| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
8. аанаабаанассад̇исуд̇д̇аван̣н̣анаа
8. Ānāpānassatisuttavaṇṇanā
144. звам̣ мз суд̇анд̇и аанаабаанассад̇исуд̇д̇ам̣. д̇ад̇т̇а ан̃н̃зхи жаад̇и табзд̇ваа баал̣ияам̣ ааг̇ад̇з д̣̇аса т̇зрз ан̃н̃зхиби абхин̃н̃аад̇зхи б̣ахуухи саавагзхи сад̣̇д̇хим̣. д̇ад̣̇аа гира махаа бхигкусан̇гхо ахоси абарижчиннаг̇ан̣ано.
144.Evaṃme sutanti ānāpānassatisuttaṃ. Tattha aññehi cāti ṭhapetvā pāḷiyaṃ āgate dasa there aññehipi abhiññātehi bahūhi sāvakehi saddhiṃ. Tadā kira mahā bhikkhusaṅgho ahosi aparicchinnagaṇano.
овад̣̇анд̇и анусаасанд̇ийд̇и аамисасан̇г̇ахзна д̇хаммасан̇г̇ахзна жаад̇и д̣̇вийхи сан̇г̇ахзхи сан̇г̇ан̣хид̇ваа гаммадтаановаад̣̇аанусаасанийхи овад̣̇анд̇и жа анусаасанд̇и жа. д̇з жаад̇и жагааро ааг̇амасанд̇химад̇д̇ам̣. ул̣аарам̣ буб̣б̣знаабарам̣ висзсам̣ ж̇аананд̇ийд̇и сийлабарибууран̣аад̣̇ид̇о буб̣б̣ависзсад̇о ул̣аарад̇арам̣ абарам̣ гасин̣абаригаммаад̣̇ивисзсам̣ ж̇аананд̇ийд̇и ад̇т̇о.
Ovadanti anusāsantīti āmisasaṅgahena dhammasaṅgahena cāti dvīhi saṅgahehi saṅgaṇhitvā kammaṭṭhānovādānusāsanīhi ovadanti ca anusāsanti ca. Te cāti cakāro āgamasandhimattaṃ. Uḷāraṃ pubbenāparaṃ visesaṃ jānantīti sīlaparipūraṇādito pubbavisesato uḷārataraṃ aparaṃ kasiṇaparikammādivisesaṃ jānantīti attho.
145. аарад̣̇д̇ход̇и д̇удто. аббад̇д̇асса бад̇д̇ияаад̇и аббад̇д̇асса арахад̇д̇асса баабун̣анад̇т̇ам̣. сзсабад̣̇ад̣̇ваязби аяамзва ад̇т̇о. гомуд̣̇им̣ жаад̇умаасининд̇и бажчимагад̇д̇игажаад̇умаасабун̣н̣амам̣. саа хи гумуд̣̇аанам̣ ад̇т̇ид̇ааяа гомуд̣̇ий, жад̇уннам̣ вассигаанам̣ маасаанам̣ барияосаанад̇д̇аа жаад̇умаасинийд̇и вужжад̇и. ааг̇амзссаамийд̇и уд̣̇игкиссаами, аж̇ж̇а абаваарзд̇ваа яаава саа ааг̇ажчад̇и, д̇аава гад̇т̇ажи аг̇анд̇ваа ид̇хзва васиссаамийд̇и ад̇т̇о. ид̇и бхигкуунам̣ бавааран̣асан̇г̇ахам̣ ануж̇аананд̇о звамааха.
145.Āraddhoti tuṭṭho. Appattassa pattiyāti appattassa arahattassa pāpuṇanatthaṃ. Sesapadadvayepi ayameva attho. Komudiṃ cātumāsininti pacchimakattikacātumāsapuṇṇamaṃ. Sā hi kumudānaṃ atthitāya komudī, catunnaṃ vassikānaṃ māsānaṃ pariyosānattā cātumāsinīti vuccati. Āgamessāmīti udikkhissāmi, ajja apavāretvā yāva sā āgacchati, tāva katthaci agantvā idheva vasissāmīti attho. Iti bhikkhūnaṃ pavāraṇasaṅgahaṃ anujānanto evamāha.
