསྨཏཱ ཙ ཨནུརུདྡྷེན ཨཱཡསྨཏཱ ཙ རེཝཏེན ཨཱཡསྨཏཱ ཙ ཨཱནནྡེན, ཨཉྙེཧི ཙ ཨབྷིཉྙཱཏེཧི ཨབྷིཉྙཱཏེཧི ཐེརེཧི སཱཝཀེཧི སདྡྷིཾ།
144. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde sambahulehi abhiññātehi abhiññātehi therehi sāvakehi saddhiṃ – āyasmatā ca sāriputtena āyasmatā ca mahāmoggallānena 2 āyasmatā ca mahākassapena āyasmatā ca mahākaccāyanena āyasmatā ca mahākoṭṭhikena āyasmatā ca mahākappinena āyasmatā ca mahācundena āyasmatā ca anuruddhena āyasmatā ca revatena āyasmatā ca ānandena, aññehi ca abhiññātehi abhiññātehi therehi sāvakehi saddhiṃ.
ཏེན ཁོ པན སམཡེན ཐེརཱ བྷིཀྑཱུ ནཝེ བྷིཀྑཱུ ཨོཝདནྟི ཨནུསཱསནྟི། ཨཔྤེཀཙྩེ ཐེརཱ བྷིཀྑཱུ དསཔི བྷིཀྑཱུ ཨོཝདནྟི ཨནུསཱསནྟི, ཨཔྤེཀཙྩེ ཐེརཱ བྷིཀྑཱུ ཝཱིསམྤི བྷིཀྑཱུ ཨོཝདནྟི ཨནུསཱསནྟི, ཨཔྤེཀཙྩེ ཐེརཱ བྷིཀྑཱུ ཏིཾསམྤི བྷིཀྑཱུ ཨོཝདནྟི ཨནུསཱསནྟི, ཨཔྤེཀཙྩེ ཐེརཱ བྷིཀྑཱུ ཙཏྟཱརཱིསམྤི བྷིཀྑཱུ ཨོཝདནྟི ཨནུསཱསནྟི། ཏེ ཙ ནཝཱ བྷིཀྑཱུ ཐེརེཧི བྷིཀྑཱུཧི ཨོཝདིཡམཱནཱ ཨནུསཱསིཡམཱནཱ ཨུལཱ༹རཾ པུབྦེནཱཔརཾ ཝིསེསཾ ཛཱནནྟི 3།
Tena kho pana samayena therā bhikkhū nave bhikkhū ovadanti anusāsanti. Appekacce therā bhikkhū dasapi bhikkhū ovadanti anusāsanti, appekacce therā bhikkhū vīsampi bhikkhū ovadanti anusāsanti, appekacce therā bhikkhū tiṃsampi bhikkhū ovadanti anusāsanti, appekacce therā bhikkhū cattārīsampi bhikkhū ovadanti anusāsanti. Te ca navā bhikkhū therehi bhikkhūhi ovadiyamānā anusāsiyamānā uḷāraṃ pubbenāparaṃ visesaṃ jānanti 4.
༡༤༥. ཏེན ཁོ པན སམཡེན བྷགཝཱ ཏདཧུཔོསཐེ པནྣརསེ པཝཱརཎཱཡ པུཎྞཱཡ པུཎྞམཱཡ རཏྟིཡཱ བྷིཀྑུསངྒྷཔརིཝུཏོ ཨབྦྷོཀཱསེ ནིསིནྣོ ཧོཏི། ཨཐ ཁོ བྷགཝཱ ཏུཎྷཱིབྷཱུཏཾ ཏུཎྷཱིབྷཱུཏཾ བྷིཀྑུསངྒྷཾ ཨནུཝིལོཀེཏྭཱ བྷིཀྑཱུ ཨཱམནྟེསི – ‘‘ཨཱརདྡྷོསྨི, བྷིཀྑཝེ, ཨིམཱཡ པཊིཔདཱཡ; ཨཱརདྡྷཙིཏྟོསྨི, བྷིཀྑཝེ, ཨིམཱཡ པཊིཔདཱཡ། ཏསྨཱཏིཧ, བྷིཀྑཝེ, བྷིཡྻོསོམཏྟཱཡ ཝཱིརིཡཾ ཨཱརབྷཐ ཨཔྤཏྟསྶ པཏྟིཡཱ, ཨནདྷིགཏསྶ ཨདྷིགམཱཡ , ཨསཙྪིཀཏསྶ སཙྪིཀིརིཡཱཡ། ཨིདྷེཝཱཧཾ སཱཝཏྠིཡཾ ཀོམུདིཾ ཙཱཏུམཱསིནིཾ ཨཱགམེསྶཱམཱི’’ཏི། ཨསྶོསུཾ ཁོ ཛཱནཔདཱ བྷིཀྑཱུ – ‘‘བྷགཝཱ ཀིར ཏཏྠེཝ སཱཝཏྠིཡཾ ཀོམུདིཾ ཙཱཏུམཱསིནིཾ ཨཱགམེསྶཏཱི’’ཏི། ཏེ ཛཱནཔདཱ བྷིཀྑཱུ སཱཝཏྠིཾ 5 ཨོསརནྟི བྷགཝནྟཾ དསྶནཱཡ། ཏེ ཙ ཁོ ཐེརཱ བྷིཀྑཱུ བྷིཡྻོསོམཏྟཱཡ ནཝེ བྷིཀྑཱུ ཨོཝདནྟི ཨནུསཱསནྟི། ཨཔྤེཀཙྩེ ཐེརཱ བྷིཀྑཱུ དསཔི བྷིཀྑཱུ ཨོཝདནྟི ཨནུསཱསནྟི, ཨཔྤེཀཙྩེ ཐེརཱ བྷིཀྑཱུ ཝཱིསམྤི བྷིཀྑཱུ ཨོཝདནྟི ཨནུསཱསནྟི , ཨཔྤེཀཙྩེ ཐེརཱ བྷིཀྑཱུ ཏིཾསམྤི བྷིཀྑཱུ ཨོཝདནྟི ཨནུསཱསནྟི, ཨཔྤེཀཙྩེ ཐེརཱ བྷིཀྑཱུ ཙཏྟཱརཱིསམྤི བྷིཀྑཱུ ཨོཝདནྟི ཨནུསཱསནྟི། ཏེ ཙ ནཝཱ བྷིཀྑཱུ ཐེརེཧི བྷིཀྑཱུཧི ཨོཝདིཡམཱནཱ ཨནུསཱསིཡམཱནཱ ཨུལཱ༹རཾ པུབྦེནཱཔརཾ ཝིསེསཾ ཛཱནནྟི།
145. Tena kho pana samayena bhagavā tadahuposathe pannarase pavāraṇāya puṇṇāya puṇṇamāya rattiyā bhikkhusaṅghaparivuto abbhokāse nisinno hoti. Atha kho bhagavā tuṇhībhūtaṃ tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘āraddhosmi, bhikkhave, imāya paṭipadāya; āraddhacittosmi, bhikkhave, imāya paṭipadāya. Tasmātiha, bhikkhave, bhiyyosomattāya vīriyaṃ ārabhatha appattassa pattiyā, anadhigatassa adhigamāya , asacchikatassa sacchikiriyāya. Idhevāhaṃ sāvatthiyaṃ komudiṃ cātumāsiniṃ āgamessāmī’’ti. Assosuṃ kho jānapadā bhikkhū – ‘‘bhagavā kira tattheva sāvatthiyaṃ komudiṃ cātumāsiniṃ āgamessatī’’ti. Te jānapadā bhikkhū sāvatthiṃ 6 osaranti bhagavantaṃ dassanāya. Te ca kho therā bhikkhū bhiyyosomattāya nave bhikkhū ovadanti anusāsanti. Appekacce therā bhikkhū dasapi bhikkhū ovadanti anusāsanti, appekacce therā bhikkhū vīsampi bhikkhū ovadanti anusāsanti , appekacce therā bhikkhū tiṃsampi bhikkhū ovadanti anusāsanti, appekacce therā bhikkhū cattārīsampi bhikkhū ovadanti anusāsanti. Te ca navā bhikkhū therehi bhikkhūhi ovadiyamānā anusāsiyamānā uḷāraṃ pubbenāparaṃ visesaṃ jānanti.
