| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৮. আনাপানস্সতিসুত্তৰণ্ণনা
8. Ānāpānassatisuttavaṇṇanā
১৪৪. এৰং মে সুতন্তি আনাপানস্সতিসুত্তং। তত্থ অঞ্ঞেহি চাতি ঠপেত্ৰা পাল়িযং আগতে দস থেরে অঞ্ঞেহিপি অভিঞ্ঞাতেহি বহূহি সাৰকেহি সদ্ধিং। তদা কির মহা ভিক্খুসঙ্ঘো অহোসি অপরিচ্ছিন্নগণনো।
144.Evaṃme sutanti ānāpānassatisuttaṃ. Tattha aññehi cāti ṭhapetvā pāḷiyaṃ āgate dasa there aññehipi abhiññātehi bahūhi sāvakehi saddhiṃ. Tadā kira mahā bhikkhusaṅgho ahosi aparicchinnagaṇano.
ওৰদন্তি অনুসাসন্তীতি আমিসসঙ্গহেন ধম্মসঙ্গহেন চাতি দ্ৰীহি সঙ্গহেহি সঙ্গণ্হিত্ৰা কম্মট্ঠানোৰাদানুসাসনীহি ওৰদন্তি চ অনুসাসন্তি চ। তে চাতি চকারো আগমসন্ধিমত্তং। উল়ারং পুব্বেনাপরং ৰিসেসং জানন্তীতি সীলপরিপূরণাদিতো পুব্বৰিসেসতো উল়ারতরং অপরং কসিণপরিকম্মাদিৰিসেসং জানন্তীতি অত্থো।
Ovadanti anusāsantīti āmisasaṅgahena dhammasaṅgahena cāti dvīhi saṅgahehi saṅgaṇhitvā kammaṭṭhānovādānusāsanīhi ovadanti ca anusāsanti ca. Te cāti cakāro āgamasandhimattaṃ. Uḷāraṃ pubbenāparaṃ visesaṃ jānantīti sīlaparipūraṇādito pubbavisesato uḷārataraṃ aparaṃ kasiṇaparikammādivisesaṃ jānantīti attho.
১৪৫. আরদ্ধোতি তুট্ঠো। অপ্পত্তস্স পত্তিযাতি অপ্পত্তস্স অরহত্তস্স পাপুণনত্থং। সেসপদদ্ৰযেপি অযমেৰ অত্থো। কোমুদিং চাতুমাসিনিন্তি পচ্ছিমকত্তিকচাতুমাসপুণ্ণমং। সা হি কুমুদানং অত্থিতায কোমুদী, চতুন্নং ৰস্সিকানং মাসানং পরিযোসানত্তা চাতুমাসিনীতি ৰুচ্চতি। আগমেস্সামীতি উদিক্খিস্সামি, অজ্জ অপৰারেত্ৰা যাৰ সা আগচ্ছতি, তাৰ কত্থচি অগন্ত্ৰা ইধেৰ ৰসিস্সামীতি অত্থো। ইতি ভিক্খূনং পৰারণসঙ্গহং অনুজানন্তো এৰমাহ।
145.Āraddhoti tuṭṭho. Appattassa pattiyāti appattassa arahattassa pāpuṇanatthaṃ. Sesapadadvayepi ayameva attho. Komudiṃ cātumāsininti pacchimakattikacātumāsapuṇṇamaṃ. Sā hi kumudānaṃ atthitāya komudī, catunnaṃ vassikānaṃ māsānaṃ pariyosānattā cātumāsinīti vuccati. Āgamessāmīti udikkhissāmi, ajja apavāretvā yāva sā āgacchati, tāva katthaci agantvā idheva vasissāmīti attho. Iti bhikkhūnaṃ pavāraṇasaṅgahaṃ anujānanto evamāha.