бавааран̣асан̇г̇ахо наама н̃ад̇д̇ид̣̇уд̇иязна гаммзна д̣̇ияяад̇и гасса банзса д̣̇ияяад̇и, гасса на д̣̇ияяад̇ийд̇и. агаарагасса д̇аава б̣аалабут̇уж̇ж̇анасса на д̣̇ияяад̇и, д̇ат̇аа аарад̣̇д̇хавибассагасса жзва арияасаавагасса жа. яасса бана самат̇о ваа д̇арун̣о ход̇и вибассанаа ваа, д̇асса д̣̇ияяад̇и. бхаг̇авааби д̇ад̣̇аа бхигкуунам̣ жид̇д̇аажаарам̣ баривиймам̣санд̇о самат̇авибассанаанам̣ д̇арун̣абхаавам̣ н̃ад̇ваа – ‘‘маяи аж̇ж̇а баваарзнд̇з д̣̇исаасу вассам̣вудтаа бхигкуу ид̇ха осариссанд̇и. д̇ад̇о имз бхигкуу вуд̣дхад̇арзхи бхигкуухи сзнаасанз г̇ахид̇з висзсам̣ ниб̣б̣ад̇д̇зд̇ум̣ на сагкиссанд̇и. сажзби жааригам̣ баггамиссаами, имзсам̣ васанадтаанам̣ д̣̇уллабхамзва бхависсад̇и. маяи бана абаваарзнд̇з бхигкууби имам̣ саавад̇т̇им̣ на осариссанд̇и, ахамби жааригам̣ на баггамиссаами, звам̣ имзсам̣ бхигкуунам̣ васанадтаанам̣ абалиб̣уд̣̇д̇хам̣ бхависсад̇и. д̇з ад̇д̇ано ад̇д̇ано васанадтаанз паасу вихаранд̇аа самат̇авибассанаа т̇аамаж̇аад̇аа гад̇ваа висзсам̣ ниб̣б̣ад̇д̇зд̇ум̣ сагкиссанд̇ий’’д̇и со д̇ам̣д̣̇ивасам̣ абаваарзд̇ваа гад̇д̇игабун̣н̣амааяам̣ баваарзссаамийд̇и бхигкуунам̣ бавааран̣асан̇г̇ахам̣ ануж̇аани. бавааран̣асан̇г̇ахасмин̃хи лад̣̇д̇хз яасса ниссаяабадибаннасса аажарияубаж̇жхааяаа баггаманд̇и, соби ‘‘сажз бад̇ируубо ниссаяад̣̇ааяаго ааг̇амиссад̇и, д̇асса санд̇игз ниссаяам̣ г̇ан̣хиссаамий’’д̇и яаава г̇имхаанам̣ бажчимамаасаа васид̇ум̣ лабхад̇и. сажзби садтивассаа бхигкуу ааг̇ажчанд̇и, д̇асса сзнаасанам̣ г̇ахзд̇ум̣ на лабханд̇и. аяан̃жа бана бавааран̣асан̇г̇ахо згасса д̣̇инноби саб̣б̣зсам̣ д̣̇инноязва ход̇и.
Pavāraṇasaṅgaho nāma ñattidutiyena kammena diyyati kassa panesa diyyati, kassa na diyyatīti. Akārakassa tāva bālaputhujjanassa na diyyati, tathā āraddhavipassakassa ceva ariyasāvakassa ca. Yassa pana samatho vā taruṇo hoti vipassanā vā, tassa diyyati. Bhagavāpi tadā bhikkhūnaṃ cittācāraṃ parivīmaṃsanto samathavipassanānaṃ taruṇabhāvaṃ ñatvā – ‘‘mayi ajja pavārente disāsu vassaṃvuṭṭhā bhikkhū idha osarissanti. Tato ime bhikkhū vuḍḍhatarehi bhikkhūhi senāsane gahite visesaṃ nibbattetuṃ na sakkhissanti. Sacepi cārikaṃ pakkamissāmi, imesaṃ vasanaṭṭhānaṃ dullabhameva bhavissati. Mayi pana apavārente bhikkhūpi imaṃ sāvatthiṃ na osarissanti, ahampi cārikaṃ na pakkamissāmi, evaṃ imesaṃ bhikkhūnaṃ vasanaṭṭhānaṃ apalibuddhaṃ bhavissati. Te attano attano vasanaṭṭhāne phāsu viharantā samathavipassanā thāmajātā katvā visesaṃ nibbattetuṃ sakkhissantī’’ti so taṃdivasaṃ apavāretvā kattikapuṇṇamāyaṃ pavāressāmīti bhikkhūnaṃ pavāraṇasaṅgahaṃ anujāni. Pavāraṇasaṅgahasmiñhi laddhe yassa nissayapaṭipannassa ācariyupajjhāyā pakkamanti, sopi ‘‘sace patirūpo nissayadāyako āgamissati, tassa santike nissayaṃ gaṇhissāmī’’ti yāva gimhānaṃ pacchimamāsā vasituṃ labhati. Sacepi saṭṭhivassā bhikkhū āgacchanti, tassa senāsanaṃ gahetuṃ na labhanti. Ayañca pana pavāraṇasaṅgaho ekassa dinnopi sabbesaṃ dinnoyeva hoti.
саавад̇т̇им̣ осаранд̇ийд̇и бхаг̇авад̇аа бавааран̣асан̇г̇ахо д̣̇иннод̇и суд̇асуд̇адтаанзязва яат̇аасабхаавзна згам̣ маасам̣ васид̇ваа гад̇д̇игабун̣н̣амааяа убосат̇ам̣ гад̇ваа осаранд̇з санд̇хааяа ид̣̇ам̣ вуд̇д̇ам̣. буб̣б̣знаабаранд̇и ид̇ха д̇арун̣асамат̇авибассанаасу гаммам̣ гад̇ваа самат̇авибассанаа т̇аамаж̇аад̇аа агам̣су, аяам̣ буб̣б̣з висзсо наама. д̇ад̇о самаахид̇зна жид̇д̇зна сан̇каарз саммасид̇ваа гзжи сод̇аабад̇д̇ипалам̣…бз… гзжи арахад̇д̇ам̣ сажчигарим̣су. аяам̣ абаро ул̣ааро висзсо наама.