༡༤༦. ཏེན ཁོ པན སམཡེན བྷགཝཱ ཏདཧུཔོསཐེ པནྣརསེ ཀོམུདིཡཱ ཙཱཏུམཱསིནིཡཱ པུཎྞཱཡ པུཎྞམཱཡ རཏྟིཡཱ བྷིཀྑུསངྒྷཔརིཝུཏོ ཨབྦྷོཀཱསེ ནིསིནྣོ ཧོཏི། ཨཐ ཁོ བྷགཝཱ ཏུཎྷཱིབྷཱུཏཾ ཏུཎྷཱིབྷཱུཏཾ བྷིཀྑུསངྒྷཾ ཨནུཝིལོཀེཏྭཱ བྷིཀྑཱུ ཨཱམནྟེསི – ‘‘ཨཔལཱཔཱཡཾ, བྷིཀྑཝེ, པརིསཱ; ནིཔྤལཱཔཱཡཾ, བྷིཀྑཝེ, པརིསཱ; སུདྡྷཱ སཱརེ 7 པཏིཊྛིཏཱ། ཏཐཱརཱུཔོ ཨཡཾ, བྷིཀྑཝེ, བྷིཀྑུསངྒྷོ; ཏཐཱརཱུཔཱ ཨཡཾ, བྷིཀྑཝེ, པརིསཱ ཡཐཱརཱུཔཱ པརིསཱ ཨཱཧུནེཡྻཱ པཱཧུནེཡྻཱ དཀྑིཎེཡྻཱ ཨཉྫལིཀརཎཱིཡཱ ཨནུཏྟརཾ པུཉྙཀྑེཏྟཾ ལོཀསྶ། ཏཐཱརཱུཔོ ཨཡཾ, བྷིཀྑཝེ, བྷིཀྑུསངྒྷོ; ཏཐཱརཱུཔཱ ཨཡཾ, བྷིཀྑཝེ, པརིསཱ ཡཐཱརཱུཔཱཡ པརིསཱཡ ཨཔྤཾ དིནྣཾ བཧུ ཧོཏི, བཧུ དིནྣཾ བཧུཏརཾ། ཏཐཱརཱུཔོ ཨཡཾ, བྷིཀྑཝེ, བྷིཀྑུསངྒྷོ; ཏཐཱརཱུཔཱ ཨཡཾ, བྷིཀྑཝེ, པརིསཱ ཡཐཱརཱུཔཱ པརིསཱ དུལླབྷཱ དསྶནཱཡ ལོཀསྶ། ཏཐཱརཱུཔོ ཨཡཾ, བྷིཀྑཝེ, བྷིཀྑུསངྒྷོ; ཏཐཱརཱུཔཱ ཨཡཾ, བྷིཀྑཝེ, པརིསཱ ཡཐཱརཱུཔཾ པརིསཾ ཨལཾ ཡོཛནགཎནཱནི དསྶནཱཡ གནྟུཾ པུཊོསེནཱཔི’’ 8།
146. Tena kho pana samayena bhagavā tadahuposathe pannarase komudiyā cātumāsiniyā puṇṇāya puṇṇamāya rattiyā bhikkhusaṅghaparivuto abbhokāse nisinno hoti. Atha kho bhagavā tuṇhībhūtaṃ tuṇhībhūtaṃ bhikkhusaṅghaṃ anuviloketvā bhikkhū āmantesi – ‘‘apalāpāyaṃ, bhikkhave, parisā; nippalāpāyaṃ, bhikkhave, parisā; suddhā sāre 9 patiṭṭhitā. Tathārūpo ayaṃ, bhikkhave, bhikkhusaṅgho; tathārūpā ayaṃ, bhikkhave, parisā yathārūpā parisā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassa. Tathārūpo ayaṃ, bhikkhave, bhikkhusaṅgho; tathārūpā ayaṃ, bhikkhave, parisā yathārūpāya parisāya appaṃ dinnaṃ bahu hoti, bahu dinnaṃ bahutaraṃ. Tathārūpo ayaṃ, bhikkhave, bhikkhusaṅgho; tathārūpā ayaṃ, bhikkhave, parisā yathārūpā parisā dullabhā dassanāya lokassa. Tathārūpo ayaṃ, bhikkhave, bhikkhusaṅgho; tathārūpā ayaṃ, bhikkhave, parisā yathārūpaṃ parisaṃ alaṃ yojanagaṇanāni dassanāya gantuṃ puṭosenāpi’’ 10.
༡༤༧. ‘‘སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ ཨརཧནྟོ ཁཱིཎཱསཝཱ ཝུསིཏཝནྟོ ཀཏཀརཎཱིཡཱ ཨོཧིཏབྷཱརཱ ཨནུཔྤཏྟསདཏྠཱ པརིཀྑཱིཎབྷཝསཾཡོཛནཱ སམྨདཉྙཱཝིམུཏྟཱ – ཨེཝརཱུཔཱཔི, བྷིཀྑཝེ, སནྟི བྷིཀྑཱུ ཨིམསྨིཾ བྷིཀྑུསངྒྷེ ། སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ ཨོཔཔཱཏིཀཱ ཏཏྠ པརིནིབྦཱཡིནོ ཨནཱཝཏྟིདྷམྨཱ ཏསྨཱ ལོཀཱ – ཨེཝརཱུཔཱཔི, བྷིཀྑཝེ, སནྟི བྷིཀྑཱུ ཨིམསྨིཾ བྷིཀྑུསངྒྷེ། སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ ཏིཎྞཾ སཾཡོཛནཱནཾ པརིཀྑཡཱ རཱགདོསམོཧཱནཾ ཏནུཏྟཱ སཀདཱགཱམིནོ སཀིདེཝ 11 ཨིམཾ ལོཀཾ ཨཱགནྟྭཱ དུཀྑསྶནྟཾ ཀརིསྶནྟི – ཨེཝརཱུཔཱཔི, བྷིཀྑཝེ, སནྟི བྷིཀྑཱུ ཨིམསྨིཾ བྷིཀྑུསངྒྷེ ། སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ ཏིཎྞཾ སཾཡོཛནཱནཾ པརིཀྑཡཱ སོཏཱཔནྣཱ ཨཝིནིཔཱཏདྷམྨཱ ནིཡཏཱ སམྦོདྷིཔརཱཡནཱ – ཨེཝརཱུཔཱཔི, བྷིཀྑཝེ, སནྟི བྷིཀྑཱུ ཨིམསྨིཾ བྷིཀྑུསངྒྷེ།
147. ‘‘Santi, bhikkhave, bhikkhū imasmiṃ bhikkhusaṅghe arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññāvimuttā – evarūpāpi, bhikkhave, santi bhikkhū imasmiṃ bhikkhusaṅghe . Santi, bhikkhave, bhikkhū imasmiṃ bhikkhusaṅghe pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā – evarūpāpi, bhikkhave, santi bhikkhū imasmiṃ bhikkhusaṅghe. Santi, bhikkhave, bhikkhū imasmiṃ bhikkhusaṅghe tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino sakideva 12 imaṃ lokaṃ āgantvā dukkhassantaṃ karissanti – evarūpāpi, bhikkhave, santi bhikkhū imasmiṃ bhikkhusaṅghe . Santi, bhikkhave, bhikkhū imasmiṃ bhikkhusaṅghe tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyanā – evarūpāpi, bhikkhave, santi bhikkhū imasmiṃ bhikkhusaṅghe.