পৰারণসঙ্গহো নাম ঞত্তিদুতিযেন কম্মেন দিয্যতি কস্স পনেস দিয্যতি, কস্স ন দিয্যতীতি। অকারকস্স তাৰ বালপুথুজ্জনস্স ন দিয্যতি, তথা আরদ্ধৰিপস্সকস্স চেৰ অরিযসাৰকস্স চ। যস্স পন সমথো ৰা তরুণো হোতি ৰিপস্সনা ৰা, তস্স দিয্যতি। ভগৰাপি তদা ভিক্খূনং চিত্তাচারং পরিৰীমংসন্তো সমথৰিপস্সনানং তরুণভাৰং ঞত্ৰা – ‘‘মযি অজ্জ পৰারেন্তে দিসাসু ৰস্সংৰুট্ঠা ভিক্খূ ইধ ওসরিস্সন্তি। ততো ইমে ভিক্খূ ৰুড্ঢতরেহি ভিক্খূহি সেনাসনে গহিতে ৰিসেসং নিব্বত্তেতুং ন সক্খিস্সন্তি। সচেপি চারিকং পক্কমিস্সামি, ইমেসং ৰসনট্ঠানং দুল্লভমেৰ ভৰিস্সতি। মযি পন অপৰারেন্তে ভিক্খূপি ইমং সাৰত্থিং ন ওসরিস্সন্তি, অহম্পি চারিকং ন পক্কমিস্সামি, এৰং ইমেসং ভিক্খূনং ৰসনট্ঠানং অপলিবুদ্ধং ভৰিস্সতি। তে অত্তনো অত্তনো ৰসনট্ঠানে ফাসু ৰিহরন্তা সমথৰিপস্সনা থামজাতা কত্ৰা ৰিসেসং নিব্বত্তেতুং সক্খিস্সন্তী’’তি সো তংদিৰসং অপৰারেত্ৰা কত্তিকপুণ্ণমাযং পৰারেস্সামীতি ভিক্খূনং পৰারণসঙ্গহং অনুজানি। পৰারণসঙ্গহস্মিঞ্হি লদ্ধে যস্স নিস্সযপটিপন্নস্স আচরিযুপজ্ঝাযা পক্কমন্তি, সোপি ‘‘সচে পতিরূপো নিস্সযদাযকো আগমিস্সতি, তস্স সন্তিকে নিস্সযং গণ্হিস্সামী’’তি যাৰ গিম্হানং পচ্ছিমমাসা ৰসিতুং লভতি। সচেপি সট্ঠিৰস্সা ভিক্খূ আগচ্ছন্তি, তস্স সেনাসনং গহেতুং ন লভন্তি। অযঞ্চ পন পৰারণসঙ্গহো একস্স দিন্নোপি সব্বেসং দিন্নোযেৰ হোতি।
Pavāraṇasaṅgaho nāma ñattidutiyena kammena diyyati kassa panesa diyyati, kassa na diyyatīti. Akārakassa tāva bālaputhujjanassa na diyyati, tathā āraddhavipassakassa ceva ariyasāvakassa ca. Yassa pana samatho vā taruṇo hoti vipassanā vā, tassa diyyati. Bhagavāpi tadā bhikkhūnaṃ cittācāraṃ parivīmaṃsanto samathavipassanānaṃ taruṇabhāvaṃ ñatvā – ‘‘mayi ajja pavārente disāsu vassaṃvuṭṭhā bhikkhū idha osarissanti. Tato ime bhikkhū vuḍḍhatarehi bhikkhūhi senāsane gahite visesaṃ nibbattetuṃ na sakkhissanti. Sacepi cārikaṃ pakkamissāmi, imesaṃ vasanaṭṭhānaṃ dullabhameva bhavissati. Mayi pana apavārente bhikkhūpi imaṃ sāvatthiṃ na osarissanti, ahampi cārikaṃ na pakkamissāmi, evaṃ imesaṃ bhikkhūnaṃ vasanaṭṭhānaṃ apalibuddhaṃ bhavissati. Te attano attano vasanaṭṭhāne phāsu viharantā samathavipassanā thāmajātā katvā visesaṃ nibbattetuṃ sakkhissantī’’ti so taṃdivasaṃ apavāretvā kattikapuṇṇamāyaṃ pavāressāmīti bhikkhūnaṃ pavāraṇasaṅgahaṃ anujāni. Pavāraṇasaṅgahasmiñhi laddhe yassa nissayapaṭipannassa ācariyupajjhāyā pakkamanti, sopi ‘‘sace patirūpo nissayadāyako āgamissati, tassa santike nissayaṃ gaṇhissāmī’’ti yāva gimhānaṃ pacchimamāsā vasituṃ labhati. Sacepi saṭṭhivassā bhikkhū āgacchanti, tassa senāsanaṃ gahetuṃ na labhanti. Ayañca pana pavāraṇasaṅgaho ekassa dinnopi sabbesaṃ dinnoyeva hoti.