Sāvatthiṃ osarantīti bhagavatā pavāraṇasaṅgaho dinnoti sutasutaṭṭhāneyeva yathāsabhāvena ekaṃ māsaṃ vasitvā kattikapuṇṇamāya uposathaṃ katvā osarante sandhāya idaṃ vuttaṃ. Pubbenāparanti idha taruṇasamathavipassanāsu kammaṃ katvā samathavipassanā thāmajātā akaṃsu, ayaṃ pubbe viseso nāma. Tato samāhitena cittena saṅkhāre sammasitvā keci sotāpattiphalaṃ…pe… keci arahattaṃ sacchikariṃsu. Ayaṃ aparo uḷāro viseso nāma.
146. аланд̇и яуд̇д̇ам̣. яож̇анаг̇ан̣анаанийд̇и згам̣ яож̇анам̣ яож̇анамзва, д̣̇асаби яож̇анаани яож̇анаанзва, д̇ад̇о уд̣̇д̇хам̣ яож̇анаг̇ан̣анаанийд̇и вужжанд̇и. ид̇ха бана яож̇анасад̇амби яож̇анасахассамби ад̇хиббзд̇ам̣. будосзнаабийд̇и будосам̣ вужжад̇и баат̇зяяам̣. д̇ам̣ баат̇зяяам̣ г̇ахзд̇вааби убасан̇гамид̇ум̣ яуд̇д̇амзваад̇и ад̇т̇о. ‘‘будам̣сзнаа’’д̇иби баато, д̇ассад̇т̇о – будо ам̣сз ассаад̇и будам̣со, д̇зна будам̣сзна, ам̣сз баат̇зяяабудам̣ ваханд̇знаабийд̇и вуд̇д̇ам̣ ход̇и.
146.Alanti yuttaṃ. Yojanagaṇanānīti ekaṃ yojanaṃ yojanameva, dasapi yojanāni yojanāneva, tato uddhaṃ yojanagaṇanānīti vuccanti. Idha pana yojanasatampi yojanasahassampi adhippetaṃ. Puṭosenāpīti puṭosaṃ vuccati pātheyyaṃ. taṃ pātheyyaṃ gahetvāpi upasaṅkamituṃ yuttamevāti attho. ‘‘Puṭaṃsenā’’tipi pāṭho, tassattho – puṭo aṃse assāti puṭaṃso, tena puṭaṃsena, aṃse pātheyyapuṭaṃ vahantenāpīti vuttaṃ hoti.
147. ид̣̇аани зваруубзхи жаран̣зхи саманнааг̇ад̇аа зд̇т̇а бхигкуу ад̇т̇ийд̇и д̣̇ассзд̇ум̣ санд̇и, бхигкавзд̇иаад̣̇имааха. д̇ад̇т̇а жад̇уннам̣ сад̇ибадтаанаананд̇иаад̣̇ийни д̇зсам̣ бхигкуунам̣ абхинивидтагаммадтаанад̣̇ассанад̇т̇ам̣ вуд̇д̇аани. д̇ад̇т̇а сад̇д̇ад̇им̣са б̣од̇хибагкияад̇хаммаа логияалогуд̇д̇араа гат̇ид̇аа. д̇ад̇ра хи яз бхигкуу д̇асмим̣ кан̣з маг̇г̇ам̣ бхаавзнд̇и, д̇зсам̣ логуд̇д̇араа хонд̇и. аарад̣̇д̇хавибассагаанам̣ логияаа. анижжасан̃н̃аабхааванаануяог̇анд̇и зд̇т̇а сан̃н̃аасийсзна вибассанаа гат̇ид̇аа . яасмаа банзд̇т̇а аанаабаанагаммадтаанавасзна абхинивидтаава б̣ахуу бхигкуу, д̇асмаа сзсагаммадтаанаани сан̇кзбзна гат̇зд̇ваа аанаабаанагаммадтаанам̣ вид̇т̇аарзна гат̇знд̇о аанаабаанассад̇и, бхигкавзд̇иаад̣̇имааха. ид̣̇ам̣ бана аанаабаанагаммадтаанам̣ саб̣б̣аагаарзна висуд̣̇д̇химаг̇г̇з вид̇т̇аарид̇ам̣, д̇асмаа д̇ад̇т̇а вуд̇д̇анаязнзвасса баал̣ид̇т̇о жа бхааванаанаяо жа взд̣̇ид̇аб̣б̣о.
147. Idāni evarūpehi caraṇehi samannāgatā ettha bhikkhū atthīti dassetuṃ santi, bhikkhavetiādimāha. Tattha catunnaṃ satipaṭṭhānānantiādīni tesaṃ bhikkhūnaṃ abhiniviṭṭhakammaṭṭhānadassanatthaṃ vuttāni. Tattha sattatiṃsa bodhipakkhiyadhammā lokiyalokuttarā kathitā. Tatra hi ye bhikkhū tasmiṃ khaṇe maggaṃ bhāventi, tesaṃ lokuttarā honti. Āraddhavipassakānaṃ lokiyā. Aniccasaññābhāvanānuyoganti ettha saññāsīsena vipassanā kathitā . Yasmā panettha ānāpānakammaṭṭhānavasena abhiniviṭṭhāva bahū bhikkhū, tasmā sesakammaṭṭhānāni saṅkhepena kathetvā ānāpānakammaṭṭhānaṃ vitthārena kathento ānāpānassati, bhikkhavetiādimāha. Idaṃ pana ānāpānakammaṭṭhānaṃ sabbākārena visuddhimagge vitthāritaṃ, tasmā tattha vuttanayenevassa pāḷittho ca bhāvanānayo ca veditabbo.