‘‘སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ ཙཏུནྣཾ སཏིཔཊྛཱནཱནཾ བྷཱཝནཱནུཡོགམནུཡུཏྟཱ ཝིཧརནྟི – ཨེཝརཱུཔཱཔི, བྷིཀྑཝེ, སནྟི བྷིཀྑཱུ ཨིམསྨིཾ བྷིཀྑུསངྒྷེ། སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ ཙཏུནྣཾ སམྨཔྤདྷཱནཱནཾ བྷཱཝནཱནུཡོགམནུཡུཏྟཱ ཝིཧརནྟི…པེ॰… ཙཏུནྣཾ ཨིདྡྷིཔཱདཱནཾ… པཉྩནྣཾ ཨིནྡྲིཡཱནཾ… པཉྩནྣཾ བལཱནཾ… སཏྟནྣཾ བོཛ྄ཛྷངྒཱནཾ… ཨརིཡསྶ ཨཊྛངྒིཀསྶ མགྒསྶ བྷཱཝནཱནུཡོགམནུཡུཏྟཱ ཝིཧརནྟི – ཨེཝརཱུཔཱཔི, བྷིཀྑཝེ, སནྟི བྷིཀྑཱུ ཨིམསྨིཾ བྷིཀྑུསངྒྷེ། སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ མེཏྟཱབྷཱཝནཱནུཡོགམནུཡུཏྟཱ ཝིཧརནྟི… ཀརུཎཱབྷཱཝནཱནུཡོགམནུཡུཏྟཱ ཝིཧརནྟི… མུདིཏཱབྷཱཝནཱནུཡོགམནུཡུཏྟཱ ཝིཧརནྟི… ཨུཔེཀྑཱབྷཱཝནཱནུཡོགམནུཡུཏྟཱ ཝིཧརནྟི… ཨསུབྷབྷཱཝནཱནུཡོགམནུཡུཏྟཱ ཝིཧརནྟི… ཨནིཙྩསཉྙཱབྷཱཝནཱནུཡོགམནུཡུཏྟཱ ཝིཧརནྟི – ཨེཝརཱུཔཱཔི, བྷིཀྑཝེ, སནྟི བྷིཀྑཱུ ཨིམསྨིཾ བྷིཀྑུསངྒྷེ། སནྟི, བྷིཀྑཝེ, བྷིཀྑཱུ ཨིམསྨིཾ བྷིཀྑུསངྒྷེ ཨཱནཱཔཱནསྶཏིབྷཱཝནཱནུཡོགམནུཡུཏྟཱ ཝིཧརནྟི། ཨཱནཱཔཱནསྶཏི, བྷིཀྑཝེ, བྷཱཝིཏཱ བཧུལཱིཀཏཱ མཧཔྥལཱ ཧོཏི མཧཱནིསཾསཱ། ཨཱནཱཔཱནསྶཏི, བྷིཀྑཝེ, བྷཱཝིཏཱ བཧུལཱིཀཏཱ ཙཏྟཱརོ སཏིཔཊྛཱནེ པརིཔཱུརེཏི། ཙཏྟཱརོ སཏིཔཊྛཱནཱ བྷཱཝིཏཱ བཧུལཱིཀཏཱ སཏྟ བོཛ྄ཛྷངྒེ པརིཔཱུརེནྟི། སཏྟ བོཛ྄ཛྷངྒཱ བྷཱཝིཏཱ བཧུལཱིཀཏཱ ཝིཛྫཱཝིམུཏྟིཾ པརིཔཱུརེནྟི།
‘‘Santi, bhikkhave, bhikkhū imasmiṃ bhikkhusaṅghe catunnaṃ satipaṭṭhānānaṃ bhāvanānuyogamanuyuttā viharanti – evarūpāpi, bhikkhave, santi bhikkhū imasmiṃ bhikkhusaṅghe. Santi, bhikkhave, bhikkhū imasmiṃ bhikkhusaṅghe catunnaṃ sammappadhānānaṃ bhāvanānuyogamanuyuttā viharanti…pe… catunnaṃ iddhipādānaṃ… pañcannaṃ indriyānaṃ… pañcannaṃ balānaṃ… sattannaṃ bojjhaṅgānaṃ… ariyassa aṭṭhaṅgikassa maggassa bhāvanānuyogamanuyuttā viharanti – evarūpāpi, bhikkhave, santi bhikkhū imasmiṃ bhikkhusaṅghe. Santi, bhikkhave, bhikkhū imasmiṃ bhikkhusaṅghe mettābhāvanānuyogamanuyuttā viharanti… karuṇābhāvanānuyogamanuyuttā viharanti… muditābhāvanānuyogamanuyuttā viharanti… upekkhābhāvanānuyogamanuyuttā viharanti… asubhabhāvanānuyogamanuyuttā viharanti… aniccasaññābhāvanānuyogamanuyuttā viharanti – evarūpāpi, bhikkhave, santi bhikkhū imasmiṃ bhikkhusaṅghe. Santi, bhikkhave, bhikkhū imasmiṃ bhikkhusaṅghe ānāpānassatibhāvanānuyogamanuyuttā viharanti. Ānāpānassati, bhikkhave, bhāvitā bahulīkatā mahapphalā hoti mahānisaṃsā. Ānāpānassati, bhikkhave, bhāvitā bahulīkatā cattāro satipaṭṭhāne paripūreti. Cattāro satipaṭṭhānā bhāvitā bahulīkatā satta bojjhaṅge paripūrenti. Satta bojjhaṅgā bhāvitā bahulīkatā vijjāvimuttiṃ paripūrenti.
༡༤༨. ‘‘ཀཐཾ བྷཱཝིཏཱ ཙ, བྷིཀྑཝེ, ཨཱནཱཔཱནསྶཏི ཀཐཾ བཧུལཱིཀཏཱ མཧཔྥལཱ ཧོཏི མཧཱནིསཾསཱ? ཨིདྷ, བྷིཀྑཝེ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ནིསཱིདཏི པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ པརིམུཁཾ སཏིཾ ཨུཔཊྛཔེཏྭཱ། སོ སཏོཝ ཨསྶསཏི སཏོཝ 13 པསྶསཏི།
148. ‘‘Kathaṃ bhāvitā ca, bhikkhave, ānāpānassati kathaṃ bahulīkatā mahapphalā hoti mahānisaṃsā? Idha, bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So satova assasati satova 14 passasati.