সাৰত্থিং ওসরন্তীতি ভগৰতা পৰারণসঙ্গহো দিন্নোতি সুতসুতট্ঠানেযেৰ যথাসভাৰেন একং মাসং ৰসিত্ৰা কত্তিকপুণ্ণমায উপোসথং কত্ৰা ওসরন্তে সন্ধায ইদং ৰুত্তং। পুব্বেনাপরন্তি ইধ তরুণসমথৰিপস্সনাসু কম্মং কত্ৰা সমথৰিপস্সনা থামজাতা অকংসু, অযং পুব্বে ৰিসেসো নাম। ততো সমাহিতেন চিত্তেন সঙ্খারে সম্মসিত্ৰা কেচি সোতাপত্তিফলং…পে॰… কেচি অরহত্তং সচ্ছিকরিংসু। অযং অপরো উল়ারো ৰিসেসো নাম।
Sāvatthiṃ osarantīti bhagavatā pavāraṇasaṅgaho dinnoti sutasutaṭṭhāneyeva yathāsabhāvena ekaṃ māsaṃ vasitvā kattikapuṇṇamāya uposathaṃ katvā osarante sandhāya idaṃ vuttaṃ. Pubbenāparanti idha taruṇasamathavipassanāsu kammaṃ katvā samathavipassanā thāmajātā akaṃsu, ayaṃ pubbe viseso nāma. Tato samāhitena cittena saṅkhāre sammasitvā keci sotāpattiphalaṃ…pe… keci arahattaṃ sacchikariṃsu. Ayaṃ aparo uḷāro viseso nāma.
১৪৬. অলন্তি যুত্তং। যোজনগণনানীতি একং যোজনং যোজনমেৰ, দসপি যোজনানি যোজনানেৰ, ততো উদ্ধং যোজনগণনানীতি ৰুচ্চন্তি। ইধ পন যোজনসতম্পি যোজনসহস্সম্পি অধিপ্পেতং। পুটোসেনাপীতি পুটোসং ৰুচ্চতি পাথেয্যং. তং পাথেয্যং গহেত্ৰাপি উপসঙ্কমিতুং যুত্তমেৰাতি অত্থো। ‘‘পুটংসেনা’’তিপি পাঠো, তস্সত্থো – পুটো অংসে অস্সাতি পুটংসো, তেন পুটংসেন, অংসে পাথেয্যপুটং ৰহন্তেনাপীতি ৰুত্তং হোতি।
146.Alanti yuttaṃ. Yojanagaṇanānīti ekaṃ yojanaṃ yojanameva, dasapi yojanāni yojanāneva, tato uddhaṃ yojanagaṇanānīti vuccanti. Idha pana yojanasatampi yojanasahassampi adhippetaṃ. Puṭosenāpīti puṭosaṃ vuccati pātheyyaṃ. taṃ pātheyyaṃ gahetvāpi upasaṅkamituṃ yuttamevāti attho. ‘‘Puṭaṃsenā’’tipi pāṭho, tassattho – puṭo aṃse assāti puṭaṃso, tena puṭaṃsena, aṃse pātheyyapuṭaṃ vahantenāpīti vuttaṃ hoti.
১৪৭. ইদানি এৰরূপেহি চরণেহি সমন্নাগতা এত্থ ভিক্খূ অত্থীতি দস্সেতুং সন্তি, ভিক্খৰেতিআদিমাহ। তত্থ চতুন্নং সতিপট্ঠানানন্তিআদীনি তেসং ভিক্খূনং অভিনিৰিট্ঠকম্মট্ঠানদস্সনত্থং ৰুত্তানি। তত্থ সত্ততিংস বোধিপক্খিযধম্মা লোকিযলোকুত্তরা কথিতা। তত্র হি যে ভিক্খূ তস্মিং খণে মগ্গং ভাৰেন্তি, তেসং লোকুত্তরা হোন্তি। আরদ্ধৰিপস্সকানং লোকিযা। অনিচ্চসঞ্ঞাভাৰনানুযোগন্তি এত্থ সঞ্ঞাসীসেন ৰিপস্সনা কথিতা । যস্মা পনেত্থ আনাপানকম্মট্ঠানৰসেন অভিনিৰিট্ঠাৰ বহূ ভিক্খূ, তস্মা সেসকম্মট্ঠানানি সঙ্খেপেন কথেত্ৰা আনাপানকম্মট্ঠানং ৰিত্থারেন কথেন্তো আনাপানস্সতি, ভিক্খৰেতিআদিমাহ। ইদং পন আনাপানকম্মট্ঠানং সব্বাকারেন ৰিসুদ্ধিমগ্গে ৰিত্থারিতং, তস্মা তত্থ ৰুত্তনযেনেৰস্স পাল়িত্থো চ ভাৰনানযো চ ৰেদিতব্বো।
147. Idāni evarūpehi caraṇehi samannāgatā ettha bhikkhū atthīti dassetuṃ santi, bhikkhavetiādimāha. Tattha catunnaṃ satipaṭṭhānānantiādīni tesaṃ bhikkhūnaṃ abhiniviṭṭhakammaṭṭhānadassanatthaṃ vuttāni. Tattha sattatiṃsa bodhipakkhiyadhammā lokiyalokuttarā kathitā. Tatra hi ye bhikkhū tasmiṃ khaṇe maggaṃ bhāventi, tesaṃ lokuttarā honti. Āraddhavipassakānaṃ lokiyā. Aniccasaññābhāvanānuyoganti ettha saññāsīsena vipassanā kathitā . Yasmā panettha ānāpānakammaṭṭhānavasena abhiniviṭṭhāva bahū bhikkhū, tasmā sesakammaṭṭhānāni saṅkhepena kathetvā ānāpānakammaṭṭhānaṃ vitthārena kathento ānāpānassati, bhikkhavetiādimāha. Idaṃ pana ānāpānakammaṭṭhānaṃ sabbākārena visuddhimagge vitthāritaṃ, tasmā tattha vuttanayenevassa pāḷittho ca bhāvanānayo ca veditabbo.