149. гааяан̃н̃ад̇аранд̇и бат̇авийгааяаад̣̇ийсу жад̇уусу гааязсу ан̃н̃ад̇арам̣ вад̣̇аами, вааяо гааяам̣ вад̣̇аамийд̇и ад̇т̇о. ат̇а ваа руубааяад̇анам̣…бз… габ̣ал̣ийгааро аахаарод̇и бан̃жавийсад̇и руубагодтаасаа руубагааяо наама. д̇зсу аанаабаанам̣ подтаб̣б̣ааяад̇анз сан̇г̇ахид̇ад̇д̇аа гааяан̃н̃ад̇арам̣ ход̇и, д̇асмааби звамааха. д̇асмаад̇ихаад̇и яасмаа жад̇уусу гааязсу ан̃н̃ад̇арам̣ вааяогааяам̣, бан̃жавийсад̇ируубагодтаасз ваа руубагааяз ан̃н̃ад̇арам̣ аанаабаанам̣ анубассад̇и, д̇асмаа гааяз гааяаанубассийд̇и ад̇т̇о. звам̣ саб̣б̣ад̇т̇а ад̇т̇о взд̣̇ид̇аб̣б̣о. взд̣̇анаан̃н̃ад̇аранд̇и д̇ийсу взд̣̇анаасу ан̃н̃ад̇арам̣, сукавзд̣̇анам̣ санд̇хааязд̇ам̣ вуд̇д̇ам̣. саад̇хугам̣ манасигааранд̇и бийд̇ибадисам̣взд̣̇ид̇аад̣̇ивасзна уббаннам̣ сунд̣̇араманасигаарам̣. гим̣ бана манасигааро сукавзд̣̇анаа ход̇ийд̇и. на ход̇и, д̣̇зсанаасийсам̣ банзд̇ам̣. яат̇зва хи ‘‘анижжасан̃н̃аабхааванаануяог̇амануяуд̇д̇аа’’д̇и зд̇т̇а сан̃н̃аанаамзна бан̃н̃аа вуд̇д̇аа, звамид̇хааби манасигааранаамзна взд̣̇анаа вуд̇д̇аад̇и взд̣̇ид̇аб̣б̣аа. зд̇асмим̣ жад̇уггз батамабад̣̇з бийд̇исийсзна взд̣̇анаа вуд̇д̇аа, д̣̇уд̇ияабад̣̇з суканд̇и саруубзнзва вуд̇д̇аа. жид̇д̇асан̇каарабад̣̇ад̣̇ваяз ‘‘сан̃н̃аа жа взд̣̇анаа жа жзд̇асигаа, зд̇з д̇хаммаа жид̇д̇абадиб̣ад̣̇д̇хаа жид̇д̇асан̇каараа’’д̇и (бади. ма. 1.174) важанад̇о ‘‘вид̇аггавижаарз табзд̇ваа саб̣б̣зби жид̇д̇асамбаяуд̇д̇агаа д̇хаммаа жид̇д̇асан̇каарз сан̇г̇ахид̇аа’’д̇и важанад̇о жид̇д̇асан̇кааранаамзна взд̣̇анаа вуд̇д̇аа. д̇ам̣ саб̣б̣ам̣ манасигааранаамзна сан̇г̇ахзд̇ваа ид̇ха ‘‘саад̇хугам̣ манасигаара’’нд̇и ааха.
149.Kāyaññataranti pathavīkāyādīsu catūsu kāyesu aññataraṃ vadāmi, vāyo kāyaṃ vadāmīti attho. Atha vā rūpāyatanaṃ…pe… kabaḷīkāro āhāroti pañcavīsati rūpakoṭṭhāsā rūpakāyo nāma. Tesu ānāpānaṃ phoṭṭhabbāyatane saṅgahitattā kāyaññataraṃ hoti, tasmāpi evamāha. Tasmātihāti yasmā catūsu kāyesu aññataraṃ vāyokāyaṃ, pañcavīsatirūpakoṭṭhāse vā rūpakāye aññataraṃ ānāpānaṃ anupassati, tasmā kāye kāyānupassīti attho. Evaṃ sabbattha attho veditabbo. Vedanāññataranti tīsu vedanāsu aññataraṃ, sukhavedanaṃ sandhāyetaṃ vuttaṃ. Sādhukaṃ manasikāranti pītipaṭisaṃveditādivasena uppannaṃ sundaramanasikāraṃ. Kiṃ pana manasikāro sukhavedanā hotīti. Na hoti, desanāsīsaṃ panetaṃ. Yatheva hi ‘‘aniccasaññābhāvanānuyogamanuyuttā’’ti ettha saññānāmena paññā vuttā, evamidhāpi manasikāranāmena vedanā vuttāti veditabbā. Etasmiṃ catukke paṭhamapade pītisīsena vedanā vuttā, dutiyapade sukhanti sarūpeneva vuttā. Cittasaṅkhārapadadvaye ‘‘saññā ca vedanā ca cetasikā, ete dhammā cittapaṭibaddhā cittasaṅkhārā’’ti (paṭi. ma. 1.174) vacanato ‘‘vitakkavicāre ṭhapetvā sabbepi cittasampayuttakā dhammā cittasaṅkhāre saṅgahitā’’ti vacanato cittasaṅkhāranāmena vedanā vuttā. Taṃ sabbaṃ manasikāranāmena saṅgahetvā idha ‘‘sādhukaṃ manasikāra’’nti āha.