‘‘དཱིགྷཾ ཝཱ ཨསྶསནྟོ ‘དཱིགྷཾ ཨསྶསཱམཱི’ཏི པཛཱནཱཏི, དཱིགྷཾ ཝཱ པསྶསནྟོ ‘དཱིགྷཾ པསྶསཱམཱི’ཏི པཛཱནཱཏི; རསྶཾ ཝཱ ཨསྶསནྟོ ‘རསྶཾ ཨསྶསཱམཱི’ཏི པཛཱནཱཏི, རསྶཾ ཝཱ པསྶསནྟོ ‘རསྶཾ པསྶསཱམཱི’ཏི པཛཱནཱཏི; ‘སབྦཀཱཡཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘སབྦཀཱཡཔཊིསཾཝེདཱི པསྶསིསྶཱམཱི’ཏི སིཀྑཏི; ‘པསྶམྦྷཡཾ ཀཱཡསངྑཱརཾ ཨསྶསིསྶཱམཱི’ཏི སིཀྑཏི, ‘པསྶམྦྷཡཾ ཀཱཡསངྑཱརཾ པསྶསིསྶཱམཱི’ཏི སིཀྑཏི།
‘‘Dīghaṃ vā assasanto ‘dīghaṃ assasāmī’ti pajānāti, dīghaṃ vā passasanto ‘dīghaṃ passasāmī’ti pajānāti; rassaṃ vā assasanto ‘rassaṃ assasāmī’ti pajānāti, rassaṃ vā passasanto ‘rassaṃ passasāmī’ti pajānāti; ‘sabbakāyapaṭisaṃvedī assasissāmī’ti sikkhati, ‘sabbakāyapaṭisaṃvedī passasissāmī’ti sikkhati; ‘passambhayaṃ kāyasaṅkhāraṃ assasissāmī’ti sikkhati, ‘passambhayaṃ kāyasaṅkhāraṃ passasissāmī’ti sikkhati.
‘‘‘པཱིཏིཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘པཱིཏིཔཊིསཾཝེདཱི པསྶསིསྶཱམཱི’ཏི སིཀྑཏི; ‘སུཁཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘སུཁཔཊིསཾཝེདཱི པསྶསིསྶཱམཱི’ཏི སིཀྑཏི; ‘ཙིཏྟསངྑཱརཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘ཙིཏྟསངྑཱརཔཊིསཾཝེདཱི པསྶསིསྶཱམཱི’ཏི སིཀྑཏི; ‘པསྶམྦྷཡཾ ཙིཏྟསངྑཱརཾ ཨསྶསིསྶཱམཱི’ཏི སིཀྑཏི, ‘པསྶམྦྷཡཾ ཙིཏྟསངྑཱརཾ པསྶསིསྶཱམཱི’ཏི སིཀྑཏི།
‘‘‘Pītipaṭisaṃvedī assasissāmī’ti sikkhati, ‘pītipaṭisaṃvedī passasissāmī’ti sikkhati; ‘sukhapaṭisaṃvedī assasissāmī’ti sikkhati, ‘sukhapaṭisaṃvedī passasissāmī’ti sikkhati; ‘cittasaṅkhārapaṭisaṃvedī assasissāmī’ti sikkhati, ‘cittasaṅkhārapaṭisaṃvedī passasissāmī’ti sikkhati; ‘passambhayaṃ cittasaṅkhāraṃ assasissāmī’ti sikkhati, ‘passambhayaṃ cittasaṅkhāraṃ passasissāmī’ti sikkhati.
‘‘‘ཙིཏྟཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘ཙིཏྟཔཊིསཾཝེདཱི པསྶསིསྶཱམཱི’ཏི སིཀྑཏི; ‘ཨབྷིཔྤམོདཡཾ ཙིཏྟཾ ཨསྶསིསྶཱམཱི’ཏི སིཀྑཏི, ‘ཨབྷིཔྤམོདཡཾ ཙིཏྟཾ པསྶསིསྶཱམཱི’ཏི སིཀྑཏི ; ‘སམཱདཧཾ ཙིཏྟཾ ཨསྶསིསྶཱམཱི’ཏི སིཀྑཏི, ‘སམཱདཧཾ ཙིཏྟཾ པསྶསིསྶཱམཱི’ཏི སིཀྑཏི; ‘ཝིམོཙཡཾ ཙིཏྟཾ ཨསྶསིསྶཱམཱི’ཏི སིཀྑཏི, ‘ཝིམོཙཡཾ ཙིཏྟཾ པསྶསིསྶཱམཱི’ཏི སིཀྑཏི།
‘‘‘Cittapaṭisaṃvedī assasissāmī’ti sikkhati, ‘cittapaṭisaṃvedī passasissāmī’ti sikkhati; ‘abhippamodayaṃ cittaṃ assasissāmī’ti sikkhati, ‘abhippamodayaṃ cittaṃ passasissāmī’ti sikkhati ; ‘samādahaṃ cittaṃ assasissāmī’ti sikkhati, ‘samādahaṃ cittaṃ passasissāmī’ti sikkhati; ‘vimocayaṃ cittaṃ assasissāmī’ti sikkhati, ‘vimocayaṃ cittaṃ passasissāmī’ti sikkhati.
‘‘‘ཨནིཙྩཱནུཔསྶཱི ཨསྶསིསྶཱམཱི’ཏི སིཀྑཏི, ‘ཨནིཙྩཱནུཔསྶཱི པསྶསིསྶཱམཱི’ཏི སིཀྑཏི; ‘ཝིརཱགཱནུཔསྶཱི ཨསྶསིསྶཱམཱི’ཏི སིཀྑཏི, ‘ཝིརཱགཱནུཔསྶཱི པསྶསིསྶཱམཱི’ཏི སིཀྑཏི; ‘ནིརོདྷཱནུཔསྶཱི ཨསྶསིསྶཱམཱི’ཏི སིཀྑཏི, ‘ནིརོདྷཱནུཔསྶཱི པསྶསིསྶཱམཱི’ཏི སིཀྑཏི; ‘པཊིནིསྶགྒཱནུཔསྶཱི ཨསྶསིསྶཱམཱི’ཏི སིཀྑཏི, ‘པཊིནིསྶགྒཱནུཔསྶཱི པསྶསིསྶཱམཱི’ཏི སིཀྑཏི། ཨེཝཾ བྷཱཝིཏཱ ཁོ, བྷིཀྑཝེ, ཨཱནཱཔཱནསྶཏི ཨེཝཾ བཧུལཱིཀཏཱ མཧཔྥལཱ ཧོཏི མཧཱནིསཾསཱ།
‘‘‘Aniccānupassī assasissāmī’ti sikkhati, ‘aniccānupassī passasissāmī’ti sikkhati; ‘virāgānupassī assasissāmī’ti sikkhati, ‘virāgānupassī passasissāmī’ti sikkhati; ‘nirodhānupassī assasissāmī’ti sikkhati, ‘nirodhānupassī passasissāmī’ti sikkhati; ‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati. Evaṃ bhāvitā kho, bhikkhave, ānāpānassati evaṃ bahulīkatā mahapphalā hoti mahānisaṃsā.
