அனாபத்திபே⁴த³வண்ணனா

131. தஸ்மிங்யேவ அத்தபா⁴வே நிப்³ப³த்தாதி தஸ்மிங்யேவ மதஸரீரே பேதத்தபா⁴வேன நிப்³ப³த்தா. ருக்கா²தீ³ஸு லக்³கி³தஸாடகே வத்தப்³ப³மேவ நத்தீ²தி மனுஸ்ஸேஹி அகோ³பிதங் ஸந்தா⁴ய வுத்தங், ஸசே பனேதங் தே³வாலயசேதியருக்கா²தீ³ஸு நியுத்தேஹி புரிஸேஹி ரக்கி²தகோ³பிதங் ஹோதி, க³ஹேதுங் ந வட்டதி. தோ²கே கா²யிதே…பே॰… க³ஹேதுங் வட்டதீதி இத³ங் அதி³ன்னாதா³னாபா⁴வங் ஸந்தா⁴ய வுத்தங். ஜிக⁴ச்சி²தபாணினா கா²தி³யமானமங்ஸஸ்ஸ அச்சி²ந்தி³த்வா கா²த³னங் நாம காருஞ்ஞஹானிதோ லோலபா⁴வதோ ச அஸாருப்பமேவ. தேனேவ ஹி அரியவங்ஸிகா அத்தனோ பத்தே ப⁴த்தங் கா²த³ந்தம்பி ஸுனகா²தி³ங் தஜ்ஜெத்வா ந வாரெந்தி, திரச்சா²னானங் ஆமிஸதா³னே குஸலங் விய தேஸங் ஆமிஸஸ்ஸ அச்சி²ந்த³னேபி அகுஸலமேவாதி க³ஹேதப்³ப³ங், தேனேவ வக்க²தி ‘‘பரானுத்³த³யதாய ச ந க³ஹேதப்³ப³’’ந்தி (பாரா॰ அட்ட²॰ 1.140).