звам̣ санд̇зби яасмаа зсаа взд̣̇анаа аарамман̣ам̣ на ход̇и, д̇асмаа взд̣̇анаанубассанаа на яуж̇ж̇ад̇ийд̇и. но на яуж̇ж̇ад̇и, сад̇ибадтаанаван̣н̣анааяамби хи ‘‘д̇ам̣д̇ам̣сукаад̣̇ийнам̣ вад̇т̇ум̣ аарамман̣ам̣ гад̇ваа взд̣̇анаава взд̣̇аяад̇и, д̇ам̣ бана взд̣̇анаабавад̇д̇им̣ убаад̣̇ааяа ‘ахам̣ взд̣̇аяаамий’д̇и вохаарамад̇д̇ам̣ ход̇ий’’д̇и вуд̇д̇ам̣ . абижа бийд̇ибадисам̣взд̣̇ийд̇иаад̣̇ийнам̣ ад̇т̇аван̣н̣анааяамзд̇асса барихааро вуд̇д̇оязва. вуд̇д̇ан̃хзд̇ам̣ висуд̣̇д̇химаг̇г̇з –
Evaṃ santepi yasmā esā vedanā ārammaṇaṃ na hoti, tasmā vedanānupassanā na yujjatīti. No na yujjati, satipaṭṭhānavaṇṇanāyampi hi ‘‘taṃtaṃsukhādīnaṃ vatthuṃ ārammaṇaṃ katvā vedanāva vedayati, taṃ pana vedanāpavattiṃ upādāya ‘ahaṃ vedayāmī’ti vohāramattaṃ hotī’’ti vuttaṃ . Apica pītipaṭisaṃvedītiādīnaṃ atthavaṇṇanāyametassa parihāro vuttoyeva. Vuttañhetaṃ visuddhimagge –
‘‘д̣̇вийхаагаарзхи бийд̇и бадисам̣вид̣̇ид̇аа ход̇и аарамман̣ад̇о жа асаммохад̇о жа. гат̇ам̣ аарамман̣ад̇о бийд̇и бадисам̣вид̣̇ид̇аа ход̇и? саббийд̇игз д̣̇вз жхаанз самаабаж̇ж̇ад̇и, д̇асса самаабад̇д̇игкан̣з жхаанабадилаабхзна аарамман̣ад̇о бийд̇и бадисам̣вид̣̇ид̇аа ход̇и аарамман̣асса бадисам̣вид̣̇ид̇ад̇д̇аа. гат̇ам̣ асаммохад̇о (бийд̇и бадисам̣вид̣̇ид̇аа ход̇и)? саббийд̇игз д̣̇вз жхаанз самаабаж̇ж̇ид̇ваа вудтааяа жхаанасамбаяуд̇д̇ам̣ бийд̇им̣ каяад̇о ваяад̇о саммасад̇и, д̇асса вибассанаагкан̣з лагкан̣абадивзд̇хаа асаммохад̇о бийд̇и бадисам̣вид̣̇ид̇аа ход̇и. вуд̇д̇амби жзд̇ам̣ бадисамбхид̣̇ааяам̣ ‘д̣̇ийгхам̣ ассаасавасзна жид̇д̇асса згаг̇г̇ад̇ам̣ авигкзбам̣ баж̇аанад̇о сад̇и убадтид̇аа ход̇и, д̇ааяа сад̇ияаа, д̇зна н̃аан̣зна саа бийд̇и бадисам̣вид̣̇ид̇аа ход̇ий’д̇и. зд̇знзва наязна авасзсабад̣̇ааниби ад̇т̇ад̇о взд̣̇ид̇аб̣б̣ааний’’д̇и.
‘‘Dvīhākārehi pīti paṭisaṃviditā hoti ārammaṇato ca asammohato ca. Kathaṃ ārammaṇato pīti paṭisaṃviditā hoti? Sappītike dve jhāne samāpajjati, tassa samāpattikkhaṇe jhānapaṭilābhena ārammaṇato pīti paṭisaṃviditā hoti ārammaṇassa paṭisaṃviditattā. Kathaṃ asammohato (pīti paṭisaṃviditā hoti)? Sappītike dve jhāne samāpajjitvā vuṭṭhāya jhānasampayuttaṃ pītiṃ khayato vayato sammasati, tassa vipassanākkhaṇe lakkhaṇapaṭivedhā asammohato pīti paṭisaṃviditā hoti. Vuttampi cetaṃ paṭisambhidāyaṃ ‘dīghaṃ assāsavasena cittassa ekaggataṃ avikkhepaṃ pajānato sati upaṭṭhitā hoti, tāya satiyā, tena ñāṇena sā pīti paṭisaṃviditā hotī’ti. Eteneva nayena avasesapadānipi atthato veditabbānī’’ti.