༡༤༩. ‘‘ཀཐཾ བྷཱཝིཏཱ ཙ, བྷིཀྑཝེ, ཨཱནཱཔཱནསྶཏི ཀཐཾ བཧུལཱིཀཏཱ ཙཏྟཱརོ སཏིཔཊྛཱནེ པརིཔཱུརེཏི? ཡསྨིཾ སམཡེ, བྷིཀྑཝེ, བྷིཀྑུ དཱིགྷཾ ཝཱ ཨསྶསནྟོ ‘དཱིགྷཾ ཨསྶསཱམཱི’ཏི པཛཱནཱཏི, དཱིགྷཾ ཝཱ པསྶསནྟོ ‘དཱིགྷཾ པསྶསཱམཱི’ཏི པཛཱནཱཏི; རསྶཾ ཝཱ ཨསྶསནྟོ ‘རསྶཾ ཨསྶསཱམཱི’ཏི པཛཱནཱཏི, རསྶཾ ཝཱ པསྶསནྟོ ‘རསྶཾ པསྶསཱམཱི’ཏི པཛཱནཱཏི; ‘སབྦཀཱཡཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘སབྦཀཱཡཔཊིསཾཝེདཱི པསྶསིསྶཱམཱི’ཏི སིཀྑཏི; ‘པསྶམྦྷཡཾ ཀཱཡསངྑཱརཾ ཨསྶསིསྶཱམཱི’ཏི སིཀྑཏི, ‘པསྶམྦྷཡཾ ཀཱཡསངྑཱརཾ པསྶསིསྶཱམཱི’ཏི སིཀྑཏི; ཀཱཡེ ཀཱཡཱནུཔསྶཱི, བྷིཀྑཝེ, ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ། ཀཱཡེསུ ཀཱཡཉྙཏརཱཧཾ, བྷིཀྑཝེ, ཨེཝཾ ཝདཱམི ཡདིདཾ – ཨསྶཱསཔསྶཱསཱ། ཏསྨཱཏིཧ, བྷིཀྑཝེ, ཀཱཡེ ཀཱཡཱནུཔསྶཱི ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ།
149. ‘‘Kathaṃ bhāvitā ca, bhikkhave, ānāpānassati kathaṃ bahulīkatā cattāro satipaṭṭhāne paripūreti? Yasmiṃ samaye, bhikkhave, bhikkhu dīghaṃ vā assasanto ‘dīghaṃ assasāmī’ti pajānāti, dīghaṃ vā passasanto ‘dīghaṃ passasāmī’ti pajānāti; rassaṃ vā assasanto ‘rassaṃ assasāmī’ti pajānāti, rassaṃ vā passasanto ‘rassaṃ passasāmī’ti pajānāti; ‘sabbakāyapaṭisaṃvedī assasissāmī’ti sikkhati, ‘sabbakāyapaṭisaṃvedī passasissāmī’ti sikkhati; ‘passambhayaṃ kāyasaṅkhāraṃ assasissāmī’ti sikkhati, ‘passambhayaṃ kāyasaṅkhāraṃ passasissāmī’ti sikkhati; kāye kāyānupassī, bhikkhave, tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ. Kāyesu kāyaññatarāhaṃ, bhikkhave, evaṃ vadāmi yadidaṃ – assāsapassāsā. Tasmātiha, bhikkhave, kāye kāyānupassī tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ.
‘‘ཡསྨིཾ སམཡེ, བྷིཀྑཝེ, བྷིཀྑུ ‘པཱིཏིཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘པཱིཏིཔཊིསཾཝེདཱི པསྶསིསྶཱམཱི’ཏི སིཀྑཏི; ‘སུཁཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘སུཁཔཊིསཾཝེདཱི པསྶསིསྶཱམཱི’ཏི སིཀྑཏི; ‘ཙིཏྟསངྑཱརཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘ཙིཏྟསངྑཱརཔཊིསཾཝེདཱི པསྶསིསྶཱམཱི’ཏི སིཀྑཏི; ‘པསྶམྦྷཡཾ ཙིཏྟསངྑཱརཾ ཨསྶསིསྶཱམཱི’ཏི སིཀྑཏི, ‘པསྶམྦྷཡཾ ཙིཏྟསངྑཱརཾ པསྶསིསྶཱམཱི’ཏི སིཀྑཏི; ཝེདནཱསུ ཝེདནཱནུཔསྶཱི, བྷིཀྑཝེ, ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ། ཝེདནཱསུ ཝེདནཱཉྙཏརཱཧཾ, བྷིཀྑཝེ, ཨེཝཾ ཝདཱམི ཡདིདཾ – ཨསྶཱསཔསྶཱསཱནཾ སཱདྷུཀཾ མནསིཀཱརཾ། ཏསྨཱཏིཧ, བྷིཀྑཝེ, ཝེདནཱསུ ཝེདནཱནུཔསྶཱི ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ།
‘‘Yasmiṃ samaye, bhikkhave, bhikkhu ‘pītipaṭisaṃvedī assasissāmī’ti sikkhati, ‘pītipaṭisaṃvedī passasissāmī’ti sikkhati; ‘sukhapaṭisaṃvedī assasissāmī’ti sikkhati, ‘sukhapaṭisaṃvedī passasissāmī’ti sikkhati; ‘cittasaṅkhārapaṭisaṃvedī assasissāmī’ti sikkhati, ‘cittasaṅkhārapaṭisaṃvedī passasissāmī’ti sikkhati; ‘passambhayaṃ cittasaṅkhāraṃ assasissāmī’ti sikkhati, ‘passambhayaṃ cittasaṅkhāraṃ passasissāmī’ti sikkhati; vedanāsu vedanānupassī, bhikkhave, tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ. Vedanāsu vedanāññatarāhaṃ, bhikkhave, evaṃ vadāmi yadidaṃ – assāsapassāsānaṃ sādhukaṃ manasikāraṃ. Tasmātiha, bhikkhave, vedanāsu vedanānupassī tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ.
‘‘ཡསྨིཾ སམཡེ, བྷིཀྑཝེ, བྷིཀྑུ ‘ཙིཏྟཔཊིསཾཝེདཱི ཨསྶསིསྶཱམཱི’ཏི སིཀྑཏི, ‘ཙིཏྟཔཊིསཾཝེདཱི པསྶསིསྶཱམཱི’ཏི སིཀྑཏི; ‘ཨབྷིཔྤམོདཡཾ ཙིཏྟཾ ཨསྶསིསྶཱམཱི’ཏི སིཀྑཏི, ‘ཨབྷིཔྤམོདཡཾ ཙིཏྟཾ པསྶསིསྶཱམཱི’ཏི སིཀྑཏི; ‘སམཱདཧཾ ཙིཏྟཾ ཨསྶསིསྶཱམཱི’ཏི སིཀྑཏི, ‘སམཱདཧཾ ཙིཏྟཾ པསྶསིསྶཱམཱི’ཏི སིཀྑཏི; ‘ཝིམོཙཡཾ ཙིཏྟཾ ཨསྶསིསྶཱམཱི’ཏི སིཀྑཏི, ‘ཝིམོཙཡཾ ཙིཏྟཾ པསྶསིསྶཱམཱི’ཏི སིཀྑཏི; ཙིཏྟེ ཙིཏྟཱནུཔསྶཱི, བྷིཀྑཝེ, ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ། ནཱཧཾ, བྷིཀྑཝེ, མུཊྛསྶཏིསྶ ཨསམྤཛཱནསྶ ཨཱནཱཔཱནསྶཏིཾ ཝདཱམི། ཏསྨཱཏིཧ, བྷིཀྑཝེ, ཙིཏྟེ ཙིཏྟཱནུཔསྶཱི ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ།
‘‘Yasmiṃ samaye, bhikkhave, bhikkhu ‘cittapaṭisaṃvedī assasissāmī’ti sikkhati, ‘cittapaṭisaṃvedī passasissāmī’ti sikkhati; ‘abhippamodayaṃ cittaṃ assasissāmī’ti sikkhati, ‘abhippamodayaṃ cittaṃ passasissāmī’ti sikkhati; ‘samādahaṃ cittaṃ assasissāmī’ti sikkhati, ‘samādahaṃ cittaṃ passasissāmī’ti sikkhati; ‘vimocayaṃ cittaṃ assasissāmī’ti sikkhati, ‘vimocayaṃ cittaṃ passasissāmī’ti sikkhati; citte cittānupassī, bhikkhave, tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ. Nāhaṃ, bhikkhave, muṭṭhassatissa asampajānassa ānāpānassatiṃ vadāmi. Tasmātiha, bhikkhave, citte cittānupassī tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ.