১৪৯. কাযঞ্ঞতরন্তি পথৰীকাযাদীসু চতূসু কাযেসু অঞ্ঞতরং ৰদামি, ৰাযো কাযং ৰদামীতি অত্থো। অথ ৰা রূপাযতনং…পে॰… কবল়ীকারো আহারোতি পঞ্চৰীসতি রূপকোট্ঠাসা রূপকাযো নাম। তেসু আনাপানং ফোট্ঠব্বাযতনে সঙ্গহিতত্তা কাযঞ্ঞতরং হোতি, তস্মাপি এৰমাহ। তস্মাতিহাতি যস্মা চতূসু কাযেসু অঞ্ঞতরং ৰাযোকাযং, পঞ্চৰীসতিরূপকোট্ঠাসে ৰা রূপকাযে অঞ্ঞতরং আনাপানং অনুপস্সতি, তস্মা কাযে কাযানুপস্সীতি অত্থো। এৰং সব্বত্থ অত্থো ৰেদিতব্বো। ৰেদনাঞ্ঞতরন্তি তীসু ৰেদনাসু অঞ্ঞতরং, সুখৰেদনং সন্ধাযেতং ৰুত্তং। সাধুকং মনসিকারন্তি পীতিপটিসংৰেদিতাদিৰসেন উপ্পন্নং সুন্দরমনসিকারং। কিং পন মনসিকারো সুখৰেদনা হোতীতি। ন হোতি, দেসনাসীসং পনেতং। যথেৰ হি ‘‘অনিচ্চসঞ্ঞাভাৰনানুযোগমনুযুত্তা’’তি এত্থ সঞ্ঞানামেন পঞ্ঞা ৰুত্তা, এৰমিধাপি মনসিকারনামেন ৰেদনা ৰুত্তাতি ৰেদিতব্বা। এতস্মিং চতুক্কে পঠমপদে পীতিসীসেন ৰেদনা ৰুত্তা, দুতিযপদে সুখন্তি সরূপেনেৰ ৰুত্তা। চিত্তসঙ্খারপদদ্ৰযে ‘‘সঞ্ঞা চ ৰেদনা চ চেতসিকা, এতে ধম্মা চিত্তপটিবদ্ধা চিত্তসঙ্খারা’’তি (পটি॰ ম॰ ১.১৭৪) ৰচনতো ‘‘ৰিতক্কৰিচারে ঠপেত্ৰা সব্বেপি চিত্তসম্পযুত্তকা ধম্মা চিত্তসঙ্খারে সঙ্গহিতা’’তি ৰচনতো চিত্তসঙ্খারনামেন ৰেদনা ৰুত্তা। তং সব্বং মনসিকারনামেন সঙ্গহেত্ৰা ইধ ‘‘সাধুকং মনসিকার’’ন্তি আহ।
149.Kāyaññataranti pathavīkāyādīsu catūsu kāyesu aññataraṃ vadāmi, vāyo kāyaṃ vadāmīti attho. Atha vā rūpāyatanaṃ…pe… kabaḷīkāro āhāroti pañcavīsati rūpakoṭṭhāsā rūpakāyo nāma. Tesu ānāpānaṃ phoṭṭhabbāyatane saṅgahitattā kāyaññataraṃ hoti, tasmāpi evamāha. Tasmātihāti yasmā catūsu kāyesu aññataraṃ vāyokāyaṃ, pañcavīsatirūpakoṭṭhāse vā rūpakāye aññataraṃ ānāpānaṃ anupassati, tasmā kāye kāyānupassīti attho. Evaṃ sabbattha attho veditabbo. Vedanāññataranti tīsu vedanāsu aññataraṃ, sukhavedanaṃ sandhāyetaṃ vuttaṃ. Sādhukaṃ manasikāranti pītipaṭisaṃveditādivasena uppannaṃ sundaramanasikāraṃ. Kiṃ pana manasikāro sukhavedanā hotīti. Na hoti, desanāsīsaṃ panetaṃ. Yatheva hi ‘‘aniccasaññābhāvanānuyogamanuyuttā’’ti ettha saññānāmena paññā vuttā, evamidhāpi manasikāranāmena vedanā vuttāti veditabbā. Etasmiṃ catukke paṭhamapade pītisīsena vedanā vuttā, dutiyapade sukhanti sarūpeneva vuttā. Cittasaṅkhārapadadvaye ‘‘saññā ca vedanā ca cetasikā, ete dhammā cittapaṭibaddhā cittasaṅkhārā’’ti (paṭi. ma. 1.174) vacanato ‘‘vitakkavicāre ṭhapetvā sabbepi cittasampayuttakā dhammā cittasaṅkhāre saṅgahitā’’ti vacanato cittasaṅkhāranāmena vedanā vuttā. Taṃ sabbaṃ manasikāranāmena saṅgahetvā idha ‘‘sādhukaṃ manasikāra’’nti āha.