ид̇и яат̇зва жхаанабадилаабхзна аарамман̣ад̇о бийд̇исукажид̇д̇асан̇каараа бадисам̣вид̣̇ид̇аа хонд̇и, звам̣ иминааби жхаанасамбаяуд̇д̇зна взд̣̇анаасан̇каад̇аманасигаарабадилаабхзна аарамман̣ад̇о взд̣̇анаа бадисам̣вид̣̇ид̇аа ход̇и. д̇асмаа сувуд̇д̇амзд̇ам̣ ход̇и ‘‘взд̣̇анаасу взд̣̇анаанубассий д̇асмим̣ самаяз бхигку вихарад̇ий’’д̇и.
Iti yatheva jhānapaṭilābhena ārammaṇato pītisukhacittasaṅkhārā paṭisaṃviditā honti, evaṃ imināpi jhānasampayuttena vedanāsaṅkhātamanasikārapaṭilābhena ārammaṇato vedanā paṭisaṃviditā hoti. Tasmā suvuttametaṃ hoti ‘‘vedanāsu vedanānupassī tasmiṃ samaye bhikkhu viharatī’’ti.
наахам̣, бхигкавз, мудтассад̇исса асамбаж̇аанассаад̇и зд̇т̇а аяамад̇хиббааяо – яасмаа жид̇д̇абадисам̣взд̣̇ий ассасиссаамийд̇иаад̣̇инаа наязна бавад̇д̇о бхигку гин̃жааби ассаасабассаасанимид̇д̇ам̣ аарамман̣ам̣ гарод̇и, д̇асса бана жид̇д̇асса аарамман̣з сад̇ин̃жа самбаж̇ан̃н̃ан̃жа убадтабзд̇ваа бавад̇д̇анад̇о жид̇д̇з жид̇д̇аанубассийязва наамзса ход̇и. на хи мудтассад̇исса асамбаж̇аанасса аанаабаанассад̇ибхааванаа ад̇т̇и. д̇асмаа аарамман̣ад̇о жид̇д̇абадисам̣вид̣̇ид̇аад̣̇ивасзна жид̇д̇з жид̇д̇аанубассий д̇асмим̣ самаяз бхигку вихарад̇ийд̇и. со яам̣ д̇ам̣ абхиж̇жхаад̣̇оманассаанам̣ бахаанам̣, д̇ам̣ бан̃н̃ааяа д̣̇исваа саад̇хугам̣ аж̇жхубзгкид̇аа ход̇ийд̇и зд̇т̇а абхиж̇жхааяа гаамажчанд̣̇анийваран̣ам̣, д̣̇оманассавасзна б̣яаабаад̣̇анийваран̣ам̣ д̣̇ассид̇ам̣. ид̣̇ан̃хи жад̇уггам̣ вибассанаавасзнзва вуд̇д̇ам̣, д̇хаммаанубассанаа жа нийваран̣абаб̣б̣аад̣̇ивасзна чаб̣б̣ид̇хаа ход̇и, д̇ассаа нийваран̣абаб̣б̣ам̣ аад̣̇и, д̇ассаби ид̣̇ам̣ нийваран̣ад̣̇ваяам̣ аад̣̇и, ид̇и д̇хаммаанубассанааяа аад̣̇им̣ д̣̇ассзд̇ум̣ ‘‘абхиж̇жхаад̣̇оманассаана’’нд̇и ааха. бахаананд̇и анижжаанубассанааяа нижжасан̃н̃ам̣ баж̇ахад̇ийд̇и звам̣ бахаанагаран̃аан̣ам̣ ад̇хиббзд̇ам̣. д̇ам̣ бан̃н̃ааяа д̣̇исваад̇и д̇ам̣ анижжавирааг̇анирод̇хабадиниссаг̇г̇аан̃аан̣асан̇каад̇ам̣ бахаанан̃аан̣ам̣ абарааяа вибассанаабан̃н̃ааяа, д̇амби абарааяаад̇и звам̣ вибассанаабарамбарам̣ д̣̇ассзд̇и. аж̇жхубзгкид̇аа ход̇ийд̇и яан̃жа самат̇абадибаннам̣ аж̇жхубзгкад̇и, яан̃жа згад̇о убадтаанам̣ аж̇жхубзгкад̇ийд̇и д̣̇вид̇хаа аж̇жхубзгкад̇и наама. д̇ад̇т̇а сахаж̇аад̇аанамби аж̇жхубзгканаа ход̇и аарамман̣ассаби аж̇жхубзгканаа, ид̇ха аарамман̣ааж̇жхубзгканаа ад̇хиббзд̇аа. д̇асмаад̇иха, бхигкавзд̇и яасмаа анижжаанубассий ассасиссаамийд̇иаад̣̇инаа наязна бавад̇д̇о на гзвалам̣ нийваран̣аад̣̇ид̇хаммз, абхиж̇жхаад̣̇оманассасийсзна бана вуд̇д̇аанам̣ д̇хаммаанам̣ бахаанан̃аан̣амби бан̃н̃ааяа д̣̇исваа аж̇жхубзгкид̇аа ход̇и, д̇асмаа ‘‘д̇хаммзсу д̇хаммаанубассий д̇асмим̣ самаяз бхигку вихарад̇ий’’д̇и взд̣̇ид̇аб̣б̣о.