‘‘ཡསྨིཾ སམཡེ, བྷིཀྑཝེ, བྷིཀྑུ ‘ཨནིཙྩཱནུཔསྶཱི ཨསྶསིསྶཱམཱི’ཏི སིཀྑཏི, ‘ཨནིཙྩཱནུཔསྶཱི པསྶསིསྶཱམཱི’ཏི སིཀྑཏི; ‘ཝིརཱགཱནུཔསྶཱི ཨསྶསིསྶཱམཱི’ཏི སིཀྑཏི, ‘ཝིརཱགཱནུཔསྶཱི པསྶསིསྶཱམཱི’ཏི སིཀྑཏི; ‘ནིརོདྷཱནུཔསྶཱི ཨསྶསིསྶཱམཱི’ཏི སིཀྑཏི, ‘ནིརོདྷཱནུཔསྶཱི པསྶསིསྶཱམཱི’ཏི སིཀྑཏི; ‘པཊིནིསྶགྒཱནུཔསྶཱི ཨསྶསིསྶཱམཱི’ཏི སིཀྑཏི, ‘པཊིནིསྶགྒཱནུཔསྶཱི པསྶསིསྶཱམཱི’ཏི སིཀྑཏི; དྷམྨེསུ དྷམྨཱནུཔསྶཱི, བྷིཀྑཝེ, ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ། སོ ཡཾ ཏཾ ཨབྷིཛ྄ཛྷཱདོམནསྶཱནཾ པཧཱནཾ ཏཾ པཉྙཱཡ དིསྭཱ སཱདྷུཀཾ ཨཛ྄ཛྷུཔེཀྑིཏཱ ཧོཏི། ཏསྨཱཏིཧ, བྷིཀྑཝེ, དྷམྨེསུ དྷམྨཱནུཔསྶཱི ཏསྨིཾ སམཡེ བྷིཀྑུ ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ།
‘‘Yasmiṃ samaye, bhikkhave, bhikkhu ‘aniccānupassī assasissāmī’ti sikkhati, ‘aniccānupassī passasissāmī’ti sikkhati; ‘virāgānupassī assasissāmī’ti sikkhati, ‘virāgānupassī passasissāmī’ti sikkhati; ‘nirodhānupassī assasissāmī’ti sikkhati, ‘nirodhānupassī passasissāmī’ti sikkhati; ‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati; dhammesu dhammānupassī, bhikkhave, tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ. So yaṃ taṃ abhijjhādomanassānaṃ pahānaṃ taṃ paññāya disvā sādhukaṃ ajjhupekkhitā hoti. Tasmātiha, bhikkhave, dhammesu dhammānupassī tasmiṃ samaye bhikkhu viharati ātāpī sampajāno satimā vineyya loke abhijjhādomanassaṃ.
‘‘ཨེཝཾ བྷཱཝིཏཱ ཁོ, བྷིཀྑཝེ, ཨཱནཱཔཱནསྶཏི ཨེཝཾ བཧུལཱིཀཏཱ ཙཏྟཱརོ སཏིཔཊྛཱནེ པརིཔཱུརེཏི།
‘‘Evaṃ bhāvitā kho, bhikkhave, ānāpānassati evaṃ bahulīkatā cattāro satipaṭṭhāne paripūreti.
༡༥༠. ‘‘ཀཐཾ བྷཱཝིཏཱ ཙ, བྷིཀྑཝེ, ཙཏྟཱརོ སཏིཔཊྛཱནཱ ཀཐཾ བཧུལཱིཀཏཱ སཏྟ བོཛ྄ཛྷངྒེ པརིཔཱུརེནྟི? ཡསྨིཾ སམཡེ, བྷིཀྑཝེ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, ཨུཔཊྛིཏཱསྶ ཏསྨིཾ སམཡེ སཏི ཧོཏི ཨསམྨུཊྛཱ 15། ཡསྨིཾ སམཡེ, བྷིཀྑཝེ, བྷིཀྑུནོ ཨུཔཊྛིཏཱ སཏི ཧོཏི ཨསམྨུཊྛཱ, སཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི། སཏིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, སཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
150. ‘‘Kathaṃ bhāvitā ca, bhikkhave, cattāro satipaṭṭhānā kathaṃ bahulīkatā satta bojjhaṅge paripūrenti? Yasmiṃ samaye, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ, upaṭṭhitāssa tasmiṃ samaye sati hoti asammuṭṭhā 16. Yasmiṃ samaye, bhikkhave, bhikkhuno upaṭṭhitā sati hoti asammuṭṭhā, satisambojjhaṅgo tasmiṃ samaye bhikkhuno āraddho hoti. Satisambojjhaṅgaṃ tasmiṃ samaye bhikkhu bhāveti, satisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘སོ ཏཐཱསཏོ ཝིཧརནྟོ ཏཾ དྷམྨཾ པཉྙཱཡ པཝིཙིནཏི པཝིཙཡཏི 17 པརིཝཱིམཾསཾ ཨཱཔཛྫཏི། ཡསྨིཾ སམཡེ, བྷིཀྑཝེ, བྷིཀྑུ ཏཐཱསཏོ ཝིཧརནྟོ ཏཾ དྷམྨཾ པཉྙཱཡ པཝིཙིནཏི པཝིཙཡཏི པརིཝཱིམཾསཾ ཨཱཔཛྫཏི, དྷམྨཝིཙཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, དྷམྨཝིཙཡསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, དྷམྨཝིཙཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘So tathāsato viharanto taṃ dhammaṃ paññāya pavicinati pavicayati 18 parivīmaṃsaṃ āpajjati. Yasmiṃ samaye, bhikkhave, bhikkhu tathāsato viharanto taṃ dhammaṃ paññāya pavicinati pavicayati parivīmaṃsaṃ āpajjati, dhammavicayasambojjhaṅgo tasmiṃ samaye bhikkhuno āraddho hoti, dhammavicayasambojjhaṅgaṃ tasmiṃ samaye bhikkhu bhāveti, dhammavicayasambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘ཏསྶ ཏཾ དྷམྨཾ པཉྙཱཡ པཝིཙིནཏོ པཝིཙཡཏོ པརིཝཱིམཾསཾ ཨཱཔཛྫཏོ ཨཱརདྡྷཾ ཧོཏི ཝཱིརིཡཾ ཨསལླཱིནཾ། ཡསྨིཾ སམཡེ, བྷིཀྑཝེ, བྷིཀྑུནོ ཏཾ དྷམྨཾ པཉྙཱཡ པཝིཙིནཏོ པཝིཙཡཏོ པརིཝཱིམཾསཾ ཨཱཔཛྫཏོ ཨཱརདྡྷཾ ཧོཏི ཝཱིརིཡཾ ཨསལླཱིནཾ, ཝཱིརིཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, ཝཱིརིཡསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, ཝཱིརིཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Tassa taṃ dhammaṃ paññāya pavicinato pavicayato parivīmaṃsaṃ āpajjato āraddhaṃ hoti vīriyaṃ asallīnaṃ. Yasmiṃ samaye, bhikkhave, bhikkhuno taṃ dhammaṃ paññāya pavicinato pavicayato parivīmaṃsaṃ āpajjato āraddhaṃ hoti vīriyaṃ asallīnaṃ, vīriyasambojjhaṅgo tasmiṃ samaye bhikkhuno āraddho hoti, vīriyasambojjhaṅgaṃ tasmiṃ samaye bhikkhu bhāveti, vīriyasambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘ཨཱརདྡྷཝཱིརིཡསྶ ཨུཔྤཛྫཏི པཱིཏི ནིརཱམིསཱ། ཡསྨིཾ སམཡེ, བྷིཀྑཝེ, བྷིཀྑུནོ ཨཱརདྡྷཝཱིརིཡསྶ ཨུཔྤཛྫཏི པཱིཏི ནིརཱམིསཱ, པཱིཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, པཱིཏིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, པཱིཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Āraddhavīriyassa