এৰং সন্তেপি যস্মা এসা ৰেদনা আরম্মণং ন হোতি, তস্মা ৰেদনানুপস্সনা ন যুজ্জতীতি। নো ন যুজ্জতি, সতিপট্ঠানৰণ্ণনাযম্পি হি ‘‘তংতংসুখাদীনং ৰত্থুং আরম্মণং কত্ৰা ৰেদনাৰ ৰেদযতি, তং পন ৰেদনাপৰত্তিং উপাদায ‘অহং ৰেদযামী’তি ৰোহারমত্তং হোতী’’তি ৰুত্তং । অপিচ পীতিপটিসংৰেদীতিআদীনং অত্থৰণ্ণনাযমেতস্স পরিহারো ৰুত্তোযেৰ। ৰুত্তঞ্হেতং ৰিসুদ্ধিমগ্গে –
Evaṃ santepi yasmā esā vedanā ārammaṇaṃ na hoti, tasmā vedanānupassanā na yujjatīti. No na yujjati, satipaṭṭhānavaṇṇanāyampi hi ‘‘taṃtaṃsukhādīnaṃ vatthuṃ ārammaṇaṃ katvā vedanāva vedayati, taṃ pana vedanāpavattiṃ upādāya ‘ahaṃ vedayāmī’ti vohāramattaṃ hotī’’ti vuttaṃ . Apica pītipaṭisaṃvedītiādīnaṃ atthavaṇṇanāyametassa parihāro vuttoyeva. Vuttañhetaṃ visuddhimagge –
‘‘দ্ৰীহাকারেহি পীতি পটিসংৰিদিতা হোতি আরম্মণতো চ অসম্মোহতো চ। কথং আরম্মণতো পীতি পটিসংৰিদিতা হোতি? সপ্পীতিকে দ্ৰে ঝানে সমাপজ্জতি, তস্স সমাপত্তিক্খণে ঝানপটিলাভেন আরম্মণতো পীতি পটিসংৰিদিতা হোতি আরম্মণস্স পটিসংৰিদিতত্তা। কথং অসম্মোহতো (পীতি পটিসংৰিদিতা হোতি)? সপ্পীতিকে দ্ৰে ঝানে সমাপজ্জিত্ৰা ৰুট্ঠায ঝানসম্পযুত্তং পীতিং খযতো ৰযতো সম্মসতি, তস্স ৰিপস্সনাক্খণে লক্খণপটিৰেধা অসম্মোহতো পীতি পটিসংৰিদিতা হোতি। ৰুত্তম্পি চেতং পটিসম্ভিদাযং ‘দীঘং অস্সাসৰসেন চিত্তস্স একগ্গতং অৰিক্খেপং পজানতো সতি উপট্ঠিতা হোতি, তায সতিযা, তেন ঞাণেন সা পীতি পটিসংৰিদিতা হোতী’তি। এতেনেৰ নযেন অৰসেসপদানিপি অত্থতো ৰেদিতব্বানী’’তি।
‘‘Dvīhākārehi pīti paṭisaṃviditā hoti ārammaṇato ca asammohato ca. Kathaṃ ārammaṇato pīti paṭisaṃviditā hoti? Sappītike dve jhāne samāpajjati, tassa samāpattikkhaṇe jhānapaṭilābhena ārammaṇato pīti paṭisaṃviditā hoti ārammaṇassa paṭisaṃviditattā. Kathaṃ asammohato (pīti paṭisaṃviditā hoti)? Sappītike dve jhāne samāpajjitvā vuṭṭhāya jhānasampayuttaṃ pītiṃ khayato vayato sammasati, tassa vipassanākkhaṇe lakkhaṇapaṭivedhā asammohato pīti paṭisaṃviditā hoti. Vuttampi cetaṃ paṭisambhidāyaṃ ‘dīghaṃ assāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā, tena ñāṇena sā pīti paṭisaṃviditā hotī’ti. Eteneva nayena avasesapadānipi atthato veditabbānī’’ti.