Nāhaṃ, bhikkhave, muṭṭhassatissa asampajānassāti ettha ayamadhippāyo – yasmā cittapaṭisaṃvedī assasissāmītiādinā nayena pavatto bhikkhu kiñcāpi assāsapassāsanimittaṃ ārammaṇaṃ karoti, tassa pana cittassa ārammaṇe satiñca sampajaññañca upaṭṭhapetvā pavattanato citte cittānupassīyeva nāmesa hoti. Na hi muṭṭhassatissa asampajānassa ānāpānassatibhāvanā atthi. Tasmā ārammaṇato cittapaṭisaṃviditādivasena citte cittānupassī tasmiṃ samaye bhikkhu viharatīti. So yaṃ taṃ abhijjhādomanassānaṃ pahānaṃ, taṃ paññāya disvā sādhukaṃ ajjhupekkhitā hotīti ettha abhijjhāya kāmacchandanīvaraṇaṃ, domanassavasena byāpādanīvaraṇaṃ dassitaṃ. Idañhi catukkaṃ vipassanāvaseneva vuttaṃ, dhammānupassanā ca nīvaraṇapabbādivasena chabbidhā hoti, tassā nīvaraṇapabbaṃ ādi, tassapi idaṃ nīvaraṇadvayaṃ ādi, iti dhammānupassanāya ādiṃ dassetuṃ ‘‘abhijjhādomanassāna’’nti āha. Pahānanti aniccānupassanāya niccasaññaṃ pajahatīti evaṃ pahānakarañāṇaṃ adhippetaṃ. Taṃ paññāya disvāti taṃ aniccavirāganirodhapaṭinissaggāñāṇasaṅkhātaṃ pahānañāṇaṃ aparāya vipassanāpaññāya, tampi aparāyāti evaṃ vipassanāparamparaṃ dasseti. Ajjhupekkhitā hotīti yañca samathapaṭipannaṃ ajjhupekkhati, yañca ekato upaṭṭhānaṃ ajjhupekkhatīti dvidhā ajjhupekkhati nāma. Tattha sahajātānampi ajjhupekkhanā hoti ārammaṇassapi ajjhupekkhanā, idha ārammaṇaajjhupekkhanā adhippetā. Tasmātiha, bhikkhaveti yasmā aniccānupassī assasissāmītiādinā nayena pavatto na kevalaṃ nīvaraṇādidhamme, abhijjhādomanassasīsena pana vuttānaṃ dhammānaṃ pahānañāṇampi paññāya disvā ajjhupekkhitā hoti, tasmā ‘‘dhammesu dhammānupassī tasmiṃ samaye bhikkhu viharatī’’ti veditabbo.
150. бавижинад̇ийд̇и анижжаад̣̇ивасзна бавижинад̇и. ид̇арам̣ бад̣̇ад̣̇ваяам̣ зд̇ассзва взважанам̣. нираамисаад̇и ниггилзсаа. бассамбхад̇ийд̇и гааяигажзд̇асигад̣̇арат̇абадиббассад̣̇д̇хияаа гааяоби жид̇д̇амби бассамбхад̇и. самаад̇хияад̇ийд̇и саммаа табияад̇и, аббанаабад̇д̇ам̣ вияа ход̇и. аж̇жхубзгкид̇аа ход̇ийд̇и сахаж̇аад̇ааж̇жхубзгканааяа аж̇жхубзгкид̇аа ход̇и.
150.Pavicinatīti aniccādivasena pavicinati. Itaraṃ padadvayaṃ etasseva vevacanaṃ. Nirāmisāti nikkilesā. Passambhatīti kāyikacetasikadarathapaṭippassaddhiyā kāyopi cittampi passambhati. Samādhiyatīti sammā ṭhapiyati, appanāpattaṃ viya hoti. Ajjhupekkhitā hotīti sahajātaajjhupekkhanāya ajjhupekkhitā hoti.
звам̣ жуд̣̇д̣̇асавид̇хзна гааяабариг̇г̇аахагасса бхигкуно д̇асмим̣ гааяз сад̇и сад̇исамб̣ож̇жхан̇г̇о, сад̇ияаа самбаяуд̇д̇ам̣ н̃аан̣ам̣ д̇хаммавижаяасамб̣ож̇жхан̇г̇о, д̇ам̣самбаяуд̇д̇амзва гааяигажзд̇асигавийрияам̣ вийрияасамб̣ож̇жхан̇г̇о, бийд̇и, бассад̣̇д̇хи, жид̇д̇згаг̇г̇ад̇аа самаад̇хисамб̣ож̇жхан̇г̇о, имзсам̣ чаннам̣ самб̣ож̇жхан̇г̇аанам̣ аносагганаанад̇ивад̇д̇анасан̇каад̇о маж̇жхад̇д̇аагааро убзгкаасамб̣ож̇жхан̇г̇о. яат̇зва хи самаббавад̇д̇зсу ассзсу саарат̇ино ‘‘аяам̣ олийяад̇ий’’д̇и д̇уд̣̇анам̣ ваа, ‘‘аяам̣ ад̇ид̇хаавад̇ий’’д̇и аагад̣дханам̣ ваа над̇т̇и, гзвалам̣ звам̣ бассамаанасса тид̇аагаарова ход̇и, звамзва имзсам̣ чаннам̣ самб̣ож̇жхан̇г̇аанам̣ аносагганаанад̇ивад̇д̇анасан̇каад̇о маж̇жхад̇д̇аагааро убзгкаасамб̣ож̇жхан̇г̇о наама ход̇и. зд̇д̇аавад̇аа гим̣ гат̇ид̇ам̣? згажид̇д̇агкан̣игаа наанаарасалагкан̣аа вибассанаасамб̣ож̇жхан̇г̇аа наама гат̇ид̇аа.