uppajjati pīti nirāmisā. Yasmiṃ samaye, bhikkhave, bhikkhuno āraddhavīriyassa uppajjati pīti nirāmisā, pītisambojjhaṅgo tasmiṃ samaye bhikkhuno āraddho hoti, pītisambojjhaṅgaṃ tasmiṃ samaye bhikkhu bhāveti, pītisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘པཱིཏིམནསྶ ཀཱཡོཔི པསྶམྦྷཏི, ཙིཏྟམྤི པསྶམྦྷཏི། ཡསྨིཾ སམཡེ, བྷིཀྑཝེ, བྷིཀྑུནོ པཱིཏིམནསྶ ཀཱཡོཔི པསྶམྦྷཏི, ཙིཏྟམྤི པསྶམྦྷཏི, པསྶདྡྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, པསྶདྡྷིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, པསྶདྡྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Pītimanassa kāyopi passambhati, cittampi passambhati. Yasmiṃ samaye, bhikkhave, bhikkhuno pītimanassa kāyopi passambhati, cittampi passambhati, passaddhisambojjhaṅgo tasmiṃ samaye bhikkhuno āraddho hoti, passaddhisambojjhaṅgaṃ tasmiṃ samaye bhikkhu bhāveti, passaddhisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘པསྶདྡྷཀཱཡསྶ སུཁིནོ ཙིཏྟཾ སམཱདྷིཡཏི། ཡསྨིཾ སམཡེ, བྷིཀྑཝེ, བྷིཀྑུནོ པསྶདྡྷཀཱཡསྶ སུཁིནོ ཙིཏྟཾ སམཱདྷིཡཏི, སམཱདྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, སམཱདྷིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, སམཱདྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Passaddhakāyassa sukhino cittaṃ samādhiyati. Yasmiṃ samaye, bhikkhave, bhikkhuno passaddhakāyassa sukhino cittaṃ samādhiyati, samādhisambojjhaṅgo tasmiṃ samaye bhikkhuno āraddho hoti, samādhisambojjhaṅgaṃ tasmiṃ samaye bhikkhu bhāveti, samādhisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘སོ ཏཐཱསམཱཧིཏཾ ཙིཏྟཾ སཱདྷུཀཾ ཨཛ྄ཛྷུཔེཀྑིཏཱ ཧོཏི། ཡསྨིཾ སམཡེ, བྷིཀྑཝེ, བྷིཀྑུ ཏཐཱསམཱཧིཏཾ ཙིཏྟཾ སཱདྷུཀཾ ཨཛ྄ཛྷུཔེཀྑིཏཱ ཧོཏི, ཨུཔེཀྑཱསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, ཨུཔེཀྑཱསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, ཨུཔེཀྑཱསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘So tathāsamāhitaṃ cittaṃ sādhukaṃ ajjhupekkhitā hoti. Yasmiṃ samaye, bhikkhave, bhikkhu tathāsamāhitaṃ cittaṃ sādhukaṃ ajjhupekkhitā hoti, upekkhāsambojjhaṅgo tasmiṃ samaye bhikkhuno āraddho hoti, upekkhāsambojjhaṅgaṃ tasmiṃ samaye bhikkhu bhāveti, upekkhāsambojjhaṅgo tasmiṃ samaye bhikkhuno bhāvanāpāripūriṃ gacchati.
༡༥༡. ‘‘ཡསྨིཾ སམཡེ, བྷིཀྑཝེ, བྷིཀྑུ ཝེདནཱསུ…པེ॰… ཙིཏྟེ… དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, ཨུཔཊྛིཏཱསྶ ཏསྨིཾ སམཡེ སཏི ཧོཏི ཨསམྨུཊྛཱ། ཡསྨིཾ སམཡེ, བྷིཀྑཝེ, བྷིཀྑུནོ ཨུཔཊྛིཏཱ སཏི ཧོཏི ཨསམྨུཊྛཱ, སཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, སཏིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, སཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
151. ‘‘Yasmiṃ samaye, bhikkhave, bhikkhu vedanāsu…pe… citte… dhammesu dhammānupassī viharati ātāpī sampajāno satimā vineyya loke abhijjhādomanassaṃ, upaṭṭhitāssa tasmiṃ samaye sati hoti asammuṭṭhā. Yasmiṃ samaye, bhikkhave, bhikkhuno upaṭṭhitā sati hoti asammuṭṭhā, satisambojjhaṅgo tasmiṃ samaye bhikkhuno āraddho hoti, satisambojjhaṅgaṃ tasmiṃ samaye bhikkhu bhāveti, satisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘སོ ཏཐཱསཏོ ཝིཧརནྟོ ཏཾ དྷམྨཾ པཉྙཱཡ པཝིཙིནཏི པཝིཙཡཏི པརིཝཱིམཾསཾ ཨཱཔཛྫཏི། ཡསྨིཾ སམཡེ, བྷིཀྑཝེ, བྷིཀྑུ ཏཐཱསཏོ ཝིཧརནྟོ ཏཾ དྷམྨཾ པཉྙཱཡ པཝིཙིནཏི པཝིཙཡཏི པརིཝཱིམཾསཾ ཨཱཔཛྫཏི, དྷམྨཝིཙཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, དྷམྨཝིཙཡསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, དྷམྨཝིཙཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘So tathāsato viharanto taṃ dhammaṃ paññāya pavicinati pavicayati parivīmaṃsaṃ āpajjati. Yasmiṃ samaye, bhikkhave, bhikkhu tathāsato viharanto taṃ dhammaṃ paññāya pavicinati pavicayati parivīmaṃsaṃ āpajjati, dhammavicayasambojjhaṅgo tasmiṃ samaye bhikkhuno āraddho hoti, dhammavicayasambojjhaṅgaṃ tasmiṃ samaye bhikkhu bhāveti, dhammavicayasambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘ཏསྶ ཏཾ དྷམྨཾ པཉྙཱཡ པཝིཙིནཏོ པཝིཙཡཏོ པརིཝཱིམཾསཾ ཨཱཔཛྫཏོ ཨཱརདྡྷཾ ཧོཏི ཝཱིརིཡཾ ཨསལླཱིནཾ། ཡསྨིཾ སམཡེ, བྷིཀྑཝེ, བྷིཀྑུནོ ཏཾ དྷམྨཾ པཉྙཱཡ པཝིཙིནཏོ པཝིཙཡཏོ པརིཝཱིམཾསཾ ཨཱཔཛྫཏོ ཨཱརདྡྷཾ ཧོཏི ཝཱིརིཡཾ ཨསལླཱིནཾ, ཝཱིརིཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, ཝཱིརིཡསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, ཝཱིརིཡསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Tassa taṃ dhammaṃ paññāya pavicinato pavicayato parivīmaṃsaṃ āpajjato āraddhaṃ hoti vīriyaṃ asallīnaṃ. Yasmiṃ samaye, bhikkhave, bhikkhuno