ইতি যথেৰ ঝানপটিলাভেন আরম্মণতো পীতিসুখচিত্তসঙ্খারা পটিসংৰিদিতা হোন্তি, এৰং ইমিনাপি ঝানসম্পযুত্তেন ৰেদনাসঙ্খাতমনসিকারপটিলাভেন আরম্মণতো ৰেদনা পটিসংৰিদিতা হোতি। তস্মা সুৰুত্তমেতং হোতি ‘‘ৰেদনাসু ৰেদনানুপস্সী তস্মিং সমযে ভিক্খু ৰিহরতী’’তি।
Iti yatheva jhānapaṭilābhena ārammaṇato pītisukhacittasaṅkhārā paṭisaṃviditā honti, evaṃ imināpi jhānasampayuttena vedanāsaṅkhātamanasikārapaṭilābhena ārammaṇato vedanā paṭisaṃviditā hoti. Tasmā suvuttametaṃ hoti ‘‘vedanāsu vedanānupassī tasmiṃ samaye bhikkhu viharatī’’ti.
নাহং, ভিক্খৰে, মুট্ঠস্সতিস্স অসম্পজানস্সাতি এত্থ অযমধিপ্পাযো – যস্মা চিত্তপটিসংৰেদী অস্সসিস্সামীতিআদিনা নযেন পৰত্তো ভিক্খু কিঞ্চাপি অস্সাসপস্সাসনিমিত্তং আরম্মণং করোতি, তস্স পন চিত্তস্স আরম্মণে সতিঞ্চ সম্পজঞ্ঞঞ্চ উপট্ঠপেত্ৰা পৰত্তনতো চিত্তে চিত্তানুপস্সীযেৰ নামেস হোতি। ন হি মুট্ঠস্সতিস্স অসম্পজানস্স আনাপানস্সতিভাৰনা অত্থি। তস্মা আরম্মণতো চিত্তপটিসংৰিদিতাদিৰসেন চিত্তে চিত্তানুপস্সী তস্মিং সমযে ভিক্খু ৰিহরতীতি। সো যং তং অভিজ্ঝাদোমনস্সানং পহানং, তং পঞ্ঞায দিস্ৰা সাধুকং অজ্ঝুপেক্খিতা হোতীতি এত্থ অভিজ্ঝায কামচ্ছন্দনীৰরণং, দোমনস্সৰসেন ব্যাপাদনীৰরণং দস্সিতং। ইদঞ্হি চতুক্কং ৰিপস্সনাৰসেনেৰ ৰুত্তং, ধম্মানুপস্সনা চ নীৰরণপব্বাদিৰসেন ছব্বিধা হোতি, তস্সা নীৰরণপব্বং আদি, তস্সপি ইদং নীৰরণদ্ৰযং আদি, ইতি ধম্মানুপস্সনায আদিং দস্সেতুং ‘‘অভিজ্ঝাদোমনস্সান’’ন্তি আহ। পহানন্তি অনিচ্চানুপস্সনায নিচ্চসঞ্ঞং পজহতীতি এৰং পহানকরঞাণং অধিপ্পেতং। তং পঞ্ঞায দিস্ৰাতি তং অনিচ্চৰিরাগনিরোধপটিনিস্সগ্গাঞাণসঙ্খাতং পহানঞাণং অপরায ৰিপস্সনাপঞ্ঞায, তম্পি অপরাযাতি এৰং ৰিপস্সনাপরম্পরং দস্সেতি। অজ্ঝুপেক্খিতা হোতীতি যঞ্চ সমথপটিপন্নং অজ্ঝুপেক্খতি, যঞ্চ একতো উপট্ঠানং অজ্ঝুপেক্খতীতি দ্ৰিধা অজ্ঝুপেক্খতি নাম। তত্থ সহজাতানম্পি অজ্ঝুপেক্খনা হোতি আরম্মণস্সপি অজ্ঝুপেক্খনা, ইধ আরম্মণঅজ্ঝুপেক্খনা অধিপ্পেতা। তস্মাতিহ, ভিক্খৰেতি যস্মা অনিচ্চানুপস্সী অস্সসিস্সামীতিআদিনা নযেন পৰত্তো ন কেৰলং নীৰরণাদিধম্মে, অভিজ্ঝাদোমনস্সসীসেন পন ৰুত্তানং ধম্মানং পহানঞাণম্পি পঞ্ঞায দিস্ৰা অজ্ঝুপেক্খিতা হোতি, তস্মা ‘‘ধম্মেসু ধম্মানুপস্সী তস্মিং সমযে ভিক্খু ৰিহরতী’’তি ৰেদিতব্বো।