Evaṃ cuddasavidhena kāyapariggāhakassa bhikkhuno tasmiṃ kāye sati satisambojjhaṅgo, satiyā sampayuttaṃ ñāṇaṃ dhammavicayasambojjhaṅgo, taṃsampayuttameva kāyikacetasikavīriyaṃ vīriyasambojjhaṅgo, pīti, passaddhi, cittekaggatā samādhisambojjhaṅgo, imesaṃ channaṃ sambojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo. Yatheva hi samappavattesu assesu sārathino ‘‘ayaṃ olīyatī’’ti tudanaṃ vā, ‘‘ayaṃ atidhāvatī’’ti ākaḍḍhanaṃ vā natthi, kevalaṃ evaṃ passamānassa ṭhitākārova hoti, evameva imesaṃ channaṃ sambojjhaṅgānaṃ anosakkanaanativattanasaṅkhāto majjhattākāro upekkhāsambojjhaṅgo nāma hoti. Ettāvatā kiṃ kathitaṃ? Ekacittakkhaṇikā nānārasalakkhaṇā vipassanāsambojjhaṅgā nāma kathitā.
152. вивзганиссид̇анд̇иаад̣̇ийни вуд̇д̇ад̇т̇аанзва. зд̇т̇а бана аанаабаанабариг̇г̇аахигаа сад̇и логияаа ход̇и, логияаа аанаабаанаа логияасад̇ибадтаанам̣ барибуурзнд̇и, логияаа сад̇ибадтаанаа логуд̇д̇араб̣ож̇жхан̇г̇з барибуурзнд̇и, логуд̇д̇араа б̣ож̇жхан̇г̇аа виж̇ж̇аавимуд̇д̇ипаланиб̣б̣аанам̣ барибуурзнд̇и. ид̇и логияасса ааг̇ад̇адтаанз логияам̣ гат̇ид̇ам̣, логуд̇д̇арасса ааг̇ад̇адтаанз логуд̇д̇арам̣ гат̇ид̇анд̇и. т̇зро банааха ‘‘ан̃н̃ад̇т̇а звам̣ ход̇и, имасмим̣ бана суд̇д̇з логуд̇д̇арам̣ убари ааг̇ад̇ам̣, логияаа аанаабаанаа логияасад̇ибадтаанз барибуурзнд̇и, логияаа сад̇ибадтаанаа логияз б̣ож̇жхан̇г̇з барибуурзнд̇и, логияаа б̣ож̇жхан̇г̇аа логуд̇д̇арам̣ виж̇ж̇аавимуд̇д̇ипаланиб̣б̣аанам̣ барибуурзнд̇и, виж̇ж̇аавимуд̇д̇ибад̣̇зна хи ид̇ха виж̇ж̇аавимуд̇д̇ипаланиб̣б̣аанам̣ ад̇хиббзд̇а’’нд̇и.
152.Vivekanissitantiādīni vuttatthāneva. Ettha pana ānāpānapariggāhikā sati lokiyā hoti, lokiyā ānāpānā lokiyasatipaṭṭhānaṃ paripūrenti, lokiyā satipaṭṭhānā lokuttarabojjhaṅge paripūrenti, lokuttarā bojjhaṅgā vijjāvimuttiphalanibbānaṃ paripūrenti. Iti lokiyassa āgataṭṭhāne lokiyaṃ kathitaṃ, lokuttarassa āgataṭṭhāne lokuttaraṃ kathitanti. Thero panāha ‘‘aññattha evaṃ hoti, imasmiṃ pana sutte lokuttaraṃ upari āgataṃ, lokiyā ānāpānā lokiyasatipaṭṭhāne paripūrenti, lokiyā satipaṭṭhānā lokiye bojjhaṅge paripūrenti, lokiyā bojjhaṅgā lokuttaraṃ vijjāvimuttiphalanibbānaṃ paripūrenti, vijjāvimuttipadena hi idha vijjāvimuttiphalanibbānaṃ adhippeta’’nti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
аанаабаанассад̇исуд̇д̇аван̣н̣анаа нидтид̇аа.
Ānāpānassatisuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 8. аанаабаанассад̇исуд̇д̇ам̣ • 8. Ānāpānassatisuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 8. аанаабаанассад̇исуд̇д̇аван̣н̣анаа • 8. Ānāpānassatisuttavaṇṇanā