taṃ dhammaṃ paññāya pavicinato pavicayato parivīmaṃsaṃ āpajjato āraddhaṃ hoti vīriyaṃ asallīnaṃ, vīriyasambojjhaṅgo tasmiṃ samaye bhikkhuno āraddho hoti, vīriyasambojjhaṅgaṃ tasmiṃ samaye bhikkhu bhāveti, vīriyasambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘ཨཱརདྡྷཝཱིརིཡསྶ ཨུཔྤཛྫཏི པཱིཏི ནིརཱམིསཱ། ཡསྨིཾ སམཡེ, བྷིཀྑཝེ, བྷིཀྑུནོ ཨཱརདྡྷཝཱིརིཡསྶ ཨུཔྤཛྫཏི པཱིཏི ནིརཱམིསཱ, པཱིཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, པཱིཏིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, པཱིཏིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Āraddhavīriyassa uppajjati pīti nirāmisā. Yasmiṃ samaye, bhikkhave, bhikkhuno āraddhavīriyassa uppajjati pīti nirāmisā, pītisambojjhaṅgo tasmiṃ samaye bhikkhuno āraddho hoti, pītisambojjhaṅgaṃ tasmiṃ samaye bhikkhu bhāveti, pītisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘པཱིཏིམནསྶ ཀཱཡོཔི པསྶམྦྷཏི, ཙིཏྟམྤི པསྶམྦྷཏི། ཡསྨིཾ སམཡེ, བྷིཀྑཝེ, བྷིཀྑུནོ པཱིཏིམནསྶ ཀཱཡོཔི པསྶམྦྷཏི, ཙིཏྟམྤི པསྶམྦྷཏི, པསྶདྡྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, པསྶདྡྷིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, པསྶདྡྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Pītimanassa kāyopi passambhati, cittampi passambhati. Yasmiṃ samaye, bhikkhave, bhikkhuno pītimanassa kāyopi passambhati, cittampi passambhati, passaddhisambojjhaṅgo tasmiṃ samaye bhikkhuno āraddho hoti, passaddhisambojjhaṅgaṃ tasmiṃ samaye bhikkhu bhāveti, passaddhisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘པསྶདྡྷཀཱཡསྶ སུཁིནོ ཙིཏྟཾ སམཱདྷིཡཏི། ཡསྨིཾ སམཡེ, བྷིཀྑཝེ, བྷིཀྑུནོ པསྶདྡྷཀཱཡསྶ སུཁིནོ ཙིཏྟཾ སམཱདྷིཡཏི, སམཱདྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, སམཱདྷིསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, སམཱདྷིསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི།
‘‘Passaddhakāyassa sukhino cittaṃ samādhiyati. Yasmiṃ samaye, bhikkhave, bhikkhuno passaddhakāyassa sukhino cittaṃ samādhiyati, samādhisambojjhaṅgo tasmiṃ samaye bhikkhuno āraddho hoti, samādhisambojjhaṅgaṃ tasmiṃ samaye bhikkhu bhāveti, samādhisambojjhaṅgo tasmiṃ samaye bhikkhuno bhāvanāpāripūriṃ gacchati.
‘‘སོ ཏཐཱསམཱཧིཏཾ ཙིཏྟཾ སཱདྷུཀཾ ཨཛ྄ཛྷུཔེཀྑིཏཱ ཧོཏི། ཡསྨིཾ སམཡེ, བྷིཀྑཝེ, བྷིཀྑུ ཏཐཱསམཱཧིཏཾ ཙིཏྟཾ སཱདྷུཀཾ ཨཛ྄ཛྷུཔེཀྑིཏཱ ཧོཏི, ཨུཔེཀྑཱསམྦོཛ྄ཛྷངྒོ ཏསྨིཾ སམཡེ བྷིཀྑུནོ ཨཱརདྡྷོ ཧོཏི, ཨུཔེཀྑཱསམྦོཛ྄ཛྷངྒཾ ཏསྨིཾ སམཡེ བྷིཀྑུ བྷཱཝེཏི, ཨུཔེཀྑཱསམྦོཛ྄ཛྷངྒོ ཏསྨིཾ སམཡེ བྷིཀྑུནོ བྷཱཝནཱཔཱརིཔཱུརིཾ གཙྪཏི། ཨེཝཾ བྷཱཝིཏཱ ཁོ, བྷིཀྑཝེ, ཙཏྟཱརོ སཏིཔཊྛཱནཱ ཨེཝཾ བཧུལཱིཀཏཱ སཏྟ སམྦོཛ྄ཛྷངྒེ པརིཔཱུརེནྟི།
‘‘So tathāsamāhitaṃ cittaṃ sādhukaṃ ajjhupekkhitā hoti. Yasmiṃ samaye, bhikkhave, bhikkhu tathāsamāhitaṃ cittaṃ sādhukaṃ ajjhupekkhitā hoti, upekkhāsambojjhaṅgo tasmiṃ samaye bhikkhuno āraddho hoti, upekkhāsambojjhaṅgaṃ tasmiṃ samaye bhikkhu bhāveti, upekkhāsambojjhaṅgo tasmiṃ samaye bhikkhuno bhāvanāpāripūriṃ gacchati. Evaṃ bhāvitā kho, bhikkhave, cattāro satipaṭṭhānā evaṃ bahulīkatā satta sambojjhaṅge paripūrenti.
༡༥༢. ‘‘ཀཐཾ བྷཱཝིཏཱ ཙ, བྷིཀྑཝེ, སཏྟ བོཛ྄ཛྷངྒཱ ཀཐཾ བཧུལཱིཀཏཱ ཝིཛྫཱཝིམུཏྟིཾ པརིཔཱུརེནྟི ? ཨིདྷ, བྷིཀྑཝེ, བྷིཀྑུ སཏིསམྦོཛ྄ཛྷངྒཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ། དྷམྨཝིཙཡསམྦོཛ྄ཛྷངྒཾ བྷཱཝེཏི…པེ॰… ཝཱིརིཡསམྦོཛ྄ཛྷངྒཾ བྷཱཝེཏི… པཱིཏིསམྦོཛ྄ཛྷངྒཾ བྷཱཝེཏི… པསྶདྡྷིསམྦོཛ྄ཛྷངྒཾ བྷཱཝེཏི… སམཱདྷིསམྦོཛ྄ཛྷངྒཾ བྷཱཝེཏི… ཨུཔེཀྑཱསམྦོཛ྄ཛྷངྒཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ། ཨེཝཾ བྷཱཝིཏཱ ཁོ, བྷིཀྑཝེ, སཏྟ བོཛ྄ཛྷངྒཱ ཨེཝཾ བཧུལཱིཀཏཱ ཝིཛྫཱཝིམུཏྟིཾ པརིཔཱུརེནྟཱི’’ཏི།
152. ‘‘Kathaṃ bhāvitā ca, bhikkhave, satta bojjhaṅgā kathaṃ bahulīkatā vijjāvimuttiṃ paripūrenti ? Idha, bhikkhave, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Dhammavicayasambojjhaṅgaṃ bhāveti…pe… vīriyasambojjhaṅgaṃ bhāveti… pītisambojjhaṅgaṃ bhāveti… passaddhisambojjhaṅgaṃ bhāveti… samādhisambojjhaṅgaṃ bhāveti… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ bhāvitā kho, bhikkhave, satta bojjhaṅgā evaṃ bahulīkatā vijjāvimuttiṃ paripūrentī’’ti.
ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།
Idamavoca bhagavā. Attamanā te bhikkhū bhagavato bhāsitaṃ abhinandunti.
ཨཱནཱཔཱནསྶཏིསུཏྟཾ ནིཊྛིཏཾ ཨཊྛམཾ།
Ānāpānassatisuttaṃ niṭṭhitaṃ aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༨. ཨཱནཱཔཱནསྶཏིསུཏྟཝཎྞནཱ • 8. Ānāpānassatisuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༨. ཨཱནཱཔཱནསྶཏིསུཏྟཝཎྞནཱ • 8. Ānāpānassatisuttavaṇṇanā