Nāhaṃ, bhikkhave, muṭṭhassatissa asampajānassāti ettha ayamadhippāyo – yasmā cittapaṭisaṃvedī assasissāmītiādinā nayena pavatto bhikkhu kiñcāpi assāsapassāsanimittaṃ ārammaṇaṃ karoti, tassa pana cittassa ārammaṇe satiñca sampajaññañca upaṭṭhapetvā pavattanato citte cittānupassīyeva nāmesa hoti. Na hi muṭṭhassatissa asampajānassa ānāpānassatibhāvanā atthi. Tasmā ārammaṇato cittapaṭisaṃviditādivasena citte cittānupassī tasmiṃ samaye bhikkhu viharatīti. So yaṃ taṃ abhijjhādomanassānaṃ pahānaṃ, taṃ paññāya disvā sādhukaṃ ajjhupekkhitā hotīti ettha abhijjhāya kāmacchandanīvaraṇaṃ, domanassavasena byāpādanīvaraṇaṃ dassitaṃ. Idañhi catukkaṃ vipassanāvaseneva vuttaṃ, dhammānupassanā ca nīvaraṇapabbādivasena chabbidhā hoti, tassā nīvaraṇapabbaṃ ādi, tassapi idaṃ nīvaraṇadvayaṃ ādi, iti dhammānupassanāya ādiṃ dassetuṃ ‘‘abhijjhādomanassāna’’nti āha. Pahānanti aniccānupassanāya niccasaññaṃ pajahatīti evaṃ pahānakarañāṇaṃ adhippetaṃ. Taṃ paññāya disvāti taṃ aniccavirāganirodhapaṭinissaggāñāṇasaṅkhātaṃ pahānañāṇaṃ aparāya vipassanāpaññāya, tampi aparāyāti evaṃ vipassanāparamparaṃ dasseti. Ajjhupekkhitā hotīti yañca samathapaṭipannaṃ ajjhupekkhati, yañca ekato upaṭṭhānaṃ ajjhupekkhatīti dvidhā ajjhupekkhati nāma. Tattha sahajātānampi ajjhupekkhanā hoti ārammaṇassapi ajjhupekkhanā, idha ārammaṇaajjhupekkhanā adhippetā. Tasmātiha, bhikkhaveti yasmā aniccānupassī assasissāmītiādinā nayena pavatto na kevalaṃ nīvaraṇādidhamme, abhijjhādomanassasīsena pana vuttānaṃ dhammānaṃ pahānañāṇampi paññāya disvā ajjhupekkhitā hoti, tasmā ‘‘dhammesu dhammānupassī tasmiṃ samaye bhikkhu viharatī’’ti veditabbo.
১৫০. পৰিচিনতীতি অনিচ্চাদিৰসেন পৰিচিনতি। ইতরং পদদ্ৰযং এতস্সেৰ ৰেৰচনং। নিরামিসাতি নিক্কিলেসা। পস্সম্ভতীতি কাযিকচেতসিকদরথপটিপ্পস্সদ্ধিযা কাযোপি চিত্তম্পি পস্সম্ভতি। সমাধিযতীতি সম্মা ঠপিযতি, অপ্পনাপত্তং ৰিয হোতি। অজ্ঝুপেক্খিতা হোতীতি সহজাতঅজ্ঝুপেক্খনায অজ্ঝুপেক্খিতা হোতি।
150.Pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā. Passambhatīti kāyikacetasikadarathapaṭippassaddhiyā kāyopi cittampi passambhati. Samādhiyatīti sammā ṭhapiyati, appanāpattaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
এৰং চুদ্দসৰিধেন কাযপরিগ্গাহকস্স ভিক্খুনো তস্মিং কাযে সতি সতিসম্বোজ্ঝঙ্গো, সতিযা সম্পযুত্তং ঞাণং ধম্মৰিচযসম্বোজ্ঝঙ্গো, তংসম্পযুত্তমেৰ কাযিকচেতসিকৰীরিযং ৰীরিযসম্বোজ্ঝঙ্গো, পীতি, পস্সদ্ধি, চিত্তেকগ্গতা সমাধিসম্বোজ্ঝঙ্গো, ইমেসং ছন্নং সম্বোজ্ঝঙ্গানং অনোসক্কনঅনতিৰত্তনসঙ্খাতো মজ্ঝত্তাকারো উপেক্খাসম্বোজ্ঝঙ্গো। যথেৰ হি সমপ্পৰত্তেসু অস্সেসু সারথিনো ‘‘অযং ওলীযতী’’তি তুদনং ৰা, ‘‘অযং অতিধাৰতী’’তি আকড্ঢনং ৰা নত্থি, কেৰলং এৰং পস্সমানস্স ঠিতাকারোৰ হোতি, এৰমেৰ ইমেসং ছন্নং সম্বোজ্ঝঙ্গানং অনোসক্কনঅনতিৰত্তনসঙ্খাতো মজ্ঝত্তাকারো উপেক্খাসম্বোজ্ঝঙ্গো নাম হোতি। এত্তাৰতা কিং কথিতং? একচিত্তক্খণিকা নানারসলক্খণা ৰিপস্সনাসম্বোজ্ঝঙ্গা নাম কথিতা।
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, satiyā sampayuttaṃ ñāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pīti, passaddhi, cittekaggatā samādhisambojjhaṅgo, imesaṃ channaṃ sambojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ sambojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānārasalakkhaṇā vipassanāsambojjhaṅgā nāma kathitā.
১৫২. ৰিৰেকনিস্সিতন্তিআদীনি ৰুত্তত্থানেৰ। এত্থ পন আনাপানপরিগ্গাহিকা সতি লোকিযা হোতি, লোকিযা আনাপানা লোকিযসতিপট্ঠানং পরিপূরেন্তি, লোকিযা সতিপট্ঠানা লোকুত্তরবোজ্ঝঙ্গে পরিপূরেন্তি, লোকুত্তরা বোজ্ঝঙ্গা ৰিজ্জাৰিমুত্তিফলনিব্বানং পরিপূরেন্তি। ইতি লোকিযস্স আগতট্ঠানে লোকিযং কথিতং, লোকুত্তরস্স আগতট্ঠানে লোকুত্তরং কথিতন্তি। থেরো পনাহ ‘‘অঞ্ঞত্থ এৰং হোতি, ইমস্মিং পন সুত্তে লোকুত্তরং উপরি আগতং, লোকিযা আনাপানা লোকিযসতিপট্ঠানে পরিপূরেন্তি, লোকিযা সতিপট্ঠানা লোকিযে বোজ্ঝঙ্গে পরিপূরেন্তি, লোকিযা বোজ্ঝঙ্গা লোকুত্তরং ৰিজ্জাৰিমুত্তিফলনিব্বানং পরিপূরেন্তি, ৰিজ্জাৰিমুত্তিপদেন হি ইধ ৰিজ্জাৰিমুত্তিফলনিব্বানং অধিপ্পেত’’ন্তি।
152.Vivekanissitantiādīni vuttatthāneva. Ettha pana ānāpānapariggāhikā sati lokiyā hoti, lokiyā ānāpānā lokiyasatipaṭṭhānaṃ paripūrenti, lokiyā satipaṭṭhānā lokuttarabojjhaṅge paripūrenti, lokuttarā bojjhaṅgā vijjāvimuttiphalanibbānaṃ paripūrenti. Iti lokiyassa āgataṭṭhāne lokiyaṃ kathitaṃ, lokuttarassa āgataṭṭhāne lokuttaraṃ kathitanti. Thero panāha ‘‘aññattha evaṃ hoti, imasmiṃ pana sutte lokuttaraṃ upari āgataṃ, lokiyā ānāpānā lokiyasatipaṭṭhāne paripūrenti, lokiyā satipaṭṭhānā lokiye bojjhaṅge paripūrenti, lokiyā bojjhaṅgā lokuttaraṃ vijjāvimuttiphalanibbānaṃ paripūrenti, vijjāvimuttipadena hi idha vijjāvimuttiphalanibbānaṃ adhippeta’’nti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
আনাপানস্সতিসুত্তৰণ্ণনা নিট্ঠিতা।
Ānāpānassatisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৮. আনাপানস্সতিসুত্তং • 8. Ānāpānassatisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৮. আনাপানস্সতিসুত্তৰণ্ণনা • 8. Ānāpānassatisuttavaṇṇanā
